Læknarnir í eldhúsinu með þriggja rétta bjórpörunar veislu

Það kom loksins að því að við nafnarnir Ragnar Freyr (Bjór & Matur) og Ragnar Freyr (Læknirinn í Eldhúsinu) blésum til veislu. Annar er klárari en hinn í sumu en hinn í öðru, eitt er þó víst að kollegi minn, góður vinur og algjörlega sturlaður kokkur, Læknirinn í Eldhúsinu, Ragnar Freyr Ingvarsson er mörgum skörum ofar en undirritaður í matargerð. Við höfum hins vegar báðir brennandi áhuga á mat og með því og ég vil meina að ég hafi amk bjórspekina á hann félaga minn í eldhúsinu ef ekki annað. Við höfum oft rætt það að leiða saman hesta okkar og leika okkur með að para mat og bjór og loksins er komið að því. Hér er afraksturinn, ég verð að segja að þetta kom gríðarlega vel út og var ákaflega gaman því við fengum til okkar góða vini til að njóta með okkur.
Lesa má nánar um uppskriftir og aðferðir hér á Læknirinn í Eldhúsinu en ég mun svona taka léttu yfirferðina og kafa meira í bjórinn. Við nafnarnir erum báðir hrifnir af
bjórnum frá Borg og því var borðleggjandi að nota bjór frá þessu frábæra brugghúsi við pörunina að þessu sinni. Þetta var virkilega skemmtilegur dagur en við félagarnir byrjuðum daginn snemma í eldhúsi meistarans. Þetta var þrírétta máltíð fyrir 6 fullorðna og 2 börn og mikið sem þurfti að gera en ég held að ef maður er skipulagður og byrjar daginn snemma að þá geti maður vel eldað þetta einn. Svo er alltaf gott að muna að þetta á að vera gaman, settu eitthvað gott í glas og ljúft á fóninn og eigðu góða stund í eldhúsinu með sjálfum þér, ja eða góðum vinum.

20190209_163111.jpg

Innkaupalistinn fyrir kvöldið:

Fyrir sushi forrétt

  • sushi grjón, einn poki
  • sushi edik 1 flaska
  • nori blöð 2 pakkar
  • lax, lítill biti
  • humarhalar, 5-6 litlir halar
  • avocado, 1 stk, skorið í þunnar sneiðar
  • gúrka, 1 stk, flysjuð og skorin í lengjur
  • gulrætur, skornar í lengjur
  • stökkt laxaroð (roðið af laxinum steik í olíu þangað til að það er stökkt eins og kex)
  • wasabi majones eftir þörfum (búið það til sjálf)
  • pæklað engifer, 1 krukka
  • Kikkoman Soyasósa, 1 flaska

Tempura deig

  • hveiti, 1 bolli
  • sykur, 1 msk
  • maísmjöl, 1 msk
  • salt, 1 tsk
  • lyftiduft, 1 tsk
  • kolsýrt vatn 1,5 bolli ( bætið við eftir þörfum, deigið á að vera dálítið eins og lím að þykkt)

Fyrir Bao Bun (fyrir ca 6-8)

  • þurrger, 3 tsk
  • vatn, 1,5 bollar, hitað í 20-25 gráður
  • hveiti, 5 bollar
  • sykur, 4 msk
  • lyftiduft, 4 tsk
  • matarolía 4 msk og svo um tvær til að smyrja skálina

Fyrir hægeldaða grísasíðuna (við vorum 6)

  • grísasíða, 2 tsk (t.d. úr Krónunni)
  • stjörnuanis, 2 stk
  • ferskur Chili, 1 stk niðurskorinn
  • rauðlaukur, 1 stk, skorinn í grófa bita
  • kulrætur, 3 stk eða svo, skornar í grófa bita
  • kanilstangir, 2 stk
  • Kikkoman Soya sósa, 4 msk
  • hlynsýróp, 4 msk eða aðeins meira
  • Garún 19.3, rúmlega ein og hálf flaska ( í soð og sósu)
  • smjör, ca 100g
  • hunang, ca 1 dl

Fyrir ribeye nautasteikina (við vorum 6)

  • ribeye nautasteikur 3 stk
  • júmfrúarolía, 3msk
  • Kikkoman Soya sósa, 3msk
  • límóna, 1 stk
  • ferskur Chili, 1 stk
  • engifer, um 5 cm
  • hvítlauskgeirar, 2 stk

Fyrir pæklað meðlæti

  • epli, 1 stk
  • pera, 1 stk
  • rauðkál
  • engifer, raspað niður, ca 5 cm
  • hvítvínsedik
  • rauðvínsedik
  • sykur og salt og smá pipar
  • ferskur rauður chili, 1 stk
  • rauðlaukur, 1 stk skorinn í ræmur

Fyrir bestu súkkulaðimús í heimi (fyrir 6+)

  • sykurpúðar, 150g
  • smjör, 50g
  • dökkt súkkulaði 250g (fínt að hafa 125g 70% og rest eitthvað gott dökkt súkkulaði)
  • heitt vatn, 60ml
  • þeyttur rjómi, 280ml
  • vanilludropar, 1 tsk

Hindberja mauk

  • frosin hindber, 300g
  • sykur, 1/2 bolli
  • súrbjór eða sitrónusafi, 2 msk
  • nýmulinn pipar, 1/2 tsk, má sleppa.

Bjórinn

  • Skoffín Nr C16 í fordrykk – skemmtilegur léttur og frískandi frá Borg
  • Esja Nr 60 – frábær wild ale frá Borg. (nánar hér)
  • Barabbas Nr 57 frá Borg, eða einhver annar belgískur Dubbel, (nánar hér)
  • Garún Nr 19.3 frá Borg í soð og sósu, má alveg vera bara Garún Nr 19 eða t.d. Nykur frá Borg svo lengi sem um ræðir öflugan imperial stout, helst tunnuþroskaður.
  • Skyrjarmur Nr 59, frá Borg (jólabjórinn 2018), svakalega skemmtilegur bláberja súrbjór með efittréttinum. (nánar hér)
  • Surtur Nr 8.2 frá Borg. Geggjaður tunnuþroskaður imperial stout sem „nicht cap“ eftir þetta allt saman, eða með eftirréttinum í stað Skyrjarms.

IMG_8085-01.jpeg

Aðferðin

Ok við Ragnar vorum tveir í þessu og það tók okkur dálítinn tíma að græja þetta, kannski líka af því að við vorum að masa dálítið og skrattast í Snædísi konu hans, svo bættist Maggi vinur okkar í hópinn um kvöldið og aðstoðaði okkur við eitt og annað á meðan dömurnar skelltu sér í pottinn. Það er samt alveg hægt að gera þessa máltíð einn, maður þarf bara að skipuleggja sig vel. Byrja á því sem tekur tíma að lyfta sér/ eldast eða stífna . Bao Bun þarf t.d. að lyfta sér í klst og svo aftur í um 60 mín. Sushi grjónin þurfa að standa líka í um klst fyrir suðu. Svo er auðvitað grísinn sem kúrir í ofni í einhverja tíma. Súkkulaðimúsin þarf að stífna í tvo tíma ca þannig að gott er að hafa þetta í huga.

Ég held að það þurfi að byrja svona um hádegi ef boðið er um kvöldið sama dag. Þar sem við vorum tveir gátum við skipt milli okkar verkum og settum grís og naut af stað á sama tíma og bao brauðin og sushi grjónin. Svo komu gestirnir þegar við vorum komnir vel af stað. Við sendum dömurnar í pottinn með Skoffín Nr C16 frá Borg í fordrykk. Maggi fékk líka Skoffín á meðan við létum hann rúlla nokkrum sushi lengjum upp. Skoffín er þægilegur og léttur, 3.8% blanda af Snorra frá borg og kombucha sem er eins konar te af Mansjúríusveppnum sem var vinsæll hér heima fyrir áratugum síðan. Þessi blanda verður skemmtileg og létt með hressandi kolsýru. Maður finnur nokkra sætu í bland við te og svo gerkrydd og jurtir frá bjórnum. Mjög næs að byrja kvöldið á svona léttmeti.

Ferskt og djúpsteikt sushi með lax, humar og stökku laxaroði.

Sushi gerð er mun einfaldari en maður heldur, ég hef gert þetta mörgum sinnum. Það eru til nokkrar aðferðir við að undirbúa grjónin, hér er sú sem ég nota. Reikna má með ca 2 klst í heildina fyrir þetta. Þegar grjónin eru klár er þeim dreift yfir nori blöðin og svo raðar maður fyllingunni á. Í eina rúllu settum við wasabe-majones, lax, steikt laxaroð, gulrætur og pæklaðan engifer. Í hina wasabe-majones, humar, gulrætur og avokadó.

Þessu er svo rúllað upp á bambus mottu og svo skorið í hæfilega maki bita.

Svo er það tempur deigið, fljótlegt að gera, passa bara að hafa ekki of þunnt. Bæta hveiti eða nota minna vatn ef eins og mjólk.

  • Hveiti, 1 bolli
  • Sykur, 1 msk
  • Maísmjöl, 1 msk
  • Salt, 1 tsk
  • Lyftiduft, 1 tsk
  • Kolsýrt vatn 1,5 bolli ( bætið við eftir þörfum, deigið á að vera dálítið eins og lím að þykkt)

Hluti af maki bitunum var svo velt upp úr deiginu og djúpsteikt í olíu þar til orðið fallega gyllt að utan. Afgangs humarhalar fóru sömu leið.

Svo er þessu raðað fallega á disk með wasapi, pækluðum engifer og soyasósu.

Langelduð grísasíða með beini og dásamlegri Garún sósa

Sennilega er best að koma kjötinu af stað áður en allt hitt er gert því svo kúrir það bara í ofni á meðan við græjum rest og fyllir eldhúsið að dásamlegum kryddilm. Hér má lesa nánar aðferðina en í raun er þetta sára einfallt. Grísasíðan er bara sett í eldfast mót sem hægt er að loka. Svo hellum við amk einni flösku af Garún 19.3 eða sambærilegum bjór yfir. Hér er allt í lagi að fá sér einn sopa, þessi bjór er svo svakalegur. Svo eru það gróft skornar gulrætur (ca 3), rauðlaukur (1 stk), 2 stk stjörnuanis, 2 kanilstangir og ferskur chili (rauður). Svo hellir maður yfir þetta um 4 msk hlynsýróp og 4msk Kikkoman Soya sósu. Lok yfir og svo inn í ofn við 180 gráður í amk 3 klst. Ragnar notaði samt líka einhver piparkorn í þetta!
Takið svo síðurnar upp og setjið á bretti, skerið puruna af og hendið í ofn við 220 – 250 gráður þar til hún verður stökk. Passið að brenna ekki. Skerið grísasíðuna í sneiðar og látið standa undir álpappír á meðan annað er undirbúið.

IMG_8125-01.jpeg

Dásamleg Garún niðursoðin sósa

Ekki henda soðinu í kringum grísinn. Sigtið þetta í pott, pressið líka vel öllu gumsinu í gegnum sigtið ofan í pottinn. Svo vel rúmlega hálf flaska af Garúnu 19.3. Setjið svo á suðu og látið sjóða dálítið niður ca um helming þar til orðið þykkt, hrærið reglulega í. Lækkið svo hita og bætið helling af hunangi út í, ca 1 dl svo er þetta bara látið malla í amk klst eða tvær. Undir lokin er um 100g af smjöri bætt útí og látið malla aðeins lengur. Sósan á að verða hnausþykk og glansandi eins og sýróp. Ef hún er of sölt/beisk, þá bætið þið meira hunangi út í. Þessi sósa var rugl góð og gríðarlega bragðmikil. Við nafnar fengum feitt prik fyrir þessa sósu þetta kvöld.

Grilluð nauta ribeye

Þetta er tekið beint af síðu Læknisins í Eldhúsinu. „Lagði steikurnar í skál, nuddaði með jómfrúarolíu, soya og lime safa. Blandaði hvítlauk, engifer og chilli saman við ásamt smáræði af niðurskorinni steinselju. Fékk svo að marinerast í nokkrar klukkustundir á meðan við undirbjuggum meðlæti og annað sem er að finna í þessari færslu. “

Pæklað meðlæti

Texti beint af síðu Læknisins í Eldhúsinu

Við gerðum þrjár tegundir af pækluðu meðlæti. Skar niður smáræði af rauðkáli, raspaði fimm cm af engifer saman við og huldi með hvítvínsediki. Bragðbætti með einni matskeið af sykri og salti. Smá pipar.
Skar svo niður eitt grænt epli og eina peru og huldi með hvítvínsediki. Bætti svo hálfum rauðum chilli saman við og bragðbætti með einni matskeið af sykri og salti.
Svo var það rauðlaukurinn. Einn rauðlaukur skorinn í þunnar sneiðar, huldi með hvítvínsediki, bragðbætti með einni matskeið af sykri og salti. Smá pipar.
Allt þetta lét ég standa út á borði í nokkrar klukkustundir á meðan við undirbjuggum allt annað sem er að finna í þessari færslu.
Auk þess að vera með pæklað meðlæti vorum við einnig með ferska næfurþunnt skorna agúrku, papríku og ferskan kóríander (fyrir þá sem eru ekki með ofnæmi).

Gufusoðið Bao brauð

20190211_194728-01.jpeg

Setjið vatn 1.5 bollar í skál, hitið í um 22-25 gráður og látið gerið útí (3 tsk) og hrærið létt. Látið standa aðeins, ca 1-2 mín. Bætið svo 4msk matarolíu saman við og hrærið aftur og látið svo standa.

Setjið 4msk sykur, 5 bolla hveiti og 4 tsk lyftiduft í skál fyrir hrærivél og blandið létt. Notið hnoðara hausinn og blandið á meðan þið hellið gervatninu yfir rólega. Aukið svo hraðan og látið vélina hnoða deigið þar til það er komið saman í kúlu. Hnoðið svo restar saman við og hnoðið deigið, það á ekki að vera klístrað þannig að það festist við borið. Bætið þá ögn hveiti og hnoðið ef þannig er.

Pennslið svo skál með restinni af olíunni, setjið deigið í, plastfilmu yfir og látið standa á ekki of köldum stað í amk klst.

Þegar deigið er orðið tvöfalt er það hoðað létt saman og mynduð lengja. Deigið á að vera létt og dúnamjúkt hérna. Skerið svo lengjuna í hæfilega bita ca 25 stk. Prófið t.d. einn bita fyrst, fletjið hann út í disk í lóanum, rétt rúmlega lóastór og um 2-3mm þykk. Notið svo kökukefli til að fletja út áboði. Þetta gerið þið við alla bitana. Pennslið helminginn með olíu og lokið þannið að það myndast hálfmáni. Setjið á bökunarpappírsbúta, einn hálfmáni á hvern bút og látið svo lyfta sér í 60 mín eða svo undir þurru viskustykki.

Svo er bara að gufusjóða í um 7 mín. Þetta er best gert í bambus gufugræju yfir wokpönnu með vatni í, passið að láta ekki vatnið ná upp í gufugrindina.

Besta súkkulaðimús í heimi

Ég hef skrifað um þessa frábæru súkkulaðimús áður og vísa ég því bara í þá færslu mína hér. Þetta virkar alltaf, ég meina hver elskar ekki súkkulaði. Reyndar settum við smá romm í þetta að þessu sinni bara til að ná aðeins spennu í þetta. Munið bara að músin þarf að stífna í ískáp í ca 2 klst. Svo þarf hindberjagumsið líka aðeins að kólna. Passið að nota bara örlítið af hindberjagumsinu ofan á músina. Þetta á að vera örþunnt lag.

Pörunin

Dúpsteikt og hefðbundið humar og laxa sushi með Esju Wild Ale frá Borg.

Það var virkilega gaman að elda í eldhúsi Læknisins í Eldhúsinu en það er í raun fullbúið professional eldhús. Svo er aldrei leiðinlegt að vera nálægt nafna mínum Ragnari Frey svo mikið er víst, hress karl með gríðarlega nærveru. En ef við byrjum á sushi forréttinum þá kom hann svakalvega vel út svona djúpsteiktur í tempura deigi, bæði humarinn og laxinn elduðust í gegn og fengu á sig rjómakennda áferð með hrísgrjónunum og grænmetinu. Þannig bítur maður í gegnum stökkt tempuradeigið og lendir svo í mjúku innihaldinu. Grjónin pakka fiskinum vel inn sem nýtur sín til fulls og svo kemur ögn bruni í bakgrunni frá wasabi majonesinu. Þetta toppar maður svo með söltu soyja sósunni. Bjórinn með þessu þarf að geta ráðið við allt án þess að skemma það. Esja Nr 60 er frábær bjór sem ég hef áður fjallað um, reyndar einstakur bjór í íslenskri bjórsögu ef út í það er farið. Bjórinn, sem er af gerðinni wild ale, er dálítið kolsýrður sem er mjög gott með þessu því kolsýran skefur skánina af gómnum sem myndast af sætum grjónunum og tempura deiginu. Það er létt sýra í bjórnum, eða kannski meira hinn einkennandi funky keimur sem tónar vel við fiskinn og svo er það þessi dásamlega eik sem kemur vel fram í bjórnum. Eikarkeimurinn á rosalega vel við djúpsteiktu bitana sérstaklega. Þetta var frábær pörun sem ég mun án efa endurtaka á meðan Esja fæst í vínbúðum.

20190209_213258.jpg

Hægelduð grísasíða og grillað nautaribeye í gufusoðnu Bao brauði með Barabbas Nr 57 frá Borg.

Við vorum með alls konar til að fylla bao brauðin, annars vegar hægeldaða grísasíðu og svo grillað nautaribeye. Ofan á þessi prótein vorum við svo með þrenns konar piklað, piklaðan rauðlauk, piklaðar perur og epli og piklað rauðkál með engifer en svona feitir réttir þurfa sýru til að opna allt upp á gátt og tóna niður fituna. Svo vorum við með stökka svínapuru sem við muldum niður til að gefa stökka áferð á móti dúnamjúku bao brauðinu og alla fituna. Svo er kóríander, já ég gæti haldið langan fyrirlestur um þessa jurt sem er ein af Guðs gjöfum til okkar mannanna, kóríander gerir allan mat og bara lífið sjálft svo ljúft. Ég mæli með því með bæði nauti og grís hér og ekki bara nokkur lauf heldur heila lúku. Svo er hægt að nota ýmsar sósur ss siracha sem alltaf er góð með svona „street food“, eða heimalagað chili majones en við vorum með vægast sagt sturlaða Garún sósu/sýróp með þessu. Þegar maður sýður svona sósu í 2 til 3 tíma með hunangi og svo smjöri gerist bara eitthvað undravert. Sósan er svo þykk, bragðmikil og rík, þar sem við finnum saltan soð-bakrunninn, stjörnuanis, kanil og svo ristuðu tónana og kaffið frá korninu í bjórnum í bland við karamelliserað hunangið. Allt þetta tvinnast svo saman í stórbrotna og flókna heild sem kemur fullkomlega á móti fitunni í kjötinu og öllu þessu súra pikklaða. Bjórinn hér með getur verið á nokkra vegu, við verðum samt að átta okkur á að hér er þróttmikill réttur á ferð með alls konar bragðflækjum og stigum. Bjórinn þarf að vera dálítið mikill en alls ekki of en hann getur ekki verið mildur og léttur því þá hverfur hann bara og við gætum allt eins verið í vatn.

IMG_8117-01.jpeg

Bjórinn sem ég valdi með þessu var páskabjórinn frá Borg frá síðasta ári (2018), sem sagt næstum árs gamall Barabbas , 7% belgískur dubbel af bestu sort. Bjórinn er virkilega góður matarbjór, mildur og mjúkur með fína sætu frá möltuðu bygginu og svo er þægileg kolsýran að gera heilmikið fyrir heildar upplifunina en belgískir bjórar eru gjarnan dálítið vel kolsýrðir. Sætan og karamellukeimurinn frá maltinu tengir vel við karamelliseringuna í kjötinu og sósunni og svo vegur sætan vel á móti beiskjunni og saltinu í sósunni og hitanum frá siracha. Það er líka mikil fita í þessu kjöti en kolsýran í bjórnum vinnur vel á henni og losar um hana af gómbogum og hreinsar palletuna og gerir hana klára fyrir næsta bita. Sýran frá piklaða grænmetinu er svo algjörlega nauðsynleg sem frábært mótvægi við salt, sætt og beiskt bæði í bjór og mat. Saman verður þetta alveg mögnuð upplifun.
Við vorum líka með Úlf Nr 3 frá Borg en það er spriklandi og hressandi IPA með beiskju og aðeins bit. IPA er ekki allra en hann er mjög flottur með feitum mat og kemur skemmtilega út á móti söltum eða sterkum mat. Humlarnir í bjórnum krydda réttinn en þeir eru líka góðir í að vinna á feitum sósunum og fitunni í kjötunu og klúfa upp á gátt og opna þannig réttinn. Einnig hreinsa humlarnir vel pallettuna á milli bita, þessi skán sem stundum myndast í gómu þegar við borðum feitmeti hverfur alveg eftir hvern sopa. Saltið og chiliið í matnum hins vegar vinnur á bjórnum og rífur aðeins upp beiskjubitið og gerir bjórinn dálítið grimmari en annars er.

IMG_8133.JPG

Frábær súkkulaðimús með hindberjamauki og bláberja súrbjór, Skyrjarmi frá Borg.

Þessi mús er geggjuð og en þung. Maður ætti að láta sjatna vel áður en þetta er borið fram og hafa skammta litla. Hindberja hlaupið léttir á þessu samt en gæti orðið væmið ef notað er of mikið. Með sætum eftirréttum með súkkulaði er klassískt að para saman stout eða enn betra imperial stout, þetta virkar dálítið eins og vel þekkt combo, kaffi og eftirréttir nema er bara mun betra. Í kvöld var hins vegar ákveðið að fara í aðeins léttari bjór, stórkostlegan bjór reyndar, Skyrjarm Nr 59 sem var einn af jólabjórunum frá Borg þetta árið. Bjórunn er súr með helling af bláberjum og skyri. Þetta virkar eins of fullkomin dressing á efirréttinn og eftir á að hyggja hefði verið flott bara að sleppa hindberjagumsinu og láta bjórinn gera það sama fyrir réttinn. Sýran og sætan frá bláberjunum létta vel á þungu súkkulaðinu og tengir einnig við berin í hindberjahlaupinu, vá hvað þetta var gott.

IMG_8141 (1).JPG

Eftir svona stóra mikla máltíð eru sumir sem setjast í betri stofuna við arininn með koníak eða whisky en það er líka hægt að opna einn svakalegan 14.5% Surt Nr 8.2 sem er sætur imperial stout þroskaður á notuðum bourbon tunnum í nokkra mánuði. Bjórinn er svakalegur, þróttmikill og margslunginn með sætum maltkeim og ögn vanillu og svo kemur notaleg bourbon tunnan vel í gegn. Eftir einn svona þá er maður til í háttinn.

Frábært kvöld, takk fyrir mig Ragnar Freyr!

Hættulega góð súkkulaði truflu romm marens kaka með imperial stout

Enn ein mögnuð uppskrift frá Nigella Lawson.  Þvílíkur unaður…segi ég sem er háður súkkulaði, kannski ekki alveg hlutlaus.  Þessi uppskrift er frekar einföld (t.d. gat ég gert hana nokkuð slysalaust) en það erfiða við hana er að maður þarf að bíða í einn jafnvel tvo daga eftir að hún verði klár.   Þegar ég skellti í þessa uppskrift var ég í súkkulaði fráhvarfi og ætlaði að bæta heldur betur úr því, ég hafði ekki lesið uppskriftina til enda þegar ég byrjaði.  Ég reyndar strandaði fljótt þegar ég komst að því að ég átti ekki romm sem er algjörlega ómissandi í þessu.  Hreimur nágranni minn bjargaði mér hins vegar fyrir rest og ég gat haldið áfram en svo rak ég augnun í að kakan á að standa í einn til tvo sólarhringa í ísskáp!  Jább ég mæli sem sagt með því að fólk hafi eitthvað súkkulaðigott að maula á meðan þessi kúrir í kælinum.

Það sem þarf:

Fyrir botninn

1-2 eggjahvítur (fer eftir stærð)
50 g hvítur sykur
2 tsk bökunar kakó
1-2 dropar hvítvíns edik

Fyrir músina sjálfa

400 g dökkt súkkulaði (70%)
60 ml Romm
60 ml gyllt síróp
500 ml þeyttur rjómi
Bökunar kakó til skreytingar

Bjórimperial stout, helst eitthvað tunnuþroskað, ég tala nú ekki um rommtunnuþroskað.  Founders KBS er snilld með þessu sem og Borg Surtur nr. 38 vanillu stout.  Ég prófaði fleiri sem komu mjög vel út líka, Founders Imperial Stout og Borg Garún.  Ef hins vegar þið viljið létta á þessu þá er kriek (kirsuberja súrbjór) alveg geggjaður með, tékkið á því líka.

Aðferð:

1) Ofn í 180 gráður á blástur.  Smyrjið svo hliðarnar á 20cm spring formi og smjörpappír í botninn.

2) Þeytið eggjahvíturnar þar til þær eru orðnar froðukenndar og þið getið myndað toppa.  Mér finnst best að nota handþeytara því þá fæ ég meiri tilfinningu fyrir þessu.  Bætið svo sykrinum í smá skömmtum og þeytið áfram á lægri stillingu.  Þið eigið að enda með þykka glansandi blöndu.   Sáldrið kakói yfir og edikið og þeytið aðeins áfram til að sameina þetta allt.  Loks dreifið þið þessu í formið og reynið að slétta þetta út eins og þið getið.

3) Bakið þetta í ofninum í 15-20 mín.  Takið svo út og látið standa þar til orðið kalt.

4) Takið fram skál og setjið vatn í pott.  Ekki láta vatnið snerta skálina, látið malla, ekki sjóða.  Bræðið svo súkkulaðið ásamt sýrópi og romminu.  Passa að enginn raki komist í þetta því þá fellur þetta allt saman út og klumpast saman. Takið svo skálina af hitanum og látið standa í 5 mín eða svo til að kólna.

5) Þeytið rjóman þar til hann er farinn að verað aðeins fluffy og þéttur.  Ekki þeyta um of samt.  Blandið svo rjómanum varlega saman við súkkulaðið þar til þetta er orðið að dásamlegri súkkulaði romm blöndu.  Reynið að standast það að smakka þetta, ég mana ykkur, það er ekki séns.

6) Hellið þessu svo í formið ofan á marens botninn.  Sléttið úr og setjið svo plastfilmu yfir og inn í ískáp í alla vega sólarhring, helst tvo.  Jább sorry þannig er það bara!

7) Þegar þið loksins ætlið að bjóða uppá herlegheitin þá er gott að taka formið út úr ísskápnum og látið standa aðeins áður en þið losið úr forminu.  Ég myndi ekki reyna að taka kökuna af form botninum nema þið séuð rosalega klár, hann kurlast upp auðveldlega.

IMG_7293

Ok kakan er geggjuð, þetta er án gríns alveg „trufflað“ dæmi 🙂  Passið ykkur bara á að fá ykkur ekki of stóra sneið því þetta er mjög þungt í mallakút.  En fyrir súkkulaðifólk þá er þetta líklega eitt það besta sem hægt er að bjóða uppá.  Í raun held ég að við eigum að líta á þetta sem konfekt eftir góða málsverð, ekki köku.  Kaffi væri fínt með eeeen við erum að spá í ölinu sem er mun skemmtilegra ekki satt?   Hér langaði mig að máta þungan mikinn og djúsí imperial stout við, helst einhvern sem hefur legið á rommtunnu en slíkt fæst auðvitað ekki hér en ef við ættum t.d. Pirate Bomb frá Prairie Artisan Ales þá væri það skemmtileg pæling því þar fáum við aðeins rommið í gegn.   Bourbon þroskaður bjór verður að duga og það er sko aldeilis ekki slæmt val.  KBS frá Founders er frábær með þessu en hér erum við með þungt á móti þungu þannig að við þurfum að fara varlega.  KBS er bruggaður með kaffi m.a. og látinn þroskast á bourbon tunnum í marga mánuði.  Útkoman er mjúkur mikill bjór með ristuðu korni sem gefur m.a. súkkulaðikeim, svo er espresso og loks bruninn frá boubon tunnunni.  Stundum má finna notalega vanillu og jafnvel kókos í geng frá eikartunnunni.  KBS er annars mjög merkilegur bjór og alls ekki sjálfsagt að komast yfir hann.

Við prófuðum einnig Surt 38 frá Borg sem er enn til í Vínbúðunum.  Hér erum við með öflugan en sætan imperial stout sem bruggaður er með vanillu.  Við erum þannig með ofsalga flott mótvægi við beiskjuna og þunganum í kökunni, hér kemur sætan í bjórnunm og vanillan ofsalega vel út.  Beiskjan frá humlunum í þessum bjór létta á á öllu og opna upp fyrir næstu bita.  Mjög flott combo.  Prófið einnig Garúnu frá Borg, hún gerir það sama nema gefur meira kaffi og beiskju í þetta allt.

Ef ykkur finnst þetta of mikið af því góða, prófið þá að létta á þessu með ferskum hindberjum ofaná kökuna eða smá þeyttan rjóma.  Eins er hægt að nota spriklandi súrbjór á borð við Kriek eða Frambozen til að gera það sama.

Páskaegg frá HR konfekt með rétta bjórnum, er til eitthvað betra?

Fyrir okkur hjá Bjór & Matur eru páskarnir tími til að njóta, við erum að tala um frí frá vinnu og svo allt hnossgætið, súkkulaði í stórum stíl, páskabjórinn og svo má ekki gleyma blessuðu lambinu.  Það eru margir sem framleiða páskaegg hér á landi, hillurnar í búðunum eru þegar farnar að fyllast af þessu. Fyrir súkkulaðifíkil eins og mig þá eru hins vegar til páskaegg og svo eru til PÁSKAEGG!   Já ég segi það bara, súkkulaði er ekki bara súkkulaði, þetta er svona rétt eins og með bjórinn, það er til fjöldaframleitt óspennandi súkkulaði og svo erum við með vandað hanverks súkkulaði.  Minn uppáhalds súkkulaðikarl hér heima er Hafliði Ragnarsson frá HR konfekt / Mosfellsbakarí,en þar á bæ kunna menn sko að gera súkkulaði og þegar kemur að páskaeggjum þá erum við að tala um hrein listaverk.  Eggin eru svo falleg að maður vill eiginlega ekki borða þau, bara horfa.  Það er samt hluti af þessu öllu saman og gleymist oft, maður á að nota öll skilningarvitin þegar maður er að njóta sælkeravöru ekki bara bragðskynið.

Súkkulaði og bjór á vel saman, menn virðast eiga erfitt með að sjá það fyrir sér en það er svo sannarlega málið.  Við höfum áður leikið okkur með bjór og súkkulaði með mjög góðum árangri.   Þetta árið ákváðum við að prófa helling af bjór og finna hina fullkomnu pörun með eggjunum frá Hafliða en hann gerir þrjár gerðir, dökkt 70% súkkulaði, mjólkursúkkulaði 38% og dulcey blond 32% súkkulaði.  Reyndar líka eitthvað af eggjum úr hvítu súkkulaði.  Ég get sagt ykkur það að mér leið eins og krakka í leikfangabúð þegar ég fékk túrinn í súkkulaðigerðinni þeirra!  Ég gæti sennilega ekki unnið þarna án þess að lenda í stórkostlegum vanræðum.

Ár hvert dettur haugur af páskabjór í vínbúðirnar, flest allt frekar óspennandi en það er þó einn og einn góður.  Við ákváðum að vera ekkert sérstaklega að einbeita okkur að páskabjór með páskaeggjunum en það slæddust þó nokkrir inn í prufurnar.  Hér er svo afraksturinn.

Glæsilegt gullið Dulcey Blond egg.

IMG_7174
Byrjum á Dulcey en þetta er uppáhalds egg konunnar.  Dulcey súkkulaði er elegant ljós karamellubrúnt og lungnamjúkt með rjómakenndri áferð í munni.  Það er nokkur sæta á tungu en ekki eins sætt og hvítt súkkulaði eða mjólkursúkkulaðið.  Við finnum svo ögn karamellukeim og smákökur og það örlar fyrir kókos.
Eftir smakk kvöldsins komumst við að því að Dulcey eggið passaði við nánast alla bjórstílana en það sem stóð uppúr voru súru ávaxtabjórarnir.  Það er vel þekkt hjá súkkulaðigerðum að tengja ávexti/ber við súkkulaðið, maður sér það t.d. í sumum molunum sem eru inní eggjunum frá HR.  Sumir eru með jarðaberjafyllingu eða ástaraldin ofl.
Oud Beesel Kriek er með betri kirsuberjabjórum sem við höfum aðgang að hér heima og gengur mjög vel með súkkulaði.  Kriek er belgískur villigerjaður bjór, bruggaður með örverum úr andrúmsloftinu sem gefa frá sér súran funky keim, svo er bjórinn látinn þroskast á kirsuberjum í mánuði og drekkur hann þannig í sig dásamlegan berjakeiminn.  Bjórinn er þannig aðeins súr og svo með áberandi kirsuberjabragði.  Svona bjór er líka nokkuð kolsýrður en kolsýran hjálpar til með að hreinsa palletuna og létta á öllu milli bita. Súkkulaðið þekur nefnilega dálítið góminn með dásamlegum rjómakenndum súkkulaðihjúp sem kolsýran skefur svo af milli bita.  Sýran í bjórnum dregur ögn úr sætunni í súkkulaðinu og kirsuberin tengjast mjög vel við súkkulaðið og gefa ákveðin elegans ofan á elegant.   Þetta alveg stein lá.

IMG_7148.JPG

Við prófuðum fleiri súrbjóra með þessu eggi og kom nýji collab bjórinn frá Borg stórkostlega út með þessu eggi líka.  Kalsari Kannit sem er ketilsýrður bjór með ástaraldin og ferskjum. Þessi bjór er bruggaður með einhverju finnsku brugghúsi sem ég bara þekki ekki neitt til. Verst að þessi kemur ekki í búðir hér heima en bjórinn er virkilega flottur og fæst á helstu börum borgarinnar um þessar myndir.

Dökkt 70% lífrænt súkkulaði frá Perú (Fairtrade).

Uppáhalds súkkulaðið mitt persónulega er þetta hér, dökkt, mikið og geggjað með kakó og svo ögn beiskju í bland við sýru. Eggið er ofsalega fallegt svona undið og snúið með kopargyllingu.   Hér koma ávaxtabjórarnir vel út, Oud Beersel Kriek er t.d. mjög flottur hér líka en bjórinn bæði léttir á öllu og gefur svo frísklegan ávaxtakeim ofaná.  Það sem okkur fannst hins vegar enn betri pörun var nýji páskabjórinn frá The Brothers Brewing í Vestmannaeyjum sem heitir einfaldlega Páska Bjór Milk Stout 8% og er svo kallaður imperial milk stout.

IMG_7202

Stout er kolsvartur bjór sem bruggaður er með brenndu byggi sem gefur bæði lit og svo ristað bragð sem oft minnir á expresso og dökkt súkkulaði.  Milk stout er svo samskonar nema að í hann er notaður mjólkursykur, lactosi sem gerfrumurnar geta ekki notað í gerjunina og því situr hann eftir í loka afurðinni og gerir bjórinn sætari og meira djúsí.  Páska Bjór Milk Stout er einmitt það, mjúkur og rjómakenndur í munni með sætum nótum en einnig þessa notalegu kaffirist og svo er smá lakkrís.  Hver kannast ekki við kaffi og súkkulaði annars?  Þetta kemur í staðinn og er enn betra.  Hér er tengingin augljós,  kaffirist og súkkulaði, sætan í bjórnum tónar svo beiskjuna frá súkkulaðinu niður og þetta verður bara æðisleg upplifun.  Páskabjór með páskaeggi, bæði dæmi um handverk af bestu gerð.

Við prófuðum alla bjórana með öllum eggjunum og komumst að því að Páska Bjór frá The Brothers gengur vel með þeim öllum.  Hér er líklega bara hinn fullkomni páskabjór á ferðinni?

Mjólkursúkkulaði 38%

Loks vorum við með klassískt páskaegg úr mjólkursúkkulaði, mjög sætt súkkulaði sem bráðnar í munni og þekur góm og tungu með feitri kakóskán.  Ekki svo að skilja að það sé neikvætt samt.  Fyrir mína parta er þetta aðeins of sætt en krakkarnir elskuðu það.  Hér komu súru bjórarnir vel út og tóna vel niður sætuna, porter og stout koma vel út líka með þessu og bæta rist og ögn beiskju við upplifunina.  Myrkvi frá Borg og Páska Bjór Milk Stout frá Brothers voru flottir með t.d.  Hins vegar er belgískt öl alltaf skemmtilegt með súkkulaði, belgíska ölið er oftast lítið sem ekkert beiskt og svo erum við með ávaxtalega sætu, oft karamellu og gerkrydd sem gaman er að leika sér með við mat. Belgískur bjór er oft einnig nokkuð kolsýrður en það er einmitt þægilegur eiginleiki þegar við erum með feita áferð í mat. Páskabjórinn þetta árið frá Borg brugghúsBarabas nr 57 (8%) er einmitt skemmtilegur belgískur dubbel sem fer blíðum höndum um tunguna með snefil af dökkum ávöxtum og notalegum belgískum kryddum.  Barabas kom vel út með mjólkursúkkulaðinu og kolsýran er mjög hentug hér því hún léttir skánina af gómnum og hreinsar alveg palletuna og gerir klára í næsta skammt.

IMG_7213

Það þarf svo alltaf að hafa í huga við svona lesningu að hér ræður smekkur manna öllu.  Ofanritað er einungis ætlað sem leiðbeiningar fyrir þá sem vilja prófa sig áfram.  Við vorum þrjú í þessum pælingum (takk Ólafur Darri fyrir aðstoðina) og eru þetta niðurstöður okkar þriggja en segir í raun ekkert um hvað þér þykir best.  Njótið heil!

 

Bjór- og súkkulaðipörun með Omnom og Borg brugghús, craft on craft!

Það geta held ég allir verið sammála því að súkkulaði er gott, sérstaklega ef það er vandað handverks súkkulaði eða craft súkkulaði eins og ég kalla það. Omnom er einmitt þekkt fyrir frumlegt og afar ljúffengt handgert súkkulaði.  Fyrir mína parta þá er nánast allt sem ég hef smakkað frá þeim til þessa gott.  Ég reyndar elska súkkulaði, er eiginlega fíkill og er því  kannski ekki alveg hlutlaus en ég er reyndar líka mjög kröfuharður á súkkulaði sem kannski vegur upp á móti?  Annað sem ég elska er auðvitað bjórinn og þegar kemur að honum þá stendur Borg brugghús mjög framarlega hér heima.  Þeir eru endalaust að koma fram með eitthvað nýtt og spennandi sem oftast er hrein unun að renna niður.  Það vita það kannski ekki margir en bjór gengur oft mjög vel við súkkulaði, það fer vissulega eftir bjórstíl og súkkulaðinu hverju sinni og maður þarf auðvitað aðeins að spá í hvað fer vel saman.  Við hjá Bjór & Matur höfum oft leikið okkur með klassískar paranir á þessu sviði eins og t.d. dökkt mikið súkkulaði með bleksvörtum imperial stout, eða súkkulaði með ögn chilli parað við létt  humlaðan amerískan porter.   Hér mætti kannski hugsa sér að við værum að skipta kaffibollanum út fyrir kaffiristinni sem einkennir bæði porterninn og stoutinn.  Humlarnir eru svo góðir móti chilli-inu, lyfta því aðeins upp og gera meira áberandi.  Eins og alltaf þá er gaman að skoða áferð og þyngd ásamt bragðinu sjálfu og vinna ýmist með andstæður eða sameiginlega eiginleika og sjá hvað virkar best. Súrt með súru, létt á móti þungu, sætt með söltu og svo framvegis.  Nú orðið er súkkulaði orðið svo fjölbreytt og margar braðgflækjur í gangi að það er endalaust hægt að leika sér með þessa hluti.  Maður þarf því að skoða aðeins hvað maður er með í höndunum til að átta sig á hvernig bjór passar best við.  Þetta á samt ekki að vera stressandi og flókið verkefni því maður á að hafa gaman að þessu og prófa sig áfram.  Ég held að allir geta tekið undir það að það getur ekki verið slæmt að þurfa að prófa sig áfram með alls konar súkkulaði á móti alls konar bjór!

Fyrirtæki hér heima eru aðeins byrjuð að átta sig á hve magnað það er að sjá hvernig réttur bjór breytir mat og öfugt.  Maður er farinn að sjá einn og einn viðburðinn skjóta upp kollinum undanfarin ár.   Við Sigrún fórum á einn svona viðburð núna bara vikunni, þar sem snillingarnir hjá Omnom og meistarar bjórsins frá Borg brugghús leiddu saman hesta sína í stórfenglegri súkkulaði bjórpörun.  Þetta var í senn mikil fræðsla um súkkulaðiplöntuna og gerð súkkulaðis sem og „mini“ bjórskóli og svo auðvitað tilraunir með paranirnar.  Ég verð að segja að eftir þessa kvöldstund þá lít ég súkkulaði allt öðrum augum.  Þetta er nánast eins og með bjórinn, það er hægt að búa til svo mikið af mismunandi bragðprófílum og áferð allt eftir hvaða súkkulaðibaunir eru valdar og hvernig gerjun og ristun er háttað og það er sko ekki sama hvort við erum að tala um fjöldaframleitt súkkulaði eða handgert eins og Omnom gerir það.   Þetta er alveg magnað.  Pörunin var líka stórksemmtileg, þeir Borgarmenn höfu gert eina pörun og Omnom fólkið aðra, sumt alveg frábært og eitthvað sem maður á klárlega eftir að leika sér með áfram.

Það voru fimm bjórar í boði þetta kvöld allir mismunandi á sinn hátt, Askasleikir amber ale, Brjánsi súröl, Giljagaur barley wine, Garún imperial stout og loks einn magnaðasti bjór brugghússins til þessa Hurðaskellir imperial porter tunnuþroskaður en þessi herramaður er fyrir alls löngu uppseldur hér heima.  Á móti þessu var heill haugur af mismunandi súkkulaði sem maður gat leikið sér með og prófað.  Ég ætla nú ekki að kafa í sauma á þessum bjórum hér eða súkkulaðinu sem slíku því það er efni í mjög langan og erfiðan pistil.  Það voru samt nokkar paranir sem vert er að fjalla um og prófa heima.

Tökum fyrst Askasleikir, sem er frekar milt og einfalt amber öl, hér má súkkulaðið ekki vera það öflugt að bjórinn hverfi, við erum alltaf að reyna að skapa aðstæður þar sem bæði matur og drykkur hagnast á pöruninni.  Mér fannst Milk and cookies súkkulaðið koma vel út því súkkulaðið er skemmtilega kryddað með alls konar jólalegum kryddum.  Hér nær súkkulaðið að „spika“ bjórinn og gera hann bragðmeiri og jólalegri og bjórinn gefur svo súkkulaðinu karamellu sætu á móti.  Annað súkkulaði sem kom mjög vel út var Spiced White + Caramel sem hefur ögn appelsínu og kanil og svo er það með áberandi karamellukeim.  Hér ná humlar í bjórnum og appelsínan í súkkulaðinu vel saman.   Þetta súkkulaði má eiginlega heita sigurvegari kvöldsins því það passaði við alla bjórana nánast en á mismunandi hátt hverju sinni. Frábært súkkulaði !!!

IMG_6697
Ein áhugaverðasta pörun kvöldsins var hins vegar að mínu mati með Brjánsa.  Bjórinn er töluvert súr en þó léttur og þægilegur.  Alls ekki bjór fyrir alla en afhverju ætti hann svo sem að vera það?  Hér er vel hægt að nota Spiced White + Caramel en það sem kom mér verulega á óvart var hversu magnað var að fara í Lakkrís + Sea Salt súkkulaðið.  Hér eru það andstæður sem koma svona vel út, salt á móti súru, og þungt á móti léttu, algjörlega frábær pörun. Hér gæti bjórnördinn sagt að við værum að breyta Brjánsa súröl í gose sem er þýskur súrbjórsstíll með söltuðum bakgrunni en það er önnur saga.  Annað súkkulaði sem kom mér í algjörlega opna skjöldu en kom stórkostlega vel út var Madagascar sem er 66% súkkulaði með áberandi sýrukeim.  Nú erum við ekki með andstæður heldur samstæður, súrt með súru.  Þetta small algjörlega, bjór og súkkulaði magna upp sýru hvors annars og svo er notalegur sætur bakgrunnur frá korninu í bjórnum og súkkulaðisætunni.

Giljagaur er mikill bjór en þó ekki of þungur og það er töluverð sæta og karamella í bragði.  Mér finnst svo alltaf einhver appelsínukeimur þarna líka.  Hér höfðu menn valið Milk of Madagascar með sem er nokkuð sætt og mjúkt og með ögn karamellu og sítrus.  Fín tengin við bjórinn.  Við Sigrún fórum hins vegar í Spiced White + Caramel sem algjörlega negldi þetta.  Við erum með látlausan appelsínubörk í súkkulaðinu og áberandi karamellu sem passar jú vel við það sem við erum að upplifa í bjórnum, svo er þarna ögn bruni eins og chilli eða eitthvað sem kemur í veg fyrir allt of væmið combo.  Þetta var eiginlega besta pörun kvöldsins að okkar mati takk fyrir!!!

IMG_6699

Garún pörunin var mjög klassísk, við þurfum eiginlega ekki að ræða það í smáatriðum, en gerum það samt, það er svo gaman.  Hér komu tvö súkkulaði strax til greina, bæði Borg og Omnom voru á sömu línu.  Dökkt og mikið súkkulaði með dökkum og miklum bjór.  Garún þarf nefnilega eitthvað sem heldur velli, ekkert vesælt og aumt.  Nicaragua er þróttmikið 73% dökkt súkkulaði með ögn sýru og töluverðri beiskju.  Það er ekkert kaffi notað hvorki í gerð bjórsins né súkkulaðis en þegar þessu er blandað saman þá framkallast lúmsk kaffirist, eins kemur ögn kaffikeimur frá ristuðu maltinu í bjórnum.  Þetta er frábær pörun, ekki síðri pörun er svo Coffee + Milk súkkulaðið sem er dökkt mjólkursúkkulaði með kaffi.  Þetta súkkulaði er helvíti magnað en það er ekkert notað af kakónibbum við gerð þess heldur bara kakófeitin úr kakóbauninni, sykur, mjólkurduft og svo kaffibaunir.  Þetta súkkulaði er mjúkt með mikla fyllingu og svo organdi kaffibragð.  Þegar þetta kemur saman við Garúnu verður úr eins konar imperial kaffi stout, skemmtilegt.

Lokahnikkurinn var svo Hurðaskellir sem er gríðarlega magnaður bjór.  Nánar um hann hér.  Hér er er bjór sem að mínu mati er dálítið erfitt að para við, tillögur Omnom og Borgar voru ágætar en ekki eitthvað sem small að okkar mati en það er það sem svo skemmtilegt.  Það er enginn með eins pallettu, það sem einum finnst gott finnst öðrum kannski skrítið.  Við duttum hins vegar niður á skemmtilega pörun með Hazelnut súkkulaðinu en það er súkkulaði sem mér fannst reyndar ekkert sérstakt þegar ég smakkaði það eitt og sér.  Þetta súkkulaði gekk heldur ekki með neinum öðrum bjór en það vakti lukku hjá okkur með Hurðaskelli.  Það er mikil jörð í súkkulaðinu og hnetur, mild sæta og mýkt.  Þessi bragðprófíll kom með skemmtilegan hnetukeim í bjórinn sem bætist við súkkuklaði, kókos, vanillu og rúgviskí í bjórnum.  Súkkulaðið dregur einnig úr sætunni í bjórnum sem jaðrar við að vera of mikil.

Þetta var einfaldlega geggjað kvöld og þökkum við Omnom og Borg fyrir frábærar stundir.

Borg/Tanker collab, Chocosourus

Gaurarnir í Borg brugghús sitja ekki auðum höndum þessa dagana, þeir eru á stöðugum þeytingi bruggandi bjór út um allar jarðir.  Hér er það Tanker Brewery í Tallin Eistlandi. Bjórinn kalla þeir Chocosourus C8 og já það er líklega gert með vilja að skrifa „sourus“ en ekki „saurus“ þrátt fyrir risaeðluna á merkimiðanum því um er að ræða súrbjór.  Í bjórinn nota þeir svo  kakóhismi frá Omnon súkkulaðigerð sem skýrir fyrri hluta nafnsins dálítið.  Já við erum að tala um spriklandi ferskan súkkulaðisúrbjór, ekki klassísk túlkun á stílnum en svo sannarlega skemmtileg.  Súkkulaði og ber, er það ekki eitthvað?  Súkkulaðihúðuð hindber eða jarðaber eru t.d. oooofsalega flott.

Bjórinn er ferskur og spriklandi á tungu með súrum undirtón og alls konar mildum ávöxtum.  Það má svo finna örlítið súkkulaði í bakgrunni, það hjálpar reyndar að vita af
því í bjórnum samt. Bjórinn er ofsalega fallegur í glasi en froðan staldrar stutt við.
Mjög skemmtilegur súrbjór sem gengur svo IMG_6253.JPGsannarlega sem sumarbjór.   Nú er um að gera að fylgjast með ef menn vilja næla sér í flösku en hann dettur í Vínbúðir og bari á næstu dögum.  Venja er að um mjög takmarkað magn sé að ræða þegar kemur að collab!

MATARPÆLING: Þetta er bara skemmtilegur bjór einn og sér en ég veit að hann myndi elska djúsí súkkulaðieftirrétti með ferskum berjum á borð við hindber eða brómber t.d.  Besta súkkulaðimús í heimi kemur sterklega til greina en þar erum við jú bæði með hindber,brómber og jarðaber í djúsí dökkri súkkulaðimús, þvílík pörun, ætli maður prófi þetta ekki bara um helgina?  Svo gengur hvíta súkkulaðifrauðið með fersku ástaraldin einnig mjög vel með þessum.  Já það er svo sannarlega gaman að vera til.

Besta súkkulaðimús í heimi með hindberjum og funky hindberja saison!

Nú er konudagur og þá þarf sko að gæla við konurnar í lífi okkar. Mér dettur ekkert betra í hug en að skella í dásamlegt súkkulaðitrít fyrir mína í tilefni dagsins. Ég er mikill súkkulaðifíkill og ég ætla ekkert að reyna að fela það en það er bara fátt betra í þessu lífi en góður súkkulaði eftirréttur. Súkkulaðimús er í miklu uppáhaldi hjá mér og ég hef sko prófað marga slíka rétti trúið mér en það er bara engin mús eins góð og þessi hér sem upprunanlega kemur frá eldhúsgyðjunni Nigella Lawson. Það versta við þessa mús er að ég get bara ekki stoppað þegar ég byrja og það kemur ekki vel út þegar gestir þurfa að berjast við mig um síðustu bitana, Sigrún þarf samt ekkert að óttast á konudaginn. Ég er svo ekki alveg að fara eftir Nigellu hér því mig langaði í smá berjasætu, hindber og sýru til að létta aðeins réttinn og gera hann meira svona konudags, ég fékk því mágkonu mína Elínu sem er snillingur í gúmmilaðigerð til að koma með hugmyndir og hún kom með hugmynd að dásamlegu hindberjagumsi sem smellpassar við bæði réttinn og bjórinn sem ég ætla að bjóða frúnni með þessu.


RÉTTUR: Besta súkkulaðimús í heimi með fersku hindberjamauki. Það besta við þessa mús er að það er fljótlegt að gera hana og auðvelt.

– 150 g sykurpúðar
– 50 g smjör
– 250 g gæðasúkkulaði (125 g suðusúkkulaði og 125 g 70% súkkulaði)
– 60 ml heitt vatn (soðið vatn)
– 285 ml rjómi, þeyttur.
– 1 tsk vanilludropar

Sykurpúðar, smjör og saxað súkkulaði er sett í stóran pott og svo er 60ml heitu vatni bætt við. Látið svo malla á mjög lágum hita, rétt til að bræða súkkulaðið og púðana. Hrærið reglulega þar til allt er bráðnað og látið svo kólna. Þeytið rjómann með vanilludropunum og blandið varlega saman við rest.

Hindberjamaukið:

– 300 g hindber (frosin er algjörlega í lagi)
– 1/4 bolli sykur
– 1 mtsk súrbjór eða bara sítrónusafi
– 1/4 tsk nýmulinn pipar (má sleppa samt)

Setjið þetta allt í matvinnsluvél og maukið þar til berin eru orðin að mauki. Svo er gott að sigta maukið til að losna við steinana og svo sjóða í ööörlitla stund á vægum hita en þetta gerir maukið silkimjúkt og aðeins hlaupkennt.

BJÓRINN: Með þessum rétt væri hægt að fara í imperial stout en það er bara of klassískt og ég held að það yrði líka of „heavy“. Hér viljum við frekar fara í frískandi súrbjór til að létta á öllu og lyfta upp sýruna í berjamaukinu. ROSES ARE BRETT frá To Øl er fullkominn hér, því hann er bruggaður með hindberjum m.a. Við gætum líka reynt aðra súrbjóra, kriek, frambozen, t.d. MIKKELLER SPONTANTFRAMBOOS en báða þessa bjóra þarf að sérpanta í ÁTVR. LIEFMANS KRIEK og OUD BEERSEL KRIEK eða GUEUZE sem fást allir í Vínbúðinni er líklega frábært val líka.


img_5985AÐFERÐ: Það er hægt að fara tvær leiðir í framsetningu, annars vegar að hafa eldrautt hindberjamaukið ofan á súkkulaðimúsinni eins og á myndinni að ofan en það kemur ofsalega fallega út, svo er bjórinn rauður í stíl en hins vegar setur maður maukið í botninn þannig að dásamleg músin fær að njóta sín (mynd að neðan). Ef þið veljið að setja rautt ofan á þá þarf fyrst að láta músina storkna í kæli í svona 2 klst og svo bara hella maukinu ofaná. Ef hin leiðin er valin þá er fínt að setja maukið í skálarnar og inn í frysti í smá stund. Svo er súkkulaðimúsinni hellt yfir og látin storkna í kæli í ca tvo tíma. Loks er skreytt með ferskum hindberjum og brómberjum t.d.

AÐFERÐ: Það er hægt að fara tvær leiðir í framsetningu, annars vegar að hafa eldrautt hindberjamaukið ofan á súkkulaðimúsinni eins og á myndinni að ofan en það kemur ofsalega fallega út, svo er bjórinn rauður í stíl en hins vegar setur maður maukið í botninn þannig að dásamleg músin fær að njóta sín (mynd að neðan). Ef þið veljið að setja rautt ofan á þá þarf fyrst að láta músina storkna í kæli í svona 2 klst og svo bara hella maukinu ofaná. Ef hin leiðin er valin þá er fínt að setja maukið í skálarnar og inn í frysti í smá stund. Svo er súkkulaðimúsinni hellt yfir og látin storkna í kæli í ca tvo tíma. Loks er skreytt með ferskum hindberjum og brómberjum t.d.
BJÓRINN: Þetta er ein magnaðasta pörun okkar til þessa held ég, kannski er það bara af því að hér erum við að leika okkur með súkkulaðirétt sem er mitt uppáhald og svo „funky“súrbjór sem ég held líka mikið uppá. Ég veit það ekki, hitt er þó víst, bjórinn einn og sér geggjaður en með súkkulaðimúsinni er hann algjörlega magnaður. Súkkulaðimúsin er mjög saðsöm og þung en hindberjagumsið í botninum opnar þetta upp með ferskum súrum berjablæ. Ég valdi þennan bjór ROSES ARE BRETT frá To Øl einmitt vegna þess að hann er súr og bruggaður með hindberjum og svo er hann bara svo fallegur svona rauður og elegant. Hindberin og sýran í bjórnum tengja gjörsamlega við hindberjamaukið í músinni og gerir það að verkum að bjór og eftirréttur framlengja hvort annað. Fyrst fær maður dásemlegt súkkulaðið, svona silkimjúkt og ljúft en dálítið þungt svo opnast allt uppá gátt með súrsætum hindberjum í botninum og þetta tvinnast allt saman, loks kemur bjórsopinn og framlengir hindberin og súra keiminn en með skemmtilegu „funky“ twisti sem einhvern veginn dregur súkkulaðið aftur fram. Þetta er algjörlega geggjað saman. Roses are brett fæst aðeins via sérpöntun ÁTVR en það er í raun lítið mál að panta svona, maður sendir bara póst á Vínbúðina og óskar eftir sérpöntun. Það er þó vel hægt að mæla með LIEFMANS KRIEK og OUD BEERSEL KRIEK eða GUEUZE sem fást allir í Vínbúðunum.
AÐFERÐ: Það er hægt að fara tvær leiðir í framsetningu, annars vegar að hafa eldrautt hindberjamaukið ofan á súkkulaðimúsinni eins og á myndinni að ofan en það kemur ofsalega fallega út, svo er bjórinn rauður í stíl en hins vegar setur maður maukið í botninn þannig að dásamleg músin fær að njóta sín (mynd að neðan). Ef þið veljið að setja rautt ofan á þá þarf fyrst að láta músina storkna í kæli í svona 2 klst og svo bara hella maukinu ofaná. Ef hin leiðin er valin þá er fínt að setja maukið í skálarnar og inn í frysti í smá stund. Svo er súkkulaðimúsinni hellt yfir og látin storkna í kæli í ca tvo tíma. Loks er skreytt með ferskum hindberjum og brómberjum t.d.

BJÓRINN: Þetta er ein magnaðasta pörun okkar til þessa held ég, kannski er það bara af því að hér erum við að leika okkur með súkkulaðirétt sem er mitt uppáhald og svo „funky“súrbjór sem ég held líka mikið uppá. Ég veit það ekki, hitt er þó víst, bjórinn einn og sér geggjaður en með súkkulaðimúsinni er hann algjörlega magnaður. Súkkulaðimúsin er mjög saðsöm og þung en hindberjagumsið í botninum opnar þetta upp með ferskum súrum berjablæ. Ég valdi þennan bjór ROSES ARE BRETT frá To Øl einmitt vegna þess að hann er súr og bruggaður með hindberjum og svo er hann bara svo fallegur svona rauður og elegant. Hindberin og sýran í bjórnum tengja gjörsamlega við hindberjamaukið í músinni og gerir það að verkum að bjór og eftirréttur framlengja hvort annað. Fyrst fær maður dásemlegt súkkulaðið, svona silkimjúkt og ljúft en dálítið þungt svo opnast allt uppá gátt með súrsætum hindberjum í botninum og þetta tvinnast allt saman, loks kemur bjórsopinn og framlengir hindberin og súra keiminn en með skemmtilegu „funky“ twisti sem einhvern veginn dregur súkkulaðið aftur fram. Þetta er algjörlega geggjað saman. Roses are brett fæst aðeins via sérpöntun ÁTVR en það er í raun lítið mál að panta svona, maður sendir bara póst á Vínbúðina og óskar eftir sérpöntun. Það er þó vel hægt að mæla með LIEFMANS KRIEK og OUD BEERSEL KRIEK eða GUEUZE sem fást allir í Vínbúðunum.

img_6001
Rósir, nei takk bjór og súkkulaðifrauð fyrir mína 🙂

Dökkt súkkulaði trít með stout eða porter

wp-1478339032382.jpg


Réttur: Dökkt súkkulaði
Pörun:
Imperial stout, stout eða porter.
Dæmi: Mikkeller Beer Geek Brunch Weasel, Borg Garún eða Borg Myrkvi


Það er viðeigandi að byrja þessa síðu á þessu klassíska „comboi“ súkkulaði og stout.  Ég er mikill sælkeri og ég einfaldlega elska súkkulaði, líklega er súkkulaði það eina sem ég ann meira en bjór. Dökkt súkkulaði er frábært eitt og sér, það hefur þægilega beiskju á móti sætunni og svo er ljómandi þegar menn bæta við sjávarsalti eða chilly t.d.  Hér heima fer ég helst í Omnom eða Lindt.  Sumir geyma súkkulaði í ískáp, mér finnst bara alls ekki gott að borða kalt súkkulaði, það þarf helst að vera næstum byrjað að bráðna þá verður það mýkra og bragðið nýtur sín meira.

Kaffi er vel þekktur fylgisveinn með góðu súkkulaði, hver þekkir ekki ljúfu stundina eftir jólamatinn svona rétt áður en pakkaflóðið er tæklað.  Þá sest maður niður í notalegt horn með ylmandi kaffi og nartar í nokkra vel valda mola áður en átökin hefjast á ný, ja eða sumir alla vega.

wp-1478338985305.jpgRauðvín er alveg afleitt með súkkulaði og hef ég aldrei skilið þá blöndu, bjórinn hins vegar gengur vel með og þá helst einhver mjúkur og ristaður bjór á borð við stout eða porter.  Persónulega vil ég hafa bjórinn með súkkulaðinu stóran og mikinn, eins og sterkann kaffibolla eða espresso.  Ég vel imperial stout því hann er gjarnan dálítið sætari en stout og porter og meiri þróttur í honum.  Allir þessir stílar ganga hins vegar en þeir eiga það sameiginlegt að vera ristaðir og minna oft á kaffi á tungu.  Ristað kornið getur einnig gefið af sér keim af dökku súkkulaði og stundum lakkrís.

Hér er ég með 70% Lindt súkkulaði með sjávarsalti og ég valdi Mikkeller Beer Geek Brunch Weasel sem er stóbrotinn 10.6% hafra stout í miklu uppáhaldi.  Ég fer í þennan þegar ég vil vera góður við mig.  Bjórinn fær 100 af 100 á Ratebeer sem er stærsta bjórsamfélag á veraldarvefnum. Í honum er dýrasta kaffi í heimi sem unnið er úr saur eins konar kattardýra í suðaustur Asíu.  Dýrin éta kaffibaunirnar og velja þær að kostgæfni, þau eru mjög vandlát.  Svo fara baunirnar í gegnum meltingarveginn og koma loks út um hinn endan tilbúnar til kaffibrennslu.  Það er sem sagt kaffi í þessum bjór og því ekki skrítið að finna keim af kaffi ásamt dökku súkkulaði og jafnvel vanillu.   Bjórinn kemur vel út með súkkulaðinu, hann hefur dálitla beiskju sem tónar vel með beiskjunni í súkkulaðinu en svo kemur sjávarsaltið með skemmtilegt mótspil við beiskjuna.  Það er einnig talsverð sæta í bjórnum sem gerir beiskjuna í hvortveggja viðráðanlegri og bakkar einnig upp sætuna í súkkulaðinu.   Hér er mikilvægt að hafa bjórinn ekki of kaldann því þá virkar hann dálítið hvass.

Ef maður er ekki alveg til í að splæsa í Mikkeller (hann kostar núna um 1360kr) þá er Garún frá Borg gott val einnig.  Eins má prófa Myrkva frá Borg eða einhvern annan porter.  Aðal atriðið er að byrja og prófa sig áfram.  Hvað með Barley Wine t.d?