Blog

Heimagert geggjað brokkolísalat

Eins og svo margir þá féllum við algerlega fyrir brokkolísalatinu sem við smökkuðum fyrst frá Sælkerabúðinni fyrir einhverju síðan. Eins og með svo margt sem okkur finnst gott þá var ákveðið að prófa heimagert og viti menn, þetta salat er geggjað og ég skal bara segja það, þetta er betra en fyrirmyndin. Við smökkuðum meira að segja head on okkar vs þeirra og með gestum. Þetta er bara æðislegt með alls konar kjötréttum.

Það sem þarf:

  • Brokkolí, helst íslenskt, það er bara mun betra
  • Hálfur rauðlaukur fínt saxaður
  • Trönuber söxuð, 1 dl
  • Ristaðar furuhnetur, hálfur til einn poki
  • Majones, 1 bolli
  • Sýrður rjómi, 3/4 bolli (næstum því heil dós)
  • Sykur, 2 mtsk
  • Hvítvínsedik, 2 mtsk

Aðferð:

Brokkolí er skolað og skorið fínt, sama með rauðlaukinn (hálfur) og trönuberin (1 dl). Blandið þessu í skál, bætið svo furuhnetum, majonesi (1 bolli), sýrðum rjóma (3/4 bolli), sykri (2 mtsk) og hvítvínsediki (2 mtsk) saman við og blandið þessu öllu saman.

Látið þetta svo standa í kæli í amk klst. Salatið er nefnilega dálítið sætt fyrst en þegar það tekur sig kemur á þetta fullkomið jafnvægi. Ef ykkur vantar samt meiri sýru eða sætu þá bara stillið þið af með ediki eða sykri.

Verði ykkur að góðu!

Lesa áfram Heimagert geggjað brokkolísalat

Pönnusteiktur Hörpudiskur steiktur í brúnu smjöri með kirsuberjatómata vinagrette

Hörputilraunir halda áfram. Þetta kom virkilega vel út. Í raun átti ég til Hörpudisk í ískápnum sem ég varð að nota. Við höfðum svo gert burrata bruschetta líka með geggjuðu smátómata vinagrette og okkur datt í hug að nota sama vinagrette á hörpudiskinn. Þetta vinagrette er eitt af mörgu sem hægt er að finna á frábærri uppskriftasíðu halfbaked harvest. Mér finnst líka geggjað að steikja uppúr smjöri, það verður allt gott þannig, en Harpan þarf dálítið háan hita og þá brennur smjörið. Brúnt smjör brennur ekki eins auðveldlega og það gefur af sér dásamlegan karamellu hnetukeim.

Þetta kom ofsalega vel út.

Það sem þarf (fyrir ca 4)

Það er erfitt að ákveða magnið hér, ef þetta er forréttur þá eru það ca 3 hörpudiskar á mann þannig að 12 stk stór hörpuskel væri hentugt hér.

  • 12 stóra hörpudiska
  • Salt og pipar
  • 2 hvítlauksrif, pressuð
  • 120 g smjör
  • Klettasalat og ferk basilica (má sleppa)

Fyrir kirsuberjatómata vinagrette

  • 2 öskjur kirsuberjatómatar
  • 1/3 bolli olífuolía
  • 3 hvítlauksgeirar, saxaðir
  • 2 mtsk ferskt timian
  • Ca 1/2 tsk sterkar chiliflögur
  • Ca 1 tsk sjávarsalt
  • Ca 1/2 tsk pipar
  • 2 mtsk kampavíns- eða hvítt balsamic edik

Aðferðin

Undirbúið hörpuna

Byrjið á að afþýða hörpudiskinn, helst í sólarhring inní í skáp. Takið svo út og latið standa á disk ofan á eldhusbréfi og leggið eldhúsbréf yfir líka.

Fínt að græja brúna smjörið. Smjör i pott á meðalhita. Látið malla þar til það er orðið gullin brúnt. Froða myndast ofan á og dökkar agnir falla út í botninn. Lyktin verður æðisleg, karamella og hnetur. Ég síaði smjörið svo í gegnum eldhúsbréf. Þannig er ég í raun að búa til eins konar ghee. Brúnt ghee kannski?

Kirsuberjatómata vinagrette

Takið fram pönnu, setjið ólifuolíu (1/3 bolli) á pönnuna, meðal hiti. Tómatarnir (2 öskjur) út á ásamt 3 söxuðum hvítlauksgeirum, 2 mtsk ferskt timian, um 1/2 tsk chili flögur, 1 tsk salt og 1/2 tsk nýmulinn pipar. Blandið þessu saman á pönnunni og látið malla þar til tómatarnir eru farnir að opnast og mýkjast vel. Ca 10 mín.

Takið pönnuna af hitanum og látið aðeins kólna í þessu. Hrærið svo saman 2 mtsk kampavíns – eða hvítu balsamic ediki. Ég átti það ekki til og notaði 1 mtsk hvítvínsedik og 1 mtsk balsamic edik.

Steikið hörpuna

Þerrið hörpudiskinn vel með eldhúsbréfi. Saltið og piprið aðra hliðina rétt áður en þið eldið. Setjið brúna smjörið á pönnuna og hitið dálítið vel.

Saxið hvítlauk (2 geirar) og setjið út á pönnuna

Raðið hörpunni á pönnuna í hring eins og klukku. Við viljum heyra snark þegar þeir fara á. Steiðkið í um 2-3 mín og snúið svo við í sömu röð og harpan var sett á pönnuna. Salt og pipar aftur og steikið í um 2 mín. Fer dálítið eftir stærð. Best að hafa prufu bita bara og taka tíma.

Raðið svo hörpudisk á disk og hellið vinagrette yfir. Ég setti klettasalat sem undirlag (aðalega sem skraut) og hörpuna yfir. Loks reif ég ferska basilicu yfir allt saman. Berið fram strax. Ég gerði það ekki en að rífa smá limebörk yfir væri líklega ansi næs.

Þið endið kannski með heldur rúmlegt af vinagrette, það er allt í lagi, setjið í krukku og notið síðar t.d. Yfir kjúklinginn eða ofan á burrata!

Hollandaise sósa eins og ég geri hana

Mér finnst dálítið mikið vesen að gera þessa sósu, ég geri hana líklega ekki nógu oft. Mér finnst þessi sósa bara ómissandi með hleyptu eggi, t.d. eggs Benedicts en þessi sósa er líka mögnuð með reyktum laxi og á fisk. Það eru til margar uppskriftir og hef ég reynt nokkrar. Hér er sú leið sem ég fer og hefur reynst mér best.

Ég geri oft Bernaise sósu frá grunni og hef einhvern veginn náð bara ákveðinni lagni með hana. Reyndar gerum við hana best þegar við erum saman að gera hana ég og Sigrún mín. Hollandaise sósa er í raun mjög svipuð sósa, nánast alveg eins en samt ekki. Auðvitað meiri sýra og sítróna í Hollandaise. Ég ákvað því bara að gera hana eins og Bernaise.

Það sem þarf fyrir ca 3-4:

  • 3 eggjarauður
  • 150 g smjör, brætt í potti (mögulega þarf ekki allt)
  • ca 2 tsk hvítvínsedik
  • sítrónusafi eftir smekk
  • salt og pipar
  • smá heitt vatn í bolla

Aðferðin:

Ok við byrjum á að einangra eggjarauðurnar (3 stk) í bolla. Bræðið svo smjörið (ca 150g) í potti og takið af hitanum.

Setjið vatn í pott og náði upp hita, ekki láta bullsjóða heldur bara þannig að það rétt bærist vatnið. Setjið hitaþolna skál yfir, ekki láta snerta vatnið. Hafið lægsta hita sem þarf til að halda vatninu heitu. Skálin má ekki verða of heit þá endið þið með hrærð egg.

Pískið eggjarauðurnar stöðugt í smá stund, bætið um 2 tsk hvítvínsediki saman við, pískið áfram þar til þær eru farnar aðeins að þykkna. Ég tók hér pottinn af hitanum, pískið áfram og byrjið að hella smjörinu í mjórri bunu saman við á meðan þið pískið stöðugt. Smjörið má ekki vera heitt. Ef ykkur finnst sósan vera að þykkna um of þá þurfið þið ekki að nota allt smjörið.

Svo má fara að bæta sítrónusafanum við. Smakkið bara til, hversu súrt viljið þið hafa þetta. Pískið stöðugt. Á þessu stigi fer þetta stundum að kekkjast aðeins hjá mér eða verður of þykkt og ég fer í vont skap. Þá minnir Sigrún mig á að ég á eftir að setja heitt vatn saman við. Salt og pipar og svo bætið þig vatni samanvið til að þynna sósuna og losna við kekkina ef þarf…

Svona virkar þetta amk hjá okkur og við fáum frábæra mjúka og djúsí sósu út úr þessu. Ég mæli samt með að þetta sé það síðasta sem þið gerið áður en matur er borinn fram þannig að sósan sé aðeins volg.

Hleypt „poached“ egg og með því!

Egg eru góð og það er hægt að gera svo ótal margt við þau. Eitt af því er að gera hleypt egg. Það er bara svo elegant og svo gefandi þegar þetta tekst og maður sér guluna flæða út og yfir undirlagið þegar skorið er á eggið. Þetta er aðeins meira dútl en að sjóða egg en samt ekki mikið meira vesen. Ég skrifaði inn þessa færslu fyrir nokkrum árum með alls konar tilfæringum, vesen með að búa til vortex og eitthvað. Þetta hefur gengið vel svo sem til þessa en svo benti nafni minn Læknirinn í Eldhúsinu mér á einhvern gaur á Youtube sem blæs á allt þetta. Hann var með aðferð sem er bara algerlega solid. Ég hef prófað nokkrum sinnum og þetta svínvirkar. Ég hef því uppfært færslu mína hér með. Hér er sem sagt eins og ég geri þetta núna! Svo er auðvitað eitthvað meðlæti með, t.d. klassískt að setja þetta ofan á pönnuristað brauð með einhverju álgeggi en þið finnið út úr því. Hollandaise sósa er líka fyrir mitt leiti afskaplega gott með þessu en samt þarf hana ekki, en er samt betra. Bara helvítis ves að gera hana.

Það sem þarf:

  • Egg, mv ca 1 – 2 á mann
  • eplaedik, x 2 mtsk
  • Vatn í djúpan pott

Aðferðin:

Það er smá kúnst að gera eggin fullkomin, þau þurfa svo sem ekki að líta þannig út, aðallega að þau bragðist vel en það er bara svo flott þegar maður nær þeim hnöttóttum og laus við tægjur.

Fyllið meðalstóran pott með vatni þannig að dýpi sé um ca 6 cm eða svo.  Náðið upp suðunni og lækkið svo hitann þannig að búblurnar hverfa og það nánast bærist ekki vatnið.

Eggin brjótið þið í bolla, eitt í hvern. Setjið svo 2 mtsk edik í pottinn og hrærið. Þetta hjálpar til við að halda eggjunum saman á hnattlaga formi. Það er einnig mikilvægt að nota fersk egg en þau virðast halda betur þessari fallegu lögun sem við erum að leita eftir því það er minna af þunnu vatnkenndu hvítunni í fersku eggjunum. Takið svo fram sigti og gleymið öllu tali um hringiðu (vortex). Setjið eggið í sigtið og látið renna af egginu þessari lausu vatnskenndu hvítu (það er þetta sem myndar tægjurnar í pottinum) og rennið því svo ofan í pottinn. Látið svo liggja þarna í 3 mín eða svo. Ekkert að hræra neitt. Tíminn fer dálítið eftir hversu linsoðin eggin eiga að vera hjá ykkur. Ef þið notið gömul egg, trúið mér ég tala af reynslu, þá er svo mikið af þessari lausu vatnskenndu eggjahvítu að það er sáralítið eftir af hvítunni til að hjúpa guluna. Kemur ekki vel út.

Hér er svo sem í lagi að hafa grunnann pott en þá verða egginn meira svona flöt eins og spælegg. Ef potturinn er djúpur þá sekkur eggið til botns og hjúpar guluna og verður meira dropalaga, það er það sem er svo fallegt.

Lyftið svo varlega egginu upp með götóttri skeið og látið renna vel af, það má þerra með pappír. Svona gerið þið við hvert egg, fer auðvitað eftir fyrir hve marga er eldað. Ef þið eruð með mörg egg eða þið þurfið að græja eitt og annað má geyma eggin í ísbaði þar til klárt til að bera fram, þá látið þig eggin vera í pottinum í 2 mín og 40 sek, þetta er alla vega tími sem er að virka fyrir mig. Ísbaðið stöðvar eldunina á eggjunum.

Þegar þið eruð svo klár í að nota eggin, þá setjið þið hvert egg í sjóðandi vatn, varlega samt og látið liggja bara í 15 sek eða svo. Fínt að prófa bara eitt egg og sjá hvaða tími hentar. Við gerum þetta til að hita eggin upp aftur. Svo er bara að raða ofan á eitthvað spennandi og njóta.

Hollandaise sósa

Ég set þessa inn sem sér færslu. Það er auðveldara að finna hana þannig. En mér finnst þetta ómissandi með.

Hér er linkur beint inn á hvernig ég geri þessa sósu.

Bjórsoðin krabbasúpa og Saison með

Ég hef aldrei eldað krabba og ef út í það er farið hef ég bara ekki smakkað krabbakjöt? Skrítið. En já ég hef lengi langað til að smakka. Ég rak svo augun í þetta hér í Nettó. Tvo fallega krabba í pakka frá Royal Iceland! Með í pakkanum var svo krabbahakk og krabba legg kjöt. Uppskriftin er sögð fyrir 6 en ég komst að því að það er dálítið langt frá því. Ég náði að fá flotta skammta fyrir fjóra með því að bæta ýmsu við hana. Þetta var stórkostlegt og mun ég kaupa þetta aftur, nema ég finni krabba annars staðar sem ég get notað í soðið. Maður þarf svo að læra kannski að vinna kjötið úr skelinni sjálfur. En alla vega, hér er það sem ég gerði og mun líklega gera aftur.

Það sem þarf fyrir 4

  • Einn pakki með tveim kröbbum frá Royal Iceland
  • 2 L vatn
  • 0.5 dl Koníak eða Brandí
  • 1 flaska af saison bjór, t.d. Satan frá Borg ef hann er enn til
  • 3-4 dl rósavín, ég átti það til opið, hefði annars notað hvítvín eða bara meira af saison
  • 2 stk stjörnuanis
  • 4-5 gulrætur skornar gróft
  • 4 hvítlauksgeirar, heilir
  • 3 tsk fiskikraftur (duft)
  • skvetta af humarkrafti (líkl. um 2-3 mtsk)
  • 170 g tómatpúrra
  • 500 ml rjómi
  • salt og pipar eftir smekk
  • smá steinselja til að skreyta

Aðferðin

Þetta er eftir uppskrift á umbúðunum nema ég bætti alls konar góðgæti saman við. Setjið 2L vatn í pott. Hlutið krabbana í sundur, sem sagt snúið lappirnar af. Setjið í pottinn og sjóðið í 60 mín ásamt, 4 gulrótum, 4 hvítlauksgeirum, 2 stk stjörnuanis, 4 dl rósavíni eða hvítvíni, 3 tsk fiskikraftur, sletta af humarkrafti og smá salt. Ekki sjóða á fullu blasti samt. Það verður að vera eitthvað eftir.

Þegar suðutíminn er kominn þá sigtið þið soðið frá skelinni og grænmetinu í pott. Bætið við krabbahakkinu, koníaki/brandi, tómatpúrru og saison bjór og sjóðið áfram í um 20 mín. Passið að salta ekki of, það er auðvelt að fara yfir strikið.

Í lokin bætið þið 500ml rjóma saman við og sjóðið í 5 mín til viðbótar. Rétt áður en borið er fram er krabba legg kjöti bætt saman við og hrært. Setjið þetta í 4 skálar og skreytið með steinselju.

Gott er að hafa með þessu sneitt snittubrauð sem þið ristið létt uppúr smjöri og olíu á pönnu.

Pörunin

Það góða við bjór-matarpörun er að það er ekkert endilega bara einn möguleiki í stöðunni, oft koma fleiri bjórstílar til greina. Sjávarfang kallar á belgískan saison, eða blond, jafnvel belgískan tripel ef um bragðmikinn rétt er að ræða. Það er líka frábært að sjóða uppúr þessum bjórum, t.d. bláskel og greinilega krabba eins og við lærðum hér. Góður brakandi lager er líka flottur með flestu sjávarfangi. Þannig að hér mæli ég með saison þar sem ég eldaði með honum. Það er ekki til mikið af saison á Íslandi, Snorri frá Borg er svona ákv saison afbrigði, skaði frá Ölvisholti var líka flottur, ég veit ekki hvort hann sé enn fáanlegur reyndar. Svo eru fleiri þarna úti. Endilega að prófa. Saison kemur upphaflega frá hinum frönsku mælandi hluta Belgíu, eða Vallóníu og var áður bruggaður í litlum sveitabrugghúsum eða sveitabæjum yfir kaldari haustmánuði ársins. Bjórinn var ætlaður sem svalandi drykkur yfir sumarmánuðina og gjarnan notaður til að fagna uppskerunni á bæjunum og er það líklega þaðan sem viðurnefnið „sveitabjór“ er komið.  Bjórinn átti að vera svalandi og þægilegur en varð þó að vera nægilega sterkur til að lifa sumarmánuðina af. Saison stíllinn er gjarnan með áfengisprósentu í hærri kantinum 5-6.5%  án þess þó að vera of sterkur, hann er gulur eða orange að lit með flottan froðuhaus og vel kolsýrður og spriklandi. Humlar koma við sögu og gefa notalega beiskju og stundum er hann þurrhumlaður til að gæða hann meiri angann.  Bjórinn er oftast dálítið sýrður og þurr á tungu og kryddaðir tónar áberandi. Saison er þó nægilega mildur til að ganga með sjávarfangi sem oft er með viðkvæman bragðprófíl sem við viljum ekki að bjórinn yfirgnæfi.

Reyndar vorum við líka með kampavín með þessu, það kom vel út en seltan í súpunni tók dálítið máttinn úr kampavíninu

Góð marinering á risarækjur og meira til

VIð erum alltaf að prófa okkur áfram með marineringu á rækjurnar okkar. Hér kom ein bara óvart sem svínvirkar. Eða kannski rækjuvirkar? Já ég veit, ég rata út, alla vega, þessi verður notuð framvegis á t.d. þennan rétt hér, risarækju kínóa grillsalat með kóríander, mango ofl.

Nú var þetta bara slumpað saman hjá okkur og ég reyni svona að cirka þetta út hér.

Það sem þarf:

  • 1,5-2 dl ólífuolía
  • 5 hvítlauksgeirar
  • 1 heill rauður ferskur chili
  • 2 tsk reykt paprikuduft
  • 1 kúfuð mtsk engifermauk (fæst alltaf í asískum búðum/market)
  • 2 tsk kóríander fræ, steytt.
  • 1 sítróna, safinn
  • 2 mtsk Kikkoman soya sósa

Þetta er bara allt sett í góðan blandara, ég er algerlega ástfanginn af Vitamixinum mínum, hann maukar allt í drasl.

Kóríander og basilicu sósa með hvítlauk, hunang og lime

Ég var að grilla geggjuð kjúklingaspjót þegar Sigrún mín ákvað að snara sér inn og græja einhverja sósu. Þetta er útkoman, alveg svakalega flott sósa sem gengur með alls konar. Fullkomin með þessum kjúkling.

Það sem þarf

  • 1 lúkufylli af fersku kóríander
  • 1 lúkufylli af ferskri basilicu
  • hálf dolla grísk jógúrt (350g dolla)
  • ca 100g majónes
  • 2, hvítlauksgeirar
  • 1 tsk hunang
  • safi úr hálfri límónu
  • salt og pipar eftir smekk

Aðferð

Allt sett í „blender“ og maukað þar til orðið algerlega sameinað. Smakkið til með salt og pipar. Flóknara er það ekki.

Hunangs, lime sriracha kjúklingaspjót með brakandi lager bjór

Það er komið sumar og þá vill maður dusta rykið af grillinu og græja eitthvað gott. Í dag er brakandi blíða, pallurinn klár og konan með óskir um eitthvað gott og sumarlegt. Ég var alveg lost en langaði að gera eitthvað einfalt en samt eitthvað sem virkaði eins og ég hafði lagt mikla vinnu í það. Ég datt niður á þessa uppskrift af netinu. Ég man ekkert hvaðan þetta kom. Útkoman var svakalega góð og ég held að hér sé kominn kjúklingaréttur sumarsins en ég mun pottþétt bjóða vinum og vanda í þetta í sumar.

Það sem þarf fyrir ca 5

  • tveir bakkar af kjúklingarlærum, úrbeinuðum
  • 6 mtsk soya sósa
  • 1/2 bolli hunang
  • 2 mtsk ólífuolía
  • 2 tsk rifinn límónubörkur
  • 6 mtsk safi úr límónum
  • 8 hvítlauskgeirar, gróft skornir
  • slatti af ferskri engiferrót. Skræld og skorin niður í kubba. ca 65g
  • 3 mtsk sriracha sósa
  • 1,5 tsk salt
  • ferskur kóríander, slatti, til að skreyta
  • límónu sneiðar til að skreyta með og kreysta yfir

Kóríander, límónu og basilicu sósa

Þessi er geggjuð með, sjá nánar hér!

Aðferð

Hreinsið kjúklinginn, klippið burt hvítu ljótu fituna. Skerið í minni bita sem ykkur finnst hæfilegt á spjótin. Leggið til hliðar.

Setjið soya sósu, hunang, ólífuolíu, rifinn límónubörk, límónusafa, hvítlauk, sriracha engiferrót og salt í „blender“ og maukið í drasl eða þar til þið eruð með alveg mjúka og fína blöndu. Takið frá ca dl í könnu. Þetta hitið þið upp alveg í lokin og notið sem sósu. Leggið kjúklinginn í þessa marineringu og inn í ísskáp helst í 5 tíma eða lengur.

Leggið grillspjót í bleyti. Hitið svo grillið, ekki hafa það of heitt samt. Þið finnið útúr þessu. Þræðið loks bitunum uppá grillspjótin, gott er að lauma rauðlauk með, sveppum og pariku inn á milli. Skellið þessu svo á grillið. Fylgist með, snúið spjótunum reglulega til að fá jafna áferð.

Gott er að hafa ferskt salat með, t.d. klettasalat og spínat með bláberjum, jarðaberjum, furuhnetum og fetaost, og auðvitað góðri ólífuolíu.

Þegar kjúklingurinn er tilbúinn, raðið þið spjótunum á fallegan bakka eða brauðbretti, skreytið með kóríander yfir og heilum kóríander greinum til hliðar. Kreistið límónusafa yfir kjúklingaspjótin. Skerið niður nokkra límónubáta og skreytið með þeim.

Hitið afganginn af marineringunni sem þið tókuð til hliðar og hellið yfir kjötið.

Pörunin

Hér gæti maður farið í flottan basic west coast IPA með notalegum sítruskeim frá humlunum og beiskju sem dálítið magna upp kryddin í réttinum en elegant og heiðarlegur ljós lager kemur líka svakalega vel út. Lagerinn er nógu látlaus til að taka ekki yfir en samt með karakter og þrótt til að halda velli. Ofsalega flott pörun.

Suðrænn og freyðandi eftirréttur

Við Sigrún elskum góða eftirrétti, eitthvað létt og ljúft til að enda fullkomna máltíð. Það er allt of oft þannig að þegar maður fer út að borða að þá eru eftirréttirnir ekkert sérstaklega eftirminnilegir. Við erum því oftast hætt að panta þá bara. En nóg um það. Hún Sigrún mín henti í þennan um daginn þegar okkur var boðið í mat til vina okkar Snædísar og Ragnars Freys (Læknirinn í Eldhúsinu). Þetta var svo ljúft að Ragnar vildi fá að hafa réttinn í nýju bókinni sem hann er að vinna að um þessar mundir.

En vindum okkur í þetta. Það sem þarf fyrir ca 4

  • 1 flaska freyðivín, ekki þurrt. Prosecco myndi ganga hér.
  • 1 askja hindber
  • 1 askja blæjuber
  • 200 g rjómaostur við stofuhita
  • 80 g flórsykur
  • 3 kúfaðar mtsk lemon curd (heimalagað ef þið getið)
  • börkur af sítrónu, rifinn eftir smekk
  • hvítt súkkulaði eða saltkaramellusúkkulaði til að rífa yfir
  • 1 peli af rjóma

Aðferðin

Athugið, þessi uppskrift er að þróast mjög hratt. Sigrún gerði þetta upphaflega bara eftir höfðinu, svo gerði ég réttinn heima hjá Ragnari þegar hann var að taka upp fyrir bókina þar sem Sigrún komst ekki. Þá breyttist uppskriftin aðeins og svo hef ég aðeins endurstillt hana hér þegar ég skrái hana niður. En það er í lagi, þetta eru engin geimvísindi. Hér er það smekkur manna sem ræður, smakkið þetta bara dálítið til. Það má líka leika sér með berin, t.d. hafa brómber líka eða bláber. Ég held líka að væri gott að skafa úr ástaraldinn efst sem skaut. En alla vega.

Takið berin og skolið varlega, skerið blæjuberin í tvent og fjarlægið vængina. Blandið berjunum saman í fallegt glas á fæti. Hálffyllið glasið eða rúmlega það, hellið freyðivíni yfir þannig að það nánast hylur berin en samt ekki alveg. Látið standa í kæli á meðan haldið er áfram.

Setjið ca 200 g af rjómaosti, um 80 g flórsykur og 2-3 kúfaðar lemon curd í skál. Ath heimalagað lemon curd er margfalt betra en tekur smá tíma. Hrærið saman og smakkið til. Hér má alveg vera dálítið sítrónubragð. Þeytið þetta svo saman í hrærivél. Rífið sítrónubörk, passið að fara ekki mikið í hvíta lagið. Blandið saman við og smakkið til. Stillið sítrónuna eftir smekk. Þegar þetta er komið vel saman þá bætið þið pela af rjóma og þeytið áfram þar til þetta er orðið mjúkt og notalegt og farið að stífna smá. Ekki samt þeyta allt of lengi.

Takið fram berjaskálarnar, hellið rjómablöndunni yfir, skreytið efst með blæjuberjum og hindberjum og svo eitt blæjuber með vængjunum. Saxið svo hvítt súkkulaði og dreyfið yfir. Berið strax fram.

Hellið góðu freyðivíni í glas og berið fram með réttinum, hér má vera þurrt cava eða kampavín en ég held að aðeins sætara eins og sec komi líka vel út hér. Sleppið samt prosecco, það er ekkert sérstakt að okkar mati, en það er jú bara við. Þessi réttur er afskaplega ljúfur og frískandi. Gengur líka bara sem stakur „fordrykku“ á pallinum í sólinni!

Kjúklingur 65, besti kjúklingur sem þú smakkar á árinu

Kjúklingur er ágætt hráefni og það er sannarlega hægt nota hann í stórkostlega rétti. Þessi réttur er svo magnaður að ég er sannfærður um að þetta verði besti kjúklingaréttur sem þú munt smakka á þessu ári. Ég elska að djúpsteikja allan andskotan, þegar ég sá nafna minn Ragnar Frey (Læknirinn í Eldhúsinu) gera þetta einhvern tíman á instagram þá varð ég bara að prófa. Eða í raun var það Sigrún mín sem eldaði og þetta var alveg magnað. Krakkarnir okkar elska þetta en þau kalla þennan rétt rauða kjúllann.

Sigrún hefur eldað þetta nokkrum sinnum en nú langaði mig að prófa. Uppskriftin er á síðunni hans Ragnars en fyrir mig sem þarf að hafa allt mjög skipulagt og einfalt uppsett þá fannst mér dálítið erfitt að lesa mig í gegnum hana. Ég ákvað því að skrifa þetta upp til að auðvelda mér verkið næst þegar ég elda þetta því það verður svo sannarlega gert oft, krakkarnir einfaldlega krefjast þess.

Ég er svo aukalega með döðlu raita og saffran hrísgrjón sem passa svakalega vel með!

Það sem þarf fyrir 6

Fyrir marineringu

  • 1.4 kg Kjúklingalæri úrbeinuð (tveir bakkar)
  • 1 dós grísk jógúrt (350ml)
  • 2 sítrónur, safinn
  • 2 egg
  • 3 mtsk túrmerik
  • 3 mtsk garan masala
  • 3 mtsk paprikuduft
  • 2 mtsk chiliduft
  • 1/2 – 1 mtsk chiliflögur, fer eftir hversu sterkar þær eru
  • 2 mtsk svartur pipar
  • 1 bolli maísmjöl
  • 3 mtsk engifermauk
  • 3 mtsk hvítlauksmauk
  • 50 mll rauðrófusafi
  • salt
  • 2-2,5 L djúpsteikingarolía

Fyrir sósuna

  • 1 dós grísk jógúrt (350 ml)
  • 50 ml rauðrófusafi
  • 5 mtsk tómatsósa
  • 2 mtsk sæt chilisósa
  • 2 mtsk sriracha sósa
  • salt og pipar eftir smekk
  • 1 grænn chili, skorinn fínt
  • 10-15 karrílauf, má sleppa, nota þá ca tsk karrí í staðinn
  • 1 mtsk engifermauk
  • 1 mtsk hvítlauksmauk

Döðlu raita

  • 1 dós grísk jógúrt
  • 1/2 búnt kóríander, saxað
  • 1-2 hvítlauksgeirar, pressaðir
  • 15-20 steinlausar döðlur, skorið smátt
  • salt

Allt hrært saman í skál

Saffran Hrísgrjón

  • 5 dl basmati hrísgrjón
  • 1 L vatn
  • 1 mtsk isio 4 olía eða 2 mtsk ghee
  • 1/2 – 1 tsk saffran þræðir
  • 1/2 sítróna, bæði hýði og safi
  • 1 tsk salt
  • 2 tsk brún sinnepsfræ (fæst í Fiska)

Aðferð

Marinering

Byrjið á að skera kjúklingalærin í hæfilega bita. Ég fékk 4 bita úr hverju læri t.d. Finnið til stóra skál og setjið kjúklinginn í hana. Þvínæst er öllum kryddunum, jógúrti, sítrónusafa, rauðrófusafa, eggjum og öllu því sem ég er líklega að gleyma að telja upp, bætt í skálina. Svo er bara að hnoða þetta eða blanda vel saman með höndunum. Látið standa í 2-3 klst eða lengur.

Sósan

Takið til skál, hrærið saman 1 dós af grískri jógúrt, 50 ml rauðrófusafa, 5 mtsk tómatsósu, 2 mtsk sæta chilisósu, 2 mtsk sriracha, salt og pipar eftir smekk. Skerið chili smátt, hitið olíu á pönnu og steikið svo aðeins chili, engifermauk, hvítlauksmauk og karrí. Hellið svo sósunni út á pönnuna og hrærið saman. Smakkið til með salti og pipar. Sósan er þá í raun tilbúin en svo er þetta hitað upp með kjúklingnum á eftir.

Hrísgrjónin

Gott er að koma hrísgrjónunum af stað áður en byrjað er að djúpsteikja. Setjið vatn í pott (1 L) og látið suðuna koma upp.  Bætið við rifnum sítrónuberki og safa (1/2 sítróna) út í vatnið ásamt saffran þráðunum og látið renna saman í 5 mín.  Á meðan notið þið tíman og setjið olíuna eða ghee í pott og náið upp hita.  Setjið sinnepsfræin varlega útí en passið ykkur þau geta poppað og þá slettist á ykkur heit ólían.  Hrærið í fræunum stöðugt í 30-40 sek, bætið svo þurrum hrísgrjónumum útí pottinn og blandið við fræin í 1-2 mín.

Bætið þvínæst hrísgrjónunum ásamt salti (1 tsk) út í saffran vatnið og hrærið létt saman og setjið svo viskastykki yfir pottinn og lok yfir og látið malla í 10 mín.  Ekki bullsjóða.  Forðist að hræra mikið svo þið brjótið ekki grjónin.  Þvínæst slökkvið þið á hitanum og látið pottinn standa í aðrar 10 mínútur.

Djúpsteikingin

Notið djúpsteikingarpott ef þið eigið. Hitið um 2 L olíu upp í 170 – 180 gráður. Djúpsteikið svo kjúklinginn í ca 4 mínútur. Kannið hvort þetta sé eldað í gegn, ef ekki þá bætið þið við mínútu ef þarf. Látið svo standa á ofngrind og kólna. Hér er fínt að henda í raita en það er alveg ómissandi með. Þetta mun slá í gegn við matarborðið. Skerið dölurnar og kóríander smátt og hrærið svo bara öllu saman í skál. Smakkið til með salti.

Naan brauð

Það verður að vera naan með til að þurrka upp þessa geggjuðu sósu. Við höfum gert ýmsar útgáfur, en Sigrún mín hefur verið dugleg að prófa sig áfram. Ég held samt að hveitikökuuppskriftin mín (tortilla) komi best út með þessu. Mótið hvert naan að vild en hafið kannski deigið aðeins þykkara en þegar gert er tortilla. Staflið naan brauðunum upp og pakkið inn í álpappír.

Þegar allt er klárt þá setjið þið kjúklingabitana út í sósuna og veltið vel saman þannig að bitarnir hjúpist alveg. Hitið aðeins upp þessa blöndu en ekki sjóða eða steikja. Skreytið með ferskum kóríander og berið fram.

Þetta er dálítið sterkt en alls ekkert sem rífur of mikið í. Mér finnst best að para indverskt með flottum premium lager, amk þennan rétt hér. Sætan í lagernum dempar dálítið brunann frá chili-inu, kolsýran og létt beiskjan opna upp sósurnar og létta á öllu. IPA gengur líka en þá þarf maður að vera tilbúinn í að bruninn í matnum verði meira áberandi.