Besta súkkulaðimús í heimi með hindberjum og funky hindberja saison!

Birt þann 18. febrúar, 201726. júlí, 2022 af Freyr

Þegar ég skrifaði þessa færslu fyrst þá var konudagur og þá talaði ég um hversu mikilvægt það er að gæla við konurnar í lífi okkar. Mér dettur ekkert betra í hug en að skella í dásamlegt súkkulaðitrít fyrir mína í tilefni dagsins. Ég er mikill súkkulaðifíkill og ég ætla ekkert að reyna að fela það en það er bara fátt betra í þessu lífi en góður súkkulaði eftirréttur. Súkkulaðimús er í miklu uppáhaldi hjá mér og ég hef sko prófað margar slíkar, trúið mér en það er bara engin mús eins góð og þessi hér sem upprunanlega kemur frá eldhúsgyðjunni Nigella Lawson. Það versta við þessa mús er að ég get bara ekki stoppað þegar ég byrja og það kemur ekki vel út þegar gestir þurfa að berjast við mig um síðustu bitana, Sigrún þarf samt ekkert að óttast á konudaginn. Ég er svo ekki alveg að fara eftir Nigellu hér því mig langaði í smá berjasætu, hindber og sýru til að létta aðeins réttinn og gera hann meira svona konudags, ég fékk því mágkonu mína Elínu sem er snillingur í gúmmilaðigerð til að koma með hugmyndir og hún kom með hugmynd að dásamlegu hindberjagumsi sem smellpassar við bæði réttinn og bjórinn sem ég ætla að bjóða frúnni með þessu.

Viðbót júlí 2022. Það er langt síðan ég skrifaði þessa færslu inn og margt vatn runnið til sjávar síðan. Hún heldur sannarlega velli þessi mús en mér datt í hug að prófa að gera Dulce súkkulaðimús líka því dulce súkkulaði er bara svo geggjað gott. Þið hafið vonandi smakkað litlu dulce páskaeggin frá Nóa…klikk! Ég reyndar keypti vitlaust súkkulaði og endaði með saltkaramellu rjómasúkkulaði en það kom samt mjög vel út.

Það sem þarf (fyrir ca 5-6 skálar)

Fyrir dökku klassísku músina

150 g sykurpúðar
50 g smjör
250 g gott súkkulaði (125 g suðusúkkulaði og 125 g 70% súkkulaði)
60 ml heitt vatn (soðið vatn)
285 ml rjómi, þeyttur
1 tsk vanilludropar

Fyrir saltkaramellu súkkulaði músina

Allt eins nema í stað suðusúkkulaði er 250 saltkaramellu rjómasúkkulaði
Smá salt
Rifinn límónubörkur
Rifsber og hindber til að skreyta

Fyrir hindbarjamaukið (best á dökku músina)

300 g hindber (frosin er alveg i lagi)
1/4 bolli sykur
1 mtsk súrbjor, eða bara sítrónusafi
1/4 tsk nýmulinn pipar (má sleppa)

Aðferð

Þetta er svo einfalt að það er pínu vandræðalegt. Dóttir mín er farin að gera þetta undir eftirliti. Takið 250g súkkulaði og saxið niður setjið í stóran pott, bætið 150 g af sykurpúðum og 50 g smjör í pottinn og bætið svo 60 ml heitt vatn yfir. Látið þetta malla á mjög lágum hita þannig að þetta bráðni saman. Hrærið nánast stöðugt. Látið svo kólna aðeins. Þeytið rjóma og 1 tsk vanilludropa saman og blandið svo varlega saman við rest.

Hindberjamaukið.

Setjið allt í matvinnsluvél og maukið þar til berin eru orðin að mauki. Svo er gott að sigta maukið til að losna við steinana. Sjóðið í örlitla stund á vægum hita en þetta gerir maukið silkimjúkt og aðeins hlaupkennt.

AÐFERÐ: Varðandi dökku músina þá er hægt að fara tvær leiðir í framsetningu, annars vegar að hafa eldrautt hindberjamaukið ofan á súkkulaðimúsinni eins og á myndinni að ofan en það kemur ofsalega fallega út, svo er bjórinn rauður í stíl en hins vegar setur maður maukið í botninn þannig að dásamleg músin fær að njóta sín (mynd að neðan). Ef þið veljið að setja rautt ofan á þá þarf fyrst að láta músina storkna í kæli í svona 2 klst og svo bara hella maukinu ofaná. Ef hin leiðin er valin þá er fínt að setja maukið í skálarnar og inn í frysti í smá stund. Svo er súkkulaðimúsinni hellt yfir og látin storkna í kæli í ca tvo tíma. Loks er skreytt með ferskum hindberjum og brómberjum t.d.

Fyrir saltkaramellu „dulce“ músina þá er það bara að setja hana í skál og kæla yfir nótt og svo skreyta með t.d. rifsberjum og hindberjum. Stráið svo smá sjávarsalti yfir og prófið að rífa límónubörk yfir þetta allt. Mjöög næs.

BJÓRINN: Þetta er ein magnaðasta pörun okkar til þessa held ég, kannski er það bara af því að hér erum við að leika okkur með súkkulaðirétt sem er mitt uppáhald og svo „funky“súrbjór sem ég held líka mikið uppá. Ég veit það ekki, hitt er þó víst, bjórinn einn og sér geggjaður en með súkkulaðimúsinni er hann algjörlega magnaður. Súkkulaðimúsin er mjög saðsöm og þung en hindberjagumsið í botninum opnar þetta upp með ferskum súrum berjablæ. Ég valdi þennan bjór ROSES ARE BRETT frá To Øl einmitt vegna þess að hann er súr og bruggaður með hindberjum og svo er hann bara svo fallegur svona rauður og elegant. Hindberin og sýran í bjórnum tengja gjörsamlega við hindberjamaukið í músinni og gerir það að verkum að bjór og eftirréttur framlengja hvort annað. Fyrst fær maður dásemlegt súkkulaðið, svona silkimjúkt og ljúft en dálítið þungt svo opnast allt uppá gátt með súrsætum hindberjum í botninum og þetta tvinnast allt saman, loks kemur bjórsopinn og framlengir hindberin og súra keiminn en með skemmtilegu „funky“ twisti sem einhvern veginn dregur súkkulaðið aftur fram. Þetta er algjörlega geggjað saman. Roses are brett fæst aðeins via sérpöntun ÁTVR en það er í raun lítið mál að panta svona, maður sendir bara póst á Vínbúðina og óskar eftir sérpöntun. Það er þó vel hægt að mæla með LIEFMANS KRIEK og OUD BEERSEL KRIEK eða GUEUZE sem fást allir í Vínbúðunum.

Fyrir saltkaramellu músina þá gæti súrbjór komið vel út en ég held að gott kampavín væri alveg geggjað með þessu. En það er bara að prófa sig áfram.

Rósir, nei takk bjór og súkkulaðifrauð fyrir mína 🙂

Sælkerapylsur á þrjá vegu með pilsner, belgískum strong ale og IPA

Birt þann 16. febrúar, 201716. febrúar, 2017 af Freyr

Pylsur og bjór er ekkert nýtt, menn hafa notað þessa pörun nánast frá upphafi ára eða hér um bil og menn sjóða jafnvel pyslurnar sínar upp úr bjór. Með klassískri „eina með öllu“ er ískaldur og þægilegur lagerbjór alveg rakið, þægileg beiskjan, grösugir humlarnir og notalegt gosið í bjórnum heldur uppi pylsunni og hreinsar pallettuna á milli bita og svo er bara eitthvað sem gerist svo undurfallegt og gott þegar steiktur laukurinn nær að tengja við sætt pilsnermaltið í ölinu.

Sem sagt, lagerinn er örugg pörun við pylsurnar almennt en það er hægt að tala um pylsur og svo er hægt að tala um PYLSUR!!!!. Já ég er að meina „gourmet“ pylsur. Þeir sem hafa kíkt á Bjórgarðinn vita hvað ég er að tala um en þeir eru dálítið sniðugir í að búa til geggjaðar sælkerapylsur sem hægt er að skola niður með flottu úrvali af bjór. Þetta hefur reyndar dalað aðeins hjá þeim verð ég að segja því nú er aðeins hægt að fá tvær mismunandi tegundir af pylsum hjá þeim en þær eru svo sannarlega ljúffengar.

Við Sigrún prófuðum að leika okkur með pylsurétti eftir að hafa orðið fyrir hugljómun á Bjórgarðinum fyrir einhverju síðan, við ákváðum svo að endurtaka leikinn núna um helgina í bústaðarferð með fjölskyldunni og finna fullkominn bjór með hverjum rétt. Við hefðum auðveldlega getað valið lager eða pilsner til að vera örugg og fengið flotta pörun en oft er gaman að taka smá áhættur því verðlaunin geta verið ríkuleg.

RÉTTUR: Sælkerapylsur frá Pylsumeistaranum á þrjá vegu.

I. ÞÝSK BRATWURST með parmaskinku, kartöflusalati, steiktum lauk og bjórsinnepssósu í fínu brauði.

Sinnepssósa: Sinnep, t.d. bjórsinnep frá Pylsumeistaranum er hrært saman við sýrðan rjóma og majones. Stillið af eftir smekk en látið sinneðið skína vel í gegn.

II. OSTAPYLSA MEÐ MEXIKÓSKU ÍVAFI, baunachilli, salsasósu og með rifnum piparosti og ferskum kóríander yfir í fínu brauði.

Baunachillíið er svo eftirfarandi : Þetta er dálítið bara svona eftir tilfinningunni, steiktur saxaður laukur, smátt söxuð rauð paprika, chilli paste úr búð eftir smekk, ekki hafa þetta of sterkt og svo soðnar nýrnabaunir. Loks er gott að krydda með t.d. fajitas kryddi.

III. STEIKARPYLSA MEÐ STEIKTRI ÖND (roasted duck), bjórlegnum rauðlauk og dásamlegri hoisin sósu líka í fínu brauði.

Bjórleginn rauðlaukur: sá sami og við notuðum í rifna grísa tacoið.
Rauðlaukur er skorinn í fínar ræmur og látinn í krukku eða ílát með loki. Svo er 100g sykur, 25g salt og 125ml af eplaediki soðið saman í 4 mín eða svo. Þessu er svo hellt yfir laukinn ásamt 125ml af reyktum imperial stout, hér kemur LAVA STOUT ofsalega vel út. Látið þetta svo standa og mýkjast í amk klst áður en þið setjið laukinn á pylsuna.

BJÓRINN:
Með þýsku kartöflusalatspylsunni þurfum við léttan og mildan bjór því þessi réttur er látlaus með viðkvæma bragðnúansa! Pilsner, ljós lager, kölsch, pale ale eða jafnvel þýskur heitibjór eru allt bjórstílar sem ganga hér vel við. Við notuðum hér PILS ORGANIC frá Víking bara svona til að prófa gamlan félaga.

Steikta öndin er mikill karakter en hún drepur dálítið niður pilsnerinn. Hér þarf aðeins stærri bjór t.d. belgian strong ale og jafnvel belgískan quadrupel. Við vorum með DUVEL frá Moortgat og LA TRAPPE QUADRUPEL sem er töluvert öflugari en báðir mjög flottir með. Imperial stout er líka flott hérna, LAVA STOUT er t.d. eins og skapaður fyrir þennan rétt.

Loks er það ostapylsan með mexíkósku yfirbragði. Pilsnerinn gengur alveg en fyrir meira líf og fjör er það pale ale eða IPA. ÚLFRÚN SESSION IPA frá Borg negldi þetta alveg hjá okkur.

SAMSETNINGIN: Það er frekar einfallt að gera þessa rétti, aðal atriðið er bara að raða réttum hráefnum saman á fallegan máta. Gott er samt að byrja á bjórlegna rauðlauknum (sjá að ofan) því hann þarf aðeins tíma til að laukurinn verði mjúkur og fínn. Svo er bara að hita pylsurnar í ofni t.d. eða grilla ef maður er í stuði sem er enn betra. Gott er að henda parmaskinkunni aðeins í ofn og gera hana meira krispí og ná þannig einnig fram seltunni. Svo klippir maður hana í minni búta. Kartöflusalatið má vera bara það sem þið eruð vön að gera eða það sem þið kippið með úr búðinni. Svo er það bara gamli góði steikti laukurinn og loks sinnepssósan yfir þegar hún er tilbúin.

Fyrir mexíkósku pylsuna er gott að rífa piparostinn dálítið fínt og svo aðeins henda pylsunni í ofninn til að bræða ostinn þegar hann er kominn á pylsuna. Alls ekki of lengi samt.

Svo er bara að njóta. Okkur reiknast svo til að ein og hálf pylsa sé temmilegt fyrir einn fullorðinn, tvær er alveg max.

BJÓR PÆLINGAR: Ef maður vill vera öruggur með góða pörun þá fer maður í ljósa lagerinn/pilsner, hann getur bara ekki klikkað. Hins vegar getur maður skapað enn meiri dýpt og flækjur með ögn flóknari bjórpörun. Með þýsku kartöflusalatspylsunni þurfum við samt bara léttan og mildan bjór því þessi pylsa er látlaus með viðkvæma bragðnúansa! Munum samt að við viljum líka að bjórinn sé góður og njóti sín, ekki bara rétturinn. Venjulega hefði ég farið hér í BRIO frá Borg, enda þýskur pilsner en við létum undan áskorun og prófuðum PILS ORGANIC frá Víking. Þetta er bjór úr „craft beer“ línu Víkings sem mér fannst góður hér fyrir nokkrum árum síðan og var eiginlega búinn að gleyma. Pils Organic kemur bara mjög vel út með þessu, elegant, krispí með netta beiskju en samt látlaus, einmitt það sem pylsan þarf. Reyndar væri þýskur hveitibjór ekki vitlaus hugmynd hér heldur, þýskt með þýsku ekki satt? Svo koma aðrir stílar vel til greina ss kölsch, pale ale og mildir IPA (Founders All Day Session IPA t.d.).

Pylsan með steiktu öndinni er mikill karakter, við erum með alls konar í gangi, bragðmikla pylsu, þunga öndina og svo hoisin sósuna sem er dálítið áberandi. Sýrði laukurinn tekur líka dálítið í. Þessi blanda getur drepið dálítið niður pilsnerinn. Hér þarf aðeins stærri bjór með sem styður við bragðið og heldur velli. Bjór eins og t.d. belgian strong ale. Gamli góði DUVELinn frá Moortgat kom t.d. mjög vel út. Hér erum við með dálítið þróttmikinn bjór með sætum belgískum gerkryddum og ögn vínanda en litla beiskju. Belgísku gerkryddin draga fram pylsuna sem kemur vel í gegn og bjórinn tónar mjög vel við sætuna í hoisin sósunni og lauknum. Reyndar er þessi sýrði bjórlaukur magnaður með öllum bjór. Vá þetta var skemmtileg upplifun. Við reyndum líka LA TRAPPE QUADRUPEL sem er töluvert öflugari en Duvelinn enda belgískur quadrupel, vínandinn er mjög áberandi en þó myndar hann vínlega sætu sem fer vel með dálítið þungum réttinum. LAVA STOUT er svo algjörlega magnaður með þessari pylsu, hér gengur bara allt upp enda er laukurinn LAVA leginn og steikta öndin fær aðeins á sig reyktan blæ og rist frá bjórnum og svo kallar bjórinn einnig fram reykkeiminn í pylsunni.

Loks er það ostapylsan með mexíkósku yfirbragði. Hér er mikið að gerast, pilsnerinn gengur alveg en það er enn skemmtilegra að lyfta pylsunni aðeins upp með t.d. pale ale eða IPA. Við eigum alltaf ÚLFRÚN SESSION IPA frá Borg og varð hún því fyrir valinu hér, bjórinn gjörsamlega negldi þetta alveg, dásamlegir blómlegir humlarnir smjúga inn á milli bragða í pylsunni og varpa smá sítrus keim á þetta allt saman og létta aðeins réttinn og svo opnar beiskjan upp bráðnaða ostinn og fituna í pylsunni. Ég skal segja ykkur að þegar hér var komið sögu í smakkinu var maður orðinn ansi saddur en léttleikinn og notaleg beiskjan í bjórnum skapaði einhvern veginn pláss í maganum til að klára rest.

Það er dálítið skemmtilegt að bera svona kræsingar á borð, fólk er bara ekki vant svona pylsum. Hér erum við bara með þrjár hugmyndir en það má vel leika sé með önnur hráefni og samsetingnar. Aðal atriðið er að hráefnið sé gott og svo bara hafa gaman. Allar pylsurnar voru að þessu sinni frá Pylsumeistaranum við Laugalæk en hann er bæði sanngjarn í verði og með gott úrval af gæðapylsum. Svo er um að gera að vera ekki að stressa sig of mikið að gera allt frá grunni í þessa pylsurétti það gæti orðið mjög tímafrekt, hér er aðal málið að finna góðar samsetningar og raða fallega saman. Kartöflusalat, steiktan lauk og öndina má vel fá bara úr verslun t.d.

Njótið!

Indversk Pizza með Pilsner

Birt þann 9. febrúar, 20179. febrúar, 2017 af Freyr

Pilsner eða léttur lager er ekki bjórinn sem ég fer í þegar ég vil virkilega hafa það huggulegt, stíllinn á hins vegar alveg sinn sess hjá mér og það er oft tími fyrir einmitt einfaldan og lítt krefjandi bjór eins og t.d. með pizzunni, hamborgaranum eða sumu sjávarfangi sem þolir ekki stóra/mikla bjóra. Á sunnudögum nennir maður oft ekki að elda eitthvað svakalegt, oft tínir maður til afganga og gerir eitthvað sniðugt úr þeim, Sigrún mín er snillingur í að töfra fram ljúfmeti úr afgöngum. Pizza er tilvalið í þetta verkefni því hún er einföld í smíðum og það má í raun setja allt milli himins og jarðar á hana.

Þegar þetta er skrifað er einmitt sunnudagur og við ákváðum að elda „Eldum Rétt“ sem við grípum í annað slagið en Eldum rétt er oft bara virkilega gott og vandað og sparar mikinn tíma á annasömu heimili. Það er dálítið skemmtilegt því að í kvöld var Eldum Rétt rétturinn INDVERSK PIZZA en við vorum einmitt með indverskt soft taco kvöldið áður. Það sem meira var, það var næstum sama hráefnið í gangi.

RÉTTUR: Indversk pizza með kjúkling, rauðlauk og kasjúhnetum og svo dásamlegum ferskum kóríander ofaná. Sjá uppskrift hér.

BJÓRINN: Pizza og lager eða pilsner er mjög flott pörun, bjórinn þolir margs konar hráefni sem oft ratar á pizzurnar. BRÍÓ frá Borg er einn af mínum uppáhalds pilsner bjórum og því nota ég hann oft í svona verkefni, ég segi stundum að Bríó sé pilsner með karakter. Það má samt vel nota annan lager ss KALDA LJÓSA, GÆÐING LAGER ofl.

Ljósi lagerinn eða pilsnerinn er mildur og léttur með þægilega grösuga humla sem passa vel við álegg á borð við kóriander, klettasallat, spínat, papriku og annað grænmeti. Gosið í bjórnum dempar einnig sterkt álegg á borð við pepperoní og jalapeno t.d. Svo passar bragðmikið nautahakk, skinkan og annað kjöt ofsalega vel við brakandi lagerinn. Fyrir mér er þetta fullkomin pörun sem klikkar seint. BRIO frá Borg er í miklu uppáhaldi hjá mér enda er þetta stórkostlegur þýskur pilsner og ekki skrítið að hann hafi unnið til fjölda verðlauna á erlendum bjórkeppnum, m.a valinn besti þýski pilsnerinn á World Beer cup 2012 en þar keppti hann á móti þýskum pilsner bjórum frá virtustu bjórframleiðendum Þýskalands. Mér finnst alltaf dálítið gaman að því að íslenskur „þýskur“ pilsner hafi unnið original þýsku pilsner bjórana sem hafa verið bruggaðir í landinu í áravís.

Þessi „Eldum Rétt“ pizza var stórkostleg og passaði vel með BRIO en ég sé reyndar líka fyrir mér góða pörun með pale ale eða IPA eins og við höfðum með mjúka tacoinu um daginn.

Garúnþroskaður Blámygluostur

Birt þann 8. febrúar, 20178. febrúar, 2017 af Freyr

Það er orðin dálítið tuggin tugga að imperial stout og blámygluostur sé fullkomið par en það er bara svo rétt og verður bara ekki nógu oft kveðið. Garún og blámygla t.d. er svo ljómandi gott að stundum finnst manni eins og þetta hafi verið skapað hvort fyrir annað. En það er svo hægt að stíga skrefi lengra og búa til garúnþroskaðan blámygluost. Já afhverju ekki að láta þetta bara tvinnast saman á hinn fullkomna máta og skapa eina ljúfa heild? Ég smakkaði þetta fyrst hjá Eirnýju í Búrinu Ostabúð fyrir nokkrum árum þegar við vorum að dæma í árlegri heimabruggkeppni FÁGUNar. Ég varð gjörsamlega dolfallinn, osturinn hafði legið í Garúnlegi í nokkra mánuði og hann var svo mjúkur og djúsí og hafði tekið í sig kaffikeiminn og ristina frá bjórnum auk vínandans sem maður fann aðeins í gegn allltaf, þvílík gersemi og svo auðvitað var þessu skolað niður með glasi af Garúnu.

Ég hef stundum leikið þetta eftir og sett gráðost í bjórþroskun, nú síðast fyrir viku síðan. Þetta er einfalt. Veljið ykkur flottan blámygluost í næstu ostabúð, eitthvað sem þið eruð vön að njóta og setjið í ílát. Hellið svo bara Garúnu yfir, látið fljóta yfir þannig að ekkert af ostinum standi uppúr því þá þornar osturinn bara. Lokið svo en hafið smá loftun á þessu. Inn í ískáp í 4 vikur eða svo. Má alveg vera lengur! Hóið svo í góða vini sem eiga eitthvað gott skilið og bjóðið uppá bjórþroskaðan blámygluost með Garúnu í glasi.

ATH ég ákvað að vera dálítið grand að þessu sinni og notaði GARÚNU 19.1 sem er tunnuþroskaður í 10 mánuði í koníakstunnu.

Skemmtilegt, einfalt og dálítið spes!

Bjórsnarl, klassískt en gott

Birt þann 5. febrúar, 20175. febrúar, 2017 af Freyr

Það er orðið allt of langt síðan við Sigrún gæddum okkur á þessu klassíska bjórsnarli, í raun höfum við ekki gripið í þetta í mörg ár. Við kynntumst þessu fyrst fyrir líklega 15 árum síðan eða svo þegar við Sigrún fórum í bjórferð til Brussel, bjórmekka Evrópu að margra mati. Fram til þess tíma var maður vanur bara saltstöngum og skrúfum með bjórnum sínum en Belgarnir opnuðu alveg augu okkar fyrir öðrum möguleikum. Það var mjög klassískt á nánast öllum börum borgarinnar að þeir buðu upp á osta/kjötbakka með bjórnum.

Belgíska ölið á einhvern veginn bara svo vel við þessa blöndu, við erum að tala um ostabita, súrar litlar gúrkur, sýrður perlulaukur, reykt pylsa og svo sterkt sinnep. Ekki flóknara en svo. Ég man þegar ég bauð fyst upp á þetta á bjórsmökkunarkvöldi í Danmörku, strákarnir voru mjöh hissa en ofsalega ánægðir og kvöldið varð einhvern veginn enn meira spes fyrir vikið.

Við Sigrún ákváðum að rifja upp gamla góða plattann á ljúfu laugardagskvöldi með WESTMALLE DUBBEL sem er einn af Trappist bjórunum margrómuðu.

SNARL PLATTI: Góður fastur ostur, t.d. Gouda, Cheddar, eða álíka. Ég valdi hér Old Amsterdam en ætlaði reyndar að hafa enskan Applewood Cheddar en ostabúðin var bara lokuð. Þessi ostur er létt reyktur og alveg geggjaður með belgískum bjór.

Svo er það pylsan, bara einhver flott reykt pylsa t.d. frá Pylsumeistaranum í Laugalæk, hér notuðum við sterkar pepperonipylsur sem koma vel út.

Svo eru það bara súrar minigúrkur, skornar aðeins niður og sýrður perlulaukur (vantar reyndar á myndina). Loks er mikilvægt að hafa gott sterkt sinnep og þá kemur Dijon fyrst upp í hugann. Við vorum dálítið svöng og því bættum við hráskinku og svo eru pekan hnetur með hunangsslettu bara svoooo gott á svona platta.

BJÓRINN: Svona platti gengur fyrir flesta bjórstíla nema kannski þá allra viðkvæmustu og mildustu eins og hveitibjórinn því sinnep og sterkar pylsur drepa bjórinn niður. Beiskja kemur heldur ekkert allt of vel út með þessu þannig að IPA, DIPA ofl líkir eru ekki bestir í þetta. Belgíski bjórinn er hins vegar fullkominn enda jafnan lítil beiskja í honum. WESTMALLE DUBBEL er belgískur Trappist bjór sem er í senn mildur og mjúkur en mjög bragðmikill með ágætis þrótt. Þessi bjór er ofsalega flottur með þessu en við gætum vel verið með eitthvað annað belgískt ss LEFFE BLOND EÐA DUBBEL, CHIMAY eða hollensku La TRAPPE bjórana.

Aðeins um TRAPPIST.
Munkabjór eins og ég kalla hann eða Trappist bjór er bjór sem þar til nýlega var aðeins bruggaður í Belgíu og Hollandi af Trappist munkum í alvöru munkaklaustrum. Í dag hafa fleiri klaustur víða um heim farið að brugga munkabjór. Sameiginlegt með þessum bjór er að hann er bruggaður af munkum innan veggja klaustursins og má þá bera Trappist merkið sem tryggir upprunann. Bjórinn er reyndar einnig með svipuðum blæ frá öllum þessum bruggklaustrum, sem sagt með belgíska eiginleika eins og ég kalla það. Trappist bjór er til sem blond (um 5-6%), dubbel (7-8%), tripel sem er í krignum 10% og loks quadrupel sem nær enn hærri hæðum. Beiskja er yfirleitt fjarverandi þar sem humlarnir sem notaðir eru eru mildir og látlausir. Hér er belgíska gerið ríkjandi í bragði og einkennandi og svo ýmsir bragðtónar frá esterum sem gerið gefur frá sér. Oft ber á ávaxtakeim, þurrkuðum suðræðnum ávöxtum, döðlum, púðursykur, karamellu ofl. Eftir því sem áfengisprósentan verður hærri verður bjórinn þurrari og beittari án þess að verða beiskur þó. Oft ber dálítið á kolsýrunni. Þessir bjórar eru virkilega flottir og vandaðir og þeir gagna gríðarlega vel með ýmsum ostum.

Dangerously Close to Stupid, bestur á Íslandi!

Birt þann 5. febrúar, 2017 af Freyr

Ég má til með að nefna hér til leiks bjór sem nýlega er kominn í vínbúðir hér heima. Þetta er bjór sem við tókum annað slagið inn á dælu á Skúla Craft Bar á meðan ég lék þar lausum hala. Einn af mínum uppáhalds bjór hvorki meira né minna. Nú er hann sem sagt kominn í vínbúðirnar. Dangerously Close to Stupid er imperial india pale ale (IIPA) eða double india pale ale (DIPA) en flestir held ég greini ekki þarna á milli enda líklega óþarfi. Hvort sem er þá er um öflugan IPA stíl að ræða. Hann er ofsalega flottur í nefi með miklum ávaxtakeim og blómlegum humlum, ég sé fyrir mér grape aldinn og appelsínur. Í munni er hann mikill og þéttur með góða fyllingu. Beiskjan er áberandi en langt frá því að vera óþægileg því sæta frá humlum og korni kemur þarna á móti og svo er þó nokkur ávaxtakeimur. Það er áberandi hvað bjórinn er ferskur og spriklandi en það er það sem er svo mikilvægt með þennan bjórstíl. Frábær bjór sem fólk verður að vita af.

INDIA PALE ALE: Óhætt er að segja að India Pale Ale eða IPA sé vinsælasti bjórstíll bjóráhugamanna, það er einnig sá stíll sem flestir heimabruggarar ná góðum tökum á að brugga. IPA er upphaflega enskur bjórstíll en í dag er ameríska útgáfan líklega mun þekktari.
Saga IPA stílsins er skemmtileg eins og hún er oftast sögð og má rekja aftur til nýveldistíð heimsveldisins Englands en þeir þurftu á þeim tíma að tryggja hermönnum sínum í Indlandi stöðugt streymi af góðum bjór til að halda þeim kátum. Á þeim tíma var kælitækni ekki til staðar og siglingar langar og allur bjór kom skemmdur á leiðarenda. Menn brugðu þá á það ráð að nota óvenju mikið af humlum í bjórinn því humlar hafa rotvarnareiginleika. Úr varð bjór sem hélt „lífi“ alla leið til indlands og hann var töluvert beiskari (vegna humlanna) en menn áttu að venjast. India Pale Ale varð til.
Í dag er IPA stíllinn orðinn mun beiskari. Þannig að ef menn sjá bjór sem er af gerðinni IPA þá þýðir það beiskja og humlar. ATH humlar geta einnig gefið af sér ávaxtakeim og sæta blómlega tóna. Vandamál við humlana er hins vegar að olíurnar og sýrurnar sem gefa beiskjuna og bragð eru töluvert rokgjarnar og hverfa úr bjórnum með tímanum. Þetta gerist óþarflega hratt og því er IPA einn af þessum bjórstílum sem á að drekka ferskan.

Umræðan um DIPA eða IIPA er eitthvað sem ég hef aldrei velt fyrir mér fyrr en ég ræddi þennan bjór við einn af sköpurum hans Tobias (To Øl Brewing) hér um árið. Ég varð einfaldlega að hrósa honum fyrir verkið og þannig fórum við að ræða stílinn. Tobias vill meina að Dangerously Close to Stupid sé meira IIPA en DIPA af því að hann er léttari og ekki eins sætur og þeir DIPA bjórar (Final Frontier t.d.) sem To Øl gerir. Tobias segist nota 95% pilsner malt og 5% melanoidin í Dangerously á meðan blanda af crystal, brown, munich, melanoidine og pilsner malt er í First Frontier. Það er alltaf priceless að fá tækifæri á að ræða við bruggmeistara um bjórinn þeirra.

Ég prófaði þennan magnaða bjór í stað Stone Ruination í IPA Gulrótakökuna sem ég póstaði hér um daginn og útkoman var vægast sagt geggjuð.

Indian Pale Ale Gulrótarkaka fyrir fullorðna!

Birt þann 29. janúar, 2017 af Freyr

Það er gaman að para bjór við mat og jafnvel enn skemmtilegra þegar maður notar bjórinn sem hráefni matargerð. Hér erum við með skemmtilega og gómsæta gulrótarköku fyrir fullorðna. Double India Pale Ale (DIPA) Gulrótarköku! Uppskriftin er fengin úr bókinni „Cooking With Beer“ sem ég gaf sjálfum mér í jólagjöf síðustu jól.

RÉTTUR: Double IPA gulrótarkaka úr STONE RUINATION IPA með IPA rjómaosta kremi fyrir 8-10.

– 1/2 bolli rúsínur
– 75 g ananasbitar úr dós
– 50 ml STONE RUINATION IPA eða annar double IPA
– 200 g smjör við stofuhita
– 200 g púðursykur
– 4 eggjarauður
– sletta af salti
– börkur af einni appelsínu
– 225 g hveiti
– 1 teskeið lyftiduft
– 1/2 tsk mulinn kanill og engifer
– 250 g rifnar gulrætur

KREM. 300g rjómaostur, 200g mascarpone, 50 ml STONE RUINATION IPA eða annar DIPA, börkur af 1 appelsínu og flórsykur eftir þörfum til að stilla af sætu og þykkt.

BJÓR MEÐ: Að sjálfsögðu notum við DIPA bjór með þessu og ekki verra að nota sama bjórinn og notaður er í uppskriftina, hér er það STONE RUINATION IPA sem er ofsalega flottur með þessu. Úrvalið ef DIPA bjór er ekki mikið hér heima en To Øl Dangerously Close to Stupit eða BrewDog Hardcore IPA koma einnig til greina. Muna menn svo ekki eftir ÚLF ÚLF frá Borg.

Við byrjum á því að opna eina ískalda dós af STONE RUINATION IPA sem kemur reyndar ekki í Vínbúðina fyrr en 1.2.17. Maður verður jú að hafa það huggulegt þegar maður stendur í ströngu í eldhúsinu. Þessi bjór er dásamlegur og við getum verið örugg um að hann er eins ferskur og það gerist. Þurr, mikill í munni með notalegri beiskju sem aðeins tekur í, sítrus, furunálar og svo þægileg sæta. Beiskjan tónar skemmtilega vel við beiskann börkinn af appelsínunum eins og við munum komast að þegar allt er klárt.

KÖKUMIXIÐ. Byrjum á að hita ofninn í 180 gráður. Hellið svo 50 ml af bjór í skál og leggið rúsínurnar og ananasbitana í bleyti. Takið svo aðra stóra skál og þeytið vel saman smjörinu og sykrinum. Bætið svo við eggjarauðum, einni í einu og þeytið vel á milli. Bætið svo saman við salti og rifnum appelísnuberki. Þegar þetta er komið saman bætum við út í hveiti, lyftidufti, kanil og engifer og hrærið varlega. Loks blöndum við gulrótum (rifnum fínt með rifjárni), rúsínunum og ananasbitunum ásamt bjórnum sem þetta lá í saman við rest. Blandið vel saman öllum þessum dásamlegu hráefnum.

Hellið kökumixinu í tvö smurð form, ca 25cm í þvermál. Bakið svo í ofni í 30-35 mín. Þið tékkið bara á hvort botnarnir eru tilbúnir, stundum þarf aukalega 5-10 mín en ekki brenna þetta í Guðana bænum, það er dýrmætur bjór um borð. Þegar þetta er tilbúið eru botnar teknir úr formum og kældir.

KREMIÐ. Einfallt, meira að segja ég get gert þetta krem og það skemmtilega við kremið er að við notum líka bjór í það. 50ml alveg. Byrjum á að blanda rjómaostinum, bjórnum og rifnum appelsínuberki saman. Hrærið svo flórsykri smám saman saman við og smakkið til eftir þörfum. Við viljum ekki hafa kremið of sætt því það er skemmtilegt að finna beiskjuna í bjórnum og appelísnunni í gegn. En þið ráðið þessu svo sem.

Skellið svo botnunum saman með kremi á milli og ofaná. Tilbúið!!! Opnaðu annan bjór og klappaðu þér á bakið. Reyndar var það Sigrún sem bakaði þetta á meðan ég hamaðist við kvöldverðinn, rifna grísinn sem tók dálítinn tíma. Takk fyrir mig Sigrún!

Hóaðu svo í vini og bjóddu uppá köku með bjór. Krakkarnir okkar smökkuðu kökuna en fannst hún aðeins of beisk en þannig á hún að vera. Hér takast á sæta og beiskja frá appelsínum en ekki síst bjórnum. Bjórinn gefur þurran sítrus keim en einnig sætu í kökuna. Kakan ein og sér er ofsalega skemmtileg, nartar örlítið í bragðlaukana með smá beiskjubiti eftir að sætan er liðin hjá. Minnir í raun dálítið á IPA bjór hvað þetta varðar. Svo fullkomnum við þetta með ísköldu glasi af STONE RUINATION IPA , magnað. Bjórinn er auðvitað dálítið stór og öflugur en þéttleikinn, fyllingin og sætan í kökunni mæta bjórnum vel og svo tvinnast bjór og kaka saman í beiskjunni. Bjórinn magnar ekki upp beiskjuna eins og maður hefði alveg eins búist við heldur virðist þetta jafnast meira út svona.

Mjúkt taco með reyktum hægelduðum grís og reyktum imperial stout

Birt þann 29. janúar, 201729. janúar, 2017 af Freyr

Ég fæ ekki nóg af taco, þetta er bara svo gott og möguleikarnir eru endalausir. Rifinn hægeldaður grís er í gríðarlega miklu uppáhaldi hjá okkur Sigrúnu og því í raun alveg borðleggjandi að blanda þessu saman, rifið grísa taco, í raun fáránlegt að gera það ekki. Hér erum við með uppskrift og bjórpörun sem að mínu mati er ein besta pörun okkar til þessa og þessi grís, maður minn hvað þetta er gott. Það væri gaman að heyra ykkar álit ef þið prófið þetta.

RÉTTUR (fyrir 4) : Mjúkt taco með reyktum rifnum grísa hnakka (1 kg eða meira) með sýrðum bjórlögðum rauðlauk, ferskum kóríander og þroskuðum Cheddar osti. Hægeldað í 3-4 klst í ofni við 150 gráður.

KRYDD NUDD (RUB). Ein tsk af öllu, mjög einfalt, sjávar salt, svartur mulinn pipar, púðursykur, chili flögur, mulin kóríander fræ, reykt papríka, laukkrydd, hvítlauks krydd, fennel duft, og season all. Hrært saman og svo nuddað í kjötið og svo er kjötið látið liggja í þessu þar til það fer í eldun. Helst 2-3 tíma.

SOÐIÐ. Þetta fer allt í pottinn með grísakjötinu í 3-4 tíma við 150 gráður.

-2 stórir laukar grófskornir
-4 gulrætur skornar í 3 bita eða svo
– nautasoð 200ml (1.5 súputeningur í heitu vatni)
– Reyktur bjór, 500ml (t.d. LAVA STOUT)
– 3 mtsk epla edik
– 4 hvítlauksrif
– 4 lárviðarlauf
– 1 kanilstöng
– 3 heilar stjörnuanis stjörnur
– 2 mtsk púðursykur

Laukur og gulrætur eru brúnaðar á pönnu í ólífuolíu og smá smjöri, því næst er þessu öllu skellt í pott og látið malla aðeins áður en kjöti er bætt við og svo sett í ofn í 3-4 klst.

BJÓRLEGINN RAUÐLAUKUR. 1 stór rauðlaukur, skorinn til helminga og svo í fínar ræmur. Laukurinn fer svo í stóra krukku eða ílát með loki. 150ml af reyktum bjór (LAVA STOUT) er hellt yfir. Næst er 150ml af epla ediki, 25g af sjávarsalti og 100g sykri soðið saman í pott í 4 mín og loks hellt yfir laukinn.

MJÚKT TACO. Sjá nánar hér og að neðan.

Meðlæti. Þroskaður mjúkur Cheddar (t.d Applewood), mætti vera reyktur og svo ferskur kóríander.

BJÓRINN: Við viljum hafa þetta reykt og því þarf bjórinn sem við eldum úr að vera reyktur, hér heima er ekki mikið úrval en LAVA STOUT frá Ölvisholti er fullkominn í þetta. Það mætti reyndar nota SURT 30 frá Borg ef hann er til eða frægasta reykbjór allra tíma Aecht Schlenkerla Rauchbier. Bjórinn með getur verið af ýmsum toga en skemmtilegt er og tilvalið að para reykinn í kjötinu við reyktan bjór og mikinn bjór. LAVA STOUT er eins og bruggaður fyrir þennan rétt. Fyrir þá sem ekki þora í hann geta vel við unað með pale ale eða IPA, t.d. GO TO IPA frá Stone Brewing.

Búðu þig undir dásamlegt kvöld, bjóddu endilega vinum því þeir eiga eftir að verða orðlausir. Þessi réttur er bara svo geggjaður. Ég hef lengi verið dálítið skotinn í LAVA STOUT frá Ölvisholti Brugghús en það hefur reynst erfitt að para hann við góðan rétt. Ég er hins vegar alveg á því að hér erum við komin með algjörlega fullkomna pörun.

MJÚKT TACO. Í raun heimagert naan brauð að hætti Sigrúnar. Líklega er best að byrja á að undirbúa brauðið strax í upphafi og láta það svo hefast.

1 tsk ger
2 matskeiðar olía
3 bollar hveiti
4 matskeiðar jógúrt (t.d. grísk jógúrt)
1 tsk salt
1 tsk hunang
3/4 bollar volgt vatn

Þurrefnum er blandað saman ásamt geri. Oliu, hunangi, jógúrti og vatni er einnig blandað saman og svo sett saman við þurrefnin. Hnoðum þetta vel og látið hefast í 30 til 60 mín. Því lengur því betra. Sjá að neðan framhaldið.

KJÖTIÐ: Ekki velja dýrustu bitana í þetta því það er bara peningasóun, kjötið má þó ekki vera eitthvað rusl heldur. Ég valdi hér grísa hnakka, 1 kg er líklega nóg en samt betra að hafa aðeins meira. Byrjið á að blanda saman kryddunum fyrir nuddblönduna og nudda kjötið vel uppúr henni. Leggja svo kjötið í fat og inn í ískáp þar til það fer í eldun. Ágætt að hafa þetta í 2-3 tíma ef tími gefst, best að láta liggja enn lengur ef hægt er. Þegar kjötið hefur legið nægilega lengi er það brúnað á öllum hliðum í ólífuolíu á heitri pönnu og svo lagt til hliðar. Prófið að finna kryddkeiminn á puttunum eftir nuddið, alveg geggjað, ég fór strax á flug með bjórpörun og sá fyrir mér einhvern geggjaðan saison…en það er reyndar önnur saga.

img_5860-001 — **Það fer alveg hálfur líter af reyktum stout í þetta, Lava er mjög flottur en má vera eitthvað annað ss Surtur 30 eða Aecht Schlenkerla Rauchbier t.d.**

SOÐIÐ. Brúnið laukinn og gulræturnar í potti sem hægt er að loka, því næst er nautakrafti, bjórnum (reyktur), púðursykri, hvítlauk, stjörnuanis, kanilstönginni, lárviðarlaufum, og epla edikinu bætt saman við og kjötinu svo bætt útí og látið malla aðeins. Svo er lokið sett á pottinn og inn í ofn á 150 gráður í 3-4 tíma. Ég verð að vara ykkur við, ilmurinn í eldhúsinu verður ómótstæðilegur þegar líður aðeins á.

BJÓRLEGINN RAUÐLAUKUR. Fínt að undirbúa meðlætið á meðan kjötið mallar í ofninum. Skerið heilan rauðlauk í tvennt og svo í þunna strimla. Setjið í krukku eða ílát með loki. Bætið 150 ml af reyktum bjór saman við. Svo er 150 ml af epla ediki 25 g sjávarsalti og 100 g af sykri sett í pott og látið malla í 4 mín eða svo. Hellið svo yfir laukinn og látið standa þar til hefur alveg kólnað.

Nú er þetta alveg að koma, ekki gleyma taco deiginu. Það er tímabært að fara undirbúa það núna. Fletjið deigið út í hæfilega stórar flatbökur. Næst er olía hituð á pönnu, stingið svo nokkur göt með gafli í hverja köku og steikið á pönnunni. Snúa við og steikja hina hliðina þegar loftbólur byrja að myndast. Flott er að fá aðeins brunabletti hér og þar. Gott er svo að leggja brauðið saman svo það myndi hálfmána.

Tékkið á kjötinu þegar nær drekur endanum og gangið skugga úr um að það sé ekki að þorna upp. Bætið við vatni eða bjór ef svo er. Þegar kjötið er tilbúið er potturinn tekinn úr ofninum og í Guðana bænum passið ykkur, ég brenni mig alltaf því ég gleymi að potturinn er allur brennandi heitur. Takið kjötið varlega uppúr vökvanum og setjið í á fat og rífið í sundur með göfflum. Hér í raun fellur kjötið í sundur af sjálfu sér nánast.
Síið soðið yfir potti og sjóðið svo aðeins niður því þetta soð er einfaldlega geggjað með tacoinu. Það er allt í lagi að þykkja aðeins með sósujafnara ef maður vill.
Loks er kjötið sett í tacoið, rauðlaukur yfir, rifinn cheddar ostur, kóríander og svo soðið af kjötinu. Með þessu drekkum við svo að sjálfsögðu sama bjórinn og við notuðum í eldunina, LAVA STOUT. Hér erum við með dálítið krefjandi imperial stout reyndar, bragðmikill og öflugur með áberandi rist og reyk en einnig aðeins sætu í bakgrunni og jafnvel lakkrís. Það eru ekki allir sem ráða við þennan bjór en það er í raun í lagi, þessi réttur gengur með ansi mörgum bjórstílum. Porter, brown ale og bock eru líklega geggjaðir með þessu en pilsner, pale pale, session IPA koma líka vel til greina.

Ég prófaði reyndar nýja session IPA bjórinn frá Stone Brewing með þessu GO TO IPA sem var alveg magnaður með. Bjórinn léttir dálítið á réttinum og bætir við aðeins sætu og ávaxtakeim og opnar þetta allt saman aðeins upp. Mildir reyktónar í réttnum dansa vel með sítruskeimnum í bjórnum svo kemur karamellumaltið í bjórnum með notalegan bakgrunn. Kóríander og IPA/pale ale er alltaf gott kombo. Njótið!

Stone Brewing á Íslandi!

Birt þann 27. janúar, 201727. janúar, 2017 af Freyr

Í gær fór ég á kynningu á Kex hostel þar sem fulltrúar frá Stone Brewing í Berlín renndu yfir sögu brugghússins og kynntu nokkra klassíska Stone bjóra sem væntanlegir eru í vínbúðir landsins 1.2.17. Stone hefur lengi verið eitt af þeim brugghúsum heimsins sem ég held hvað mest uppá en hingað til hefur verið erfitt að fá þá í Evrópu. Ástæðan er einföld og virðingaverð, Stone er afar ant um gæði bjórsins sem þeir senda frá sér og þeir vilja ekki að bjórinn þeirra tapi ferskleikanum. Þeir sem ætla sér að selja bjórinn þeirra þurfa að skrifa undir samning sem ma inniheldur ákvæði um að bjórnum sé fargað ef hann er meira en 3 mánaða gamall. Flutningaleiðir frá höfuðstöðvunum í Bandaríkjunum eru langar og tímafrekar og því næst einfaldlega ekki að koma bjórnum í hús og selja innan þess tíma. Til að svara aukinni eftirspurn opnuðu Stone brugghús í Berlín seint á síðasta ári (2016) og nú er það því orðinn veruleikinn sem blasir við okkur að Stone er komið til Íslands. Það eru nautnaseggirnir og snillingarnir Andri og Ingi hjá Járn og Gler sem standa fyrir þessu og þeir hafa hvíslað að mér að verðið á þessum bjór verði með besta móti.

„Allt kapp lagt á gæði bjórsins til neytandans!“

Þetta var skemmtilegur fyrirlestur í gær og bjórinn stórkostlegur, ég var sérstaklega ánægður með að sjá að flest allt var í dósum enda er það eina vitræna leiðin til að varðveita gæði bjórsins og Stone er eitt af þeim brugghúsum heimsins sem er að reyna að koma þessum boðskap á framfæri. Bjór gærdagsins var mjög ferskur enda bara rúmlega 3 vikur síðan hann kom úr brugghúsinu í Berlín. Það má svo taka fram að Stone bruggar eftir pöntun, ekki öfugt, þ.e.a.s þú pantar bjórinn og þá brugga þeir hann fyrir þig þannig að þeir eru aldrei með neinn lager.

Eins og stendur á dósunum frá Stone, dósir eru betri punktur!

Ég tók sérstaklega eftir því á þessari kynningu að nokkuð er lagt uppúr matarpörun hjá Stone. Í Berlín er Stone með stærsta bjórgarð Þýskalands með stærsta úrval af hágæðabjór. Staðurinn tekur yfir 1000 manns í sæti og er mikið lagt upp úr góðum mat sem hentar bjórnum. Á kynningunni í gær töluðu þau um að bjórinn þeirra væri mjög matarvænn og nokkuð auðvelt að para hina ýmsu rétti við hann og á síðunni þeirra má t.d. finna ábendingar um ýmsar matarparanir fyrir hvern bjór, eins og t.d. hér Go TO IPA sem er virkilega flottur session IPA sem mun detta í Vínbúðina innan tíðar.. Mér finnst alltaf gaman þegar fólk hugsar um og talar um mat og bjór saman.

Þetta eru sem sagt mjög góðar fréttir, Stone í Vínbúðirnar, hver hefði trúað þessu fyrir nokkrum árum? Við hjá Bjór & Matur hlökkum til að byrja að prófa okkur áfram með matarparanir fyrir þessa karla.

Bjórsmökkunar heimboð

Birt þann 21. janúar, 2017 af Freyr

Það er alltaf gaman að smakka og uppgötva nýja bjóra en ef maður er í góðra vina hópi verður upplifunin enn betri. Það er því tilvalið að hóa í góða vini þegar smakka á nokkra bjóra og gera flotta kvöldstund úr því. Í dag er bjórinn dálítið „inn“ hjá okkur á klakanum og fólki finnst ofsalega spennandi að vera boðið í bjórsmakk eða það er alla vega okkar reynsla. Þetta má framkvæma t.d. með einhverju einföldu snarli með eða bara hóa í venjulegt matarboð en hafa smá bjórsmakk í upphafi t.d. Eins og áður þá eru engar harðkjarna reglur sem þarf að fylgja en það eru samt nokkur atriði má hafa í huga svo allt verði sem skemmtilegast. Hér ætlum við að tæpa á því helsta en þetta á fyrst og fremst að vera gaman ekki satt?

Gott er að bjóða ekki uppá of margar tegundir sama kvöld því þá er hætt við að síðustu bjórar kvöldsins renni saman í eitt. 3-4 er passlegt en má alveg fara upp í 6 ef ekki er mikið í hverju glasi.
Ef þú þekkir bjórinn sem þú ætlar að bjóða þá er fínt að byrja á léttari og mildari bjór og færa sig svo upp í þróttmeiri bjór í lokin. Það er bara þannig að ef maður drekkur 13% barley wine í upphafi mun allt sem eftir kemur virka bragðlaust.
Ef þú ert sjálf/ur að fara smakka bjórinn í fyrsta sinn er gott bara að skoða prósenturnar og byrja á lægsta styrk og oft er miðað við að hafa ljósari bjórinn fyrst og svo dekkja eftir sem líður á. ATH þó að liturinn getur blekkt, t.d. 5% porter sem er kolsvartur ætti að koma undan 9% DIPA sem er ljós.
Gaman er svo að passa að hafa smá fjölbreytni í bjórvali, ekki hafa t.d. 3 mismunandi lager bjóra eða súrbjóra. Það er gaman að fá smá innsýn í hve breytileikinn er mikill.
Svo er alltaf gaman að taka dálítið mið af þeim mat sem maður býður uppá, t.d. ef maður er með forrétt, aðalrétt og eftirrétt að hugsa aðeins út í hvernig brjór passar með hvaða rétt.

Svo er bara um að gera að drífa þetta í gang, smakka og pæla og leika sér með paranir.