Bjór & Matur

Hvít súkkulaði- og ástaraldin mús með ávaxtabjór!

Birt þann 24. apríl, 20175. desember, 2017 af Freyr

Ég held að Nigella Lawson elski súkkulaði álíka mikið og ég, hún er alla vega með ansi margar súkkulaðiuppskriftir á sínum vefsíðum. Hér er eins sáraeinföld, falleg og svo sannarlega ljúffeng. Algjör dásemd með vönduðum ávaxtabjór á borð við OUD BEERSEL KRIEK.

MÚS (fyrir 4): 150g hvítt súkkulaði, 3 stór egg, 5 ástaraldin og slatti af ferskum hindberjum.

BJÓRINN: Vandaður súrbjór með ávöxtum, t.d. kirsuberjum (kriek), hindberjum (framboise) eða einhverju öðru. Passa þarf að um alvöru ávaxtabjór sé að ræða, ekki þessa með viðbættu ávaxtaþykkni. Gott dæmi er OUD BEERSEL KRIEK eða LIEFMANS KRIEK BRUT.

MÚSIN: Súkkulaðið er brotið niður í litla bita, og svo sett í glerskál yfir potti með vatni. Látið vatnið sjóða. Súkkulaðið á ekki að bráðna alveg í samfellda sósu eins og dökkt súkkulaði heldur er nóg að það sé farið að afmyndast og er orðið mjúkt. Passa vel að ekkert vatn fari i súkkulaðið. Of mikil bráðnun skemmir líka súkkulaðið. Takið skálina svo til hliðar og látið kólna aðeins.

Þeytið eggjahvíturnar þar til orðið stíft. Á að haldast í skálinni þegar henni er hvolft. Blandið svo eggjarauðunum (ekki hvítunum, passið ykkur á því, ég gerði það nefnilega óvart fyrst) saman við súkkulaðið sem hefur náð að kólna aðeins. Varlega! Skerið svo ástaraldinin í helminga og skóflið innvolsinu út, öllu saman, fræ, kjöt og alles, út í súkkulaðiblönduna. Veltið þeim varlega saman við súkkulaðið. Loks blandið þið ofurvarlega hvítunum saman við þetta allt þar til vel blandað saman.

Loks veljið þið einhver falleg glös, setjið hindberin í botnin, fínt að láta standa aðeins þannig að þau kremjist aðeins og myndi safa. Hellið svo músinni yfir og setjið inn í kæli þar til orðið stíft. 4 tímar ættu að duga.

BJÓRINN: Þessi eftirréttur er vissulega flottur bara einn og sér en frábær með góðum ávaxtabjór. Kaffi er ekki málið hér, það rústar dálítið fallegum og viðkvæmum bragðflækjunum í þessum milda eftirrétt. Hvítt súkkulaðið er dásamlegt með eggjunum og skapar mjúka notalega áferð og svo kemur sýran frá hindberjunum og ástaraldininum og klippir upp áferðina og gerir heildina létta og frískandi. Sætan í súkkulaðinu bindst svo vel við sætuna í ástaraldinunum. Bjórinn með þessu þarf að lyfta undir þetta allt saman og ekki yfirgnæfa neitt. Ávaxtabjór er kjörinn í þetta og í raun það eina raukrétta. Belgískur kriek er súrbjór sem þroskaður er með ferskum kirsuberjum í einhverja mánuði. Bjórinn er léttur og súr og svo með berjakeiminn auðvitað. Frábær bjórstíll og geggjaður með svona efirrétt. Það er auðvelt að sjá hvernig sýran í bjórnum tengir við og styður berjasýruna í eftirréttinum á sama tíma og hún skapar dásamlegt mótvægi við þrúgandi sætuna. Þetta er eiginlega of góð pörun til að reyna að lýsa í rituðu máli. Prófið t.d. OUD BEERSEL KRIEK.

Borg/Tanker collab, Chocosourus

Birt þann 24. apríl, 201724. apríl, 2017 af Freyr

Gaurarnir í Borg brugghús sitja ekki auðum höndum þessa dagana, þeir eru á stöðugum þeytingi bruggandi bjór út um allar jarðir. Hér er það Tanker Brewery í Tallin Eistlandi. Bjórinn kalla þeir Chocosourus C8 og já það er líklega gert með vilja að skrifa „sourus“ en ekki „saurus“ þrátt fyrir risaeðluna á merkimiðanum því um er að ræða súrbjór. Í bjórinn nota þeir svo kakóhismi frá Omnon súkkulaðigerð sem skýrir fyrri hluta nafnsins dálítið. Já við erum að tala um spriklandi ferskan súkkulaðisúrbjór, ekki klassísk túlkun á stílnum en svo sannarlega skemmtileg. Súkkulaði og ber, er það ekki eitthvað? Súkkulaðihúðuð hindber eða jarðaber eru t.d. oooofsalega flott.

Bjórinn er ferskur og spriklandi á tungu með súrum undirtón og alls konar mildum ávöxtum. Það má svo finna örlítið súkkulaði í bakgrunni, það hjálpar reyndar að vita af
því í bjórnum samt. Bjórinn er ofsalega fallegur í glasi en froðan staldrar stutt við.
Mjög skemmtilegur súrbjór sem gengur svo sannarlega sem sumarbjór. Nú er um að gera að fylgjast með ef menn vilja næla sér í flösku en hann dettur í Vínbúðir og bari á næstu dögum. Venja er að um mjög takmarkað magn sé að ræða þegar kemur að collab!

MATARPÆLING: Þetta er bara skemmtilegur bjór einn og sér en ég veit að hann myndi elska djúsí súkkulaðieftirrétti með ferskum berjum á borð við hindber eða brómber t.d. Besta súkkulaðimús í heimi kemur sterklega til greina en þar erum við jú bæði með hindber,brómber og jarðaber í djúsí dökkri súkkulaðimús, þvílík pörun, ætli maður prófi þetta ekki bara um helgina? Svo gengur hvíta súkkulaðifrauðið með fersku ástaraldin einnig mjög vel með þessum. Já það er svo sannarlega gaman að vera til.

Hvað er gott með Sushi?

Birt þann 23. apríl, 201723. apríl, 2017 af Freyr

Það er langt síðan ég gerði sushi en ég var nokkuð duglegur hér fyrir nokkrum árum að gera sushi frá grunni við mikinn fögnuð fjölskyldunnar. Þetta var nánast hverja helgi á tímabili. Við elskum nefnilega gott sushi á þessu heimili (hver gerir það ekki?). Ég hef hins vegar legið í dvala núna í nokkur ár. Í gær ákvað ég hins vegar að rjúfa múrinn og dusta rykið af sushi töktunum og prófa nokkra bjóra með sem við Sigrún höfum verið að skoða mtt einmitt sushi. Sushi gerð er dálítið dútl og tekur tíma en það er alveg kjörið að hóa í nokkra vini og setjast saman yfir þetta með gott vín eða góðan bjór við hönd og spjalla, þá er bara allt í lagi að eyða tíma í þetta.

Ég lendi oft í því að missa mig í hráefnum og enda með allt of margar tegundir af sushi bitum (Maki) og allt of fáa af hverri tegund og svo man maður bara ekkert hvað var í hverju, möguleikarnir eru auðvitað nánast endalausir. Mitt ráð til ykkar er því að ákveða t.d. bara 3 gerðir af rúllum og gera þær vel. Í gær var ég með spicy þema en spicy krabbasallat bitarnir mínir eru uppáhald fjölskyldunnar og mér heyrist eftir gærdaginn að Lovísa Ósk vinkona okkar sé hjartanlega sammála. En skoðum þetta á eftir, fyrst er það undirbúningurinn, ss grjónin.

SUSHI GRJÓNIN: maður verður að nota sushi grjón (fæst í Bónus og Hagkaup t.d.), einn poki (500g) ætti að duga fyrir 3 svanga fullorðna.

1. Setjið grjónin í stóra skál, helst úr gleri eða plasti. Skolið svo varlega með fersku vatni. Hér viljum við skola alla sterkju af grjónunum. Fínt að hella af reglulega vatninu af sem í fyrstu er hvítt en verður svo tærara og tærara. Tilbúið þegar skolvatn er alveg tært.

2. Látið grjónin standa í fersku vatni í klst. Svo færir maður grjónin yfir í sigti og lætur renna af þeim í 15 mín.

3. Setjið grjónin í pott, bætið 7 dl af vatni útí og látið suðu koma upp með lokið á. Lækkið svo hita í lægsta hita og látið malla í 10 mín. Svo er potturinn tekinn af hellunni og látinn standa í aðrar 10 mín.

4. Færið grjónin loks yfir í tréskál, má vera úr plasti eða gleri reyndar. Sumir reyna að þerra grjónin, ég sleppti því. Látið kólna niður í stofuhita með handklæði yfir.

DRESSING á GRJÓNIN: Þið fáið grjóna edik á sama stað og grjónin. 0.75 dl af ediki með 0.75dl sykri. Setjið í pott og hitið þar til sykurinn er uppleystur í edikinu. Ef þið notið meira af grjónum þarf meira af þessari dressingu. Svo er bara að blanda þessu saman varlega við grjónin.

SPICY KRABBASALLAT: Ok ég datt bara niður á þessa blöndu með fikti og tilraunum en þetta er alveg geggjað í sushi. Spicy krabbasallat bitarnir eru lang vinsælastir á heimilinu. Það er því góð hugmynd að gera nóg af þessu sallati.

– Majones, ca 5 mtsk (fer alveg eftir hve mikið þið ætlið að gera)
– Surimi („krabbakjöt“), t.d. 5-6 lengjur. Skorið mjög fínt.
– Vorlaukur eða blaðlaukur, skorið mjög fínt. Magn fer bara eftir smekk.

– Safi úr hálfum til heilum lime

– Chilli krydd, eða ferskur fíntskorinn chilli. Eftir smekk, má alveg taka vel í

– Reykt paprikuduft, eftir smekk.

Hrærið bara öllu saman í skál og látið standa aðeins áður en sett á maki bitana. Fín að græja þetta t.d. á meðan grjónin liggja í bleyti.

Þegar grjónin eru tilbúin þá er eftirleikurinn auðveldur, að raða hráefnum saman og rúlla vefjurnar. Fínt er að gera krabbasallatið á meðan grjónin standa í bleyti og svo á meðan grjónin kólna er tilvalið að skera niður grænmetið og gera allt klárt.

Ég ætla svo ekki að segja ykkur hvað á að setja í rúllurnar, þar kemur að ykkar eigin ímyndunarafli. Ég læt þó hérna með hugmyndir af þeim rúllum sem ég var með í gær en þær komu ofsalega vel út. Það sem þið þurfið að hafa eru nori blöð (þangblöð) sem undirlag fyrir grjónin og svo bambusmottu til að rúlla með. Fyrir „inside out“ vefjurnar þarf plastfilmu. Meðlæti er klassískt, soya sósa, sýrður engifer og wasabi.

Spicy krabbasallat (maki): Hér nota ég hálft noriblað, glansandi hliðin niður. Set svo þunnt lag af grjónum yfir allt blaðið, þunnt lag af krabbasallati ofan á fyrir miðju og rúlla svo upp. Bitarnir verða dálítið mjóir og háir. Flott að setja svo smá sallat ofan á bitana þegar búið að skera niður.

Djúpsteiktur teriyaki kjúlli (maki): Hér fékk ég smá hjálp frá Nings, ég bara nenni ekki að standa í að gera djúpsteiktan kjúkling. Pantaði lítinn skammt og fékk mjög ljúft létt sýrt hrásallat með. Flott að gera inside out rúllur líka, sem sagt grjónahliðin snýr út.
Til að gera þetta þarf plastfilmu líka. Setjið grjón á noriblað (heilt blað), glans hliðin snýr niður. Flott að sáldra sesamfæjum yfir grjónin, eða rauð hrogn en þetta lookar bara svo vel. Leggið svo plastfilmuna yfir grjónin og snúið öllu við þannig að glanshliðin á noriblaðinu snúi upp. Leggið þetta á bambusmottuna og svo er fyllingin sett beint á norihliðina. Kjúklingurinn, hrásallatið, og Teriyaki sósan. Einnig gott að lauma línu af spicy majonesi (fæst í Bónus t.d.). Svo er rúllað upp og plastfilma tekin undan jafn óðum. Þegar búið er að skera bitana niður er flott að skreyta með chillisósu.

Spicy majo laxarúlla (maki): Við verðum að hafa fisk í sushi ekki satt? Ferskur lax er málið. Hér var ég með lax með spicy majonesi sem ég fékk í annað hvort Hagkaup eða Bónus, man bara ekki hvar. Þetta er mjög gott með laxinum. Ég geri alltaf „inside out“ rúllur fyrir laxinn, mér finnst það bara það eina rétta, rauð hrogn eru mjög viðeigandi skraut hér. Ég fékk lítinn bita af laxi hjá Fiskikonginum, þetta þarf ekki að vera stór biti. Svo er þetta bara eins og hér að ofan, laxinn settur í ræmum á nori blaðið, vel af spicy majo með, rauð paprika í ræmum og ferskar avocado lengjur. Rúllið upp og skerið í bita.

Spicy majo laxa nigiri: Mér finnst alltaf flott að hafa nigiri bita með. Þeir eru fljótgerðir og setja svip á bakkann. Takið grjónaklípu og leggið í lóann og hálfkreppið lóann. Þjappið svo grjónum og myndið lítinn bragga. Svo er gott að smyrja spicy majonesi ofan á. Skerið lax í þunnar fallegar sneiðar, og leggið ofan á.

BJÓRINN MEÐ: Flestir eru vanir hvítvíni með sushi og það er bara ekkert að því, gott hvítvín getur verið frábært með sushi, bjórinn hins vegar býður upp á mun fleiri möguleika. Megin reglan er að bjórinn taki ekki völdin, sushi er ekki ódýrt að gera og maður er búinn að eyða svo miklum tíma í að gera það, það væri mikil synd að finna svo ekki almennilegt bragð af því. Bjórinn verður samt að vera merkjanlegur, við viljum heldur ekki bjór sem maður finnur ekki bragð af fyrir sushi-inu þá er alveg eins hægt að drekka vatn. Hinn gullni millivegur, bjór og réttur verða að gera eitthvað fyrir hvort annað.

Það eru í raun margir möguleikar þegar bjórinn er valinn, það fer nefnilega dálítið eftir því sem maður setur í rúllurnar, en svo er nokkrir fastir punktar sem þarf að hafa í huga, eins og seltan frá soya sósunni og sætan frá grjónunum. Wasabi er svo auðvitað mjög sterkt og tekur vel í og engiferið er sýrt og spicy. Að þessu sinni var þemað „spicy“, maður gæti því hugsað sér IPA eða Pale Ale þar sem við erum með seltu og chilli hins vegar er beiskjan frá humlunum alls ekki að passa við stemninguna í sushi. Belgískur blond er aftur á móti alveg málið t.d. LEFFE BLOND. Þessi bjór er alveg laus við beiskjuna en býr yfir áberandi ávaxtasætu og skemmtilegum krydduðum tónum frá gerinu. Bjórinn er ofsalega flottur á móti öllu þessu sterka frá réttinum og hann tengir vel við sæt grjónin og magnar upp bragðið. Bjórinn pakkar hann einhvern veginn inn sterkt chilli-ið og wasabi brunanum og mildar þetta allt saman og svo blandast þetta allt, sætt, salt og sterkt í rúnaða heild í gómnum. Ljómandi gott.

Við vorum svo með annan skemmtilegan með þessu. Súrbjórinn OUD BEERSEL GUEUZE sem er framúrskarandi belgískur gueuze. Þessi bjór er léttur en í senn mildur og bragðmikill. Súr á tungu með ögn sætu og svo þetta „funky“ bragð sem erfitt er að lýsa. Þessi bjór léttir vel á spicy themainu með kitlandi gosinu og sýrða bragðinu. Bjórinn breytir aðeins matnum en á skemmtilegan og funky máta! Það er svo virkilega gaman að finna hvernig hann er með engiferinu en hann virkar hér eins og brú, bragðið af engiferinu, rífur aðeins í með sýru og spice og svo er bjórinn bara eins og fullkomið framhald og bragðið heldur áfram óbreytt nema bara meira áberandi. Svo endar þetta í smá funky kveðju.

Geggjað….væri gaman að heyra ykkar álit!

Dulcey páskaegg og stout

Birt þann 14. apríl, 2017 af Freyr

Nú líður að Páskum sem þýðir súkkulaði og meira súkkulaði en úrvalið er orðið ansi flott, það er hægt að fá egg af ýmsum toga núna frá nokkrum framleiðendum. Svo má ekki gleyma snillingnum og súkkulaðimógúlnum Hafliða Ragnarssyni sem er að mínu mati besti súkkulaðigerðarmaður landsins. Ég hef lengi haft augastað á páskaeggjunum hans en aldrei einhvern veginn látið vaða í þau þar til nú. Hvert egg er stórkostlegt lystaverk og maður í raun tímir ekki að skemma það og borða. Nóg um það, við megum auðvitað ekki gleyma bjórnum en það er vel hægt að para bjór við súkkulaðieggin.

Ég valdi Dulcey blond súkkulaðiegg handa okkur frúnni en ég viðurkenni samt að mig langaði dálítið í dökka súkkulaðieggið líka, ég bara elska dökkt súkkulaði. Dulcey er hins vegar dásamlegt súkkulaði og ég sé ekki eftir því vali. Það er hægt að leika sér með nokkra bjórstíla með þessu eggi en mig langaði að prófa gamlan félaga, Mikkeller Beer Geek Breakfast sem er dásamlegur hafra stout með 100 stig af 100 mögulegum á Ratebeer.com. Beer Geek er sögulegur bjór en þetta er einn af fyrstu bjórum Mikkellers og sá bjór sem kom Mikkeller á kortið á sínum tíma. Bjórinn er virkilega vandaður og flottur, bruggaður með hafraflögum og eðal kaffi. Hann býr þannig yfir notalegri rist, kaffi og svo látlausri en vel merkjanelgri sætu. Það góða við þennan bjór er nafnið, morgunverður sem gefur manni þannig grænt ljós að drekka hann með súkkulaðiegginu á Páskamorgun.
Dulcey súkkulaði er eins konar blanda af mjólkursúkkulaði og karamellu, ja eða þannig upplifi ég það amk. Dúnamjúkt og rjómakennt og svo er ögn salt með. Þessi blanda kallar dálítið á eitthvað mótspil, við viljum ekki meira sætt hér, það verður of mikið af því góða. Stout eða porter er kjörinn bjór fyrir þetta verkefni. Hér mætir beiskjan og ristin frá korninu sætunni og bráðnar einhvern veginn saman við og gerir mjög gott mót. Kaffikeimurinn er líka velkominn en við erum auðvitað vön að tefla kaffi á móti flestum sætum eftirréttum, sumir nota meira að segja sykur í kaffið. Súkkulaðikeimur er oft líka í þessum bjórum, dökkt súkkulaði sem er flott með mjólkursúkkulaðinu og svo tengir karamellan í egginu vel við karamellukeiminn frá ristaða korninu í bjórnum. Sem sagt, hér erum við bæði með andstæður og samstæður. Mjög ljúft.

Okkar ástkæri Myrkvi frá Borg er einnig frábær með þessu en aðrir stout eða porter bjórar koma vel til greina.

Imperial Stout BBQ Pulled Pork Smáborgarar með ferskum DIPA!

Birt þann 2. apríl, 20172. apríl, 2017 af Freyr

RÉTTUR: Hægeldaður rifinn svínahnakki í imperial stout marineringu með stout BBQ sósu í heimabökuðum smáborgurum. BBQ sliders baby! Og svo ferskt hrásallat með! Fínt fyrir 6 fullorðna.

KJÖTIÐ : Ég slumpaði á magn kjöts, tók tvo bakka af svínahnakkasneiðum sem dugaði vel fyrir ca 6 fullorðna. Auðvitað má vera eitthvað annað svínakjöt en þetta bara svínvirkaði.

MARINERING: Ein flaska af FOUNDERS IMPERIAL STOUT (335ml) en má vera annar imperial stout, t.d. Mikkeller Breakfast Stout eða Garún frá Borg.
– salt (Maldon) og pipar (malaður)
– Sriracha hot chilli sósa (Bónus)
– Reykt paprikukrydd
– Dash af oregano, rosmarin og timan kryddum (ca mtsk af hverju)
– Olía til að steikja úr
– 2 epli skorin gróft (má vera með hýði)
– 1 meðalstór laukur, skorinn gróft
– 6 hvítlauksgeirar, fínt saxaðir
– 1 bolli kjúklingasoð

BBQ SÓSAN: Þessi sósa er geggjuð og hægt að nota í alls konar samsetningum.
– 1 Flaska af FOUNDERS IMPERIAL STOUT eða sambærilegt.
– Hálft epli, afhýdd og fínsaxað
– Skallot laukur 1-2, fínsaxað
– 2 hvítlauksgeirar, fínsaxaðir
– 1 bolli tómatssósa
– 1/4 bolli Dijon sinnep
– 1 mtsk Teriyaki sósa
– 3 mtsk púðursykur
– 2 mtsk hunang
– 1 tsk reykt paprika
– 1 mtsk Worcestershire sósa
– Salt og pipar eftir smekk

SMÁBORGARAR: Flott uppskrift hér á Vínotek.

– 10 dl hveiti eða 7,5 dl hveiti og 2,5 dl spelt (auk hveitis til viðbótar þegar deigið er hnoðað)
– 4 dl volg mjólk
– 1 dl volgt vatn
– 1 bréf þurrger
– 2 msk akasíusíróp eða 1 msk sykur
– 1/2 tsk salt
– 3 msk ólívuolía

HRÁSALLAT: T.d er þessi flott hér á Vínotek. Eða bara eitthvað sem þið eruð vön að gera.

BJÓRINN MEÐ: Þetta er mikill og þungur réttur og kallar á stóran og stæðilegan bjór með. Það er eiginlega borðleggjandi að fara hér í sama bjór og er í marineringunni FOUNDERS IMPERIAL STOUT, sem er geggjaður stout en gæti þó verið heldur þungur hér. Venjulegur stout og kannski aðeins humlaður er líka flott pörun. Double IPA eins og ÚLFUR ÚLFUR (9%) er hins vegar algjörlega geggjaður með þessu.

KJÖTIÐ. Rifinn grís er svo dásamlegt fyrirbæri, það er hins vegar hægt að gera hann á ýmsa vegu og koma sumar leiðir betur út en aðrar. Þessi uppskrift hér krefst tíma en er algjörlega þess virði. Það er þó ekki að skilja að uppskriftin sé flókin. Finnið eitthvað gott svínakjöt, ekki of dýrt, ég nota alltaf grísahnakka, það er t.d. hægt að fá í Bónus bara í sneiðum sem kemur ofsalega vel út.

Við byrjum á marineringunni því þetta þarf helst að liggja á kjötinu í sólarhring. Þannig að daginn fyrir veisluna þá gerum við eftirfarandi. Kryddið kjötið ríkulega með salti og pipar, nuddið inn í kjötið. Nuddið svo Sriracha sósunni á báðar hliðar kjötsins, kryddið aðeins með reyktri papriku. Setjið kjötið í ílát með loki og hellið svo stout yfir kjötið og inn í kæli. Allt í lagi að stela einum sopa hér, Founders imperial stout er bara svo magnaður. Þegar ca helmingur tímans er liðinn þá er ágætt að snúa sneiðunum við t.d. næsta morgun.

Daginn eftir er gott að byrja snemma, reiknið með að kjötið malli í ofninum í 3 tíma amk. Hitið ofninn í 195 gráður. Takið svo kjötið úr marineringunni og þurrkið vel. Látið standa í um 30 mín. Krydda svo vel aftur með salti, pipar og þurrkryddum (Rosmarin, Timian og Oregano). Hitið svo olíu á pönnu og brúnið kjötið á öllum hliðum, vel brúnað sko og ekki allt kjötið í einu. Takið smá tíma í þettal leggið svo til hliðar. Það getur farið að festast aðeins í pönnunni, allt í lagi þá að bæta aðeins olíu á pönnuna, hendið svo eplum og lauknum útí og kryddið með salti og pipar. Hrærið í og látið mýkjast aðeins, ca 4-5 mín. Svo bætum við hvítlauknum og kryddum við. Loks hellum við marineringunni yfir og hér er gott að skafa dálítið upp úr pönnunni og losa það sem hefur fests við. Látið suðu koma upp og malla svo í 3 mín. Hér er svo gott að hella öllu yfir í stóran pott sem má fara inn í ofn. Bætið svo kjötinu við og kjúklingasoði þannig að það nánast hylji kjötið. Lokið sett á og svo bara inn í ofn. Fínt að tékka annað slagið á þessu og hræra í. Kjötið er tilbúið þegar það fellur í sundur þegar maður klórar í það með t.d. gaffli.

SMÁBORGARAR og HRÁSALAT. Það er fínt að nota tímann núna og græja hamborgarabrauðin (sjá Vínotek) og salatið (sjá Vínotek). Fínt að fylgja bara uppskriftunum á Vínotek. Munið bara að við erum að tala um smáborgara þannig að ekki gera of stórar kúlur.

BBQ SÓSAN. Þessi er geggjuð, takið fram pott, svissið epli, hvítlauk og skallotlauk í olíu á meðal hita. Kryddið með salti og pipar. Látið malla þar til mjúkt og glært. Bætið svo öllu öðru í pottinn, já þar með talinn bjórinn. Látið suðu koma upp. Smakkið bara til, kannski viljið þið aðeins meiri sætu, meiri reyk eða bruna. Undir ykkur komið bara. Svo lækkið þið hitann í lægsta hita, lok yfir og látið malla í 1.5 klst.

Þegar kjötið er tilbúið þá takið það úr ofninum látið standa í um 15 mín. Loks er kjötið veitt úr soðinu og rifið í sundur með gaffli. Svo hrúgið þið kjötinu á borgarana, hrásallat yfir og dásamleg BBQ sósan. Berið fram með ljúfum bjór og njótið!

BJÓR PÖRUN: Hér er hægt að fara ýmsar leiðir, maður getur valið að fara bara í léttan lager og lofa kjötinu að ráða algjörlega för og þá á kostnað bjórsins eða sem er jú alltaf skemmtilegast að tefla fram bjór sem gerir eitthvað fyrir réttinn og bætir hann. Imperial Stout eða stout er borðleggjandi þar sem hann er jú notaður í bæði marineringuna og sósuna. Hér erum við að tengja saman drykk við hráefni í matnum. Reyndar er hér hætt við að þunginn verði of mikill því imperial stout er þéttur og mikill með ofsalega miklum og þungum rétti. Það er þó ljúft að finna ristaða og brennda kornið og tengja við reykinn í sósunni og dálítið hjúpa brunann i kjötinu og draga úr honum. Kaffiristin í bjórnum passar líka vel við BBQ bragðið. FOUNDERS IMPERIAL STOUT er kannski heldur of sætur fyrir þetta verkefni, ekki misskilja mig, þetta er mjög skemmtileg pörun og gaman að nota sætuna hér á móti öllu þessu salta og brunanum í chilli-inu og svo tengja við sætuna í BBQ sósunni, hins vegar verður þetta mjög þungt. Ég held að aðeins þurrari stout með meiri beiskju væri skemmtilegri með, t.d. Mikkeller Beer Geek Breakfast já eða bara Garún frá Borg sem er frábær imperial stout!

Önnur pörun sem bara kallar á mann er imperial IPA eða DIPA. Þar sem við erum hér á sjálfum fyrsta apríl þá er borðleggjandi að nota ÚLF ÚLF frá Borg sem er framúrskarandi DIPA bjór. Á meðan imp. stout lofar okkur að taka einn eða kannski einn og hálfan „slider“ þá opnar double ipa allt upp á gátt og léttir á pallettunni. Það er alveg mangað að upplifa hvernig bjórinn skapar einhvern veginn pláss fyrir 2-3 sliders í viðbót! Sætan kemur með skemmtilegt mótvægi við chilli brunann frá kjötinu og dempar aðeins og svo er beiskjan í bjórnum og saltið í kjötinu eins og fullkomið hjónaband. Beiskjan ýfir aðeins upp chilli brunann í fyrstu en við fleiri sopa og meira kjöt þá virkar beiskjan og humalsætan dempandi. Gosið og brakandi humlarnir opna réttinn alveg upp og léttir hann á allan hátt en stelur engu af bragðinu. Prófið endilega báða þessa stíla og metið hvort gengur betur! Munið bara að Úlfur Úlfur er bara til í kringum 1. apríl og hann á að drekkast FERSKUR!

Öflugasti bjór Íslandssögunnar, Garún Garún!

Birt þann 28. mars, 201728. mars, 2017 af Freyr

Borg brugghús er orðið þekkt fyrir að brugga bjór sem teygir sig vel út fyrir öll box og ramma, þeir hafa samt aldrei farið svona langt. Garún Garún, öflugasti bjór Íslandssögunnar, TUTTUGUOGEITT PRÓSENT (21%) takk fyrir. Þetta er rosalegt eigum við að kalla þetta TRIPEL STOUT? Maður hugsar spritt og bruni en þegar maður smakkar þá er bjórinn bara allt allt annað en það. Þetta er Garún á sterum, vá!!!! Till að ná bjór svona hátt í áfengi þarf til að byrja með helling og ég meina helling af malti en það þýðir auðvitað hellingur af sykri, mér skilst reyndar að uppskriftin sé sú sama og fyrir Garúnu (11.5%). Svo beita þessir öðlingar tækni sem við getum kallað frosteimingu þar sem þeir eiginlega frysta vatnið úr bjórnum og styrkja hann þannig. Svo er bjórinn látinn þroskast og gerjast á notuðum koníakstunnum í nokkra mánuði en við það tekur bjórinn í sig bragðið úr tunnunni og frá koníakinu sem lá á tunnunni.

Öflugasti bjór frá Íslandssögunnar hvorki meira né minna!

Útkoman er kolgeggjuð en gengur upp. Ég mæli eiginlega með því að menn opni flöskuna í litlu rými því þegar þessu er hellt í glas þá ryðst upp úr glasinu ilmvöndur sem fyllir öll vit og herbergið sem maður er í. Þetta er rosalegt, sætur vínlegur keimur með kaffiblæ og eik. Í munni fer bjórinn hamförum um braðglaukana en er samt varkár og tillitssamur. Það kom mér reyndar á óvart hversu notalegur bjórinn er en í senn rosalegur. Ég er ekki að segja að hann sé mildur, þetta er „mother fucker“ en þéttleikinn og mikil sæta gera hann spennandi og viðráðanlegan og svo kemur þessi svakalegi áfengishiti og loks koníakstunnan í bakgrunni. Mín fyrsta hugsun eftir fyrsta sopann var Bourbon County stout!!! Eitthvað sem hefur verið ofarlega á lista hjá mér yfir bestu bjóra veraldar. Ég ætla bara að enda þetta hér, þetta er það langsamlega besta sem ég hef smakkað frá Borg Brugghús frá upphafi, punktur og basta.

Hvað matarpörun varðar þá…..gleymið því, við viljum ekki hafa nokkur áhrif á þetta bragð og svo er bara ekkert sem heldur velli á móti þessu monsteri. Þetta er bjór sem maður opnar eftir matinn til að njóta með góðum vin eða elskhuga til að gera gott kvöld ógleymanlegt! Það verður svo gaman að sjá hvernig þessi karl mun þroskast næstu árin. Endilega kaupa tvær eða þrjár flöskur. Eina til að sötra strax og svo tvær til að smakka næstu tvö árin.

Úlfur úlfur?

Birt þann 27. mars, 201725. september, 2017 af Freyr

Flesta mánuði ársins er engan íslenskan double IPA að finna á Íslandi. Staðan breytist hins vegar blessunarlega ár hvert þann 1. apríl þegar Úlfur Úlfur frá Borg dettur í búðir og bari. Um er að ræða flottan bjór sem mögulega er eini 1. apríl bjór veraldar? Úlfur Úlfur er klárlega stóri bróðir Úlfs en hann er töluvert öflugari (9%) og að margra mati helmingi betri. Bjór þessi hefur verið í dálitlu uppáhaldi hjá Bjór&Matur síðustu ár og okkur finnst það eiginlega pínu súrt að geta ekki komist í hann alla daga ársins.

Hvað er double IPA? Við getum líka talað um imperial IPA en Imperial IPA er eins og nafnið bendir til öflugari útgáfa af venjulegum IPA. Stíllinn er töluvert humlaður og er oft töluvert beiskari fyrir vikið. Hann er einnig hærri í áfengisprósentum og nær stundum 10-11% eða jafnvel enn hærra (þá er reyndar talað um tripel IPA). Til þess að fá bjórinn svona sterkann þarf mikið af malti. Malt er sætt og því er Imperial bjórinn oft dálítið sætari en sá venjulegi. Þetta er einnig þróttmikill bjór með mikinn þéttleika og fyllingu og beiskjan er yfirleitt í góðu jafnvægi við sætann undirtóninn frá maltinu. Bjórinn verður því ekki of sætur eða of beiskur, nema jú ef menn eru viljandi að stuða bragðlaukana eins og vinsælt er orðið nú til dags reyndar.

Úlfur Úlfur er bragðmikill og flottur en verður þó ekki alls ekki ruddalegur eða erfiður. Beiskjan er áberandi en sætan á móti mildar hann og svo koma ávaxtaríkir humlarnir inn með líka. Ofsalega flottur bjór þegar hann er ferskur, já FERSKUR það þarf nefnilega að athuga að svona bjór, DIPA eða IPA þarf að drekka eins ferskan og hægt er því humlarnir sem eru jú í lykilhlutverki í þessum bjórstíl missa mátt sinn frekar fljótt. Það þýðir að þó bjórinn komi bara einu sinni á ári að þá borgar sig ekki að hamstra og sitja svo uppi með bjór sem er orðinn „döll“ eða líflaus, nema maður ætli að drekka mikið af honum á stuttum tíma auðvitað.

MATARPÖRUN: Það getur verið dálítið snúið að finna rétti sem ganga með double IPA því beiskjan og áfengið eiga það til að „dominera“. Saltir réttir og ekki verra ef þeir eru dálítið feitir eru hins vegar flott pörun fyrir IPA. Hér er flott að prófa eitthvað massíft sem heldur velli gagnvart bjórnum, við erum að tala um t.d. þróttmikið grillað kjöt hvers konar með bragðmiklum og djúsí sósum og grilluðu grænmeti, en grillunin myndar ristaðan karmelliseraðan hjúp á kjötið og grænmetið ef það er marinerað í sykurbaseruðum legi. Karamellukeimurinn tvinnast vel við sætt karamellumaltið í bjórnum og feitar sósur og fitan í kjötinu opnast upp með beiskjunni. Beiskjubitið gerir einnig þungan réttinn léttari og þægilegri. Ég tala svo ekki um ef manni tekst að koma beikoni að…..t.d. að vefja því utan um kjötið og grilla það þannig, þá erum við komin með saltið og enn meiri fitu. Dásamlegt.

Önnur frábær hugmynd eru ostar, bragðsterkur cheddar, stilton ostur eða jafnvel blámygluostur en allir þessir ostar eru dálítið saltir og skilja eftir sig rjómakennda slykju í gómi sem beiskir humlarnir og áfengið elska að hreinsa af en þannig opnast palletan fyrir viðkvæmari bragðflækjum ostanna. Mér finnst sætur ávaxtablærinn frá humlunum koma ofsalega vel út með þroskuðum blámyglunni t.d.

Ég verð svo að benda á IPA gulrótarkökuna sem er án efa frábær með Úlf Úlf, prófa það um næstu helgi ef allt gengur eftir.

Ungnauta taco með geggjaðri chili-lime sósu, kóríander og rauðlauk og notalegum Pale Ale

Birt þann 4. mars, 20174. mars, 2017 af Freyr

Sorry, þið eruð líklega komin með nóg af taco uppskriftum frá mér en ekki ég samt. Ég bara verð að lauma þessari með….svo er ég hættur, þetta er bara svo geggjað. Já og einfalt líka…rosalega einfalt. Ég ætla í raun að koma hér með tvær útgáfur, fljótlegu og þægilegu útgáfuna sem ég var með í gær og svo lúxus útgáfuna sem tekur aðeins meiri tíma.

FLJÓTLEGA LEIÐIN: Heimabakað naan tekur tíma og stundum hefur maður ekki þann lúxus. Þá er bara helvíti gott að grípa tilbúið naanbrauð úr Bónus. Reyndar fékk ég allt í Bónus nema bjórinn. Það er ekki alveg sama hvaða brauð maður notar það eru til nokkrar útgáfur en þetta hér svínvirkar (sjá mynd) ef maður hendir því í brauðristina en þá verður það dúnamjúkt og fluffy. Þið finnið það í kælinum.
En að réttnum, mjög einfalt en ó svo gott. Upprunanlega er sósan eða fleytið eða hvað maður á að kalla það komið úr uppskrift frá Gordon Ramsay en svo hef ég aðeins þróað hana og notað í allt öðru samhengi en Gordoninn. T.d. eins og hér. Það sem þarf er:

-Kikkoman Soyasósa – 1 hluti (t.d. 1 dl)
-Ólifu Olía – 1 hluti eða jafnvel ögn minna
-Safi úr 1 lime- má vera úr tveim
-Púðursykur – 1 hluti
-Ferskur Chili, skorinn niður, fræin fara með
-Hellingur af gróft söxuðum ferskum kóríander

Þessu er bara hrært vel saman, fínt að setja í glært fallegt ílát því þetta lookar vel með rauðu chilli og grænum kóríander.
Svo er bara rifinn ostur, veljið eitthvað gott, cheddar t.d. Hér vorum við með Cathedral extra mature cheddar ost úr Bónus líka, svo er það bara rauðlaukur í þunnum ræmum og loks eitthvað stökkt grænt ss kínakál.

Kjötið, gott nautakjöt, ég notaði ungnautasnitsel úr Bónus, það leit rosalega vel út og mjög gott en það má nota hvaða nautakjöt sem er. Gott er að nota hluta af sósunni til að marinera aðeins kjötið og svo er það steikt á heitri pönnu, medium rare eða rare er best. Loks skorið í eins þunnar ræmur og þið getið.

Brauðið er sett í ristina í smá stund, þá verður það fluffy og mjúkt, brjótið það svo saman til helminga, raðið svo öllu ofantöldu í á fallegan hátt. Sósan er þunn og lekur út hér á endunum en það er allt í lagi, þetta er götumatur og má vera smá messy!

LÚXUS LEIÐIN: Aðeins flóknari en samt ekki mikið, gæðin eru meiri en þó ekki himinn og haf. Þessa leið ferðu ef þú er með nóg af góðu öli í kælinum og hefur tíma til að dúllast í eldhúsinu. Byrjaðu á sósunni/marineringunni hér að ofan. Notaðu gott kjöt t.d. úr einhverri af kjötbúðum landsins. Byrjaðu á að steikja það og legðu það svo í marineringu í hluta af sósunni. Farðu svo í að gera naan deigið (sjá hér). Þegar það er klárt er fínt að vinda sér í að gera bjórlauk (sjá hér).

Loks er bara að undirbúa meðlætið, rífa niður kóríander, kál og rífa niður ostinn. Farðu í ostabúðina og finndu bragðmikin cheddar ost, osturinn er dálítið lykilatriði þannig að hafðu hann góðan. Loks er bara að steikja brauðið á pönnu og svo raða í og njóta.

BJÓRINN: Þetta er bragðmikið og ríkt með seltu og ögn chilli og þolir því bjór með karakter og bragð. Salt og pale ale fer vel saman og ég elska að para kóriander með þessum bjórstíl líka. Saltið tónar aðeins niður beiskjuna í humlunum en beiskjan eykur hins vegar aðeins á brunann frá chilliinu sem er bara snilld. Við Íslendingar bjóðum ekki uppá mikið úrval af pale ale einhverra hluta vegna, þetta er gríðarlega vinsæll bjórstíll og á sér mjög breiðan aðdáandahóp og ætti því að vera í mun meira magni hér heima. Hægt er að fá tvo íslenska pale ale bjóra sem eitthvað vit er í (Einstök Pale Ale er ekki skilgreindur sem íslenskur), GÆÐING PALE ALE og svo SLEIPNIR frá Ölvisholti. Þess má geta að nú hefur Ölvisholt fengið til sín nýjan bruggmeistara sem jafnframt er fyrsta kona Íslands til að gegna þessu hlutverki. Ásta Ósk Hlöðversdóttir er reyndur heimabruggari og mikill bjórnautnaseggur en ég þekki hana frá árum mínum á Skúla Craft Bar þar sem við Stebbi Magg réðum hana til starfa áður en einhver annar bar myndi næla í hana. Við sjáum sko ekki eftir þeirri ákvörðun. Ölvisholt er í góðum höndum og spennandi að sjá hvað Ásta mun töfra fram fyrir okkur á næstu misserum.

SLEIPNIR er sem fyrr segir amerískur pale ale, 5.4% í ágætis jafnvægi. Hann er frekar mildur og látlaus en hefur þó karakter og bragð. Beiskju er stillt í hóf og maltkarakter látlaus. Þetta er bjór sem allir ráða vel við og mjög skemmtilegur með t.d. pizzu, hamborgara eða djúsí nauta taco með chilli og lime sósu. Ef menn vilja svo poppa upplifunina enn meira upp og rífa fram chilli brunann og seltuna væri hægt að nota beiskan IPA, mér dettur t.d. í hug humlasprengjuna JACK HAMMER frá BrewDog en hann tekur vel í án þess þó að stela senunni.

Júdas 16.1 og páska – eplabaka með pecanhnetum og karamellusósu.

Birt þann 1. mars, 20171. mars, 2017 af Freyr

RÉTTUR: eplabaka með muldu páskaeggi og pecanhnetum, skreytt með pecanhnetum og karamellusósu.

– 200g hveiti
– 200g smjör
– 200g sykur
– 100g haframjöl
– 4 græn epli
– 3 lítil mulin páskaegg frá Nóa td.
– Pecanhnetur grófsaxaðar
– kanilsykur

Aðferð. Einfalt, hveiti, smjör, sykur og haframjöl er hnoðað saman í skál. Eplin afhýdd og skorin í sneiðar og raðað í eldfast mót. Kanilsykur yfir (ekki spara) og svo er deigið mulið yfir ásamt muldum pecanhnetum og páskaeggjabrotum. Þessu er svo hent í ofn á ca 180 gráður þar til komin er fallega gyllt áferð á deigið.

BJÓRINN: Þessi réttur er ofsalega „rich“ og því erfitt að hafa of þungan bjór með. Quadrupel er massífur bjórstíll hins vegar langaði okkur að prófa JÚDAS 16.1. með þessu eiginlega vegna þess að bragðnúansar í bjórnum minna að mörgu leiti á réttinn. Bock eða Scotch ale koma einnig sterklega til greina hér.

JÚDAS 16.1 PÁSKABJÓR:
Júdas nr 16 var páskabjórinn frá Borg brugghús árið 2013 og var jafnframt fyrsti quadrupel okkar Íslendinga. Virkilega flottur bjór á sínum tíma og ég tala nú ekki um þegar maður var búinn að lofa honum að eldast á flösku í ár t.d. Quadrupel er belgískur bjórstíll og með þeim öflugari í bjórveröldinni. Oftast liggur bjórinn frá 11% og uppúr. Orðið „quad“ þýðir í sjálfu sér ekki neitt sérstakt en er meira tilvísun í styrk bjórins. T.d. má segja að belgískur dubbel (eins og t.d. Leffe) sé tvöfaldur, tripel þrefaldur (Westmalle Tripel) og þá væri quadrupel fjórfaldur ekki satt? Í ár færir Borg brugghús okkur Júdas endurfæddan, Júdas nr16.1 sem hefur þroskast á notuðum koníakstunnum í einhverja mánuði en við það dregur bjórinn í sig viðarkeiminn og bragð af koníaksrestunum.

Í glasi er Júdas 16.1 dökk dökk brúnn eða eiginlega svartur með léttan froðuhaus sem hverfur með hraði. Það hellist yfir mann dásamlegur angan úr glasinu þegar hellt er, mikil sæta eins og rúsínur eða sykruð epli og svo er koníakið áberandi með ögn viðarkeim. Í munni er mikill þróttur og vínandi sem er alls ekki sprittaður heldur meira á sætu nótunum, eins og sherrí eða koníak (nema hvað?). Tunnukeimurinn og koníakið er áberandi og svo eins og rúsínur, og þegar líður á bjórinn og hann fær að volgna aðeins koma fram nýjir tónar, gul epli, kanelsykur og jafnvel hunang eða appelsínusafi. Stórskemmtilegur bjór, maður getur treyst því að Júdas 16.1 setji sinn svip á Páskana.

PÖRUN:
Hvað gengur svo með quadrupel? Ekki auðveld spurning því bjórinn er stór og mikill og getur verið erfitt að finna máltíð sem passar. Rétturinn þarf að þola ágang bjórsins en á sama tíma að njóta sín. Borg brugghús vann sælla minninga skemmtilega bjór og matarpörunarkeppni á síðasta ári sem kallað var „Bryggeribrak“. Meðal bjóra sem Borg tefldi fram á þessari keppni var einmitt Júdas 16.1. Pörunin var „spot on“ með hugljúfum eftirrétti. Við erum að tala um kryddmarineraðar plómur,með áberandi sýrum, borið fram með sýrðum rjóma og karmeliseruðum heslihnetum. Hljómar dásamlega. Sigrún gerir stundum eplaböku eða mulning, ég veit ekki hvað maður á að kalla þetta, en eplabökuhrúgald kemur vel til greina? Alla vega mjög gott, með skornum eplum, góðu „hveitikrösti“, pecanhnetum og kanilsykri. Svo er hægt að bragðbæta með súkkulaðibitum og karamellusósu yfir! Ég ákvað að prófa að tefla þessu á móti Júdasi og af því að við erum með Páskabjór þá notuðum við páskaegg frá Nóa í þetta. Útkoman var virkilega flott.

Ég verð samt að viðurkenna að þetta er mjög þungt, bakan er mjög saðsöm og svo er bjórinn heldur ekkert lamb að leika sér við þannig að menn verða að vera opnir fyrir þessu. Fá sér bara litla skammta af bökunni og njóta. Gleðilega Páska!!!

Saltkjöt og Baunir með beittum IPA!

Birt þann 28. febrúar, 201731. júlí, 2022 af Freyr

Það getur verið dálítið snúið að finna góða matarpörun fyrir beiskan IPA en það er þó vel hægt. Hér er dæmi um frábæran stað fyrir þennan skemmtilega bjórstíl. IPA er einkennandi beiskur og því getur bragðið verið dálítið dominerandi þegar það blandast við bragðflækjur máltíðarinnar. Það þarf því eitthvað sem stendur föstum fótum gagnvart beiskjunni eða jafnvel tónar hana aðeins niður. Saltur matur er kjörinn í þetta verkefni og hvað betra en okkar klassíski sprengidagsmatur saltkjöt og baunir?

Baunasúpan er þykk og mikil og saltið oft áberandi. Auk þess er saltkjötið oftast nokkuð feitt og djúsí. Þetta er algjört kjörlendi fyrir beittan IPA sem klýfur fituna niður og opnar alveg upp þennan þunga rétt og gerir hann léttari og þægilegri. Saltið tvinnast við beiskjuna og dregur ögn úr henni á sama tíma og það kryddar dálítið bjórinn sjálfan og dregur fram notalegt bragðið frá korninu og gerinu.

Já afhverju ekki gera enn meira úr sprengideginum og gera þjóðlegan rétt dálítið skemmtilegri? Þetta er að minnsta kosti skemmtileg leið til að finna hvernig þessi bjórstíll gegnur vel með feitu og söltu. Prófið t.d. TUMA HUMAL frá Gæðing eða ÚLF frá Borg.