Freyr

Einn besti bjór veraldar, Peche ‘n Brett með geggjuðum geitaosti!

Birt þann 3. mars, 2018 af Freyr

Við gætum kannski verið hér með bestu pörun okkar til þessa? Ég veit ekki, erfitt að meta auðvitað en það er samt klárt að þessi pörun er algjörlega „spot on“ eins og sagt er! Við erum hér með Peche ‘n Brett (10%) frá Logsdon Brewery Oregon USA sem er einn af þessum mjög svo eftirsóttu bjórum heimsins síðustu ár og bara alls ekki auðvelt að komast yfir flöskur af þessu gulli. Bjórinn sem er af gerðinni saison er gerjaður með villigeri (Brettanomyces) sem gefur einkennandi „funky“ bragð sem sumir líkja við fúkkalykt, háaloft, leður eða álíka. Einnig er ögn súr og notalegur keimur í þessum bjór. Bjórinn er svo gerjaður á haug af ferskum ferskjum og dregur þannig í sig dásamlegan ferskjukeim og loks látinn þroskast á eikartunnum í einhvern tíma. Útkomann er afar drekkanlegur bjór með léttri sýru, notalegum sætum ferskjukeim og svo er þessi dásamlega flotti funky earthy keimur frá villigerinu. Bjórinn er stórkostlegur einn og sér sem fordrykkur eða svalandi sumardrykkur en hann kemur líka alveg ofsalega vel út með mjúkum geitaosti.

Ég gerði mér ferð einu sinni sem oftar, út á Granda þar sem Búrið ostabúð er staðsett. Þar smakkaði ég nokkra osta og kom heim með þrjá mismunandi til að máta við bjórinn. Ég var samt í raun búinn að ákveða að geitaosturinn væri besta pörunin áður en ég lagði af stað í Búrið , hann er bara svo magnaður. Chevre Cendre er franskur mjúkur geitaostur með svartri birkiösku á yfirborðinu. Osturinn er ekki með þessum sterka „geitarkeim“ eins og ég kalla það en hann er þarna og svo er hann dálítið sýrður. Dásamlegur ostur alveg og ég tala nú ekki um ef maður setur hann á kex ásamt ögn af krydduðu aprikósumarmelaði sem fæst einnig í Búrinu. Marmelaðið gefur þannig ögn biturt bragð og svo með sætum aprikósukeim sem blandast við sýruna frá ostinum og svo auðvitað þetta flotta funky geitabragð.

Þegar maður bætir svo Peche ‘n Brett bjórnum við þessa dásemt er útkoman stórbrotin. Þessi bjór er eins og bruggaður fyrir geitaostinn, sýran í ostinum tengist sýrunni í bjórnum og svo tvinnast funky sveitakeimurinn í bjórnum fullkomlega við ostinn. Ferskjurnar virka svo eins og aprikósumarmelaðið ofan á allt saman. Þetta er mögnuð pörun. Það má benda á að Peche ‘n Brett er dálítið dýr en það er að miklu leiti vegna mjög svo ósanngjarnra áfengislaga sem fer afar illa með svona 10% bjór. Það má því vel notast við „litla“ bróðir Peche ‘n Brett, Seizoen Bretta sem er sá bjór sem notaður er í grunninn. Hér vantar reyndar ferskjurnar.

Bjórhátíð, lokahnykkurinn!

Birt þann 25. febrúar, 201825. febrúar, 2018 af Freyr

Þá er parTíið búið, loka dagur Bjórhátíðar var í gær og nú er heilt ár í næstu veislu. Það eru dálítið blendnar tilfinningar sem bærast í manni í dag, að hluta til er ég dálítið feginn að þessu sé lokið, það er bara takmarkað hvað hægt er að leggja á sig en á hinn bóginn þá er maður dálítið tómur inní sér. Hvað á maður að gera næstu daga t.d.? Enginn bjór? Það er reyndar alveg leyfilegt að opna dós af góðu öli í dag t.d. frá Lamplighter, svona til að trappa sig aðeins niður (þ.e.a.s ef maður var pínu séður og verslaði nesti á Bjórhátíð).

En tökum lokadaginn saman hér eldsnöggt en svo kemur heildar samantekt innan skamms. Gærdagurinn var dálítið erfiðari en fyrstu tveir, ég held að palletan hafi verið orðinn mettuðm bragðlaukar dálítið dofnir og svo er hitt að maður verður svo vanur góðum bjór að kröfurnar aukast með degi hverjum. Ég held að 3 dagar séu alveg max í svona fest. Ég fann amk að ég átti erfitt með að finna virkilega góðan bjór í gær en mér tókst það nú samt.

Ég smakkaði lítið af því íslenska í gær, en ég leit við hjá KEX brewing, Borg, Malbygg og Ölverk en ég bara gleymdi að smakka spennandi bjór frá Ör Brewing Project sem þeir kölluðu How Hi Are You og er IPA með bourbon, vanillu og laktósa. Frekar súrt að missa af þessum skrítna karli, en ég er nokkuð viss um að ég geti laumast í smakk á næstunni eða hvað? Malbygg var hins vegar með besta bjórinn þennan daginn að mínu mati, helvíti nettann skýjaðan pale ale með Galaxy. Þetta er greinilega allt á réttri leið hjá þeim. Borg var ekki með neitt spennandi þennan daginn, þ.e.a.s ekkert sem ég hafði ekki smakkað áður nema tuttugu og eitthvað rúmlega % kolsvarta monsterið á litlu tunnunni, hann fór alveg með mig svona á 3. degi í þynnku. Ég ætla bara ekkert að tjá mig frekar um hann.

Ég var mest ánægður með það sem var að gerast á efri hæðinni í gær, The Other Half héldu áfram að töfra mann upp úr skónum 3. daginn í röð. Báðir IPA bjórarnir þeirra voru geggjaðir en mér fannst samt Space Cadet (9.1%) hazy citra DIPA frá Voodoo Brewing alveg sturlaður, einmitt það sem mig vantaði til að lifna aðeins við. Black Magic, 13% imperial stoutinn frá Voodoo var einnig magnaður, þroskaður á four roses bourbon tunnum, hins vegar heldur snemmt að fara í svona karl kl 16:00 á laugardegi. The Veil voru líka með mjög gott mót í gær, en ekkert nýtt samt fyrir mig (hafði smakkað þetta á tap takeover á miðvikudaginn á Mikkeller). Tripel IPAinn þeirra sem var undir alla dagana var reyndar með betri bjóruim hátíðarinnar. Bokkereyder var með áhugaverðan bjór, einn fyrsti bjórinn sem þeir gerðu, gueuze sem tappað var á flösku 2014. Raf hafði gleymt þessum flöskum en fann þær bara nýlega og ákvað að kippa þeim með til Íslands. Verulega flottur gueuze.

20180224_163845 — Voodoo gaurarnir hafa verið að standa sig vel alla hátíðina

Civil Society (5 besta nýja brugghús á Ratberr 2017) þarf að nefna hér en þeir hafa verið með arfa góðan bjór alla hátíðina. Safaríku DIPA bjórarnir standa uppúr hjá þeim og í gær var engin undantekning. Mjög flott. Besti bjór gærdagsins, þeir voru reyndar tveir, kom hins vegar frá Mikkeller. Já ég veit pínu klisja? Samt, þessir voru algjörlega mindblowing. Eftir helling af bjór í gær sem mér fannst bara góður þá kom þessi, Spontanpentadrupelrasperry 13% ávaxtasprengja sem kom mér bara í opna skjöldu. Eftir þennan bjór var ég í raun bara tilbúin að fara heim og segja þetta gott, ég gerði það reyndar ekki, fékk mér fyrst annað glas ef þessu sælgæti og kláraði svo daginn á Mikkeller Beer Geek Vanilla Maple Shake barrel aged (13%) og þvílíkur endir á góðri hátíð.

Mikkeller Spontanpentadrupel rasperry (13%)

Bjórfest á Kex, dagur 2!

Birt þann 24. febrúar, 201824. febrúar, 2018 af Freyr

Þá erum við komin vel inn í miðja Bjórhátíð, dagur tvö yfirstaðinn og hann var sko aldeilis ekki síðri en gærdagurinn. Ég held að mæting hafi veri enn betri en í gær ef marka má andþyngslin á neðri hæðinni. Bjór og Matur tékkaði á því helsta sem í boði var og við könnuðum íslensku brugghúsin sérstaklega að þessu sinni. Þess má geta að RVK Brewing og Smiðjan voru ekki með bjór á þessari hátíð eins og planað var og verðum við því að bíða ögn lengur eftir smakki frá þeim. Malbygg var hins vegar á sínum stað og kom að þessu sinni með nokkuð vandaðan hazy IPA sem óhætt er að mæla með, ég smakkaði hann reyndar eftir ansi marga þunga stóra karla og því ekki alveg réttmætur dómur en engu að síður nettur IPA. Tveir – þrír dagar til og þá held ég að þessi karl þeirra verði alveg mangaður. KEX brewing tefldi fram virkilega flottum NEIPA í kvöld, alveg á pari við það sem aðrir voru með á hátíðinni og verð ég bara að taka hattinn ofan fyrir þeim í kvöld en að mínu mati tók Kex brewing íslensku samkeppnina í kvöld. Vel gert!!!

Ef við tökum svo súrbjórinn fyrir þá held ég að Black Project, De Garde og Bokkereyder hafi átt sviðið í kvöld. Þó svo að Bokkereyder hafi verið með alveg „rock solid“ villibjór (hop on the hype train) þá held ég svei mér þá að Black Project hafi slegið þá út. Ég hvet amk súra fólkið á morgun til að tékka á Black Project á morgun ef menn vilja súrt og ljúft af bestu sort, súrbjór er annars kjörinn „Þynnkuböster“ ef út í það er farið.. Reyndar verð ég líka að nefna hér Fonta Flora til sögunnar en þeir voru á efri hæðinni með alveg geggjað bottle pore, Funk Fuzz Wild Ale with Peaches 6.5% (sjá mynd) en þessi bjór er einn af topp 5 bjórum kvöldsins að okkar mati. Tékkið endilega á honum á morgun, geggjað stöff.

Það var erfitt að krýna eitthvað eitt brugghús sigurvera kvöldsins, það var bara svo margt gott í boði. Ég ræddi meira að segja við nokkra af mestu bjórspekúlöntum landsins og enginn þeirra gat nefnt eitthvað eitt brugghús til sögunnar í þessu samhengi sem kannski sýnir hversu mögnuð þessi bjórhátíð er. Það er nánast allt gott. Lamplighter var reyndar með alveg sturlaðan bjór, Rabbit Rabbit sem einnig er hægt að taka með sér heim á dósum. Other Half var einnig með algjörlega fáránlega ljúfa DIPA bjóra sem runnu heldur betur vel niður í kvöld. Þetta er bara svo ótrúlega gott hjá þeim, ég ræddi við einn af bruggurum þeirra um hvernig í andskotanum þeir færu að þessu. Hann svaraði bara auðmjúkur „já við reynum bara okkar besta til að gleðja!“. Já annað kvöldið í röð þá voru þeir sko heldur betur að gleðja og það vel. Vá hvað þeir eru að standa sig!

Cloudwater hélt áfram að valda vonbrygðum, DIPA bjórinn þeirra var bara ekkert spes og myndi ég velja Partíþoku, nýja T-línu bjórinn frá Borg alltaf fram yfir hann en sá er bara alls ekki svo galinn. Kodda helvítið frá því í gær var þó betri að mínu mati. Ég held bara að ég láti Cloudwater eiga sig það sem eftir lifir hátíðar!

The Veil stóðst væntingar í kvöld, þvílík unun! Þeir voru með geggjaðan tripel IPA, þykkur djúsí og ögrandi sem sló vel á þynkuna í byrjun kvölds og svo einn besta bjór sem ég hef smakkað lengi Never Mind Double Plum sem verður bara að teljast meistaraverk!

Ef ég reyni svo að taka saman það besta í kvöld, segjum 4 bestu bjóra kvöldsins þá væru það þessir, Spontan pentadrupel blueberry 12% frá Mikkeller (sjá mynd efst), þvílíkur safi! Svo væri það Quadfather 11.4% Quadrupel frá Voodoo Brewery sem legið hefur á bourbon tunnum í ekki 24 heldur 25 mánuði. Glæsilegur bjór verð ég að segja. Svo var Funk Fuzz Wild Ale with Peaches 6.5% frá Fonta Flora algjörlega mindblowing og loks verð ég að nefna til sögunnar Never Mind Double Plum frá The Veil, algjörlega fullkominn bjór.
Já ég hef þetta ekki lengra í kvöld, maður verður að fara hvíla sig fyrir átök morgundagsins, sjáumst þá!

Bjórfest á KEX dagur 1!

Birt þann 22. febrúar, 2018 af Freyr

Nú er fyrsti dagur bjórhátíðar að baki og þvílíkur dagur. Þetta er án efa það allra allra besta sem hægt er að komast í í bjór á Íslandi í dag. Þvílíkt „lineup“. 51 geggjuð brugghús sem keppast við að heilla okkur upp úr skóm og sokkum með sturluðum bjór. Já það eru stór orð og það er bara þannig, stór hátíð og allt það. Ef við tökum þetta saman örsnöggt þá er þetta nokkurn veginn svona, frá bæjardyrum Bjórs & Matar amk.

Það var auðvitað ekki hægt að smakka öll brugghúsin á einu sessioni, við erum að tala um 51 stykki, við fórum samt í það sem menn vilja meina að sé það heitasta í dag. Lampligher í Boston er líklega það brugghús sem menn sjá fyrir sér að eigi eftir að skína hvað hæst á næstu misserum, sumir vilja meina að það sé á pari við Trillium, þeir voru alla vega með mjög góðan New England IPA sem fór vel niður, reyndar var hann virkilega góður og líklega með betri bjórum kvöldsins…ja ef maður er fyrir safaríka matta IPA bjóra. Við smökkuðum reyndar ekki belgíska tripelinn þeirra sem líklega var góður. Cycle Brewing (5. besta brugghús veraldar) mætti með alveg fáranlega góðan tunnuþroskaðan imperial kaffi porter 11.5% sem ég man bara ekkert hvað hét. Sá var alveg magnaður og ekki verri að prófa hann með Omnon Nigaragua Súkkulaði á staðnum. Já Omnon er nefnilega með bás þarna, þú bara mætir með bjórinn, segir snillingunum frá hvernig bjór þú ert með og þeir ráðleggja súkkulaði með.

Bokkereyder kom ekki á óvart, eða við skulum orða það að þeir eða hann (Raf) stóðst væntingar. Það var Raf Souvereyns sjálfur sem stóð vaktina í kvöld og hellti stoltur úr tignarlegum magnum flöskunum í gesti og gangandi. Við erum að tala um alveg stórkostlegan gueuze sem hann blandar úr 1. og 2. ára lambic frá bestu lambic brugghúsum Belgíu og lætur svo þroskast á mismunandi tunnum í ár. Þetta var geggjað. Við erum að tala um að ein svona flaska kostar algjörlega augun úr, 2000$ heyrði ég einhvers staðar og því er þetta fáránlega gott tækifæri til að smakka bjór sem venjulegur maður á bara alls ekki tök á að smakka á lífsleiðinni. Þetta er eitthvað sem menn verða bara að prófa á morgun, áður en allt klárast.

Cloudwater var með bás en þeir voru hins vegar vonbrigði í kvöld, þeir voru ekki með sína frægu hazy IPA bjóra í kvöld heldur ágætis helles, Helles Mandarina sem var bara sæmilegur en ekkert spes og svo einhvern stout sem ég nennti ekki að skoða nánar. Það var engin röð á þessum bás í kvöld sem segir bara ýmislegt.

Hið nýja íslenska Ör Brewing Project kom með sinn allra fyrsta bjór, hazy IPA sem var bara virkilega ljúfur og get ég mælt með honum ef hann er enn til á morgun. Borg kynnti til leiks nýjan T-línu bjór sem þeir kalla hina hliðina á koddanum eða eitthvað í þá áttina. Ég verð bara að segja að þessi bjór kom skemmtilega á óvart. Mitt í öllum þessum geggjuðu hazy new england IPA þá hélt þessi algjörlega velli. Þetta er kannski það besta frá Borg í langan tíma?

Ég gæti haldið endalaust áfram, Voodoo Brewery var geggjað sem og Civil society Brewing,. De Garde var með sturlaðan súrbjór, báðir geggjaðir þetta kvöldið. En svona til að klára þetta þá kom The Other Half og sá og sigraði, kemur reyndar bara ekkert á óvart. Þeir voru með algjörlega mind blowing NEIPA í kvöld og stendur þetta frábæra brugghús frá Brooklyn NYC uppi sem sigurvegari fyrsta kvölds Bjórhátíðarinnar. Þeir segjast bara vera með IPA á hátíðinni og hlakka ég mjög til að smakka hvað þeir koma með á morgun. Ég náði svo ekki að smakka Black Project súrbjórana en það ku hafa slegið í gegn í kvöld einnig. ‘Eg mun klárlega tékka á þeim á morgun.

Sjáumst á morgun….skál!

Gómsæt Sítrónu Marengs Terta með bjór á súru á nótunum á konudaginn?

Birt þann 17. febrúar, 201828. júní, 2018 af Freyr

Nú er konudagurinn á morgun og þá er nú eins gott að græja eitthvað trít fyrir konuna. Ég er forfallinn súkkulaði fíkill og reyni að nota öll tækifæri til gera eftirrétti þar sem súkkulaði er í aðalhlutverki. Hins vegar er ekki hægt að hugsa um eigin hagsmuni þegar kemur að því að gera vel við hinn helminginn, maður verður stundum að láta undan. Konan mín féll algjörlega fyrir sítrónu marengs tertu sem við fengum okkur í París fyrir nokkrum árum síðan. Þetta var reyndar ofsalega gott og fór vel niður með frönsku kampavíni af bestu sort, ég verð bara að viðurkenna það. Ég ákvað því að reyna að líkja eitthvað eftir þessu og sem oft áður kíkti ég á vefsíðu Nigellu og fann þessa uppskrift hér. Það er gaman að lesa á síðunni hennar að hún gafst upp fyrir löngu síðan að reyna að gera hefðbundna stírónu marengs tertu, þær voru bara aldrei nægilega fullkomnar hjá henni að hennar mati. Þessi uppskrift á að vera einfaldari en alls ekki síðri. Sigrún mín var alla vega virkilega sátt!

Það sem þarf í þetta (gott að smella bara mynd af listanum hér) :

Í botninn

125 g mjúkt ósaltað smjör
4 stór egg, annars 5, rauður og hvítur aðskildar, rauðurnar fara í botninn
100 g sykur
100 g hveiti
25 g maís mjöl
1 tsk lyftiduft
½ tsk matarsóti
rifinn börkur af 1 sítrónu
4 tsk sítrónusafi
2 tsk mjólk

Í marenge-inn

½ tsk „cream of tartar“
200 g sykur
eggjahvítur úr 4 eggjum

Annað

150 ml þeyttur rjómi
150 g „lemon curd“, ég notaði 320g (heil krukka)

Bjórinn með

Súrbjór með ögn beiskju biti ss Sur Simcoe frá To Øl. Eins kemur berliner weisse vel til greina, prófið t.d. Stone Berliner Weisse já eða Brjánsa frá Borg ef hann er enn til. Svo er belgíski gueuze alveg stórbrotinn með þessu líka. Tropical Rumble frá To Øl er geggjaður með þessu líka en hann er hlaðinn tropical ávöxtum og er með notalegt bit frá Mosaci humlum sem er nauðsynlegt hér.

Aðferð:

Ok til að byrja með verð ég að taka fram að ég er virkilega lélegur með eggjahvítur og svona marenge. Ég ælta líka að viðurkenna að marenge dæmið mitt féll í fyrstu umferð hjá mér en útkoman var samt geggjuð. Það sést vel á myndinni að ofan að marenge lagið er ansi aumingjalegt og ekkert í líkingu við það sem maður sér hjá Nigellu. Ég veit samt hvað klikkaði, komum að því á eftir. Viðbót, ég endurtók þetta á 2. í konudegi og þá lukkaðist þetta svona líka vel (sjá hér til hliðar).

1. Byrjið á að forhita bakarofn í 190 gráður. Finnið til tvö hringlaga form, 21 cm í þvermál og smyrjið með smjöri.

2. Blandið eggjarauðum, 100 g af sykrinum, mjúka smjörið, hveiti, maís mjöl, lyftidufti, matarsóda og sítrónu berki í blandara og blandið vel. Bætið svo sítrónu safanum og mjólk við og blandið áfram.

3. Deilið blöndunni milli formanna tveggja. Hér fær maður smá panic, þetta virðist voðalega lítið en þetta nær samt að dekka formið. Bara anda með nefinu og dreifa úr þessu í formin.

4. Þetta finnst mér alltaf erfiðast. Þeytið eggjahvíturnar og „cream of tartar“ vel í þeytara (hrærivél) þar til þið fáið rjómakennda áferð og hægt er að mynda toppa. Stillið svo á aðeins hægari stillingu á þeytaranum, og þeytið meðan þið bætið sykrinum (200g) smátt og smátt saman við. Ég hrærði honum varlega saman við í fyrstu tilraun með sleif en þá held ég að hvíturnar hafi fallið hjá mér, alls ekki gera það. Ég gerði þetta í hrærivél í annað sinn og þá var þetta flott. Blandan á að verða töluvert þykk og stíf í lokin. Deilið svo blöndunni á milli formanna og dreifið úr.

5. Svo er Nigella með einhverjar tilfæringar, í annað formið á maður að slétta vel úr eggjahvítunum með málmspaða en hitt formið þá notar maður bakhliðina á skeið til að ýfa upp og mynda toppa í yfirborðið. Stráið svo ögn sykri yfir toppana. Smellið báðum formunum svo í ofninn í ca 25 mín.

6. Látið svo botnana kólna alveg. Takið slétta botninn (þann sem þið gerðuð ekki toppa í) og snúið á hvolf (marengs hliðin niður) á kökudisk.

7. Þeytið rjóma, ekki þannig að verði alveg stífur samt. Dreifið svo „lemon curd“ yfir botninn og svo rjóma þar yfir. Takið svo hinn botninn og leggið ofaná þannið að hliðin með marengs toppunum snúi upp. Þá er þetta bara klárt.

Kakan kom dásamlega vel út, súr en líka nokkuð sæt. Ég hefði alveg vilja meira krispí marengs en það kemur bara næst. Bjórinn gerði svo alveg útslagið.

Sur Simcoe frá To Øl er skemmtilegur súr session pale ale, sem sagt blanda af súröl og pale ale. Við erum þarna með aðeins beiskjuna frá simcoe humlunum og sítrus furunálarnar sem oft fylgja simcoe og svo er einhver ögn ferskja sem skín í gegn. Þegar bjórinn kemur strax á eftir munnbita af kökunni er eins og hann taki bragðið sem er að fjara dálítið út og blæs lífi í það og togar fram aftur súra sítrónukeiminn, beiskjan ræðst svo á rjómafituna og opnar allt upp á þægilegan hátt. Skánin sem byrjar að myndast í gómnum hverfur alveg. Þannig er eins og bjórinn framlengi braðinu frá kökunni og heldur gangandi þar til næsti biti mætir á staðinn. Svo kemur sykursætan í kökunni vel út á móti súr-beiskjunni í bjórnum og gerir mjög skemmtilegt mót. Þetta er sannarlega súr en góð upplifun.

Þegar ég endurgerði kökuna (taka tvö), köllum það bara 2. í konudegi, þá prófaðir ég ansi magnaðan bjór með sem algjörlega negldi þetta. Tropical Rumble frá To Øl er 4.3% tropical IPA bruggaður með mango, ástaraldin og ferskjum ásamt helling af mosaic humlum. Bjórinn er virkilega nettur með þægilega beiskju frá humlunum og djúsí sítrus og ávaxtaríka humla en svo koma ávextir inn með dálítið beiskum ávaxtakeim. Virkilega flott með tertunni sem sem fyrr segir er dálítið sæt. Beiskjan trappar sætuna niður og heldur vel við sítrónukeiminn. Geggjað.

Gott freyðivín er líka algjörlega geggjað með þessu og nánast betri pörun en hér er talað um að ofan.

Nýr Stone á Íslandi, Berliner Weisse!!!!

Birt þann 11. febrúar, 201817. febrúar, 2018 af Freyr

Það hefur vonandi ekki farið framhjá neinum að Stone er komið á klakann reyndar fyrir all nokkru en það eru þeir snillingar Andri og Ingi hjá Járn&Gler (og frá því nýlega, Malbygg) sem standa fyrir þessum innflutningi. Stone er framúrskarandi amerískt brugghús sem gerir stórkostlegan bjór. Nú á dögunum bættist nýr bjór við línuna í Vínbúðinni, Stone Berliner Weisse 4.7% sem er nákvæmlega eins og nafnið gefur til kynna, bjór af gerðinni berliner weisse en það eru gallsúrir og frískandi bjórar sem ættaðir eru frá Berlin. Stone er einmmitt með brugghús í Berlin til að sinna ört vaxandi Evrópumarkaði og Stone Berliner Weisse kemur til okkar beint þaðan og því má segja að hér séum við með nokkuð original berliner weisse. Þess má annars geta að Stone er með geggjaðan bjórgarð í Berlín sem við mælum sterklega með að fólk skoði ef það er statt í borginni en þar á bæ gera menn mikið úr bjór og matarpörun.

Bjórinn er sem fyrr segir nokkuð súr og léttur og afar svalandi og alveg kjörinn drykkur á heitum sólríkum sumardögum. Við höfum kannski ekki mikið af slíkum dögum hér heima en bjórinn er líka skemmtilegur matarbjór. T.d. kemur svona súrbjór mjög vel út með fiskréttum, t.d. djúpsteiktum þorskhnökkum, eða súrbjórs smálúðu ceviche! Eins er hann helvíti nettur með sítrónu marengs tertu 🙂

Dásamleg Nutella Ostakaka parað við Kirsuberja Súrbjór (Kirek) og Porter!

Birt þann 3. febrúar, 201816. febrúar, 2020 af Freyr

Nú fer að líða að konudeginum og þá er eins gott að fara íhuga trít fyrir betri helminginn. Ég er mikið fyrir súkkulaði og súkkulaðieftirrétti og það er sem betur fer eiginkonan líka þannig að þetta er nokkuð borðleggjandi. Þegar kemur að eftirréttum þá leita ég oft til Nigellu Lawson til að fá hugmyndir því ég veit að hún er mikill nautnaseggur eins og ég og eftirréttir hennar svíkja sjaldan. Þessi er t.d. eins og sniðin fyrir mig nutella ostakaka! Eins og ég segi oft, það næstbesta við þessa uppskrift (það besta er auðvitað útkoman) er að það er sára sára einfallt að gera hana, meira að segja ég get gert hana!

Gott er að gera kökuna daginn áður en hún er borin fram því þá verður hún stíf og fín í ísskápnum.

Innkaupalistinn er hér (fínt að taka bara mynd af honum með símanum):

– 400 g Nutella við stofuhita
– 250 g hafrakex, Digestives
– 75 g mjúkt ósaltað smjör
– 100 g saxaðar ristaðar herslihnetur
– 500 g rjómaostur við stofuhita
– 60 g flórsykur, sigtaður

-Myrkvi frá Borg
-Oud Beersel Kriek

Aðferð:

Myljið kexið í blandara, bæti við smjörinu og um 15 ml af Nutella. Blandið saman. Bætið svo 3 mtsk herslinetum við og blandið þar til orðið eins og aðeins rakur sandur.
.
Finnið til hringlaga springform ca 25cm í þvermál eða þannig að kexbotninn verði ca 1 cm á þykkt þegar kexblandan er sett í. setjið kexblönduna svo í formið. Mér finnst fínt að hafa smjörpappír í botninn og smyrja hliðarnar á forminu með smjöri. Þéttið með skeið eða bara lóanum. Skellið inn í ísskáp
.
Þeytið svo rjómaost og flórsykur saman í hrærivél þar til orðið mjúkt og án kekkja. Bætið þá afganginum af nutella saman við og þeytið áfram. Við viljum enda með silkimjúka og algjörlega ókekkjótta blöndu.
.
Takið formið út úr ísskápnum og setjið blönduna varlega yfir kexbotninn. Þekjið svo yfirborðið með herslihnetunum og setjið filmu yfir og inn í áskáp þar til næsta dag. Berið fram beint úr ísskápnum.

Pörunin:
Kakan er ekki eins þung og ætla mætti, rjómaosturinn gefur netta sýru sem léttir aðeins á. Engu að síður erum við með helling af nutella og svo kexbotninn sem er dálítið þungur. Við gætum farið í imperial stout með þessu sem er nokkuð klassískt með svona rétt en fyrir mér væri það of þungt. Við viljum létta á þessu og opna upp með t.d. spriklandi gosmiklum kirsuberja súrbjór eða kriek eins og hann heitir á frummálinu. Hér á landi er ekki mikið úrval sem stendur en við höfum þó aðgang að einum besta kriek í heimi, OUD BEERSEL KRIEK. Kakan þekur góminn með silkimjúkri hnetusúkkulaðiskán sem gælir við bragðlaukana en gæti orðið aðeins þrúgandi til lengdar en bjórinn skefur þessa skán af með kolsýrunni og bætir svo léttri sýru ásamt kirsuberjum við bragðupplifunina. Sýran í ostinum tengir algjörlega við sýruna í bjórnum. Svo er bjórinn svo fallegur á borði, fagur rauður og konudagslegur ekki satt? Þetta er frábær leið til að heilla konuna upp úr skónum, ja eða bara hvern sem er.

Við Sigrún vorum mjög sátt, hins vegar fannst okkur jafnvel vanta smá kaffirist með þessu. Það er alltaf gott að fá sér kaffi eftir góða máltíð. Það er auðvitað hægt að fá sér rjúkandi kaffibolla með, það kemur mjög vel út en ef við erum að einbeita okkur að bjórnum þá er MYRKVI frá Borg algjörlega máli. Þetta er fullkomið combo, Myrkvi er kaffi porter ef bestu gerð sem þýðir ristað korn og kaffibaunir er gefa ljúfa kaffitóna í bakgrunni. Súkkulaði og kaffi er órjúfanleg heild ekki satt? Nett beiskjan frá humlunum virka líka ofsalega vel á móti rjómaostinum og fitunni í þessu og hjálpar til við að létta á pallettunni milli bita. Ristin á korninu er svo eins og beint framhald af ristuðu herslihnetunum á kökunni. Þetta bráðnar allt einhvern veginn í fullkomna heild.

Já hér eru tveir mjög skemmtilegir möguleikar í boði, er ekki bara um að gera að prófa báða?

Meira um Bjórhátíð á Kex! Cycle Brewing, KEX Brewing collab ofl spennandi!

Birt þann 30. janúar, 2018 af Freyr

Nú er tæpur mánuður í stærstu bjórhátíð Íslandssögunnar, hina árlegu Bjórhátíð á KEX. Ég hef þegar fjallað um hátíðina og skoðað nokkur af þeim 50 brugghúsum sem munu mæta á hátíðina með bjórinn sinn. Mikkeller, To Øl og BRUS, Lord Hobo, Brewsky, Other Half, The Vail, Bokkereyder, Alefarm, De Garde Brewing, Cloudwater Brewing, Civil Society Brewing og People Like Us hef ég þegar fjallað um og má lesa um þessi stórkostlegu brugghús hér. Þess má geta að nýr best of listi Ratebeer er kominn út og má sjá aðeins breytingar á top 10. Cloudwater er komið í 2. sæti úr 5. sæti, sem sagt annað besta brugghús veraldar, og Other Half er nú komið úr 10. sæti í 7. sæti. Mikkeller er núna í 9. sæti en þeir eru svo sem ekki óvanir þessum lista. Nýtt á listanum er svo Cycle Brewing sem er um þessar mundir 5. Besta brugghús veraldar skv Ratebeer. Þetta er magnað, það má svo alltaf deila um Ratebeer og þessa lista en það er efni í aðra umfjöllun.

Mig langar aðeins að skoða þetta nánar og nefna til sögunnar nokkur íslensk brugghús sem menn verða að tékka á á hátíðinni.

Cycle Brewing
5. Besta brugghús veraldar er staðsett í St. Petersburg Florida í Bandaríkjunum. Þeir hófu göngu sína formlega árið 2013 undir nafninu Cycle Brewing en fyrir þann tíma vöktu þeir mikla athygli með ögrandi bjór sinn sem ónefnt brugghús innan veggja barsins Peg‘s Cantina. Það var sonur eigandans, Doug Dozark sem hóf að brugga á staðnum bjór eftir að hafa lært bjórsmíðar hjá ekki minni brugghúsum en Oscar Blues og Cigar City sem nú er t.d. 8. besta brugghús veraldar á ofantöldum lista. Nafnið er skýrskotun í ást Dougs á hjólreiðum, ekki flókið það en Doug ku fara allar sínar ferðir á hjóli. Brugghúsið byrjaði í flottum vönduðum IPA bjórum en síðla árs 2016 fóru þeir að einbeita sér meira að tunnuþroskuðum bjór af ýmsum toga og eru líklega hvað þekktastir fyrir þá bjóra í dag. Þetta verður eitthvað geggjað!

KEX Brewing,
er fyrsta farandsbrugghús Íslands, þeir hafa bruggað hér og þar og með hinum og þessum á þessum fáu árum sem þeir hafa verið til staðar. Þetta flakk þeirra byrjaði eiginlega með „legendary“ samstarfsbruggi (Collab) með Surly brewing í skúr einhverstaðar útí bæ í tengslum við Bjórhátíðina á Kex 2015. Síðan hafa þeir bruggað á flestum brugtækjum landsins og gert ótal samstarfsbrugg með stjörnum á borð við WarPigs, Collective Arts, Brus, Brewski og 18th Street svo eitthvað sé nefnt. Nýlega voru þeir svo í heimsókn í Brooklyn NY hjá stórstjörnumum The Other Half brewing og gerðu með þeim dularfullan berliner weisse sem fékk nafnið Nothing To Declare sem er því miður eitthvað sem hálf vonlaust verður að smakka held ég. Þetta er í raun ansi magnað, að vera að skapa bjór með svona miklum listamönnum í bjórgerð, ekki sjálfgefið!!!

Það verður hins vegar hægt að smakka annan bjór á Bjórhátíð sem KEX Brewing bruggaði með Collective Arts nú á dögunum en það er spennandi imperial stout sem bruggaður er með Omnon caconibbum og salti frá Saltverk og er eins konar tilraun til að gera fljótandi útgáfu af saltkaramellu súkkulaði. Dósirnar líta geðveikt vel út og bjórinn hljómar svakalega spennandi. Collective Arts er svo enn eitt brugghúsið sem menn geta tékkað á á Bjórhátíð einnig.

Lady Brewing
er skemmtilegt nýtt farandsbrugghús sem kom með sinn fyrsta bjór á síðasta ári minnir mig, First Lady sem er virkilega elegant og „down to earth“ IPA. Lady Brewing er eina bjórgerð landsins sem samanstendur einungis af konum en gaman er að minnast þess að það voru í raun konur sem voru brautryðjendur í greininni á sínum tíma en allt frá tímum Egypta hafa konur verið í fararbroddi í bjórgerð þar til tiltölulega nýlega. Lady bruggar bjórinn sinn að mestu í Ægisgarði líkt og KEX gerir um þessar mundir. Flottar dömur hér á ferð.

Malbygg og Ör Brewing Project
eru svo bruggsmiðjur sem enn eru ekki farnar að brugga bjór en verða með frumsýningar á Bjórhátíð 2018. Báðar þessar bjórsmiðjur eru virkilega áhugaverðar og bind ég mjög miklar vonir við þær enda bara topp lið sem stendur á bak við þær. Hér má lesa nánar um Malbygg og Ör.

Reykjavík Brewing Company
eða RVK Brewing er enn eitt brugghúsið sem mun opna dyr sínar á næstu vikum líklega. Hér er spennandi verkefni í gangi sem stefnir í að verða jafnvel fyrsta brugghús landsins með „taproom“ sem er bara geggjað. Hér má lesa um heimsókn mína í verðandi brugghúsið á síðasta ári.

Það eru fleiri íslensk brugghús á Bjórhátíð en ég mun koma að þeim síðar!

Skýjaborgin NE IPA T1, það verður ekki ferskara en þetta!

Birt þann 25. janúar, 201825. janúar, 2018 af Freyr

Það er með fagnaðarlátum sem ég kynni til leiks Skýjaborgina frá Borg Brugghús en um er að ræða fyrsta bjór í nýrri tilraunalínu frá brugghúsinu og fær hann því merkinguna T1. Bjórinn er um 7% New England IPA eða NEIPA sem er sá bjórstíll sem menn eru að tapa sér yfir um heim allan í dag, stundum kallað the „haze craze“ eða skýja æðið því einkennandi fyrir þennan bjórstíl er skýjað útlit hans, oft svo að hann minnir á ávaxtasafa frekar en eitthvað annað. Nánar um NEIPA stílinn hér. Borg hefur gefið út nokkrar hugmyndir að merkimiða T- línunnar á fésbókarsíðu sinni en ég hef valið þá útgáfu sem mér finnst flottust fyrir þessa Tilraunalínu eins og sjá má hér til hliðar.

Ef við skoðum merkimiðann nánar má sjá nýtt tákn, TAP ONLY sem þýðir einfaldlega það að þessi bjór kemur bara á krana, ekki á dósir eða flöskur eins og hugmyndin er í dag amk og því verður aðeins hægt að fá tilraunabjórinn á útvöldum börum borgarinnar, og takið eftir, í ofsalega takmörkuðu magni. Skýjaborgin kemur t.d. bara á örfáa bjórbari og þá bara einn eða tveir kútar á hvern stað ef ég skil Borgar menn rétt. Merkimiði er því í raun bara svona formlegheit því hann mun ekki fara á neitt svo sem nema ef við einhvern veginn neyðum Borg til að setja þetta í aðrar umbúðir en það er önnur umræða.

Skýjaborgin er alla vega stórkostlegur og algjörlega það sem ég kalla NEIPA en það er þó umdeilt hvort þessi stíll sé til sem eiginlegur bjórstíll og menn deila líka um hvað það sé sem skilgreini stílinn. Ég á sjálfur erfitt með að skilgreina stílinn en einmitt svona er NEIPA fyrir mér, safaríkur og „djúsí“ með ávaxtablæ og rétt örlítið beiskjubit frá humlunum og svo vil ég persónulega hafa hann skýjaðan og flottan en það er svo sem bara útlitsatriði en samt, það er hluti af upplifuninni ekki satt?

hver þarf „taprooms“, þetta gerist bara ekki ferskara en þetta!

Útgáfa Skýjaborgarinnar er með dálítið sérstöku sniði en þetta er í fyrsta sinn í sögu brugghússins sem bjór kemur eins ferskur og þessi til neytandans og er afar sjaldgæft að svona gerist á Íslandi. Bjórnum verður nefnilega tappað á kúta á morgun (föstudag), fer svo beint út í bíl og beint á þá bari sem valdir hafa verið og geta tengt strax við dælu hjá sér. Þetta þýðir að bjórinn verður kominn á krana aðeins nokkrum klukkustundum eftir að honum er tappað á kúta, sem er sérstaklega mikilvægt í þessu tilviki því NEIPA stíllinn krefst þess að bjórinn sé drukkinn eins ferskur og mögulegt er. Það er nefnilega svona sem bjórgerðarmennirnir hjá Borg vilja að þú upplifir Skýjaborgina. Erlendis geta bjórsmiðir gert þetta með svo kölluðum „taprooms“ sem eru litlir barir út af brugghúsinu sjálfu og fólk getur þá drukkið bjórinn af krana um leið og hann er tilbúinn frá brugghúsinu. Ef þið viljið smakka þessa perlu þá er um að gera að fylgjast með á fésbókarsíðu Borgar á morgun og drífa sig á þá staði sem munu dæla þessu því þetta klárast jafnvel á morgun eða hinn.

Founders CBS, einn eftirsóttasti bjór veraldar?

Birt þann 19. janúar, 2018 af Freyr

Þið þekkið vonandi öll KBS og velgengni þessa magnaða bjórs, ef ekki þá er um að gera að drífa sig í að bæta úr því. CBS er svo enn eitt ævintýrið frá Founders, sem lengi vel hefur verið eitt af mínum uppáhalds. Oft er talað um hvíta hvali í þessum efnum (white whale) sem mér finnst í raun ekki réttnefni því hvítir hvalir eru í raun bara alls ekkert sjaldgæfir. Menn eru líklega að tengja við Moby Dick sem var jú einstakur, hins vegar eru Beluga Hvalir alls ekkert sjaldgæfir og þeir eru hvítir eins og hveiti. Ég kýs að kalla svona bjór Geirfugl sem kannski er heldur ekki rétt því Geirfulgar eru alls ekki til. Nóg um það, þessi bjór er alla vega nógu andskoti sjaldgæfur og einn eftirsóttasti bjór veraldar vilja menn meina. Founders bruggaði þennan bjór fyrst fyrir ansi mörgum árum og varð hann „instant success“.

Sagan segir að þeir hafi bara dottið niður á þessa blöndu þegar þeir komust yfir eikartunnur sem notaðar höfu verið undir þroskun hlyndsýróps og svo bourbon. Þeir Founders menn ákváðu að prófa að gera KBS uppskriftina (tunnuþroskaður imperial stout), sem þá var orðinn meðal rómuðustu bjórum veraldar, og skella þeim á tunnurnar. Úr varð þessi magnaði konfektmoli sem þeir kölluðu Canadian Breakfast Stout eða bara CBS. Bjórinn sló rækilega í gegn. Founders bruggaði bjórinn síðast árið 2011 og þá í litlu upplagi og kláraðis hann strax og menn börðust hreinlega um síðustu flöskurnar. Nú 6 árum síðar ákvað Founders, ekki síst vegna mikils þrýstings frá fylgjendum sínum um heim allan, að gera loksins annað batch sem hluta af svo kallaðri Barrel Aged seríu sinni, sem inniheldur tunnuþroskaðan bjór af ýmsum toga. Bjórinn kom út í lok síðasta árs og var hægt að fá í öllum fylkjum Bandaríkjanna í afar, afar takmörkuðu upplagi og þurftu menn að forpanta aðgang að röðum fyrir útgáfu bjórins á hverjum stað. Sem sagt, nánast ómögulegt að fá þetta helvíti. Þessu hefur svo skolað hér á strendur okkar Íslendinga fyrir tilstuðlan Andra og Inga hjá Járn og Gler og verður að teljast álíka undalegt og þegar menn uppgötva á næstu árum að maðurinn hefur aldrei lent á tunglinu.

Þetta er sturlun, CBS mun detta í almenna en takmarkaða, býst ég við, sölu á næstunni en í fyrsta sinn í sögunni hér ætla ég ekki að gefa upp tímapunktinn því ég í minni einskærri græðgi og eigingirni ætla að kaupa þetta allt sjálfur þegar þetta kemur í Vínbúðirnar!

Þess má geta að þessi bjór er svakalega flottur með bóndadags kökunni frá Mosfellsbakaríi þetta árið enda hefur uppáhalds súkkulaðikarlinn minn Hafliði haft hönd í bagga með gerð þessa kræsinga. Þvílíkt combo!!!

Bjór & Matur

Höfundur: Freyr