Bjór & Matur

Fyrsti íslenski triple IPA bjórinn, Úlfur Úlfur Úlfur!

Birt þann 20. júlí, 2017 af Freyr

Ég hef fjallað um IPA, double IPA og New England IPA (nýjasta færslan hér) og nú er komið að því að skoða triple IPA. Þetta er í raun ekki flókið, IPA eða india pale ale (sjá nánar hér) er einn vinsælasti bjórstíll veraldar meðal bjóráhugafólks. Einkennandi fyrir stílinn eru ferskir humlar sem gefa áberandi beiskju og hann liggur frá 5% til svona 7%. ÚLFUR frá Borg er gott dæmi um IPA, eiginlega virkilega gott dæmi, sérstaklega nýja útgáfan sem kom út á dögunum.

DIPA eða double IPA, stundum kallaði IIPA eða imperial IPA er svo bara IPA sem er töluvert öflugari bæði í áfengi og humlum. Það er að segja það er mun meira af humlum í bjórnum en það þarf ekki endilega að þýða miklu meiri beiskju, venjan er þó að beiskjan er meiri í DIPA en IPA. Áfengið nær oftast frá 8% og upp í 9-10%. ÚLFUR ÚLFUR er t.d. DIPA!

Triple IPA (IIIPA) er svo hvað? Jú þú gískaðir rétt, enn öflugari IPA, við erum að tala um haug og aftur haug af humlum og töluverða beiskju og svo áfengi frá 10% og uppúr. Munið bara að þótt áfengið sé svona mikið þá þýðir það ekki endilega að bjórinn sé sprittaður og rammur því til að ná svona miklu áfengi þarf mikið magn af malti sem þýðir mikið af sykri. Bæði DIPA og IIIPA geta því verið nokkuð sætari en IPA en auðvitað finnur maður þróttinn og hitann frá áfenginu. ÚLFUR ÚLFUR ÚLFUR (ÚÚÚ) er einmitt triple IPA og fyrstur sinnar tegundar á Íslandi. Borg hefur aldrei notað eins mikið af humlum í einn bjór, Citra og El Dorado humla sem eru þekktir fyrir djúsí suðræna ávaxtatóna. Svo nota þeir sérstrakan amerískan gerstofn, eins konar „super ger“ sem þolir mikið áfengi sem er nauðsynlegt þegar svona stór bjór á í hlut. Þennan stofn ræktuðu bruggmeistarar Borgar sérstaklega upp fyrir þennan bjór. Gerið gefur af sér ljúft og milt ávaxtabragð sem tvinnast vel við humlana. ÚÚÚ pakkar heilum 11% áfengis takk fyrir en það kemur ekki sérstaklega fram í bragði. Maður finnur vel fyrir þessum prósentum en meira á formi hita og þéttleika.

Úlfur úlfur úlfur er kominn í vínbúðirnar núna og hann á eins og alltaf þegar IPA á í hlut að drekkast í gær!

Ýmsar skemmtilegar breytingar á nokkrum kempum frá Borg.

Birt þann 20. júlí, 201720. júlí, 2017 af Freyr

Nú eru sko skemmtilegir tímar fyrir aðdáendur Úlfafjölskyldunnar frá Borg. Strákarnir hjá Borg eru nefnilega duglegir að prófa nýja hluti og þeir eru stöðugt að nostra við ölið og þróa það áfram til að ná fullkomnun. Úlfur hefur t.d. breyst lítillega í gegnum árin og það sama má segja um Úlfrúnu ofl. Nú hafa menn þar á bæ hins vegar gert dálítið stórar breytingar á í raun allri Úlfahjörðinni, Úlf, Úlf Úlf og Úlfrúnu, já og svo er auðvitað hinn glænýji Úlfur Úlfur Úlfur kominn í búðir líka en það er önnur saga.

Allir Úlfarnir hafa fengið nýtt útlit, menn eru t.d hættir að sía bjórinn og því er hann loksins orðinn eins og mér finnst að svona bjór eigi að vera, mattur og djúsí. Borg er líka að nota nýtt ger í Úlfana sína, skoskt ger líkt og menn nota í New England IPA sem ég skrifaði um hér bara í gær. Ger þetta gefur af sér meiri ávaxtablæ og notalegheit. Ég smakkaði nýja Úlf í gær með grillaðri pizzu og hann var alveg helvíti flottur og er ég eiginlega sáttari við hann svona heldur en áður. Kannski bara kominn með pínu leið á honum í gamla búningnum? Nýji ÚLFUR er vissulega með sinn gamla góða Úlf karakter en hann er núna meira djúsí og mýkri en hefur þó beiskjuna sína eins og vera ber. Ég mæli með að menn prófi þetta sem fyrst, pökkunardagur á flöskunum er 12.7.17.

ÚLFRÚN hefur verið dálítið út og suður frá upphafi, alltaf að breytast aðeins en nú er held ég endanleg útgáfa komin fram sem er talsvert breytt frá fyrstu lögun. Í síðustu eða þarsíðustu viku tilkynnti Borg að Úlfrún væri nú með nýja skoska gerinu og ekki eins tær í útliti en svo hafa þeir breytt honum aðeins eftir það. Ég er t.d. hér með dós sem var töppuð í fyrradag, já 18.7.17 takk fyrir, gerist ekki ferskara. Valli og Óli (Borg) sögðu mér að þessi útgáfa væri líklega endanleg, algjörlega ósíaður, með skoska gerinu og beiskja töluvert minni en áður, í raun eins og Úlfrún átti alltaf að vera. Bjórinn er bruggaður þannig að humlar eru settir í bjórinn eftir suðuna, hann er með skosku geri, mattur og djúsí og svo nota menn hafra, hveiti og rúg. Svo þegar beiskja hefur verið dempuð eins og nú er þá hefur þessi bjór í raun allt sem bjór þarf að hafa til að vera kallaður New England IPA (NEIPA). Hvorki Valli né Óli vildu hins vegar gefa neitt upp um hvort Úlfrún sé NEIPA eða ekki enda er það í raun bara ekki aðal atriðið, aðal málið er eins og ávalt, að neytandinn kunni að meta bjórinn. Valli glotti samt dálítið þegar ég spurði hann ef það merkir eitthvað! Fyrir mína parta þá er hér um að ræða bjór sem er vel í áttina að vera NEIPA, hann er ekki eins djúsí djúsí eins og ég vil hafa góðan NEIPA en hann er þó þarna innan marka og virkilega ljúfur og flottur, „New Englandish IPA?“. Úlfrún er bjór sem ég mun nota sem sumarbjór nr eitt hér eftir.

ÚLFUR ÚLFUR er líka breyttur og enn í umferð en eins og kunnugt er kemur Úlfur Úlfur venjulega bara út í kringum 1. apríl. Menn eru þó aðeins að leika sér með hann og laga til og því fæst hann enn, það stendur þó ekki til svo ég viti að bjórinn sé kominn til að vera árið um kring. Úlfur Úlfur er með nýja skoska gerinu og hann er líka alveg ósíaður. Í glasi lítur hann ofsalega vel út, eins og NEIPA svei mér þá, mattur og djúsí. Fyrir mína parta er hann hins vegar of þurr og beiskur fyrir stílinn en góður er hann svo sannarlega og líklega sá besti hingað til. Óli Rúnar (Borg) vill heldur ekki meina að menn hafi verið að reyna að brugga New England IPA sérstaklega. Um að gera að drífa sig í þessa karla á meðan þeir eru ferskir.

Loks má nefna að AYCAYIA er kominn aftur og alveg nýtt batch og því afar ferskur, svo var að detta í hús nýr SÆMUNDUR, settur á dós 18.7.17 og ku hann vera með nokkuð minni beiskju en sá fyrsti.

En næsta „stopp“ ÚLFUR ÚLFUR ÚLFUR triple IPA!!!

Skýjaða NEPA æðið á Íslandi er það eitthvað?

Birt þann 19. júlí, 201720. júlí, 2017 af Freyr

New England IPA (NEIPA eða NEPA), er það sem allir eru að tala um, “The Haze Craze“ eins og sumir kalla það! En hvað er í gangi? NEIPA er bjórstíll sem er að gera allt vitlaust um þessar mundir, eða alla vega í nágrannalöndum okkar enda ekkert skrítið. Stíllinn sem er tiltölulega nýr af nálinni er ný túlkun brugghúsa á New England svæðinu í Bandaríkjunum á hinum ástkæra india pale ale (IPA) stíl sem notið hefur mikilla vinsælda um heim allan um áraraðir. Sumir segja að stíllinn hafi byrjað með HEADY TOPPER frá Alchemist sem líklega er einn eftirsóttasti bjór veraldar? Ég skal ekki segja en ég get þó sagt það að þessi bjórstíll er algjört hnossgæti. Stíllinn er einkennandi mattur og oftast ljós eða heiðgulur og minnir um margt á djúsí ávaxtasafa. Ávaxtasafi er í raun ekki fjarri lagi því það er heill hellingur af safaríkum, tropical humlum í þessum bjórum sem eru settir í bjórinn eftir að suðu er lokið í bruggferlinu. Á þann máta er beiskju stillt í hóf en við fáum þess í stað allt þetta dásamlega ávaxtaríka humalbragð og þessa skýjuðu áferð. Gerið skiptir alltaf máli þegar kemur að bjór og oftast nota menn breska eða ameríska stofna í NEIPA en það eru svo sem engin lög til um það .

Ég verð að segja að ég kolféll fyrir þessum stíl enda hef ég alla tíð hallast meira að ósíuðu útgáfunum af IPA og ég bara elska þetta dásamlega fruity humalbragð. Sumir strangtrúaðir bjórspekulantar eru hins vegar ósáttir og vilja meina að hér sé verið að upphefja eiginleika í bjór sem hefur verið tengt við óvandaða framleiðslu, sem sagt gruggið og svo eru hin “hárnákvæmu“ vísindi að tímasetja humlaviðætur í suðunni fokin út um gluggann. Óvandaður bjór þar sem enginn þarf að hugsa, bara sturta öllum humlunum útí eftir suðu og málið er dautt. Ég skal ekki segja, en fyrir mitt leiti er aðal málið útkoman í lokin, ef bjórinn er góður þá er mér persónulega sama um hversu flókið bruggferlið var, ég get reyndar sagt ykkur að það er bara ekkert auðvelt að brugga þennan stíl, ég hef reynt nokkrum sinnum og ekki komist nálægt því sem þessir töframenn eru að ná fram sem vel kunna til verka.

Hvar getur maður svo komist í herlegheitin? Jú erlendis auðvitað, t.d. fara menn mikið héðan til Boston en þar eru algjörir snillingar sem hafa masterað þennan bjórstíl ss Trillium Brewing og Tree House Brewing og mæli ég sterklega með að menn prófi þessa, í Kaupmannahöfn hafa snillingarnir Mikkeller og WarPigs náð algjörri fullkomnun í þessu líka og svo verð ég að nefna Other Half í Brooklyn New York en annars eru flest almennileg brugghús að reyna fyrir sér í þessum bjórstíl nú orðið. Hér heima er hins vegar ekki auðvelt að komast í NEIPA bjór og ég furða mig eiginlega á því. Það hafa vissulega verið event þar sem NEIPA bjór hefur dottið inn á bari eins og t.d. á Mikkeller & Friends Reykjavík en þetta er þó sára sára sjaldan. Borg brugghús hefur reynt fyrir sér í þessu en þeir brugguðu New England bjór með Gæðingi á síðasta ári en sá bjór fór í örlitlu magni bara á kúta á einhverja fáa bari bæjarins. Ég náði amk ekki að smakka. Það má svo auðvitað alltaf deila dálítið um hvenær bjór er NEIPA eða ekki, ég er svo sem með ákveðnar skoðanir hvað það varðar og miðað við það þá hef ég ekki séð eða smakkað neinn NEIPA frá Borg (það má svo sannarlega vera mér ósammála, t.d. hvað með Lóu eða nýja Úlf Úlf?), vonum að það standi til bóta, það sama má segja um Gæðing. The Brothers Brewery í Vestmannaeyjum eru að gera virkilega góðan bjór almennt og þeir eru með bjór sem þeir kalla DIRTY JULIE sem þeir segja að sé New England IPA. Ég hef ekki smakkað hann en sem komið er en það er svo sannarlega á “to do“ listanum. Vandinn er að ég á aldrei leið til Vestmannaeyja en það er eina leiðin til að smakka þennan bjór eins og staðan er í dag. Hins vegar hefur fluga á vegg sagt mér að við hér á meginlandinu getum átt von á að komast í Dirty Julie í höfuðborginni áður en um langt líður. Hlakka til. Svo eru það strákarnir Hinni, Steini og Eymar í Kex Brewing, þeir eru svo sannarlega að svara kallinu og hafa verið að gera ekki einn eða tvo heldur nokkra NEIPA bjóra undanfarna mánuði. Ég hef smakkað nokkra hjá þeim og þeir eru alveg að ná þessu að mínu mati. LESS IS NEVER MORE sem þeir gerðu með WarPigs fyrr á árinu var t.d. sérstaklega góður og finnst mér að þar hafi menn algjörlega neglt stílinn. Ég þekki þessa stráka persónulega og veit að þeir eru svo sannarlega ekki hættir. Ég verð svo að nefna Bryggjan Brugghús, þeir gerðu NEPA bjór sem líklega er enn hægt að fá hjá þeim. Ég smakkaði hann fyrr á árinu en var ekki hrifinn, fínn bjór en ekki New England IPA eins og ég vil hafa þá. Bergur bruggmeistari gerir annars mjög flottan bjór og hef ég oftast verið ánægður með Bryggju bjórinn til þessa.

Það er sem sagt þannig að það er ekki hægt að fá þennan geggjaða bjórstíl út í búð og enn sem komið er þarf að fara til Vestmannaeyja í Dirty Julie (sagt með fyrirvara þar sem ég hef ekki smakkað bjórinn, kannski minnir hann ekkert á stílinn?) eða bíða eftir að Kex Brewing komi með kút undir á Mikkeller & Friends. Það er reyndar stundum hægt að fá NEIPA dósir á Mikkeller & Friends frá brugghúsi þeirra í San Diego og þarf bara að fylgjast með á fésinu. Fyrir mína parta þá er þetta samt óásættanlegt ástand, ég vil geta amk gengið að góðum NEIPA vísum á krana einhvers staðar, þetta er besti bjórstíllinn fyrir mig um þessar mundir. Auðvitað væri enn betra að geta kippt með dós af þessu í vínbúðinni. Vandinn er samt að hér er um gríðarlega viðkvæma ferskvöru að ræða og þá þarf rennslið að vera gott svo hann staðni ekki í hillunum og því skil ég svo sem vel að menn þori ekki alveg þangað enn sem komið er.

Það verður spennandi að sjá hvað gerist á næstu mánuðum. Ég væri alveg sáttur við að sjá Borg NEIPA krana fast á Skúla Craft bar t.d.

Eldbökuð Pizza og bjór!

Birt þann 15. júlí, 201715. júlí, 2017 af Freyr

Pizza og bjór er vel þekkt pörun, eitthvað sem við í raun bara gerum án þess að hugsa út í það ekki satt? Oftast er það lager bjór sem verður fyrir valinu sem er bara fín pörun í sjálfu sér, einfalt og gott. Bjórinn gefur stuðninginn án þess samt í raun að bæta nokkru við. Hins vegar finnur maður þegar maður sleppir lagernum að það vantar eitthvað.

Ég er staddur hér á Côte d’Azur eða það sem við þekkjum sem Frönsku Rivieruna sem er í rauninni strandlengja í S-Frakklandi sem liggur að Miðjarðarhafinu og nær milli Ítalíu í Norðri og Spánar í Suðri. Við Sigrún höfum í mörg ár látið okkur dreyma um að skoða S-Frakkland og nú kom loks að því. Við erum stödd hér í stóru húsi í agnar smáu fjallaþorpi sem liggur milli Nice og Cannes. Þetta er dásemdar staður en rúsínan í mínum persónulega pylsuenda er útieldhús sem fylgir húsinu. Hér getur maður grillað, eldað á eldavélinni eða það sem best er, eldað í eldofninum, já ég sagði eldofninum! Ég get sagt ykkur að það er fátt sem jafnast á við það að dúlla sér við pizzugerð að kvöldlagi í 29 stiga hita í garðeldhúsi á meðan fjölskyldan svamlar um í lauginni skammt frá. Auðvitað er maður svo með franskt rauðvín við hönd á meðan maður stendur í „ströngu“.

20170715_231549 — Útieldhúsið séð frá veröndinni, hér sést í grillið, eldofninn er í hinu horninu. Dásamlegur reitur!

Það er dálítil kúnst að „stilla“ eldofninn rétt ef svo má segja. Ég eldaði pizzur held ég þrisvar í ofinum í þessari ferð og ég skal segja ykkur að þetta eru bestu pizzur sem ég hef gert. Í fyrstu umferð náði ég ekki nægilegum hita í ofninum og lenti í vandræðum en pizzurnar voru samt góðar. Ég ráðfærði mig við nokkra góða og taka tvö var mun betri. Ég notaði þá heilan poka af eldivið, hlóð upp bálkesti innst í ofninum og lét loga glatt. Svo er maður ekkert að bíða eftir að þetta verði að kolum, bara drífa pizzurnar inn og muna að snúa reglulega til að fá jafnan bakstur. Ég var með bara heldur klassískar ítalskar pizzur með hráskinku, fínt skornum kryddpylsum, rochefort osti, rifnum osti, tómötum, ólífum og svo bara ferska basilliku í lokin. Botninn varð létt brenndur í köntunum, stökkur og dásamlegur og allt áleggið bráðnað í drasl. Pylsurnar sem lágu efst voru líka örlítið brenndar sum staðar sem kom mjög vel út.

Það er 35 stiga hiti úti og svo þegar ofninn er kominn á flug, 300 gráður þá verður ansi heitt í eldhúsinu þó það sé úti. Rauðvín gengur alveg svo sem á meðan maður er að elda…rauðvín gengur auðvitað alltaf, alls staðar ekki satt? Hins vegar tókst mér að grafa upp IPA hérna í matvörubúðinni, bæði frá Brooklyn Brewing og BrewDog. Ískaldur svona karl í þessum hita er bara nákvæmlega það sem maður þarf. Við ákváðum svo að halda bara áfram í bjórnum með Pizzunum.

IPA er frískandi og hressandi sérstaklega í hitanum hér, hann gefur nokkra sætu sem tengir vel við ger og korn í pizzabotninum. Það er einnig nokkur selta í álegginu, bæði frá ólifunum, kjötinu og blámygluostinum en beiskjan frá humlunum í bjórnum lyftir undir seltuna á vissan máta en á sama tíma kemur sætan frá maltinu inn á móti og skapar fullkomið jafnvægi. Olían frá ólífunum og svo feita, rjómakennda áferðin í blámyglunni opnast vel upp með beiskjunni frá humlunum. Þetta er bara algjör snilld. Ég fékk mér líka gott rauðvín með pizzunni en það var bara ekki að gera sig.

Grillað lamb í kirsuberjabjórlegi með kinoa-myntu salati með granateplum, pistashnetum og geitaosti.

Birt þann 19. júní, 201723. júní, 2017 af Freyr

Það eru komnir tveir nýjir bjórar frá Borg í hillur Vínbúðarinnar, tveir af nokkrum reyndar þetta sumarið, annar er ný útgáfa af Ástríki sem sem bara dúkkaði upp í dag en Ástríkur er eins og margir muna hinn árlegi óopinberi Gay Pride bjór okkar Íslendinga. Hinn er endurútgáfa af Aycayia IPA sem er samstarfsbjór Borg Brugghúss og Cigar City í Tampa. Þetta er bjór sem ég er mjög stoltur af enda átti ég nokkurn þátt í tilurð hans á sínum tíma. Bjórinn kom út í flöskum á síðasta ári sælla minninga en er nú kominn í nýjan og betri búning, dósir sem eru bæði umhverfisvænar og varðveita gæði bjórsins betur en flöskurnar!

Kriek legið lambakjöt.

Ég hef haft augastað á þessum rétti í nokkurn tíma. Uppskriftin er úr bókinni Cooking with beer eftir Mark Dredge. Ég greip nokkrar lambasteikur um daginn þegar ég var að skoða Costco eins og stór hluti þjóðarinnar. Ég fann svo aldrei tíma til að elda þær vegna anna. Í gær ákvað ég að henda kjötinu í pækil þar sem ég átti allt til sem þurfti, ekki vildi ég að kjötið færi til spillis. Daginn eftir var svo kjötið eldað. Hugmyndin var upphaflega að para þetta með stout eða porter, reyndar veit ég að súrbjór á borð við gueuze myndi líka ganga vel. Ég komst hins vegar ekki í vínbúðina fyrir kvöldið. Ég átti til smakkprufur af Ástríki og Aycayia og ákv að prófa þá með lambinu. Hugmyndin er svo sem ekki galin, belgískur blond með tropical humlum sem smellpassa við ávaxtaþemað i salatinu og svo þessi geggjaði Aycayia sem er hlaðinn af djúsí framandi suðrænum humlum sem gefa okkur keim af mango, ferskjum, ástaraldin ofl. Ég verð að viðurkenna að ég varð bara nokkuð spenntur fyrir þessu. Mynta, granatepli, sítróna og kirsuber með öllum þessum suðrænu ávaxtatónum frá ölinu hljómar næstum jafn vel á blaði og í munni.

Það sem þarf (fyrir 4):

Pækill
250ml Oud Beersel Kriek eða annar kriek
3 mtsk sykur
3 mtsk salt
12 kóríander fræ, mulin
1/2 tsk mulinn kanill
2 lárviðarlauf
3 hvítlauksgeirar
Lambakjöt að eigin vali, kótilettur eða lambasteikur t.d.

Salatið
Kinoa mv 4 (ca 60g á mann)
Fræ úr einu granatepli (varðveitið safann ef hægt)
100g ristaðar pistashnetur (án skeljar)
Rjómageitaostur eftir smekk
Lúka af ferskri myntu, skorin fínt

Dressing
4 mtsk Oud Beersel Kriek eða annar kriek
2 mtsk sítrónusafi
2 mtsk safi úr granatepli ef einhver er
4 mtsk olífuolía
1 mtsk hunang
1/2 tsk salt

Bjórinn
Ástríkur belgískur pale ale eða Aycayia IPA eru mjög skemmtilegir með þessu en aðrir góðir möguleikar eru stout eða gueuze (t.d. Oud Beersel Gueuze).

Aðferð

Daginn fyrir eldun er pækill undirbúinn. Setjið allt í skál og hrærið. Geymið rest af bjórnum til morguns. Hellið yfir í ílát með loki og látið kjötið ofan í þannig að það fljóti yfir kjötið. Bætið vatni ef þarf.

Þegar elda á kjötið, takið lambið úr pæklinum og þerrið með viskastykki eða bréfi. Saltið og piprið aðeins og grillið á heitu grilli í nokkrar mín á hvorri hlið. Látið hvíla í 5 mín áður en borið fram.

Sjóðið kinoa eins og stendur á pakkningu og látið kólna. Blandið svo í skál eða á fat. Dreifið svo granateplafræjum, hnetunum, geitaosti og myntu yfir á smekklegan hátt. Búið til dressing með að blanda öllu saman í skál og hræra vel. Dreifið svo yfir bæði lambið og salatið. Það munar öllu að hafa svoldið vel blautt salatið.

BJÓRINN

ÁSTRÍKUR frá Borg brugghús er sem fyrr segir hinn óopinberi Gay Pride bjór okkar Íslendinga. Hann kemur út í regnbogalitum ár hvert í kringum Gay Pride og áletrunin á merkimiðanum er öfug miðað við það sem við eigum að venjast. Hingað til hefur Ástríkur verið öflugur belgískur tripel eða strong ale í krinum 10% áfengis en að þessu sinni er hann aðeins 4.6%. Bjórinn er bruggaður með úrvals amerískum humlum sem þekktir eru fyrir suðrænan bragðprófíl. Útkoman er notalegur belgískur blond með þægilega beiskju og milda suðræna ávaxtastemningu. Mjög notalegur og auðveldur bjór.

Hinn bjórinn er svo hinn dásamlegi AYCAYIA, sem einnig er frá Borg, vægast sagt stórkostlegur bjór með aðdáunarverðan humalprófíl, Equinox, El Dorado, Eureka, Calypso, Mandarina Bavaria ásamt þekktum félögum Citra, Mosaic og Magnum. Þessi samsetning gefur af sér suðræna hamingjubombu á formi 6.4% IPA. Í glasi er hann gylltur og mattur með dúnamjúkan froðuhaus. Um leið og maður hellir honum finnur maður tælandi angan af suðrænum ávöxtum á borð við ananas, perur og mango til að nefna eitthvað. Í munni er hann hreint út sagt dásamlegur, spriklandi gosið lífgar strax upp á bragðlaukana og gerir þá klára fyrir humlaseríuna sem mynda flókið samspil ávaxta, beiskju og blóma. Hér má finna heila ávaxtakörfu af suðrænum ávöxtum af öllum stærðum og gerðum. Ég fer ekki nánar út í það því hér verða menn að lofa sínum eigin bragðlaukum að ákveða nákvæmlega hvaða ávexti þeir pikka upp en það er einmitt svo einstaklingsbundið. Sætan er langt í frá að vera of mikil því bjórinn er nokkuð þurr á móti. Eftirbragð er langt og seyðandi og manni einhvern veginn er alveg sama þó maður eigi eftir að tapa áttum. Hver sopi kallar á þann næsta en þannig á það líka að vera.

PÖRUNIN

Þessi réttur er mildari en mann grunar. Bragðið af lambakjötinu fær að njóta sín til fulls þar sem engar þungar sósur eru að trufla, ég mæli samt með að menn noti ríkulega af dressingu til að fá þennan flotta súra berjakeim sem kemur mjög flott út með myntunni. Seltan frá pistashnetunum, sýran frá granateplafræjunum og svo þessi funky jörð og rúnaða áferð frá geitaostinum vinna vel saman með myntunni og kirsuberjakeimnum frá ölinu og lífga hressilega upp á lambakeiminn og skapa dálítið „öðruvísi“ stemningu.

Hér verðum við að spá í regluna um að para létt með léttu því við viljum ekki gera lítið úr kjötinu. Bjórinn þarf að lyfta undir réttinn og draga fram skemmtilega bragðtóna sem maður jafnvel myndi missa af annars. Belgískur blond er flottur í þetta og ég tala nú ekki um ÁSTRÍK sem er með amerískum humalprófil sem gefa bragð af þekktum suðrænum ávöxtum. Hér passar nefnilega að hafa ávaxtasætuna með til að draga fram ber og ávexti í dressingunni. Belgíski gerkeimurinn á einnig alltaf vel við lambið sem er dálítið jarðbnundið ef svo má segja. Myntan og krydd frá gerinu vinna mjög skemmilega saman.

Klassískur IPA er kannski ekki fyrsta val með svona mildum lambarétti en beiskjan frá humlunum koma reyndar alltaf vel út með grilluðu kjöti og eins er beiskjan þægileg móti fitunni í kjötinu. AYCAYIA er vissulega IPA en með tropical humlum sem gefa bragð af framandi suðrænum ávöxtum á borð við það sem maður fær í Ástríki nema bara mun meira áberandi. Humlarnir vinna einnig vel með myntunni og draga hana meira fram. Bjórinn gerir þennan milda rétt nokkuð bragðmeiri og skapar meiri dýpt og ávextirnir eiga vel við eins og fyrr segir.

Ég var með lambasteikur hér en ég held að grillað þurrkryddað lambalæri kæmi ofsalega vel út líka, mig langar amk að prófa það næst. Skál, svo hlakka ég til að skrifa næstu snilld frá Borg sem er bara rétt handan við hornið. Lifið heil!

Kjúklinga mango grillsalat með mango bjór

Birt þann 10. júní, 201719. júní, 2017 af Freyr

Stundum er það allra einfaldasta bara svo gott. Nú er komið sumar og því við hæfi að borða eitthvað létt og ferskt og ekki skemmir ef maður getur notað grillið aðeins líka! Þetta ljúffenga salat er komið frá Nigella Lawson en hún er mikið fyrir allt sem er djúsí og gómsætt en jafnframt einfalt í framleiðslu. Ég hef lengi verið að spá í að prófa þetta salat með einum af mínum uppáhalds bjórum, FOUNDERS MANGO MAGNIFICO en núna þegar Borg er að koma með nýjan bjór á markað, SÆMUND MANGO PALE ALE þá bara hafði ég enga afsökun lengur fyrir að drífa ekki í að prófa þetta.

Það sem þarf (fyrir 3-4):

1 til 2 þroskaðir mango skornir í kubba
2 fínt saxaðir vorlaukar
2 ferskir chili ávextir fínt skornir og fræhreinsaðir
2-3 súraldin (lime), safinn úr þeim.
3-4 kjúklingabringur, grillaðar og skornar í bita
kál eftir smekk, t.d. einhver blanda bara
2 lúkur af ferskum kóríander, skorinn gróft
sletta af ristaðri sesam olíu, ca 2 – 3 tsk

Bjórinn

Mango Magnifico (10%) frá Founders og/eða Sæmundur Mango Pale ale (4.7%) frá Borg. ATH það þarf að sérpanta Mango Magnifico via ÁTVR.

Aðferð:

Flysjið mango og skerið í litla kubba, saxið vorlaukinn fínt sem. Hreisnsið fræin úr chili ávöxtunum og skerið fínt. Setjið allt þetta í skál og blandið varlega með höndunum. Munuið að chili er ekki gott í augu. Um að gera að skafa safann af mangoinu með í skálina. Kreistið safa úr súraldin eftir smekk yfir. Ég vil hafa dálítið mikið til að vinna á móti chili brunanum.

Grillið kjúklinginn, fínt að salta aðeins og skerið svo í bita og látið kólna. Bætið svo kjúklingabitum og káli í skálina og blandið varlega. Setjið svo sesam olíu yfir og ólífu olíu eftir smekk. Loks dreifið þið þessu á disk og sáldrið ögn af ferskum kóríander yfir.

BJÓRINN

Mango Magnifico (10%) er svakalegur bjór, einn sá skemmtilegasti þarna úti frá Founders í Michigan og tilheyrir svo kallaðri Backstage series sem eru bjórar sem Founders gerir aðeins einu sinni. Þetta er eins konar leiksvið bruggaranna, þeir sjóða saman eitthvað magnað og gott og svo kemur það bara ekki aftur þrátt fyrir miklar vinsældir (blessuð sé minning Bolt Cutters). Oft alveg geggjað stöff. Einstaka sinnum hafa þeir reyndar látið undan þrýstingi og gert sama bjórinn tvisvar. Mango Magnifico er frábær hugmynd, við erum að tala um bjór sem er hlaðinn mango og svo nota menn habanero chili til að skapa alveg djöfullegt en frábært mótspil við djúsí mangóið. Maður finnur engan veginn fyrir þessum 10% áfengis fyrr en þegar líður á kvöldið og maður er farinn á trúnó við nágrannana upp úr þurru. Mangoið er áberandi og svo einhver ofsafenginn ávaxtasæta. Bjórinn er samt sem áður þungur og magnaður og svo kemur léttur chili bruninn í gegn í restina. Svakalegur bjór sem ruglar saman sumri og vetri einhvern veginn á ljúfan máta? Bjórinn þarf að sérpanta via ÁTVR sem er í raun ekkert mál.

PÖRUNIN

Þessi pörun er nokkuð augljós ekki satt, mango og cili með mango og chili? Borðleggjandi!!! Stundum er nefnilega virkilega farsælt og bara allt í lagi að para saman eins bragði við eins bragð, þ.e.a.s bragð sem passar saman og magnar hvort annað upp. Rétturinn er ferskur í grunninn og mildur en ferskur chili ávöxturinn rífur hann dálítið upp og gerir hann öflugan og staðfastan. Kjúklingurinn er látlaus með þessu öllu saman en virkar sem nauðsynleg fylling og tengir saman lime, mango, kóríander og chiliið auðvitað. Maður gæti ætlað að Mango Magnifico væri of öflugur, við erum jú með 10% monster en nei, mangoið tengir skemmtilega við mangoið í salatinu og magnar hvort tveggja upp og sætan í bjórnum dempar dálítið brunann í salatinu. Rétturinn fær að njóta sín í munni en svo tekur bjórinn við og pakkar öllu inn í þétta mango umgjörð. Habanero bruninn frá bjórnum kemur svo alveg í restina og rífur ögn í. Það er ofsalega gaman að upplifa hér hvernig þessi magnaði bjór breytist til hins betra með þessu frábæra salati. Vandamálið hér er hins vegar að Mango Magnifico tileyrir Backstage series og verður ekki bruggaður aftur. Það er þó einhver slatti til ennþá held ég.

Önnur alveg geggjuð pörun er hinn glænýji Sæmundur frá Borg. Þessi bjór sem er mango pale ale er reyndar ekki kominn í búðir þegar þetta er ritað en hann er bara að detta í hús. Hér erum við með pale ale sem bruggaður er með mango puré sem gefur óneitanlega áberandi mango keim í gegnum hæfilega beiskju/humal bakgrunninn. Hér erum við með allt annan bjór, 4.7% vs 10% og enginn habanero bruni í restina. Við Sigrún ákváðum að prófa þennan karl með mango salatinu og viti menn, bjórinn er að brillera hérna. Eins og ég segi, ef manni finnst bjórinn góður einn og sér, þá er hann stórbrotinn í þessari pörun. Hér gerist eitthvað allt annað en hér að ofan, í stað þess að taka yfir og dempa réttinn þá kemur Sæmundur inn og rífur upp réttinn, humlar og beiskja í bjórnum rífa upp brunann í chiliinu og einnig mangokeiminn. Mangoið í bjórnum styður einnig vel við ferska mangoið í salatinu. Svo er aldrei of oft sögð tuggan um hve humlar og kóríander virðast eiga vel saman, dásamlegt. Hér erum við með tvo valmöguleika, annars vegar þróttmikill bjór sem tekur yfir á þægilegan og elegant máta og hins vegar léttur bjór sem tekur salatið upp á annað level og magnar allt upp á sama tíma og hann léttir á palettunni. Við Sigrún gátum ekki sameinast um hvor bjórinn væri betra match og því mælum við með báðum.

KBS sjaldgæfur gullmoli á ótrúlegum stað

Birt þann 5. júní, 2017 af Freyr

Founders brewing hefur lengi verið í miklu uppáhaldi hjá mér, saga brugghússins er ein af þessum fallegu ævintýrum sem enduðu vel. Það voru tveir áhugasamir heimabruggarar sem ákváðu að segja störfum sínum lausum og snúa sér alfarið að bjórgerð fyrir almennan markað. Þeir helltu sér út í svimandi há bankalán og stofnuðu svo brugghúsið árið 1997. Þetta var í Grand Rapids í Michigan. Í upphafi brugguðu þeir bara hefðbundinn bjór, ekki vondan en ekkert sem menn tóku sérstaklega eftir, þeir voru á barmi gjaldþrots þegar þeir félagar Mike Stevens og Dave Engbers ákváðu að venda kvæðum í kross og skapa bjór eins og þeir vildu í raun sjálfir sjá bjórinn. Bjór með hortugheit, eitthvað sem var ekki fyrir fjöldan heldur meira fyrir alvöru bjórnörda. Þetta gekk svona líka vel upp hjá þeim félögum. Vinsældir bjórsins jukust ár frá ári og nú er brugghúsið metið meðal bestu brugghúsa veraldar. Á stærsta brjórsamfélagi veraldar Ratebeer.com hefur brugghúsið verið í efstu þremur sætunum undan farin ár. Þeir eiga einnig nokkra bjóra á lista yfir 50 bestu bjóra veraldar og bjór þeirra hefur unnið margoft til verðlauna á hinum ýmsu bjórkeppnum.

KBS eða Kentucky Breakfast Stout er í dag meðal eftirsóttustu bjóra í veröldinni og er í raun ekki hlaupið af því að ná sér í flösku. Saga bjórsins hefst árið 2001 þegar Dave Engbers er staddur á barnum sínum og einn gestanna gefur honum súkkulaðihúðaða espresso kaffibaun til að smakka. Það vildi svo til að Dave var þarna með Founders Porter við hönd sem hann skolaði bauninni niður með. Þarna varð hann fyrir hugljómun, afhverju ekki að blanda súkkulaði, kaffi og bjór saman? Þetta varð kveikjan af einum vinsælasta stout veraldar, Founders Breakfast Stout sem kemur út ár hvert milli september og desember og er stundum hægt að finna þenna bjór hér heima. Meira fikt og pælingar leiddu svo til þess að þeir félagar ákváðu að prófa dálítið galna hugmynd að sjá hvað myndi gerast ef bjór myndi liggja á notuðum bourbon tunnum en þá þessum tíma voru menn ekki farnir að gera þetta. Þeir sömdu við Jack Daniels um að fá nokkrar notaðar tunnur, eitthvað sem þótti frekar undaleg bón á þessum tíma, og fylltu þær með Breakfast Stout. Þarna duttu menn niður á eitthvað alveg nýtt og eftir nokkrar fínstillingar leit KBS dagsins ljós. Bjórinn var og er fáanlegur í mjög takmörkuðu magni því það eru takmörk fyrir því hve mörgum tunnum maður getur komið fyrir á lager. Bjórinn liggur nefnilega þarna í heilt ár. Útkoman er stórkostlegur mjúkur og djúsí imperial stout (11.8%) með vanillukeim, kaffi, súkkulaði og svo auðvitað áberandi bourbon. Þetta er bara eitthvað sem menn verða að prófa. Nú er svo komið að þessi bjór er fáanlegur í ÁTVR. Eitthvað sem er í raun galið þar sem fólk stendur í röðum til að ná sér í flöksu þegar KBS dettur í sölu ár hvert í kringum apríl.

KBS er dásamlegur til að njóta einn og sér á síðkvöldi til að innsigla góðan dag eða með nokkrum vel völdum súkkulaðimolum eftir góða máltíð.

Halloumi- og aspasgrillsalat með belgískum hveitibjór.

Birt þann 4. júní, 201710. maí, 2019 af Freyr

Við fengum Gestgjafann í heimsókn um daginn (2017) til okkar. Tilefnið var í raun bara sumarið, nýtt Weber gasgrill á pallinum og kannski það mikilvægasta að hitta góða vini og leika okkur með bjór og mat. Við vorum með fjóra rétti og belgískt bjórþema með. Gestir okkar voru nefnilega hluti af bjórklúbbnum okkar frá Danmörku en við byrjuðum einmitt að skoða belgíska bjórinn á þeim tíma og því fannst okkur Sigrúnu tilvalið að bjóða uppá gamla góða félaga með matnum. Bjór eins og t.d. Hoegaarden var alveg ómissandi við grillið í dönsku sumarsólinni.

Þetta var virkilega skemmtileg grillveisla með góðu fólki. Lesa má nánar um réttina og uppskriftir í Júníblaði Gestgjafans 2017 og þar eru líka haugur af skemmtilegum myndum. Mig langar samt að henda á ykkur einni uppskrift frá þessu kvöldi sem kom mér eiginlega á óvart. Pörunin með Hoegaarden var algjörlega geggjuð. Myndirnar hér í þessari færslu eru teknar bara beint úr blaðinu og eru eftir ljósmyndarann Hákon Davíð Björnsson.

SALATIÐ – grillaður Halloumiostur og aspars með fennel og rauðlauk.

Það er alltaf gaman að prófa eitthvað nýtt, sérstaklega þegar útkoman er góð. Okkur langaði að grilla eitthvað létt í forrétt, við vorum líka með grillaða bjórlegna humarhala í forrétt reyndar. Grillaður aspars er snilld, ég hef í raun aldrei grillað hann sjálfur áður og langaði því að prófa, svo vantaði eitthvað spennandi með. Halloumi ostur er kjörinn fyrir grillið því hann er bæði skemmtilegur á bragðið og svo er hann svo þéttur í sér að hann bráðnar ekki ofan í grillið við eldun. Við fórum því á stúfana og fundum uppskrift í gamalli bók frá Jamie Oliver og ákváðum að láta reyna. Eftirfarandi er því byggt að mestu leiti á þeirri uppskrift.

20170601_140805 — Mynd tekin beint úr Gestgjafanum, mynd eftir Hákon Davíð Björnsson

Það sem þið þurfið (fyrir 5-6):

1-2 fennel hausar, fer dálítið eftir stærð
2 stk rauðlaukur
3 mtsk Extra Virgin ólifuolía
Safi úr einni appelsínu
600 g ferskur grænn aspars
400 g Halloumi ostur
Salt og pipar eftir smekk
Svo er það bjórinn, belgískur hveitibjór eins og t.d. HOEGAARDEN BLANCHE

Aðferðin:

Hitið grillið. Trimmið svo fennel hausana og skerið fínt í ræmur, flysjið rauðlaukinn og skerið fínt. Leggið til hliðar. Skerið appelsínuna í tvent og kreistið allan safan úr og setjið í skál. Það er í fínu lagi að fá aldinkjötið með. Bætið ólifuolíu saman við og hrærið. Leggið til hliðar.

Næst er það grillunin. Skolið aspasinn vel og brjótið ljótu endana af, þeir bara brotna á rétta staðnum. Pennslið með ólifuolíu og kryddið með salti og pipar. Grillið svo á meðalheitu grilli þar til mjúkt og komnar fallegar rendur í asparsinn. Snúið asparsnum nokkrum sinnum svo hann brenni ekki. Takið af grillinu.

Halloumi osturinn er síðastur og borinn fram strax eftir grinnun. Stykkið er skorið eftir smekk í u.þ.b. 5 mm þykkar sneiðar og pennslaður báðum megin með ólifuolíu og ögn saltaður. Grillið á heitu grilli þar til fallegar rendur eru komnar á ostinn eða hann er orðinn dálítið mjúkur.

Blandið fenníku, rauðlauk og aspas í skál, raðið halloumi ostinum ofan á, hellið appelsínublöndunni yfir og berið strax fram. Það er gott að geyma aðeins af appelsínulegi til að bæta á salatið eftir hentugleika.

BJÓRINN – Belgískur hveiti, t.d. Hoegaarden Blanche.

Belgar eru snillingar í bjórgerð, það verðir ekki af þeim tekið. Belgískur hveitibjór er dásamlegur sér í lagi á heitum sumardegi. Það er einhver lenska í okkur Íslendingum að telja að hveitibjórar séu þungir bjórar, líklega tengja menn hveiti við brauð? Ég skal ekki segja, það er hins vegar þannig að hveitibjórar eru hinir mestu svaladrykkir. Fyrir mér er hveitibjór sumarbjór, eitthvað sem maður drekkur í steikjandi sumarsólinni til að svala þorstanum. Hoegaarden er líklega elsti belgíski hveitibjórinn og jafnvel þótt víðar væri leitað? Menn krydda bjórinn með appelsínuberki og kóríander sem gerir bjórinn dálítið skemmtilegan, maður finnur örla fyrir þessu ef bjórinn er ekki of kaldur. Þetta er bjór sem kallar á létta rétti því hann er jú mildur og viðkvæmur. Salöt, sushi og annað sjávarfang er t.d. kjörin pörun.

20170601_141020 — Mynd tekin beint úr Gestgjafanum, mynd eftir Hákon Davíð Björnsson

Pörunin

Hér erum við með létt og ferskt salat með mildum en skemmtilegum bragðflækjum þar sem við finnum látlausan lakkrískeim og ögn sýru. Það er einnig áberandi selta frá ostinum og svo kemur appelsínukeimurinn í gegn. Þessi réttur kallar á mildan bjór sem ekki stelur senunni. Hoegaarden smellpassar hér, appelsínubörkurinn í bjórnum tengir vel við dressinguna og magnar upp appelsínuna í bæði bjór og mat. Eins verður kóríander meira áberandi og virkar eins og auka krydd á salatið. Bjórinn tvinnast við salatið og framlengir einhvern veginn bragðupplifunina í munni á þann hátt að bjór og réttur taka ekki neinn endi. Þetta er alveg magnað að upplifa….fullkomin pörun verð ég að segja!

„Mindblowing“ pörun á Spontan

Birt þann 30. apríl, 2017 af Freyr

Ég var í Kaupmannahöfn í vikunni og kíkti að sjálfsögðu á Spontan aftur. Að þessu sinni valdi ég 4 rétti og bjórpörun með 4 bjórum. Ég fékk allt annan mat en síðast en hann var algjörlega stórkostlegur eins og við var að búast. Hver rétturinn algjört lystaverk, já ég setti „y“ hér með vilja! Bjórinn var fínn og passaði vel við matinn en síðasta pörunin fór alveg með mig. Rétturinn var eftirréttur og heitir á seðlinum „Cloudberry, Sea Buckthorn, Ymer, Honey“ en til að lýsa þessu þá er þetta eins og kalt sorbet með berjasósu, (cloudberry og Sea Buckthorn) sem var sætsúr og berjuð og svo næfurþunn kristalliseruð hunangsplata ofan á með fíngerðu lakkrískurli og claudberry dufti. Skemmtileg blanda af berjum, sýru og svo sætu hunangi með ögn seltu frá lakkrísnum. Bjórinn sem var serveraður með var Yule mælk frá To Øl en þetta er 15.5% imperail stout. Venja er að drekka imperial stout frekar volga en þessi var serveraður ískaldur. Í fyrstu var ég pínu hissa á þessu, ætti þessir snillingar ekki að vita þetta? Svo rann það upp fyrir mér að þetta hlyti að vera með vilja gert. Ég spurði því þjóninn sem sagði mér að bjórinn ætti einmitt að vera kaldur þegar maður fær hann á borðið því þannig verður hann ekki eins „overpowering“ og stelur ekki senunni frá þessum dálítið viðkvæma eftirrétt. Ég verð að viðurkenna að ég hef aldrei látið mér detta í hug að tefla svona öflugum bjór á móti svona berjuðum og viðkvæmum eftirrétti. Hins vegar þegar bjórinn er svona kaldur þá virkar þetta frábærlega. Bjórinn er líka mjög sætur og mjúkur þrátt fyrir 15.5% og tengir þannig rosalega vel við hunangssætuna og svo kemur allt þetta súra og ferska alveg svakalega vel á móti ristinni og aðeins kaffitónunum í bjórnum. Það er bara erfitt að lýsa þessu en þessi blanda var algjörlega „mindblowing“. Maður þarf að reyna eitthvað svipað hér heima…..hmmmm veit samt ekki með þessi ber og hunangsplötuna, verður pínu snúið 🙂

Haven Bar í Kaupmannahöfn, tímabundið verkefni?

Birt þann 29. apríl, 201729. apríl, 2017 af Freyr

Það er alltaf best að skrifa um staði þegar maður er staddur á þeim, þá drekkur maður í sig umhverfið og stemninguna jafnóðum…já og bjórinn líka auðvitað ef svo ber undir. Hér sit ég sem sagt á Haven bar í annað sinn í þessari ferð og sötra Mikkeller Pellet Palate Wrecker NE IPA og er að bíða eftir að kl verði 13:00 því þá hefst lunch matseðillinn. Haven er, hvað eigum við að segja, eins konar „diner“? Ég veit það ekki, alla vega þetta er staður sem opnaði bara hér fyrir nokkrum vikum (2017) í tengslum við svo kallað Haven Festival sem verður þann 11. og 12. Ágúst næstkomandi. Þetta er hátíð skilningarvitanna þar sem fólki gefst tækifæri á að örva bragðlauka, heyrn og sjón en hátíðin er samkurl nokkurra snillinga á sviði tónlistar, bjórs og matarkúltúrs. Við erum að tala um bræðurna Aaron og Bryce Dressner úr hljómsveitinni National, Michelin stjörnukokkinn Claus Meyer (Studio) og bjórgúrúið Mikkel Borg frá Mikkeller. Haven bar var eiginlega bara opnaður í tengslum við þessa hátíð sem eins konar upphitun og þegar maður spyr staffið hér veit enginn hvort barinn lokar eða heldur áfram í einhverri mynd þegar hátíðin er yfirstaðin í lok sumars. Barinn er staðsettur í öðrum enda Standard sem er fyrrverandi ferjustöð við höfnina (við enda á Nyhavn). Staðurinn hýsir þrjá staði sem reknir eru af Claus Meyer, Standard, Studio (sem er stjörnustaðurinn) og Almanak, já og núna Haven bar.

Haven er stílhreinn, látlaus og bjartur staður, það eru 10 Mikkeller kranar með ýmsu góðgæti og svo er lítill en vandaður „lunch“ seðill og hefðbundið barsnarl ef þú ert snemma á ferð. Maturinn kemur að ofan, sem sagt frá kokkum Studio og er seðillinn að hluta til breytilegur. Ég vil svo endilega mæla með eftirréttnum sem ég fékk hér um daginn áður en ég gleymi, Spring Donut sem er kúlulaga kleinuhringur fylltur með rabbabaramauki og svo er flórsykur og einhver glassúr ofan á. Mjög gott t.d. með villibjórnum Mikkeller Mikropolis BA Bourbon með sítrónukjöti (10.7%). Allt sem ég smakkaði af matseðlinum var vægast sagt geggjað. Laxinn var stórbrotinn „Fried potato bread and smoked salmon, skyr cream, pickled fennel and chives„. Ég fór í alveg hárétta bjórinn með þessu held ég, Alefarm Soft Spoken IPA með Citra og Mosaic. Þetta er enn einn New England bjórinn, ég veit, en hann er bara svo ofsalega mjúkur og mildur með hæfilega miklu frútti og svo aðeins beiskju sem virkar vel með feitum laxinum og meðlætinu. Ég fékk mér líka „Crispy chicken skin with lumpfish roe & cress“ með reyktu baunasallatssmjöri sem small alveg við bjórinn. Framsetningin á þessu er svo algjörlega mögnuð, hér fær maður svo sannarlega eitthvað fyrir augað, nef og bragðlauka. Ég bara elska svona litríka rétti, það er eitthvað svo Michelin eitthvað!

Já ég gleymdi því næstum, þeir eru mikið með lifandi tónlist hér um helgar, þá er bara band inni á miðju gólfi í góðum fílíng. Helvíti huggulegt. Ég held að ef menn eru staddir í Kaupmannahöfn eða á leiðinni hingað að þá sé þetta alveg ómissandi stopp. Ég meina, hver vill ekki láta gæla dálítið við sig á mörgum vígstöðvum í einu? Grípið gæsina á meðan hún gefst á kannski hvergi eins vel við og hér! Þetta ævintýri er kannski búið í september 2017.