Eftirréttur í dýrari kantinum, espresso martini tiramisu

Espresso martini er einn af okkar uppáhalds kokdillum en ég hef verið að reyna að mastera hann í nokkurn tíma núna.  Þegar ég svo náði honum fullkomnum fór ég að fikta í honum áfram og leika mér aðeins.  Ég prófaði t.d. að setja létt þeyttan rjóma ofan á drykkinn rétt áður en ég ber hann fram.  Þetta hefur slegið í gegn hér á mínu heimili og gestir eru svakalega ánægðir.  Rjóminn tekur í sig kaffið og Kahlua og verður algert salgæti þarna ofaná.

Um daginn sátum við saman konan og vinkona okkar og gæddum okkur á þessum drykk, þvílíkt hnossgæti, fljótlega fór umræðan að snúast um hvort ekki væri hægt að gera þetta sem rétt.  Eftirrétt t.d. …þar sem Sigrún mín er mjög hrifin af tiramisu þá datt mér í hug að auðvitað væri hægt að gera einhvers konar espresso martini tiramisu!  Hugmyndin var fædd, mér leiddist í dag svo ég ákvað að prófa þetta.  Ath ég er að búa til þessa uppskrift en byggi aðeins á tiramisu uppskrift auðvitað þannig að mögulega mun ég breyta henni með tímanum, fínpússa.  Það kann vera að þetta hafi verið gert áður, reyndar mjög líklegt en ég hef amk ekki séð neina slíka uppskrift.

Svona gerði ég þetta.

Það sem þarf fyrir 3:

  • Kokteilhristari
  • Ísmolar
  • Ca 200 ml rjómi
  • 1 egg (hvítan og rauðan aðskilin)
  • 70 ml Kahlua + 2 tsk auka í rjómann
  • 70 ml kalt sterkt kaffi
  • 70 ml Vodka
  • Suðusúkkulaði til að rífa yfir (má sleppa)
  • ½ mtsk bökunarkakó
  • 250 g mascarpone ostur (við stofuhita)
  • 50 g sykur
  • 8 stk lady fingers kex

wp-1598803251331.jpg

Aðferð

Ok við erum að tala um að þetta er espresso tiramisu martini og það þýðir að ég geri espresso martini hrist í shaker með klökum og allt, ekkert plat.  Ég mæli með að gera þrefalda uppskrift, þá er hægt að hella í sér glas til að njóta á meðan eftirrétturinn er lagaður.

Drífið í því að hella uppá gott sterkt kaffi, hellið því svo í skál svo það kólni hraðar.  Látið 250 g mascarpone ost og 1 egg ná stofuhita, mikilvægt.  Aðskiljið svo hvítuna og rauðuna.  Þeytið saman rauðuna og 50g sykur í skál.  Þegar þetta er komið saman þá bætið þið mjúkum mascarpone ostinum saman við ásamt 2 tsk Kahlua og þeytið þar til vel blandað saman eins og smjör.

Þeytið eggjahvítuna í annari skál þar til þið náið að mynda toppa.  Ekki alveg stífþeyta eins og við marens.  Leggið til hliðar.

Gerið espresso martini.   Takið fram hristarann og setjið nokkra ísmola í hann, svo 70 ml Kahlua, 70 ml kaffi og 70 ml Vodka (ef þið ætlið að gera þrefalda þá er betra að gera þriðja drykkinn sér).  Hristið eins og enginn sé morgundagurinn.  Takið fram 4 martiniglös og hellið í gegnum sigti í eitt glas, ef þið ætlið að fá ykkur þá eruð þið með 5 glös.   Brjótið svo 8 lady fingers í minni bita og leggið í skál og hellið svo espresso martini yfir og látið þetta blotna dálítið.   Raðið svo lady fingers í 3 martiniglös.

wp-1598803319912.jpg

Þvínæst blandið þið eggjahvítunni varlega saman við mascarpone blönduna.  Dreifið svo þessu yfir lady fingers lagið í glösunum þremur.   Grófsaxid suðusúkkulaði og dreifið yfir mascarpone lagið.

Næst setjið þið 200 ml rjóma í skál og svo hellið þið espresso martini úr hinu glasinu  saman við (sem sagt það fer heill einfaldur kokteill í þetta).  Þeytið svo rjóma martini blönduna þar til þið eruð sátt..

Dreifið rjómanum svo yfir mascarpone lagið, sigtið í lokin kakódufti yfir og setjið í kæli.   Þetta þarf amk 3 tíma í kæli en sólarhringur væri fullkomið, þá nær bragðið að koma fram og blandast vel.

Njótið!

Geggjuð frönsk sítrónu terta (lemon tart) með spriklandi kampavíni

Sigrún kynnti mér fyrir þessu fyrirbæri fyrir mörgum mörgum árum þegar við vorum eiginlega krakkar að skoða París. Hún pantaði sér lemon tart á litlu kaffihúsi skammt frá Eiffelturninum og auðvitað glas af kampavíni með. Þetta var geggjað!
Eftir þetta reyndum við að líkja eftir þessu hér heima enda á þeim tíma ekki hægt að fá neitt svipað hér á kaffihúsum. Stutta sagan er að þetta tókst bara engan vegin enda færni í eldhúsinu ekki uppá marga fiska þá.

Nú höfum við hins vegar náð meiri leikni í eldhúsinu. Ég ákvað fyrir líklega tveim árum að prófa aftur að endurlifa þessa hamingju og gerði sítrónu marens tertu að hætti Nigella Lawson. Ég setti þessa færslu inn hér undir „gómsæt sítrónu marengs terta..“. Þessi terta kom mjög vel út og gladdi konu mína mikið á þeim tíma. Þetta er líka mjög gott en samt ekki þessi Parísar upplifun. Við vorum svo sem sátt þar til við prófuðum lemon tart frá Gulla Arnar. Þessi gaur kann sitt fag, lemon tartið hans sendi okkur beint til Parísar og þá var ekki aftur snúið. Ég ákvað að reyna aftur, fór á netið og googlaði. Það er haugur af uppskriftum til, ég skil í raun ekki afhverju ég reyndi þetta ekki fyrr. Ég raðaði saman nokkrum sem ég fann og þetta er útkoman, alveg geggjað og alveg á pari við það sem við fengum í París. Veii!

Það sem þarf í þetta:

fyrir bökuna

  • 175 g hveiti
  • 25 g möndlu mjöl
  • 75 g flórsykur
  • smá salt
  • 90 g smjör
  • 35 g egg

fyrir lemon curd

  • 250 g smjör
  • 500 g sykur
  • 300 g sítrónusafi úr ca 8 sítrónum
  • 4 egg
  • rifinn sítrónubörkur úr tveim sítrónu

fyrir marensinn

  • ½ tsk „cream of tartar“
  • 200 g sykur
  • eggjahvítur úr 4 eggjum

Aðferðin

Bakan

wp-1597667547222.jpg

Byrjið á bökunni, það má gera hana daginn áður, líklega betra. Ég fann þessa uppskrift hér og fylgdi henni bara alveg. Kom mjög vel út.

Setjið þurrefnin í hræirvélaskál, 175 g hveiti, 25 g möndlumjöl, 75 g flórsykur og salt. Blandið saman. Skerið svo smjörið (90 g) í litla kubba og bætið út í og hrærið vel þar til deigið er orðið eins og blautur sandur.

Pískið egg saman í skál, vigtið 35 g og hellið varlega saman við deigið á meðan þið hrærið. Hættið að hræra þegar deigið hefur sameinast, ekki hræra áfram.

pakkið deiginu inn í matarfilmu, fletjið það út og myndið ferning. Kælið í 2-3 tíma þar til kalt í gegn.

Stráið hveit á borð og keflið. Strjúkið hveiti líka á deigið. Mýkið deigið með því að þrýsta á það með keflinu hér og þar. Forðist mikla snertingu með höndum, það gerir deigið klístrað. Þegar deig er farið að mýkjast er hægt að fletja út með keflinu. Gerið eins þunnt og þið viljið. Ég var með 28 cm form en það má vera hvernig stærð sem er. Fyrir þessa stærð er ágætt að fletja deigið út á smjörpappír. Þá er auðveldara að koma deiginu yfir í formið.

Hvolfið svo deiginu yfir formið og pressið því niður í öll horn. Fletjið svo út deigið í formið og jafnið. Gerið göt með gafli í botninn hér og þar til að forðast loftbólur. Skerið svo deigið af köntunum. Kælið svo aftur í ca klst. Bakið svo í ofni, 160 gráður í 15-20 mín þar til bakan er orðin gullin og falleg.

fyllingin, lemon curd

Ég skoðaði nokkrar uppskriftir á netinu, þessi gaur hér var eitthvað svo einlægur og skemmtilegur og fransk – enskan hans alveg dásamleg. Ég sé ekki eftir að hafa prófað þessa því útkoman var stórkostleg.

Setjið smjörið (250 g) í pott, stillið á lægsta hita og látið bráðna í rólegheitum meðan annað er græjað. Kreistið 7 til 8 sítrónur eða þar til þið eruð komin með 300 g vökva. Rífið börk af einni sítrónu ofan í og blandið saman.

Þegar smjörið er bráðnað kannið hitan, smjörið á bara að vera ögn volgt. Bætið sykrinum útí (500 g) og hrærið saman. Takið svo af hellunni og hrærið áfram. Bætið einu eggi samanvið á meðan hrært er stöðugt. Passa að hræra hratt og strax því botninn á pottinum er heitari en blandan sjálf. Því næst er næsta eggi bætt við á sama hátt og svo koll af kolli.

Færið pottinn aftur á helluna og hækkið hitann. Bætið svo sítrónublöndunni saman við og hrærið vel. Náið upp suðu, þetta þarf að vera kröftug suða en látið bara sjóða í nokkrar sek. Takið af hellunni, hrærið áfram um stund og látið svo kólna.

Þegar lemon curd er farið að stífna aðeins er henni hellt yfir bökuna. Látið svo standa í kæli í 3-4 klst. Þetta er ríflegt í þetta mót. Afganginn setjið þið bara í krukku og notið síðar!

wp-1597621543049.jpg

Marensinn

Það eru til alls konar tilfæringar yfir hvernig maður gerir ítalskan marens en hann er mjög flottur á svona tertur. Ég nennti samt ekki að spá í því heldur gerði klassískan franskan marens og flamberaði það svo með brennara í lokin.

Sem sagt, setjið 4 eggjahvítur í skál, helst að láta standa í amk 20 mín áður en þið hrærið þær saman. Passa að ekki komist arða af eggjarauðu með. Skálin þarf að vera þurr og alveg hrein. Hrærið svo saman með ½ tsk cream of tartar á meðalhraða til að byrja með. Þegar þetta virðist vera komið nokkuð vel saman og farið að lofta um þá má auka hraðann. Þegar hvíturnar eru orðnar mjúkar og hægt að mynda toppa þá fer sykurinn útí. Bætið 200 g sykri saman við, mjög varlega á meðan þið hrærið. Við erum að tala um ca matskeið í senn með mínotu millibili. Já þetta tekur tíma. Þegar allur sykurinn er kominn er hrært á góðum hraða áfram þar til blandan er orðin þykk og stíf og þið finnið helst ekki sykurkorn milli fingranna.

Dreifið svo marens yfi lemon curd lagið og skreytið að vild. Mér finnst koma vel út að gera svona toppa með sprautupoka og svo flambera með brennara. Það mætti meira segja brenna þetta meira næst sé ég.

Pörunin

Þetta er einfalt, hér er það kampavínið sem ræður ríkjum í pöruninni, þurrt gott kampavín. Gula ekkjan kom svakalega vel út, ísköld og ferskt með ögn sítrus tón og milda sætu tóna sem koma vel saman við sítrónukeiminn í tertunni. Sætan í marensnum dempast skemmtilega með þurru víninu og kolsýran hjálpar við að losa skánir af gómbogum. Í bjórveröldinni væru það einhverjir súrbjórar eða wild ale, jafnvel með ávöxtum eins og mango eða ástaraldin. Ekki þó of sætir bjórar. Mig langar t.d. að prófa Teig eða Holt frá RVK Brewing með þessu ef ég næ tökum á flösku.

Njótið vel og sendið mér endilega myndir ef þið nennið!

Indversk veisla að hætti Yesmine Olsson með íslenskri bjórpörun!

Ég hef alltaf verið spenntur fyrir indverskum mat en ég hef ekki hætt mér út í að prófa að elda hann sjálfur, það hefur bara vaxið mér í augum.  Mig hefur samt alltaf langað að læra að gera indverskt. Ég hnippti því hér um árið í nágranna okkar og vinkonu Yesmine Olsson sem eins og kunnugt er er snillingur í indverskri matargerð . Ég spurði  hana hvort hún vildi ekki elda með mér indverskt og bjóða góðu fólki í mat en til að selja henni hugmyndina kvaðst ég vilja prófa að para bjór með réttunum.  Yesmine líkaði hugmyndin vel en hún sagði mér reyndar eftir á að hún hafi ekki verið vongóð um að bjórpörunin kæmi vel út en samt spennt að sjá hvernig til tækist.  Hún er búin að taka þetta til baka núna enda kom það henni verulega á óvart hvernig til tókst. Reyndar mér líka!

Ég hef oft velt því fyrir mér hvernig það kæmi út að para bjór við indverska rétti, þetta er nefnilega mikil áskorun, þeir eru oft mjög sterkir og miklir réttirnir og það eru svo ótal mörg krydd í þeim, krydd sem maður þekkir ekkert allt of vel.  Ég sá mér því leik á borði, ég myndi læra smá inn á töfrandi heim indverskrar matargerðar á sama tíma og ég gæti prófað bjórpörunina.

wp-1590433486965.jpg

Yesmine er snillingur í eldhúsinu, ég vissi það svo sem en ég fékk bara meiri staðfestingu á því eftir þennan dag okkar saman í eldhúsinu, mikið var þetta gaman.  Við vorum reyndar nokkra daga að plana veisluna og svo þurftum við að hittast því ég þurfti að fá nákvæmar lýsingar á réttunum, við erum að tala um hvernig krydd, hvernig áferð, sætt, súrt, sterkt og svo framvegis.  Ég nefnilega þurfti að velja bjórinn út frá þessum upplýsingum eingöngu því ég hafði jú ekki smakkað neitt af þessu áður.  Út frá þessum upplýsingum gerði ég lista yfir þá bjóra sem kæmu til greina, ég valdi nokkra til að prófa með hverjum rétt bara svona til að hafa smá varnagla á. Það má ekki gleyma því að við vorum með 8 gesti í þessari veislu þannig að smá pressa! Ég vildi hafa þetta íslenskt bjórþema og auðvitað bara bjór frá landsins bestu brugghúsum!

Þetta lukkaðist svona líka vel, bæði að mínu mati og svo 9 annara reyndar líka, og maturinn guð minn góður…eða ætti ég frekar að segja Yesmine góða?  Ég ætla að rissa aðeins upp þessar paranir og láta eina og eina uppskrift fljóta með.

Djúpsteikt indverskt „dumplings“ með geggjaðri karrí mayo sósu!

Við byrjuðum á léttum forrétt svona til að koma öllum í gírinn.  Við vorum ofsalega heppin með veður og gátum því notið matar og drykkjar á svölunum hjá þeim Yesmine og Adda.  Í forrétt vorum við með djúpsteikt indversk „dumplings“ sem við höfðum fyllt með nautahakki og svínahakki sem legið hafði í indverskri kryddmarineringu yfir nótt.  Þetta er virkilega bragðmikill réttur en þó ekkert sem rífur allt of mikið í.   Við erum með öll klassísku kryddin í þessu, kóríander, múskat, engifer, túrmerik, karrí og meira til.  Þessi réttur er dálítil handavinna, jafnvel þó við séum búin að marinera deginum áður. En í góðum félagsskap og með gott hvítvín t.d. á kantinum þá er bara gaman!

wp-1590434071375.jpg

Ef maður er svakalega anal getur maður gert degið sjálfur en best er að kaupa dumplings deig bara tilbúið í asískum verslunum.  Þetta eru örþunnar deigplötur.  Bleytið alla kanta með vatni til að deigið klístrist saman í lokin þegar þið krumpið það saman.  Setjið hæfilegt magn af fyllingu á miðja örkina og lokið svo með fingrunum og þéttið vel.  Svo er þetta djúpsteikt í jurtaolíu þar til orðið gyllt og stökkt.  Látið svo standa á grind!

Fyllingin er hér

  • 250 g nautahakk
  • 250 g svínahakk
  • 1 laukur
  • 1 rauðlaukur
  • 1,5 dl vorlaukur
  • 2 skalottlaukar
  • 4 hvítlaukssrif
  • 25 g ferskur kóríander
  • 3 stórir tómatar
  • 2 cm engiferrót
  • 1/4 tsk múskat
  • 1/2 tsk túrmerik
  • 2 tsk karrí
  • 2-3 ferskir rauðir chilipipar eftir smeklk
  • 3-4 msk matarolía
  • 5 stk döðlur
  • salt og pipar

Allt nema kjötið er blandað vel saman í matvinnsluvél.  Svo er kjötinu bætt útí og hrært saman.  Látið svo standa yfir nótt helst.  Amk nokkra tíma.

Með þessu vorum við  svo með alveg splunku nýja uppfinningu, karrí mayo sósu sem Yesmine töfraði fram.  Yesmine sagðist hafa fengið innblástur frá kóríander mayo sósunni minni og langaði að prófa að gera eitthvað svona indverskt twist með majonesi.  Hún hefur annars aldrei áður notað majones í sinni matargerð.  Ég viðurkenni að ég er pínu stoltur sko.  Þessi sósa er kreisí!  Krrrrreisí og ég sök á því að hún varð til!

Indversk karrí mayo sósa

  • ca 2-3 bollar (US cups) majones
  • ca 1/2 mtsk kapers
  • 2-3 litlar súrar gúrkur (pikles)
  • 1-2 mtsk engiferrót
  • 1 grænn chili ávöxtur
  • 3 hvítlauksgeirar
  • 1 mtsk gott karrí krydd
  • sjávarsalt eftir smekk

Aðferð.

Ok, þetta er í fyrsta sinn sem þessi sósa er gerð, ég gerði hana svo aftur daginn eftir nokkurn veginn svona.  Menn verða svo bara að smakka til, meiri hvítlauk eða meira salt eða karrí.  Allt eftir smekk.  Þetta á samt að vera karrí mayo þannig að meira karrí en minna.   Þetta er í raun allt sett saman og maukað með töfrasprota.  Ef menn vilja bera fram í skál með smá bitum í þá er það bara fínt en ef við viljum bera sósuna fram í sprautuflösku þá þarf að mauka þetta vel þannig að engir bitar eru eftir í maukinu.  Bæði betra!

Þessi sósa er alveg mögnuð með þessu og í raun með ansi mörgum réttum sé ég fyrir mér.  Ég veit að þessi sósa mun slá rækilega í gegn í sumar!

wp-1590434139611.jpg

Pörunin!

Hér erum við með stökka áferð, það er fita í deiginu og djúpsteikingunni og svo er grísahakkið feitt og djúsí inní og kryddin áberandi.  Karrí mayo sósan er svo alveg sér á báti og rífur vel í með hvítlauk og karrí.   Þetta er geggjað eitt og sér en enn betra með góðum drykk.   Hér þarf bjór sem heldur velli gagnvart kryddunum og bragmikilli sósunni en þó ekki þannig að hann taki öll völd.  Við viljum njóta líka kryddanna og kjötsins.  Með feitum mat og sósum eins og hér er er kjörið að nota bjór með smá beiskju bit, IPA er fullkominn í verkið og svo auðvitað gaman að para Indian Pal Ale við Indian food ekki satt, svona bara vegna upprunans?  Beiskjan í bjórnum klippir upp fituna í þessum rétt og opnar allt upp á gátt og hreinsar munn og kok af fitubrákinni sem myndast.  Ég ákvað að fara hér í minn uppáhalds íslenska IPA/pale ale sem er frá Malbygg brugghús og heitir einfaldlega Kisi. Mér er sama hvað stendur á dósinni, þetta er safaríkur djúsí NEIPA (new england IPA) þar sem humlarnir fá að njóta sín með ávaxtakeim á borð við mango og ástaraldin en svo er líka örlítið beiskjubit sem sinnir sínu hlutverki eins og áður er ritað.

Þetta er fullkomið, öll þessi krydd , léttur hiti og þessi feita áferð steinliggja með þessum frábæra bjór.  Ég elska líka kóríander og IPA, það er eins og þetta tvennt hafi verið fundið upp saman. Vá!  Það besta er að Yesmine, sem ekki er mikið fyrir bjórinn, var alveg dolfallin.  Henni fannst þetta koma svakalega vel út og þá er takmarki mínu náð.

Aðalréttirnir, lamba pylsu grillspjót og kjúklinga grillsprjót með spínat kóríandersósu og alls konar meðlæti.

wp-1590434012790.jpg
Eggaldinn í alveg nýjum búning

Við ákváðum að hafa nokkra rétti sem fólk bara blandar saman á einn disk, það voru bæði stærri og minni réttir.  Við vorum með hvítlauks naanbrauð með, saffran hrísgrjónum, magnað döðlu  raita og svakalega góð ofnbökuð eggaldinn með indverskum kryddum toppuð með sósu af óþekktum toga, já ég gat ekki fylgst með öllum töfrunum hennar Yesmine.

Fyrir lambagrillspjótin (fyrir 4-5)

  • 400 g lambaprime, skorið í hæfilega bita
  • 400 g kryddpylsur, tvær gerðir, t.d. chorizo pylsur og eitthvað annað gott
  • 1/2 dl repjuolía
  • 5 kardimommur
  • 10 negulnaglar
  • 5 cm kanilstöng
  • 1 tsk túrmerik
  • 5 svört piparkorn
  • 2 tsk cuminfræ
  • 2 stórir laukar, skornir í fernt
  • 5 hvítlauksrif
  • 2 grænir chilibelgir með fræjum
  • 5 cm af ferskri engiferrót, afhýdd, skorin gróft
  • safi úr 1/2 sítrónu
  • 1 tsk sjávarsalt

Aðferðin

Fyrir marineringuna á kjötinu.  Taktu öll kryddin á disk.  Taktu til pönnu og hitaðu hana vel upp.  Svo eru kardimommur, negulnaglar, kanilstöng, pipar og cuminfræ þurristað á pönnunni í 30-40 sek eða þar til kryddin breyta um lit og gefa frá sér frábæran ilm.  Notaðu svo mortél til að merja öll kryddin nema túrmerik.   Setjið öll hráefnin í matvinnsluvél ásamt kryddunum og maukið saman.  Veltu lambakjötinu vel uppúr marineringunni, skerðu líka pyslurnar í hæfilega bita og blandaðu þeim saman við lambið.  Látið standa yfir nótt.

wp-1590433676693.jpg

Sama dag og rétturinn er borinn fram.   Leggi tréspjót/grillpinna í bleyti, skerið niður gula papriku og rauðlauk í hæfilega bita eftir smekk.  Raðið svo lambi og pylsum saman á spjótin og inn á milli lauk og papríku.  Látið þetta líta dálítið vel út.  Pysla og kjöt saman samt, þannig renna kryddin úr hvoru tveggja saman við grillunina.

Auk lambaspjóta vorum við með kjúklingaspjót með dásamlegri spínat kóríandersósu.  Yesmine notar alltaf úrbeinað lærkjöt þegar hún notar kjúkling, ég er algjörlega sammála, þetta er besta kjötið, svo djúsí og gott og dregur í sig öll kryddin í marineringunni.  Þessi réttur var bragðmikill líka, ekki þó eins spicy og lambaspjótin en í sósunni er ríkjandi kóríander og hvítlauksbragð.  Ofsalega gott saman.

Hrísgrjón eru ómissandi með indverskum mat, þau vissulega drýgja máltíðina en eru líka frábær til að sjúga í sig sósurnar á diskunum, ekkert má fara til spillis.  Með mjög sterkum mat er líka gott að nota hrísgrjónin til að dempa brunann.  En hrísgrjón eru ekki bara hrísgrjón, Yesmine notar nánast eingöngu basmati grjón t.d. en það er mikill munur á gæðunum.  Þetta kvöld komst ég svo að því að ég og Sigrún mín höfum verið að elda hrísgrjón vitlaust alla okkar tíð.  Ég komst líka að því að hægt er að gera fáranlega gómsæt hrísgrjón sem meðlæti.

wp-1590433511942.jpg
Saffran þræðir, gull kryddanna!

Saffran hrísgrjón

  • 5 dl basmati hrísgrjón
  • 1 L vatn
  • 1 mtsk isio 4 olía eða 2 mtsk ghee
  • 1/2 – 1 tsk saffran þræðir
  • 1/2 sítróna, bæði hýði og safi
  • 1 tsk salt
  • 2 tsk brún sinnepsfræ (fæst í Fiska)

Setjið vatn í pott (1 L) og látið suðuna koma upp.  Bætið við rifnum sítrónuberki og safa (1/2 sítróna) út í vatnið ásamt saffran þráðunum og látið renna saman í 5 mín.  Á meðan notið þið tíman og setjið olíuna eða ghee í pott og náið upp hita.  Setjið sinnepsfræin varlega útí en passið ykkur þau geta poppað og þá slettist á ykkur heit ólían.  Hrærið í fræunum stöðugt í 30-40 sek, bætið svo þurrum hrísgrjónumum útí pottinn og blandið við fræin í 1-2 mín.

Bætið þvínæst hrísgrjónunum ásamt salti (1 tsk) út í saffran vatnið og hrærið létt saman og setjið svo viskastykki yfir pottinn og lok yfir og látið malla í 10 mín.  Ekki bullsjóða.  Forðist að hræra mikið svo þið brjótið ekki grjónin.  Þvínæst slökkvið þið á hitanum og látið pottinn standa í aðrar 10 mínútur.

Þetta er svakalega gott með öllum þessum réttum.

Gott naan brauð er líka ómissandi með indverskum mat.  Það má gera það frá grunni sem er auðvitað skemmtilegast og svo grilla á grilli eða ef maður á tandori ofn, þá notar maður hann auðvitað.   Gott er að útbúa einhverja góða olíu, t.d. hvítlauskolíu og pennsla brauðin fyrir eldun.

Annað sem er mikilvægt að mínu mati er eitthvað ferskt og létt til að milda tungu og hvíla frá sterkum kryddum.  Klassískt er gúrku raita sem þó mér finnst stundum dálítið of klassískt jafnvel.  Yesmine bauð uppá aðeins aðra útgáfu, alveg hrikalega góða döðlu raita sem koma æðislega vel út með öllu þessu hérna, döðlurnar gefa skemmtilega sætu í þetta allt saman.

Loks var það ofnbakaða eggaldinið, það var svakalegt.  Maður er vanur að grilla þetta og setja salt og olíu á og það kemur vel út en þessi útgáfa var stórkostleg, öll þessi indversk krydd, radísuspírur og svo þessi dularfulla sósa ofan á.  Úff úff úff!

Pörunin

En ok, pörunin, þetta var pínu flókið en svo í raun ekki.  Hér gat ég ekki parað einn bjór við hvern rétt því við buðum upp á þetta allt saman í einu, sem einn rétt með mörgum vinklum.  Ég prófaði nokkra bjóra með þessu.  Mér fannst borðleggjandi að velja frekar látlausa bjóra en sem þó gætu höndlað sterk krydd á sama tíma og þeir yfirbuguðu ekki látlausu kryddin sem maður vill ekki missa af eins og t.d. safran eða múskat.  Hrísgrjón er lykil meðlæti í svona veislu og því tilvalið að velja bjór sem bruggaður er með hrísgrjónum, bæði tengja grjónin vel við grjónin í matnum en svo gefa þau fyllingu og dempa brunann frá „heitum“ kryddum á borð við chili eða sterk karrí.  Ég valdi hrísgrjóna lager í þetta verk en það vill svo til að það eru alla vega tveir slíkir í boði akkúrat núna frá íslenskum framleiðendum.

wp-1590434301967.jpg

Sudoku Rice Lager frá Borg er frábær lager.  Hann er þéttur og elegant með ögn sætukeim og afar látlausu humalbiti sem er þó til staðar.  Mér fannst borðleggjandi að tefla fram lager með grilluðum pylsum, kjúlla og lambi og þetta svínvirkaði.  Sætan í korninu dempaði ögn kryddin en slökkti samt alls ekki á þeim heldur tvinnaðist bragðið frá bjórnum fallega saman við hrísgrjónin og rest.   Nett beiskjan var nægileg til að vinna á fitunni frá kjötinu og sósunum.  Mjög gott combo.

wp-1590609667787.jpgÖnnur pörun sem kom vel út var Yuzu Rice Lager frá RVK Brewing.  Þessi bjór er líka bruggaður með hrísgrjónum en einnig yuzu ávexti sem er súrt sítrusaldin frá Austurlöndum fjær.  Þessi bjór er afar ferskur og sumarlegur og smellpassar á pallinn í sólinni en gengur líka vel hér af sömu ástæðum og hér að ofan.  Súraldinið gefur svo auka vinkil með þægilega sýru sem gengur vel á móti þungum matnum og styður skemmtilega við ferska döðlu raita-ið.   Gestum þótti þetta skemmtilegur valmöguleiki með matnum.

Það sem hins vegar sló í gegn hjá mér persónulega, og það voru nokkrir sammála mér í því var næsti bjór.  Ég var reyndar á höttunum eftir rauðöli eða amber bjór fyrir verkið, jafnvel hefði bock geta komið vel út en þau brugghús sem ég skoðaði, bestu íslensku brugghúsin okkar auðvitað, áttu slíkan bjór ekki til á flöskum eða dósum.   Hér langaði mig að nota bjór með mikinn maltkarakter en sem væri þó léttur og meðfærilegur.  Ofannefndir bjórstílar eru dekkri en hinn ljósi lager því í þá er notað aðeins meira ristað korn/malt sem gefur af sér ögn karamellukeim og rist.   Ég sá fyrir mér fullkomna tengingu við grillaða kjötið sem fær jafnan á sig ákv karamellu áferð við grillunina.  Það er líka vel þekkt að sætukeimurinn frá maltinu komi ofsalega vel út á móti sterkum kryddum og er jafnvel það eina sem gengur á móti sterkustu chiliréttum þeirra Indverja.

Það var Maggi hjá RVK brewing sem reyndar líka er með sitt eigið brugghús, sem ég hef fjallað stuttlega um áður Mono, sem benti mér á aðra mögulega lausn.   Þeir Mono strákar voru nýlega komnir með bjór á flösku sem gæti gengið, svo kallaður märtzen , sem er þýskur lager sem menn tengja jafnan við Oktoberfest þar í landi.  Þetta er „maltforward“ bjór og oft með kopar til rauðum blæ.  Bjórinn er lager og yfirleitt með létta til meðal fyllingu og litla beiskju.  Þetta fannst mér frábær hugmynd og ákvað að prófa.

wp-1590434346705.jpg

De Stijl heitir kauði og er samstarfsbrugg með Ekta Brewing sem ég þekki lítt til.  Bjórinn var töluvert mildari en ég átti von á og ekki eins maltaður og amber en maltið þó vel merkjanlegt.  Bjórinn er þó með áberandi meiri bragðprófíl ef miðað er við hrísgrjóna lagerinn sem ég fjallaði um að ofan.  Þessi bjór algjörlega negldi þennan mat og gerði nákvæmlega það sem ég hafði vonast til.  Maltsætan og ristin dönsuðu vel með grilltónunum frá kjötinu, indversku kryddin komu líka skemmtilega vel út með þessum bjór og tvinnuðust kóríander, kardimommur, negull og allt hitt skemmtilega við karamelluristina frá korninu.   Sterkustu tónarnir frá lambaspjótunum milduðust ögn og lyftu meira að segja upp bjórnum og gerðu hann meiri.  Kolsýran var líka kærkomin á móti öllum þessum brögðum og fitunni en kolsýran „skefur“ einhvern veginn palletuna og opnar fyrir næsta bita.

Frábær pörun!

Svakaleg sænsk „kladdkaka“ með indversku chili súkkulaði ganache og þeyttum mynturjóma

wp-1590434457338.jpg

Góð veisla þarf að enda eftirminnilega að mínu mati og þessi gerði það svo sannarlega.  Jafnframt var hér besta pörun kvöldsins sem kom meira að segja mestu efasemdamönnum á óvart.  Þessi kaka er svakaleg, djúsí og klístruð með fullfermi af súkkulaði alveg eins og ég vil hafa það í eftirrétt.  Ofan á þessu var svo þykkt nánast eins og fudge súkkulaðikrem með indversku chili kryddi sem reif af og til í.  Svo kom stökk áferð frá ristuðu pistasíuhnetunum ofan á.  Ekki má svo gleyma þeytta rjómanum með fersku myntunni en myntan og kryddin í kökunni dönsuðu vel saman og myntan gefur líka léttleika og ferskan blæ í þetta allt saman.

Ég mun pottþétt gera sér færslu hér innan skamms bara með uppskrift af sænskri súkkulaðikladdköku með chili súkkulaðikremi og svo þessari pörun.   Þessi eftirréttur er svakalega þungur en gefandi, mér datt í hug að prófa tvo bjóra með.  Mjög hefðbundið er að nota stout, porter eða imperial stout með súkkulaðieftirréttum.  Hér er það tengingin við kaffið sem er augljós enda oft hægt að finna kaffitóna og súkkulaði í þessum bjórum.  Humlarnir gefa svo beiskjuna sem létta dálítið á þunganum.  Ég bauð því uppá Garúnu frá Borg.  Þetta er svakalega flottur bjór, rótsterkur og mikill með ögn sætu en þó vegur beiskjan þyngra og svo áberandi kaffiristin, jafnvel ögn lakkrís og súkkulaði.    Þetta er bjór fyrir þróttmikið fólk með sterka palletu.  Bjórinn gengur einn og sér sem eftirréttur ef út í það er farið.  Þessi pörun var skemmtileg, kaffið og súkkulaðið tengdu vel við og beiskjan opnaði vel upp þunga kökuna.  Beiskjan dró líka mikið upp chili hitann í kreminu sem var mjög skemmtilegt því ef eitthvað er hefði mátt vera meira chili í kökunni að mínu mati.

wp-1590434520599.jpg

Það sem sló hins vegar öll met var Blágosi frá Microbar & Brew (Gæðingi brugghús).  Blágosi er ofsalega skemmtilegur súrbjór eða svo kallaður gose sem er þýsk ættaður súrbjór, Blágosi er í grunninn Skyrgosi ketilsýrður með skyri og bragðbættur með bláberum, heilum helling alveg.   Bjórinn er ofsalega þægilegur með léttri sýru, ögn skyrkeim og svo ljómandi bláberjasýru.   Mér datt í hug að tefla þessum bjór fram á móti þungri kökunni til að létta aðeins á öllu.  Svo eru ber á borð við hindber, bláber og jarðaber alveg frábær með súkkulaðikökum yfirleitt.  Gosið í bjórnum og sýran opnuðu allt upp á gátt gerði kökuna auðmeltari og skópu pláss fyrir næsta bita, berin tvinnuðust dásamlega saman við súkkulaðið og sýran skapaði skemmtilegar andstæður við chili brunann.   Þetta var alveg mögnuð pörun og mun ég klárlega hafa þetta í mínum veislum þegar ég vil slá í gegn.

Djúsí þriggja hæða súkkulaðikaka

Hér á þessum bæ elskum við súkkulaði og súkkulaðikökur já og í raun allt sem er með súkkulaði, meira að segja súkkulaðibjór.  Við höfum prófað ýmsar uppskriftir en ef maður þarf að svala súkkulaðiþörfinni í eitt skipti fyrir öll þá er það þessi hér.  Þessa uppskrift fékk Sigrún kona mín frá vinkonu okkar Elvu Brá sem er bökunarmeistarinn í vinahringnum okkar.

Þessi er svakaleg, þá er ég ekki að meina af því að hún sé svo þung og tormelt heldur er hún svo lungnamjúk og með svo ríkulegt súkkulaðibragð að það hálfa væri nóg.  Það besta við þetta allt er að það er frekar einfalt að baka þessa köku.

Það sem þarf í þessa elsku:

  • 1 og 1/2 bolli (355 ml) mjög heitt eðal kaffi
  • 85 grams suðusúkkulaði, saxað
  • 3 bollar (600 g) sykur
  • 1 og 1/4 tsk matarsalt
  • 3/4 bollar (175 ml) jurtaolía
  • 1 og 1/2 bolli (355 ml) súrmjólk eða AB mjólk
  • 3/4 tsk vanilludropar
  • 3 eggs (stór)
  • 2 og 1/2 bolli (315 g) hveiti
  • 1 og 1/2 bolli (ca. 130 g) ósætt bökunarkakó
  • 2 tsk (10 grams) matarsóti
  • 3/4 tsk (4 grams) lyftiduft

fyrir kremið

  • 455 g suðusúkkulaði
  • 1 bolli (235 ml) rjómi
  • 2 mtsk (25 grams) sykur
  • 2 mtsk (40 g) sýróp, ljóst
  • 55 g ósaltað smjör

wp-1586615603980.jpg

Aðferðin

  1. Saxið súkkulaði (85g) frekar fínt og setjið í vel stóra skál,  Bruggið kaffi, hafið það sterkt og mjög heitt.  Hellið kaffinu yfir og br æðið þannig súkkulaðið saman við. Látið standa svona í 4-5 mín og hrærið svo vel saman þar til mjúkt og fallegt.  Bætið svo sykri (600g) , salti (1 og 1/4 tsk), súrmjólk (1 og 1/2 bolli), vanilludropum (3/4 tsk) og olíu (3/4 bolli) saman við og blandið vel.  Hrærið svo saman við eggjunum, einu í einu.
    .
  2. Sigtið svo yfir þetta hveiti (2 og 1/2 bolli), bökunarkakói (1 og 1/2 bolli), matarsóta (2 tsk) og lyftidufti (3/4 tsk).   Blandið svo öllu vel saman þar til orðið alveg án köggla.
    .
  3. Hitið ofninn í 150 gráður, takið til 3 hringlaga form, 18 cm að þvermáli.  Smyrjið að innan með smjöri og deilið deiginu í formin.   ATH það verður dálítill afgangur sem er tilvalinn í nokkur bollakökuform.  Bakið svo í ca 30 mín, við byrjuðum að kanna deigið eftir 30 mín, botnarnir eru tilbúnir þegar þið stingið tannstöngli í miðjuna og ekkert kemur á hann.
    .
  4. Takið botnana út og látið kólna alveg.
    .
  5. Þá er það kremið. Fínsaxið súkkulaðið (455 g) og setjið í skál.
    .
  6. Setjið rjóma (235 ml), sykur (2 mtsk) og sýróp (2 mtsk) í pott yfir vægan hita.  Pískið vel þar til sykur er leystur upp.  Látið suðuna koma upp.  Takið pottinn af hellunni og hellið yfir súkkulaðið og pískið vel þar til súkkulaðið er alveg bráðnað samanvið.   Skerið smjör í kubba og bætið saman við.  Hrærið áfram þar til allt er sameinað og fínt.
    .
  7. Látið kremið kólna vel niður, hrærið annað slagið í.  Sumir tala um að gera þetta yfir ísbaði til að hraða ferlinu.  Þegar kremið er orðið stífara og eins og þykkt smjör er það orðið tilbúið.  Ef þetta verður of stíft þannig að það er ekki hægt að smyrja má aðeins hita aftur upp.
    .
  8. Svo er bara að smyrja þessu á botnana og raða þeim upp.  Hafið alveg 7-8mm þykk lög.  Smyrjið líka ofan á kökuna og hliðarnar.  Skreytið að vild.  Sigrún bakaði þessa köku núna um Páskana og skreytti með litlum súkkulaði eggjum og kanínum.

Njótið.  Kakan er geggjuð daginn eftir og á degi tvö enn betri.  Það er augljós pörun með þessu, mjúkur porter eða stout, jafnvel imperial stout.

Banana Toffee Ostakaka

Sunnudagar eru svona tiltektar dagar hjá okkur, það er einhvern veginn ekki hægt að liggja með tær uppí loft án þess að fá samviskubit.  Ég hef samt komist hjá því stundum að vera á haus í tiltekt ef ég tek mig til og baka.  Ég er lengi að baka, mikill dútlari þannig að sunnudagar eru orðnir dálítið bökunardagar hjá okkur.  Ég sé þá um eldhúsið og skil það eftir eins og dauðhreinsaða skurðstofu…….. fyrir aðgerð það er að segja.

Ég leitaði einu sinni sem oftar til Nigellu Lawson í leit að ostakökuuppskrift, ég meina þessi kona er nautnaseggur fram í fingurgóma og hún kann svo sannarlega að gæla við bragðlaukana.  Ég datt niður á þessa hér og sá allt í einu lausnina á bananavanda heimilisins.   Þannig er að við kaupum inn banana en það þarf að gera eftir ströngum reglum því sú yngsta vill helst hafa þá græna og harða en unglingurinn vill hafa bananana gula og mjúka en alls ekki með neinum blettum á.  Það endar því oft þannig að einhver er ósáttur og bananarnir fá að dúsa í ávaxtaskálinni þar til þeir eru svo svartir að það er varla hægt að handfjatla þá.   Hér er komin uppksrift sem krefst þess að bananarnir séu vel þroskaðir og djúsí.

wp-1581262518647.jpg

Alla vega!

Það sem þarf

Í botninn

  • 250 g Digestive kex
  • 75 g ósaltað mjúkt smjör

fyrir fyllinguna

  • 4 ofþroskaðir bananar, milli stórir
  • 60 ml sítrónusafi
  • 700 g rjómaostur, við stofuhita (mikilvægt)
  • 6 stór egg
  • 150 g mjúkur ljós púðursykur

fyrir toffee sósuna

  • 100 g ósaltað smjör
  • 125 ml gyllt sýróp
  • 75 g mjúkur ljós púðursykur

Aðferðin

Ok til að svekkja ykkur, þá þarf kakan að standa yfir nótt þannig að planið tímanlega.

  1. Takið til springform, 23cm í þvermál.  Smyrjið vel að innan með smjöri eða klippið til smjörpappír í botninn.  Pakkið forminu svo vel inn í álpappír að utan.  Þetta á að vera þannig að vatn sleppi ekki inn í formið þegar það er sett í vatnsbað.  Það má alls ekki leka.
    .
  2. Setjið kexið (250g) og mjúka smjörið (75g) í matvinnsluvél og maukið þar til þetta er orðið eins og rakur sandur og farið að klumpast ögn saman.   Pressið blöndunni svo í botninn á springforminu og setjið inn í kæli
    .
  3. Stappið banana (4 stk) með gafffli í skál, bætið við 60ml sítrónusafa og leggið til hliðar.
    .
  4. setjið mjúka rjómaostinn (ath þarf að vera við stofuhita, ekki beint úr kæli) í hrærivél og hrærið þar til orðið silkimjúkt og fínt, bætið þá 6 eggjum og 150g púðursykur samanvið.   Hrærið áfram til að blanda þessu vel saman.  Loks fer bananastappan með sítrónusafanum útí.  Hrærið þar til þið eruð komin með silkimjúka blöndu.
    .
  5. Takið formið úr kæli og hellið blöndunni yfir.  Finnið til djúpa ofnplötu og leggið formið í miðjuna.  Hitið ofn í 170 gráður.  Sjóðið vatn og látið það standa ögn.  Þegar ofninn er orðinn heitur setjið þið ofnplötuna í ofninn og hellið vatninu ofan í þannig að það nái upp á mitt springformið.  Vatnsbaðið gerir baksturinn hægari og jafnari þannig að kakan verður meira frauðkennd og „fluffy“.
    Bakið í um klst, ég var með 55 mín.  Tékkið á kökunni eftir klst, hún á að vera orðin stíf í yfirborði en dálítið eins og óbökuð í miðjunni þegar þið ýtið við henni.
    .
  6. Takið kökuna út og látið kólna, setjið svo álpappír yfir hana og inn í ískáp í sólarhring.  Takið kökuna út um 1/2 klst fyrir framreiðslu.wp-1581260663814.jpg
    .
  7. Toffee sósuna má gera hvenær sem er, 1-2 dögum áður eða á meðan kakan er í ofninum.  Aðal málið er að hún á að vera köld þegar hún er sett á. Þetta er skv Nigellu, ég gerði þetta fyrst deginum áður en þá var sósan orðinn mjög stíf og ómeðfærileg.  Þurfti að hræra upp og hita í örbylgjuofni.  Líklega best að gera þetta sama dag og þið berið kökuna fram.
    Setjið 100g smjör, 75g ljós púðursykur og 125ml ljóst sýróp.  Látið malla á lágum hita.  Hrærið öðru hvoru í.  Þegar þetta er farið að búbbla og farið að myndast froða (sjá mynd) þá látið þið búbbla áfram í um 1-2 mín og takið svo af hitanum og látið kólna ögn.  Svo er þessu hellt í könnu og látið kólna alveg niður.  Ekki í kæli samt.
    .
  8. Takið kökuna út um 1/2 klst fyrir framreiðslu, opnið springformið og flytjið kökuna varlega yfir á kökudisk.  Hrærið í toffee sósunni og hellið henni svo yfir.  Ekki hella öllu því það er fínt að hafa aukalega fyrir þá sem vilja bæta enn meiri sælu í líf sitt eftir á.

Pörunin

Það er hægt að leika sér dálítið hér, t.d væri gaman að prófa bananastout með þessari köku en hann er svo sem ekki auðfundinn hér heima og gæti orðið heldur væmin útkoma.  Imperial stout er augljós uppástunga en hann hefur sætuna, kaffiristina og svo auðvitað er oft áberandi súkkulaðikeimur af slíkum bjór en bananar og súkkulaði er vel þekkt blanda.  Founders Imperial Stout, sem ég held að fáist enn hér heima er frábær með þessu, þar er súkkulaðikeimur í bragði og ögn kaffirist.  Stundum finnst mér bananakeimur af bjórnum líka.

Annar skemmtilegur möguleiki er að tengja við karamelluna, þá er hægt að para bjór með mikinn maltkeim sem  stundum minnir á karamellu, eins og t.d. bock eða doppelbock, scotch ale væri líklega alveg magnaður með líka, verst að það er ekki hægt að fá slíkan bjór hér heima síðast þegar ég vissi.

 

Súkkulaði hnetusmjörs ostakaka, svakalega gott!

Ég hef aldrei gert alvöru ostaköku áður, mig langaði að prófa, það er fyrsti febrúar 2020, janúar verið algert helvíti, alls konar slys og snjóflóð ofl.  Nú er kominn tími til að njóta og hafa það gott.  Ég skoðaði nokkrar uppskriftir og datt inn á þessa, súkkulaði hnetusmjörs ostakaka frá Nigella Lawson.  Ég elska hnetusmjör, sérstaklega þegar það er tengt við súkkulaði og því ákv ég að prófa.  Ath, þessa þarf að baka deginum áður en á að njóta.

Það sem þarf í þetta

Fyrir botnin

  • 200 g digestive kex
  • 50 g salthnetur
  • 100 g sökkt súkkulaði (t.d. dropar)
  • 50 g ósaltað mjúkt smjör

Fyrir fyllinguna

  • 500 g rjómaostur
  • 3 stór egg
  • 3 eggjarauður aukalega
  • 200 g sykur
  • 125 g sýrður rjómi
  • 250 g fínt hnetusmjör

Fyrir kremið

  • 250 g sýrður rjómi
  • 100 g rjómasúkkulaði dropar
  • 30 g mjúkur ljóst púðursykur

wp-1580730874813.jpg

Aðferðin

Setjið kexið (200g), 50g salthnetur, dökka súkkulaðið (100g) og 50g mjúkt smjör í matvinnsluvél og maukið þar til þetta er orðið eins og rakur sandur og klumpast saman.

Finnið til hringlaga springform, 23cm í þvermál, dreifið úr deiginu í botninn, pressið niður í botninn og aðeins upp með hliðum. Setjið þetta í kæli meðan þið græjið annað. ATH ég smurði formið vel með smjöri en það er líklega betra að hafa bökunarpappír í botninn?

Takið til skál fyrir hrærivél, setjið allt í sem fer í fyllinguna, 500g rjómaostur, 200g sykur, 3 egg, 3 eggjarauður, 125g sýrður rjómi, 250g hnetusmjör og hrærið vel saman þar til orðið mjúkt og án kekkja. Hellið þessu svo yfir kexbotninn og inn í ofn.  170 gráður í um 50 mín.

Kakan á að vera eins og bökuð í yfirborðinu en ekki í gegn, dálítið eins og himna sem hægt er að rjúfa með skeið.  Takið kökuna út og látið standa meðan þið gerið kremið.

Í lítinn pott setjið þið 100g rjómasúkkulaði, 250g sýrðan rjóma og 30 g púðursykur.  Kveikið undir, og látið bráðna saman á vægum hita.  Hrærið stöðugt með sleikju td þannig að ekkert brenni við botn.  Muna, vægur hiti.  Þegar þetta er bráðnað vel saman takið þið pottinn af og hellið þessu varlega yfir kökuna.

Þetta ætti að fljóta vel yfir kökuna en ef það er þykkt má nota skeið til að dreifa yfir en passið þá að rjúfa ekki yfirborðið á kökunni, þá blandast kremið dálítið við deigið undir yfirborðinu.  Þetta fer svo inn í ofn í svona 7-10 mín.

Svo látið þið kökuna kólna í forminu og setjið matarfilmu eða álpappír yfir og inn í ísskáp í sólarhring.  Kakan er nú klár í slaginn.

wp-1580732178204.jpg

Pörunin

Hér erum við með ofsalega þunga og mikla köku.  Ein lítil sneið er meira en nóg.  Með þessu væri gott að hafa stout eða jafnvel porter sem er mildari og léttari.  Ekki skemmir ef notað er kaffi í bjórinn en oft er bara kaffikeimur af brennda maltinu sem notað er í þessa stíla.  Nettir humlar rífa aðeins upp þetta mikla þunga og kaffiristin tónar vel við kökuna og súkkulaðið í kexbotninum.   Hnetusmjör og stout er líka vel þekkt blanda enda mörg brugghús sem gera hnetusmjörs kaffistout.  Imperial stout er líklega of þungt en mig langaði samt að prófa og fór því í Bjössa Bollu frá Malbygg  en þessi bjór er frábær ef þú fílar bakkelsisbjór (pastry beer) yfir höfuð.  Í bjórinn nota strákarnir ma. kókosbollur sem skapa sætuna og fyllingu líka.  Þetta er mikill bjór og dálítið þungur, sætan í bjórnum gæti reynst mönnum of mikið með kökunni en ég elska sætt og mér fannst þetta algjört gúmmilaði saman.   Ég var samt alveg búinn á því eftir eina sneið.

Hin árlega lagköku og bjórkeppni Nollanna 2019

„hugmynd kviknaði einmitt í góðra vina hópi fyrir ári síðan“

Bjór er hægt að para við nánast hvaða rétt sem er og er þá jólalagkaka, randalína, vínarkaka eða hvaða nöfnum hún nefnist, engin undantekning, aðal málið er bara að fá hugmyndina.
…..Þessi hugmynd kviknaði einmitt í góðra vina hópi fyrir ári síðan þar sem nokkrir góðir nágrannar í Norðlingaholti voru saman komnir yfir öli heima hjá Bjór & Matur. Einhverjir byrjuðu að monta sig af lagkökum sínum, menn töldu auðvitað sína köku bestu lagkökuna og gerðu mikið úr eigin hæfileikum í bakstri og það lá því beinast við að sannreyna það fyrir næstu jól sem eru einmitt þessi jól 2019.
…..Það voru þó einhverjir sem ekki voru eins roggnir enda er kökubakstur er alls ekki allra.  Því kom upp sú hugmynd að tefla líka fram bjór með kökunum, einhvern magnaðan sem líka parast vel við þá köku sem menn reiddu fram.

Í upphafi var þetta að mestu leiti í gríni gert en þegar líða fór á árið fóru menn að huga að þessum viðburði og að endingu ákveðið að gera þetta að veruleika enda voru menn farnir að draga heim í bú alls konar furðulega og spennandi bjóra á ferðalögum sínum um heiminn, eitthvað sem gæti gengið með lagköku.

Til að gera mjög langa loku frekar stutta þá varð úr að núna þann 19.12.19 mættu 12 sigursælar sálir með kökuna og bjór í fyrstu lagköku bjórkeppni sögunnar.  Menn voru ekkert að grínast með þetta, menn mættu með ýmist ævafornar uppskriftir sem gengið hafa milli kynslóða í fjölskyldunum eða glænýjar og spennandi tilraunir með ný hráefni.
…..Það voru jafnvel tár á hvörmum þegar sumar kökurnar voru kynntar til leiks með hugljúfum sögum um hvernig uppskriftin kom til.  Auðvitað veit maður ekkert hvort sögurnar voru sannar eða ekki en það var algjört aukaatriði.

„kakan þarf að vera lagkaka, fjöldi laga er frjáls og í raun útlit líka..“

Reglurnar voru einfaldar að þessu sinni enda í fyrsta sinn sem þessi keppni er haldin og líklega fyrsta sinn í veröldinni líka ef út í það er farið?  Regluverkið mun fínpússast á komandi árum enda var ákveðið að gera þetta að árlegum viðburði í kringum jólin því allir voru á eitt sáttir, þetta var ofsalega skemmtilegt.
…..Ein af reglunum er að kakan þarf að vera lagkaka, fjöldi laga er frjáls og í raun útlit líka en auðvitað getur það komið niður á dómum ef menn fara of frjálst með túlkun sína á lagköku.  Í raun veit enginn skilgreininguna á lagköku en ákveðnar hugmyndir voru vissulega uppi.
…..Kakan má heldur ekki vera bökuð af neinum nema þeim sem taka þátt í keppninni.  Bjórinn er alveg frjáls, menn þurfa bara að reyna að finna bjór sem gleður, er spennandi og spes en samt gengur með þeirri köku sem menn tefla fram.  Menn geta ekki dæmt sína köku eða sinn bjór.

wp-1576926060062.jpg

Dæmt er á eftirfarandi hátt, stig eru gefin fyrir bragð kökunnar og útlit.  Bjórinn er dæmdur eftir bragði en líka hversu framandi og spennandi hann er.  Bjór sem t.d. er vondur getur fengið fullt af stigum fyrir exotic flokkinn t.d. ef hann er bruggaður á botni eldfjalls á Galapagos eyjum eða hann er bruggaður einu sinni á ári af nunnum og seldur í litlu fjallaþorpi í Nepal einn dag á ári eða eitthvað álíka. Loks voru gefin mikilvæg stig fyrir bestu pörunina líka.

„maður hefði einhvern veginn ekki trúað að lagkaka gæti verið svona mismunandi“

Það kom á óvart hve fjölbreytnin var mikil, maður hefði einhvern veginn ekki trúað að lagkaka gæti verið svona mismunandi.  Formið var svipað í flestum tilvikum og var rétthyrningurinn vinsælastur enda það sem menn hafa kannski oftast séð og tengt við lagköku.
…..Lögin voru mismörg, sá sem var með flest lög var með 7 lög en flestir voru með 5 lög.  Ein kakan var með blandaðri berjasultu á milli, önnur var gerð úr guinnes bjór, enn önnur var með saltkaramellu smjörkremi á milli og svona mætti lengi telja.  Sumar kökurnar voru ljósar og aðrar dökkar eins og nóttin.

Útliðið telur og því er vissara að vanda til verksins, sumir pössuðu sig á að hafa öll lögin jafn þykk og öll horn rétt og yfirborð með réttum vatnshalla á meðan aðrir földu óvönduð vinnubrögð með glæsilegum skreytingum.  Sumir nenntu ekkert að spá í þessu og treystu á bragð og bjórinn með.

Keppnin fór þannig fram að menn byrjuðu á að kynna til leiks bjór og köku.  Hér gefst mönnum tækifæri á að segja frá því hvaðan uppskriftin er komin og hvaða humyndir voru á bak við val á hráefnum ofl.  Það var hér sem sumir kusu að reyna að skora stig með hjartnæmum frásögnum um tilurð uppskrifta.
…..Bjórinn er ekki minna mikilvægur enda höfðu menn haft ár til að grúska í þessu og næla sér í eitthvað spennandi.  Menn fengu hér tækifæri á að segja frá hvernig þeir náðu í bjórinn og hvað er merkilegt við hann.  Eins afhverju þessi bjór var valinn með þeirri köku sem þeir reiddu fram.   Þetta kom skemmtilega út og var ákveðið að á næsta ári væru gefin auka stig fyrir framsetningu.

„Möguleikarnir eru margir, þessar kökur eru í grunninn dálítið kryddaðar, negull, kanil og engifer“

Hvernig er annars best að para lagköku og bjór saman?  Er vænlegast að treysta á andstæður, súrt á móti söltu, sætt á móti beiskju og svo frameftir götum eða kemur best út að leika sér með samstæður, tengja eiginleika í bjór við hráefni í kökunni?  Það er erfitt að svara þessu og þess vegna er svo gaman að prófa sig áfram og sjá árangurinn.
….. Möguleikarnir eru margir, þessar kökur eru í grunninn dálítið kryddaðar, negull, kanil og engifer er oftast áberandi, sumir setja sýróp í deigið líka sem gefur ákv sætu, kremlögin geta svo verið margslungin og mismunandi.  Maður getur líka séð fyrir sér að vera með bjór sem minnir á það sem maður drekkur með kökum, kaffi t.d. eða ísköld mjólk jafnvel.  Hér sé ég strax fyrir mér milk stout t.d.!

wp-1576925281192.jpgVið Sigrún vorum t.d. með hlynsíróp í deiginu okkar og höfðum svo saltkaramellu smjörkrem á milli.  Við ákváðum að prófa geggjaðan bjór með, bæði af því að hann er svakalega góður og gæti halað inn stigum bara á bragðinu, eins er hann nokkuð exotic því hann er sjaldan bruggaður og erfitt að fá hann þegar hann kemur út einu sinni ári í mesta lagi.  Við erum að tala um Maplesaurus Rex sem er 14% massífur imperial stout með hlynsírópi og vanillu.   Bruggaður af Pure Project í San Diego og fæst í raun bara þar á bæ þegar hann kemur út.
….. Bjórinn er 14% en það kemur ekki fram í bragði, hann er mjúkur og þéttur með notalegum keim af hlynsírópi og svo vanillu í restina.  Mjög mild kaffirist af maltinu.  Þetta kom vel út með randalínunni okkar, sírópið tengdist við sírópið í kökunni og dró það meira fram, mýktin í bjórnum pakkaði inn kökubitanum og gerði hann meira djúsí.  Vanillan bættist við kökuna á skemmtilegan máta, en sætan í bjórnum var mögulega aðeins of mikil því kakan var líka dálítið sæt.  Þetta varð því dálítið þungt.  Saltkaramellan í kreminu naut sín vel með vanillunni og svo tengdi karamelluseraða maltið vel við kremið.

wp-1576926491009.jpg

 Eitt parið var með blandað sultulag á sinni randalínu og svo ávaxta gose með frá Dogfish Head.  Super Eight Super Gose heitir bjórinn en hann er pakkaður af alls konar berjum og ávöxtum, og er dálítið súr á tungu en þó má greina ögn saltkeim í bakgrunni.  Bjórinn einn og sér svona la la að mínu mati, en pörunin var virkilega flott, sýran og berin léttu vel á öllu og tónuðu sætuna í kökunni niður.  Sultan tengdist líka við berin og varð þannig meira áberandi.   Hér er gott dæmi um andstæður, sýran og léttleikinn í bjórnum koma til móts við þunga sætu kökuna og gerir allt svo létt og skemmtilegt.

„Sterkasti bjór veraldar?“

Fleiri bjórar þetta kvöld voru Sam Adams Utopias, 29% barley wine sem er með sterkari bjórum veraldar og kemur út einu sinni á ári ca og er aldrei eins.  Hér er mörgum lögunum af bjórnum sem legið hafa mislengi á mismunandi eikartunnum blandað saman í þennan eina bjór.  Flaskan kostar augun úr en við förum svo sem ekki út í verðið en ég gert sagt að flaskan er undir 50.000 kr.
….. Hér var það augljóslega exotic dómurinn sem menn voru að sækjast eftir en einnig kom hann mjög vel út með randalínunni.  Hér er það eins og gott koníak með eftirréttinum.  Þessi bjór er magnaður og það skrítna er, 29% koma ekki fram í bragði sem spritt eða bruni.

wp-1576925700004.jpg

Fleiri skemmtilegir bjórar voru á borðum, t.d. hinn glæsilegi Duchesse de Bourgogne frá Brouwerij Verhaeghe sem er frábært flæmst rauðöl og fæst neira að segja hér í Vínbúðum landsins, Svo var það áramótabjórinn frá Reykjavík Brewing, Kosmós 2020 sem er virkilega snoturt  sterkt belgískt öl með stokkrós og súraldin.   Þessi bjór kom með þeirri lagkögu sem vann keppnina í ár fyrir bestu kökuna en útlitið átti þar stóran þátt.  Pörunin kom líka nokkuð vel út með kökunni, dálítið súr, ávaxtaríkur og þægilegur á móti dökkri guinnes lagkökunni.

Já þessi keppni heppnaðist svona líka vel og verður klárlega endurtekin að ári.  Menn eru þegar farnir að huga að því sem betur mætti fara næst og nú er svo heilt ár til að finna þennan eina sanna bjór með kökunni.  Undirritaður ætlar að reyna að fá eitthvað af okkar frábæru brugghúsum til að brugga lagkökubjór fyrir næstu keppni.  Ég er þó ekkert allt of viss um að það takist en samt skemmtileg pæling.    En til lukku Kjartan og Beta, þið unnuð núna, við tókum annað sætið en þetta verður öruggur sigur á næsta ári.

wp-1576925995394.jpg

Svakaleg hvítsúkkulaði kókos brownie með ítölskum marens og ástaraldin

Ég viðurkenni það að við á B&M erum mjög hrifin af sætum eftirréttum, það er bara eitthvað svo fullnægjandi við að enda góða máltíð á ljúfum og sætum nótum. Við höfum prófað ýmsa eftirrétti á veitingastöðum borgarinnar og það er einn sem stendur uppúr. Hvítsúkkulaði ostakakan á KOL er einfaldlega hrikalega góð. Við höfum meira að segja stundum farið út að borða á einu veitingastað en endað kvöldið með eftirrétt á Kol. Það má!

Við frúin höfum undanfarið verið að reyna að gera þennan rétt heima í eldhúsinu, vonarljósið kveiknaði fyrst fyrir nokkru síðan þegar Elísabet mágkona Sigrúnar bauð okkur í hvíta brownie með ristuðum kókosflögum. Þetta minnti nokkuð á réttin á Kol og gaf okkur hugmyndir til að þróa þetta áfram. Við bættum aðeins í kökuna, hvítu súkkulaði t.d. og svo höfum við þróað mascarpone krem ofan á með kókos og sítrónu. Svo þegar við bættum fersku ástaraldin og ítalska marensnum við var þetta eiginlega komið. Ástaraldin ísinn (gelato) fær maður svo t.d. hjá Valdísi eða einhverri af betri ísbúðum borgarinnar. Þetta er einfalt og skemmtilegt að gera. Endilega að prófa, best er að gera kökuhlutann sólarhring áður en borið fram.

ÞAÐ SEM ÞARF (það mætti í raun gera helmingi minni uppskrift)

Þetta er líklega nóg í efitrrétti fyrir 10 manns eða meira.

150 g ósaltað smjör
100 g hvítt súkkulaði
2 egg
2,5 dl hrásykur
1 tsk vanilludropar
½ tsk salt
1 sítróna
1,5 dl hveiti

4 eggjahvítur
½ tsk cream of tartar
200 g sykur

Kókosflögur, ristað á pönnu
3-4 ástaraldin
ástaraldinn sorbet/ítalskur ís (má sleppa en er geggjað með)

1 stk mascarpone ostur
2 tsk sítrónusafi
1 tsk kókosekstrakt

1 msk flórsykur

4-5msk rjómi

AÐFERÐIN

Kökubotninn

Best að byrja á kökunni, helst deginum áður en veislan fer fram því þá nær kakan að þéttast og verður meira djúsí. Látið smjörið (150g) og hvítt súkkulaði (100g) í skál og bræðið á vægum hita yfir vatnsbaði. Hrærið vel saman. Ef þetta virðist skilja sig þá er það alveg ok. Þetta fer allt saman þegar rest er bætt við. Látið þetta svo kólna aðeins.
Setjið svo 2 egg, 2,5 dl hrásykur og vanilludropa í skál og þeytið saman. Bætið svo ½ tsk salt, safa úr 1 sítrónu saman og hrærið áfram. Bætið svo 1.5 dl hveiti saman við og hrærið vel. Þegar þetta er allt komið saman er loks súkkulaðismjörblöndunni bætt útí og allt hrært saman. Svo er þetta sett í form, gott er að hafa smjörpappír í forminu og pennsla með olíu.

Bakið svo við 150 gráður í ofni í um 40 – 45 mín. Látið svo kólna og setjið inn í ísskáp til næsta dags.

Kremið

Heill mascarpone ostur, við ca stofuhita sett í skál. Bætið ½ – heilli tsk kókosextract saman við. Ég vil hafa smá kókosbragð af þessu og notaði heila tsk. 2 msk flórsykur, má vera 3 msk og loks 2 tsk sítrónusafi (má auka eftir smekk). Hrærið þessu saman með þeytara eða í hrærivél. Bætið svo dass af rjóma saman við og hrærið áfram. Hvað er dass? Ég hellti tvisvar úr rjómanum, líklega um 4 msk?

Passið að þeyta ekki of mikið þannig að rjóminn skilji sig og verði að smjöri.

Smyrjið þessu svo á kökuna og látið standa í kæli þar til tilbúið til framreiðslu.

Marensinn

Það eru til alls konar tilfæringar yfir hvernig maður gerir ítalskan marens. Ég nennti ekki að spá í því heldur gerði klassískan franskan marens og flamberaði það svo með brennara í lokin.

Sem sagt, setjið 4 eggjahvítur í skál, helst að láta standa í amk 20 mín áður en þið hrærið þær saman. Passa að ekki komist arða af eggjarauðu með. Skálin þarf að vera þurr og alveg hrein. Hrærið svo saman með ½ tsk cream of tartar á meðalhraða til að byrja með. Þegar þetta virðist vera komið nokkuð vel saman og farið að lofta um þá má auka hraðann. Þegar hvíturnar eru orðnar mjúkar og hægt að mynda toppa þá fer sykurinn útí. Bætið 200g sykri saman við, mjög varlega á meðan þið hrærið. Við erum að tala um ca matskeið í senn með mínotu millibili. Já þetta tekur tíma. Þegar allur sykurinn er kominn er hrært á góðum hraða áfram þar til blandan er orðin þykk og aðeins stíf og þið finnið helst ekki sykurkorn milli fingranna.

20190828_212038-01669838994.jpeg

FRAMREIÐSLAN

Skerið kökuna í bita, ca 3 x 10 cm kubba og setjið á diska. Létt ristið kókosflögur á pönnu og setjið til hliðar. Setjið marensinn strax í sprautupoka, varlega þó. Hafið hringlaga stút á og sprautið svo á diskinn fallegan marenstopp. Flamberið svo með brennara þannig að það komi aðeins litur á þetta.

Skerið ástaraldinn í tvennt og skóflið úr hálfum slíkum innvolsið og látið leka yfir kökuna og diskinn. Loks sáldrið þið kókosflögunum yfir þetta og berið fram.

Það er frábært en ekki ómissandi að hafa með þessu ástaraldin sorbet eða ítalskan ís (gelato). Ég hef prófað að kaupa ástaraldin ís hjá Valdísi en hann er frábær með þessu, ferskur og kaldur. Æi hann er eiginlega ómissandi með, amk ef þetta á að verða eins og á Kol. Ef þið hafið ísinn með þá bætið því honum síðast á diskinn, myndið kúlu eða ef þið getið svona möndlulagaða ískúlu og setjið á hvern disk og berið fram. Þetta er svakaleg hamingjubomba.

Með þessu eru nokkrir möguleikar, kampavín gengur alltaf með hvítu súkkulaði og ástaraldin. Frábært combo en ef maður er í bjór þá held ég að súrbjór væri snilld, ég er að hugsa Peche n Brett frá Logsdon en sá bjór er algjörlega magnaður súrbjór með ferskjum og ætti að fást enn í Vínbíðinni. Þetta verður líklega prófað á næstu dögum!

Sjúkar stout pecanhnetu brownies með ljúfum porter á sunnudegi

Sunnudagar eru oft leiðinlegir, já eða það finnst mér alla vega, einhvern veginn ekkert að gera og bara vinnuvika faramundan.  Það er vel hægt að lyfta upp deginum með einhverju góðu í gogginn.  Ég sá þessa uppskrift um daginn á instagram, theberonesse heitir „accountinn“ en þar eru að finna helling af spennandi bjóruppskriftum.

Ég er mikið fyrir súkkulaði, þannig er það bara og góð „brownie“ er himnasæla ef hún er vel gerð.  Hér er uppskrift sem er að slá í gegn hér á mínu heimili á þessum rigningar sunnudegi.  Það er allt í lagi að para við bjór á sunnudegi, það er enginn að fara detta í það svo sem. Ath, maður þarf eiginlega að baka þetta deginum áður og láta standa í kæli yfir nótt.

Bjórinn

20190330_155731-01893071815.jpeg

Það er reyktur stout í þessari uppskrift en eini bjórinn af þeim toga hér heima í vínbúðunum er Lava stout frá Ölvisholti en hann er líka virkilega ljúffengur og flottur í matargerð.  Ég hef oft gripið í hann t.d. við hægeldaðan grís, sósur og annað.  Það var hins vegar enginn Lava til í Vínbúðinni þegar ég ætlaði að henda í köku, það er í raun í lagi en reykurinn er dálítið einkennandi og sérstakur og ég vildi gera þetta eftir bókinni.  Ef þið finnið ekki Lava þá er hægt að nota bara þurran porter eða stout í staðinn.  Ég hins vegar á til nokkrar flöskur af Surti 30 frá Borg brugghús, bæði frá 2015 og 2016.  Þessi var ofsalega reyktur í upphafi en árin hafa mildað reykinn nokkið og er hann orðinn ljúfur sem lamb.

 

Það sem þarf í þetta

Fyrir brownie

  • 280g hafrakex (Digestive), mulin
  • 2  msk púðursykur
  • 90g bráðnað smjör og aftur 90g bráðnað smjör (notað á mism. stöðum)
  • 420g sykur
  • 135g ósætt bökunarkakó
  • 1 tsk salt
  • 3/4 bolli (um 164g) reyktur stout7porter
  • 1 tsk vanillodropar
  • 2 stór heil egg og tvær eggjarauður
  • 95g hveiti
  • 1/4 tsk reykt paprika

Fyrir pecan lagið

  • 2 msk reyktur stout
  • 1 bolli púðursykur
  • 1/2 bolli hlynsíróp
  • 2 egg
  • 1 tsk vanilludropar
  • 55g bráðið smjör
  • 57g (1/4 bolli) rjómi
  • 230g hakkaðar pecan hnetur
  • 1 sk salt

Aðferð

  1. Hendið 280g hafrakexi í matvinnsluvél, brjótið þetta niður fyrst og setjið 2 msk púðursykur saman við og blandið þar til orðið vel mulið.  Hafið vélina í gangi og bætið bráðna smjörinu (90g) saman við.  Blandið þar til þetta er orðið eins og blautur sandur.
  2. Pressið þessu ofan í ferkantað mót, 23 x 33cm (ég var með ögn minna og fékk því aðeins þykkari bita)
  3. Blandið saman afgangnum af smjörinu (90g), 420g sykur, 135g bökunarkakó, 1 tsk salt, 1tsk vanilludropar og bjórnum í hrærivél.
  4. Þegar þetta er allt sameinað bætið þið eggjunum út í, tvö heil egg og tvær eggjarauður.  Hrærið þar til vel blandað saman.
  5. Loks bætið þið hveitinu (95g) og reyktu paprikunni út í og hrærið létt þar til hefur blandast saman, ekki mikið meira en það.
  6. Hellið þessu svo yfir kexbotninn og inn í ofn á 180gráður í 20-25 mín.   Takið þetta svo út og lækkið ofninn í 160 gráður.

fyrir pekan lagið

  1. Þvoið hrærivélaskálina og blandið svo saman 2 msk bjór, 1 bolla púðursykur, 1/2 bolla sírópi, 2 egg, 55g smjör, 57g  rjóma og hökkuðu pecanhnetunum.  Blandið vel saman.
  2. Hellið þessu yfir brownie lagið þannig að það þekji alveg og bakið í 35 mín við 160 gráður.  Miðjan á að vera dálítið hreyfanleg en ekki eins og drulla.
  3. Matarfilma yfir og kælið í ískáp yfir nótt.

img_8608-01521321348.jpeg

Pörunin

Ok það skal sagt bara strax í upphafi, þetta er eins langt frá lágkolvetna eða keto fæði og hægt er enda er það bara allt í lagi líka.  Þetta er líka svakalega þungt í maga þannig að þessi uppskrift er líklega fyrir 12 manns, farið varlega.

Kakan er mjög djúsí og dálítið klístruð, salt er áberandi en svo er líka ákveðin sæta frá pecan laginu og súkkulaðið kemur auðvitað líka vel fram.  Ég finn lítið sem ekkert fyrir reyknum í bjórnum í þessu samt.  Þetta er dásamelgt í munni, 3-4 bitar alveg nóg held ég.  Rjómi eða vanilluís er fullkomin og jafnvel kærkomin viðbót við þetta.  Hér er svo hægt að bjóða kaffi með, það gengur alltaf með svona súkkulaði kökum en ef við viljum hafa bjór þá má það ekki vera of þungur bjór, það gæti endað illa.  Imperial stout og jafnvel stout er því úr myndinni hins vegar er porter léttari og mildari bjór og alveg ljómandi pörun.

Porter hefur margt sameignlegt með kaffibollanum, hann er til að byrja með svartur eins og kaffi en í hann er notað ristað malt sem gefur þennan lit en einnig létta rist og kaffikeim.  Oft koma einnig fram léttir súkkulaðitónar.  Bjórinn er með ögn beiskju en þó ekkert eins og IPA.  Beiskjan léttir vel á þessum rétt og klippir í gegnum smjörfituna og klístrið og opnar upp bitann í munni.  Kaffið og ristin tengja vel við súkkulaðið og hneturnar og draga dálítið úr sætunni sem getur orðið heldur mikil.  Súkkulaðið í kökunni dregur einnig fram súkkulaðikeiminn í bjórnum.  Þetta er mjög ljúft allt saman.  Við notuðum hér Myrkva frá Borg brugghús en það er ljómandi porter og meira að segja notað kaffi í hann, kaffi porter.

Stout súkkulaði kirsuberja baka með villtum kirsuberjabjór

Ég rakst á þessa uppskrift um daginn einhvers staðar og varð strax hugfanginn, þetta getur ekki verið vont.  Stout kirsuberja baka!  Ég hef verið að bíða eftir rétta augnablikinu til að henda í þetta og svo kom Rebekka Cherry Wild Ale frá Borg út og þá voru bara engar afsakanir lengur.  Hljómar eins og drauma combo og það kemur svo í ljós að það er  það svo sannarlega.

Ég er ekki flinkur að baka en mér tókst þetta og þá tekst ykkur þetta líka, líklega jafnvel betur.

Það sem þið þurfið:

Böku botn, (pie crust), það eru margir möguleikar, veljið það sem þið eruð vön að nota.  Hér er ein hugmynd.  Þessi er dálítið rífleg fyrir 31cm form.

  • 240g smjör
  • 180g flórsykur
  • 1 tsk salt
  • 60g möndlumjöl (fínt hakkaðar möndlur)
  • 1 stk egg
  • 1 stk eggjarauða
  • 470g hveiti

Fyllingin

  • 300g 70% súkkulaði brotið í bita
  • 4,5 msk ósaltað smjör
  • 3 msk hlynsíróp
  • 120ml stout
  • 4,5 msk rjómi
  • 2 og 1/2 bolli steinlaus kirsuber, má vera 3 bollar ef þið nennið

Þeyttur rjómi

  • 2 bollar rjómi (473ml)
  • 2/3 bolli flórsykur (158ml)
  • 1 tsk vanilludropar
  • 2 msk stout

Bjórinn

  • Stout fyrir rjómann og fyllinguna.  Hér notaði ég Lepp frá Brothers Brewing sem er frábær í þetta.  Leppur er milk stout en þetta má vera hvaða stout sem er svo lengi sem hann er góður.
  • Kirsuberjabjór (kriek) eða flanders red.  Má svo sem prófa frambozen eða svipað.  Hér notaði ég Rebekku Cherry Wild Ale frá Borg sem er magnaður, ég prófaði líka Rauðhettu og Úlfinn frá Borg og Brekeriet sem kom álíka vel út.

IMG_8459

Aðferðin

Böku botn

Byrjið á bökunni, hafið allt hráefnið við sama hita og setjið saman í hrærivél nema 350g af hveiti.  Blandið þessu saman í vélinni, bætið svo afganginum af hveitinu eftir þörfum, ekki víst að þurfi allt.  Byrjið á að bæta við og notið hnoðarann á hrærivélinni, færið svo á borðið og hnoðið í höndunum.  Þetta á að vera aðeins rök klessa, ekki of þurrt. Kælið í ísskáp í 5 mín, því best er að vinna með deigið kalt.

Á meðan deigið er að kólna er gott að skera kirsuberin í tvennt og steinhreinsa, það er dálítið dúlt..

Takið svo tvær arkir af bökunarpappír, stráið smá hveiti á deigið og fletjið mjög þunnt á milli pappírsarkanna. Við erum að tala um ca 3mm þykkt.   Setjið svo deigið í böku form og látið standa í ca 30 mín. ATH miðað við 31 cm form þá verður afgangur af deiginu. Gott er að pikka nokkur göt í botninn. Loks er þetta bakað í ofni við 160 gráður þar til kominn er aðeins litur á þetta.  Þetta tekur um 20 mín.  Takið svo bökuna út og látið kólna alveg.

Fyllingin

20190323_153122.jpgBrytjið 200g súkkulaði, 3 msk smjör, 1/3 bolli stout og 2msk hlynsýróp í skál sem þolir hita.  Setjið ögn vatn í pott og látið malla á lágum hita.  Setjið skálina yfir og látið bráðana. Hrærið reglulega í með sleikju.  Passa að ekkert vatn komist í súkkulaðið, þá kekkjast allt.  Þegar þetta er bráðnað og komið vel saman bætið þið 3 msk rjóma saman við og blandið vel saman.  Loks hellið þið öllum kirsuberjunum saman við og hrærið saman þar til öll berin eru hulin súkkulaði.

Látið þetta kólna aðeins, þó ekki þannig að byrjið að storkna.   Hellið svo ofan í böku botninn sem er orðinn kaldur.   Dreifið vel úr og setjið svo plastfilmu yfir og inn í ísskáp í amk 4 tíma.  Best að láta þetta bara vera yfir nótt.

Rjóma toppur

Skömmu áður en þetta er borið fram er allt sett í skál og þeytt í hrærivél þar til myndast dálítið stífir fallegir toppar.  Smakkið þetta þetta er fáránlega gott.  Svo dreifið þið bara úr þessu ofan á kældu bökuna og skreytið með ferskum kirsuberjum.   Þetta má svo stífna aftur í ísskáp en þá verður rjóminn dálítið eins og stíft krem ofaná sem er líka gott.

IMG_8490-01.jpeg

Pörunin

Þetta er ofsalega skemmtilegt, kakan er svo glæsileg með dökkvínrauðum kirsuberjum og Rebekka kemur ofsalega vel út með þessu í glæsilegu flöskunni með korktappa og vírneti.  Allt voðalega elegant og spennandi að bera fram.  Gestir reka upp stór augu.

Kakan ein og sér er virkilega flott, 70% súkkulaðið og stoutinn í fyllingunni gefa áberandi beiskju og seltu en berin og sætur rjóminn ofaná jafna þetta aðeins út.  Útkomonan er flott og alls ekki væmin, frekar hallast þetta aðeins yfir í beiskju hliðina. Svo koma notalegir kontrastar fram þegar stökkur botninn mætir lungnabjúka rjómanum ofaná. Það góða við þetta er að börnin voru ekkert voðalega hrifinn og létu kökuna vera, ekki nógu sætt fyrir þau.  Ef maður vill hafa þetta meira barnvænt og væmið væri hægt að hafa 55% súkkulaði t.d.  En við viljum það ekki hér því bjórinn gerir það sem þarf.

Rebekka cherry wild ale er algjörlega frábær með þessu, léttur og sýrður með kirsuberjatónun og skemmtilegu gerkryddum.  Berin tengja saman við berin í kökunni og draga fram bragið þannig að maður áttar sig á að hér erum við með kirsuberja böku.  Sýran léttir á beiskjunni í kökunni og léttir á öllu og svo er eins og sætan í kökunni verði meiri sem líklega má hengja á kirsuberin í bjórnum.  Loks gerir kolsýran góðverk með því að kljúfa fituna í rjómanum og smjörinu í botninum upp og hreinsa þannig gómboga og bragðlauka.   Þessi blanda er geggjuð og ég verð að segja að hér er bjórinn ómissandi.

Við prófuðum líka Rauðhettu og Úlfinn sem er flanders red/IPA eða wild IPA.  Hér eru berjatónar á borð við kirsuber áberandi og bjórinn er funky og súr sem smellpassar við þessa böku.   Já hér eru alla vega tveir möguleikar en það má leika sér með aðra stíla líka. t.d. Gæti stout virkað vel eða porter, t.d. bjórinn sem við notum í fyllinguna og rjómann.   Hér var það Leppur (milk stout) frá Brothers Brewing en ég var bara búinn að drekka hann þegar kom að því að smakka bökuna.