Pizza Rosa a la Chris Bianco

Birt þann af Freyr

Pizza er mest borðaði matur á heimsvísu enda góður matur og möguleikarnir nánast endalausir þegar kemur að áleggi. Ég hef skrifað um pizzagerð áður og ætla ekki að kafa of mikið í það hér en það er þó mikilvægt að taka það fram að hráefnið sem þú notar er það allra mikilvægasta. Ef hráefnið er bara svona la la þá verður pizzan aldrei meira en það. Mér finnst deigið vera það mikilvægasta, það er svo stór hluti af pizzunni og þvi mikilvægt að gera gott deig eða kaupa gott tilbúið deig.

Hugmyndir okkar hér kvikna oft út frá matreiðsluþáttum, eitthvað sem við sjáum þar og reynum að endurgera í eldhúsinu okkar heima. Um daginn datt ég niður á þáttaröð á Netflix, Chef’s Table Pizza sem fjallar heimsins meistara í pizzagerð. Þetta eru skemmtilegir þættir sem vert er að skoða. Í fyrsta þættinum er fjallað um Chris Bianco sem ku hafa komið pizzunni á kortið og gagnrýnendur tala um að hann geri bestu pizzur í Veröldinni. Vandamálið fyrir okkur sem langar að sannreyna það er að hann er með staðina sína í Arizona.

Auðvitað verður maður forvitinn og þess vegna langar mig að prófa Pizza Rosa sem er ein af þessum frægu á matseðlinum hjá Chris. Þessi pizza hljómar látlaus en ku vera ofsalega góð. Já og ég get auðvitað sagt það núna, hún er frábær. Hér kemur lýsing á því hvernig ég gerði hana, ég veit auðvitað ekkert hvernig pizzan hans Chris á að bragðast en þessi er svakaleg.

Það sem þarf í eina pizzu

  • Gott deig, ekki eitthvað semi gott deig. Mikilvægt!
  • Rauðlaukur, fínt sneiddur í mandolini
  • Ferskt rósmarin, smátt skorið, ca 2 mtsk
  • Pistasiukjanar, muldar
  • Rifinn parmesan, 1 bolli eða meira
  • Ferskur mozzarella, slitinn í sundur
  • Hvítlauksolía

Aðferðin

Deigið þarf að vera fullkomið, það er það mikilvægasta við pizzugerð skal ég segja ykkur. Gerið allt klárt, rífið parmesan, sneiðið rauðlaukinn, saxið rósmarin og myljið pistasiuhneturnar. Hitið ofninn þannig að hann sé tilbúinn. Hjá mér er það 450 gráður!

Fletjið út deigið í höndunum, ekkert kefli takk. Dreifið hvítlauskolíu yfir og svo helling af rifnum parmesan (ca 1 bolli). Passa að skilja eftir ca 2-3 cm af pissujaðrinum sem fær ekkert álegg. Þetta á að vera eins og teppi nánast, pressið ostinn varlega ofan í deigið. Osturinn sýgur aðeins upp olíuna þannig að botninn verði ekki of blautur. Svo eru það rauðlaukhringirnir (hálfur rauðlaukur), slatti alveg en fer eftir smekk. Dreifið svo rósmaríni (2 mtsk) yfir pizzuna og mozzarella osti sem þið slítið í sundur.

Verið tilbúin með pistastiuhneturnar (ca 2 mtsk). Bakið pizzuna í ofninum, þegar hún er alveg að verða klár takið þið hana út og dreifið pistasiukjörnunum yfir. Aftur inn í ofn í smá stund. Berið á borð með góðri ólífuolíu yfir.

Rjómalöguð Tékknesk Dill Sveppa Súpa – Kulajda

Birt þann af Freyr

Það er svo gaman að ferðast um heiminn og smakka á matarmenningu annarra þjóða og detta inn á eitthvað nýtt. Þannig spretta upp hugmyndir að réttum til að spreyta sig á heima við. Við vorum á dögunum í Prag sem er dásamleg borg og matarmenning mikil svo ég tali nú ekki um bjórinn. Þar smakkaði ég bestu súpu sem ég hef smakkað, já ég segi það bara, ég man alla vega ekki eftir að hafa smakkað betri súpu í langan tíma. Þetta var reyndar á mjög flottum veitingastað uppá þaki í 30 stiga hita með ægifagurt útsýni yfir þessa stórbrotnu borg, þannig að ég var dálítið hræddur um að öll þessi umgjörð hefði ahrif á upplifun mína. Ég mæli alla vega með að þið prófið þennan stað ef þið þvælist til Prag. Staðurinn heitir Coda og tilheyrir Aria lúxushótelinu sem er hið glæsilegasta.

Alla vega, súpa þessi er klassík í tékkneskum matarkúltúr og er í raun dill kartöflusúpa með gæðasveppum,. Mætti líka kalla hana sveppa dill kartöflusúpu? Svo er hefðbundið sett soðið egg í hana en á Coda var notað hleypt egg (poached egg) sem er auðvitað enn meira elegant.

Ég ákvað þegar heim var komið að prófa að gera mína eigin súpu, fullur neikvæðni reyndar því ég var viss um að ég ætti ekki séns að fanga þessa stemningu heima í eldhúsinu. En viti menn, og ég er alveg hreinskilin hér, þetta tókst svona alveg spot on. Geggjað. Uppskriftina fann ég á netinu en þar er aragrúi af uppskriftum af þessari súpu en ég valdi þá sem hljómaði sem líkust Coda súpunni. Ég fékk svo Gunnar Karl, (Dill Restaurant) sem er að mínu mati einn af okkar færustu, til að segja mér hvernig maður gerir Dill olíu. Svona þegar ég hugsa út í það þá skil ég ekki afhverju ég hef ekki gert þetta fyrr.

Það sem þarf (fyrir 4)

Ath þetta er heldur saðsöm súpa og mjg flott sem forréttur, alla vega skammtastærð ætti ekki að vera stór.

  • 300g kartöflur
  • 40g smjör
  • 4 mtsk (40g) hveiti
  • 50g sykur
  • 15g (hálf dós) þurrkaðir chanterelle sveppir, þetta fæst í Netto og Hagkaup alla vega, ógeðslega dýrt. Má nota aðra þurrkaða sveppi í staðinn
  • 200ml rjómi
  • 3 mtsk edik, t.d. Hvítvínsedik
  • 100g ferskt dill, bara blöðin, ekki stönglar
  • 3 mtsk ferskt dill (blöin), fínt skorið
  • Um 720ml nautasoð
  • 480 ml vatn til að sjóða sveppina í
  • Salt og pipar
  • 4 hleypt egg
  • 200ml bragðlaus olía

Aðferðin

Það er ágætt að byrja á dill olíunni, t.d. bara daginn áður. Það eru til uppskriftir á netinu. Ég fór eftir ráðum Gunna, 100g ferskt dill, bara blöðin, ekki hörðu stönglarnir. Sett í blandara, 200g bragðlaus olía og svo bara blanda vel, 8-10 mínotur. Það á að rjúka uppúr þessu en ég náði ekki því stigi en það kom samt vel út hjá mér. Svo er þetta sigtað í gegnum klút. Tilbúið!

Skolið sveppina í volgu vatni. Setjið 480 ml vatn í pott, sveppina útí og náið upp suðu. Lækkið þá hita og látið malla í 15 mínotur og leggið til hliðar.

Svo er það hveitibollan, setjið 40-50g smjör í pott, bræðið smjör á meðalhita, setjið svo 40-50g hveiti útí og hrærið í ca 1-2 mín þar til þið eruð komin með mallandi massa. Bætið nautasoði (2-3 teningar leystir upp í 720ml vatni) hægt saman við og hrærið stöðugt. Haldið áfram þar til soðið er búið. Sigtið sveppina frá soðinu og bætið því saman við súpuna. Smakkið til með salti. Náið upp suðunni og lækkið svo hitann og látið malla undir loki.

Skrælið kartöflurnar, skerið þær svo í litla kubba, ca 1 cm á kant. Bætið þeim svo út í súpuna ásamt sveppunum. Sjóðið súpuna svo þar til kartöflurnar eru orðnar mjúkar. Á meðan þetta er að gerast saxið þið dillið fínt, ekki nota stönglana, bara mjúku blöðin og litlu stönglana á þeim. Þegar súpan er tilbúin lækkið þið hitann, hrærið saman við 200 ml rjóma, 3 mtsk edik, 50g sykur og smá pipar. Bíðið aðeins með dillið.

Hleypt egg

Fyllið glerskál með köldu vatni og ísmolum, setjið vatn í pott, ca 2 mtsk epla eða hvítvínsedik saman við og náið upp suðu. Brjótið 4 fersk egg í litla bolla. Þegar suðan er komin upp þá lækkið þið hitann þar til það rétt kraumar í. Takið svo fram sigti, setjið eitt egg í sigtið og látið renna aðeins af því. Rennið svo egginu ofan í pottinn og bíðið í 2 mín og 40 sekúndur. Veiðið eggið upp og rennið því í ísbaðið. þetta stoppar eldunina. Endurtakið fyrir hvert egg. Sjá nánar hér

Takið nú súpuna af hitanum, hrærið dillinu saman við, 3 mtsk. Takið fram 4 fallegar skálar, dreifið súpunni í hverja skál, passið að sveppirnir fari með en þeir vilja falla til botns í pottinum. Setijið eitt egg í hverja skál. Nú klárast eldunin á eggjunum. Skreytið með dillolíunni og ferskum dill greinum og berið fram strax.

Pörunin

Þessi súpa er æðisleg, hún er dálítið sæt en svo kemur réttur skammtur af sýru á móti, stillið þetta af með sykri eða ediki að vild. Súpan er í senn mjúk og þægileg en samt ekki of þung. Samt er hún matarmikil og seðjandi. Ekki hafa hana of heita samt. Með þessu kemur ískald rosé kampavín eða crémant ofsalega vel út. Búbblurnar skera á fituna í súpunni og létta á pallettunni. Ískaldur tékkneskur pilsner er líka frábær með þessu, Pilsner Urquell beint af stáltanki væri auðvitað best en hér heima höfum við jú ekki þann lúxus. Svo er bara að njóta.

Bruschetta með kirsuberjatómata vinaigrette og ferskjum

Birt þann af Freyr

Þetta er einfalt og ofsalega gott. Uppskrift beint frá Halfbaked harvest. Frábær sem forréttur með góðu rosé freyðivíni! Þetta vinaigrette hef ég líka notað sem meðlæti, t.d. Hér með hörpudisk

Það sem þarf

  • 2 öskjur kirsuberjatómatar
  • 1/3 bolli olífuolía
  • 3 hvítlauksgeirar, saxaðir
  • 2 mtsk ferskt timian
  • Ca 1/2 tsk sterkar chiliflögur
  • Ca 1 tsk sjávarsalt
  • Ca 1/2 tsk pipar
  • 2 mtsk kampavíns- eða hvítt balsamic edik
  • Súrdeigsbrauð
  • Ferskar safaríkar ferskjur
  • 2 Mosarella kúlur
  • Fersk basillica

Aðferðin

Takið fram pönnu, setjið ólifuolíu (1/3 bolli) á pönnuna, meðal hiti. Tómatarnir (2 öskjur) út á ásamt 3 söxuðum hvítlauksgeirum, 2 mtsk ferskt timian, um 1/2 tsk chili flögur, 1 tsk salt og 1/2 tsk nýmulinn pipar. Blandið þessu saman á pönnunni og látið malla þar til tómatarnir eru farnir að opnast og mýkjast vel. Ca 10 mín.

Takið pönnuna af hitanum og látið aðeins kólna í þessu. Hrærið svo saman 2 mtsk kampavíns – eða hvítu balsamic ediki. Ég átti það ekki til og notaði 1 mtsk hvítvínsedik og 1 mtsk balsamic edik.

Skerið niður súrdeigsbrauð í snittustærð eða bara eins og þið viljið og steikið á sömu pönnu og þið notuðuð fyrir tómatana. Bæti smá olíu og smjör við. Þegar brauðið er orðið stökkt og gullin áferð komin á það er það tekið af. Skerið niður ferskar ferskjur, reynið að finna eins safaríkar og þið getið. Ef þær eru ekki djúsi og safaríkar (við búum nefnilega á Íslandi) þá er hægt að skera þær niður og mýkja þær aðeins á pönnu með ögn smjöri og sykri. Timian krydd kæmi líka vel út. Ég hef gert þetta reyndar líka bara með apríksósum, það kemur líka vel út en er vissulega ekki eins.

Svo er bara að raða þessu á brauðið, slítið í sundur mozzarella, og raðið þessu öllu á. Hellið svo safanum yfir og skreytið með ferskri basillicu. Berið þetta svo fram með góðu rosé kampavíni eða cremant.

Ljómandi “fluffy” frönsk ommiletta

Birt þann af Freyr

Egg eru líklega það hráefni sem við hér á Bjór og Matur gætum ekki verið án. Það er hægt að gera svo ótal margt með þeim, eins og dásamleg hleypt egg, eða alvöru eggjahræru að hætti Gordon Ramsay, já eða bara gamla góða linsoðna eggið með salti og ekki má gleyma bakstrinum eða sósunum eins og silkimjúka hollandais sósuna eða bennann. Þegar ég var lítill þá fékk ég oft ommilettu hjá pabba. Það var í raun ekkert sem ég man sérstaklega eftir sem einhverja lúxus máltíð heldur bara eggjaköku með pylsubitum og einhverju slíku. En þetta þjónaði sínum tilgangi á þeim tíma svo sem, að metta mallakút þegar lítill áhugi eða tími var fyrir að stússa í eldhúsinu.

Ég hef svo tekið eftir því í öllum kvikmyndum um mat og í þessum matreiðsluþáttum eins og MasterChef ofl að ommiletta er einhver svona marker eða viðmið fyrir hversu fær maður er í eldhúsinu. Ég tek það fram nú eins og oft áður að ég er enginn snillingur í matargerð en ég hef gaman af áskorunum og prófa mig áfram. Ég ákvað að fara í smá rannsóknarleiðangur í þessu og hef verið að prófa mig áfram og lesið mig til um ommilettur. Franska aðferðin heillaði mig og það er hún sem ég er að reyna að apa eftir. Ég er orðinn bara mjög sáttur við útkomuna en líklega er alltaf hægt að gera betur? Hér er alla vega eins og ég geri þetta.

Það sem þarf í eina ommilettu

  • 3 egg (fer reyndar eftir stærð pönnunnar), þetta miðast við pönnu hjá mér sem er lítil, ca 20 cm í þvermál. Stærri panna, fleiri egg.
  • Smjöklípa á pönnuna
  • Salt
  • Krydd eftir smekk, ég nota chilli flögur, oregano og smá papriku krydd
  • Parmesan, rifinn, ca 2 mtsk
  • Trufflu Aioli, ca 2-3 tsk, fer algerlega eftir smekk
  • Eitthvað “meðlæti” t.d. Bara tómatar, avocado, graslaukur eða eitthva sem ykkur dettur í hug.

Aðferð

Brjótið 3 egg í skál, ekki brjóta þau á kanti skálarinnar heldur á flötu undirlagi því annars er hætta á að fá skurn inn í eggið. Saltið með ca hálfri tsk af salti. Hrærið svo vel, mjög vel til að fá loft vel inn í eggin.

Takið til kryddin og rífið parmesan. Hitið “non stick” pönnu, það er mikilvægt, það gengur ekkert með venjulegar pönnu. Við viljum hafa þetta aðeins yfir meðalhita.

Setjið smá olíu á pönnun og myndarlega smjörklípu og látið bráðna. Passið að smjör og olía þeki alla pönnuna.

Hellið eggjahrærunni á pönnuna og hrærið með sleikju eða þunnum spaða sem má nota á teflon pönnu. Ég vil hafa þetta örþunnan plastspaða. Hrærið í þessu þar til eggin eru farin að verða eins og eggjahræra á forstigi. Alls ekki gera alveg eggjahræru. Sléttið svo úr þessu þannig að þekji alla pönnuna. Lækkið hitann undir. Dreifið svo rifnum parmesan osti yfir allan flötinn, kryddið svo eftir smekk og fylgist með. Losið ommilettuna meðfram köntunum með spaðanum. Um leið og það er hægt að byrja að rúlla ommilettunni upp þá hallið þið pönnunni frá ykkur og rúllið ommilettunni upp með spaðaun.

Yfirborðið á að vera alveg slétt og heiðgult. Ommilettan á helst að vera dálítið blaut ofaná, sem sagt ekki alveg fulleldað í gegn. Rúllið ommilettunni alveg upp rennið henni af pönnunni á disk og látið standa aðeins. Eggin halda áfram að eldast í miðjunni.

Ef ommilettan er of blaut inní, eins og óelduð egg þá þarf að hafa hana aðeins lengur á pönnunni næst. Ef hins vegar ommilettan er stíf og leiðinleg þá hafið þig haft hana of lengi á pönnunni. Það er í raun ekki hægt að segja til ákveðinn tíma þetta er tilfinning og smá æfing.

Loks er bara að skreyta með t.d. Avocado og tómötum. Eg ríf líka parmesan yfir og svo má hafa klessu af trufflu aioli til hliðar, það er svoooo gott með þessu. Njótið og endilega taggið mig ef þetta gengur upp hjá ykkur.

Snögg pæklaður rauðlaukur

Birt þann af Freyr

Það er svo mikilvægt að hafa sýru í mat á móti sætu, salti og beiskju. Ein leið til að kalla það fram er pæklað grænmeti, það getur í raun verið hvað sem er, jafnvel ávextir eins og epli og perur. Rauðlaukur er líklega vinsælast hjá okkur hér. Þetta er líka svo ofsalega fallegt meðlæti.

Ég einhvern veginn man aldrei hvernig ég geri þetta nákvæmlega en kemur samt alltaf vel út svo sem en ég ákvað að skrá þetta niður svo auðvelt væri að kalla það fram næst þegar ég þarf pæklaðan rauðlauk.

  • 1 rauðlaukur, sneiddur í mandolín
  • 1 bolli vatn, soðið
  • 1/2 bolli edik, t.d. eplaedik eða hvítvínsedik
  • 1,5 mtsk sykur
  • 1 tsk salt

Sneiðið laukinn í mandolini, skerið svo þvert á hringana til að opna þá, Leggið í skál, setjið edikið yfir, salt og sykur og blandið vel. Hellið svo soðnu vatninu yfir, bætið svona tsk af rósapiparkúlum yfir og látið standa þar til þið þurfið að nota. Það er ágætt að ná alla vega svona 2 tímum en betra ef líður lengri tími. Ég hef leikið mér með alls konar útgáfur af þessu en aldrei skrifað hlutföllin niður. Darri vinur minn gerði þetta svona síðast þegar ég var í mat hjá honum og ég ákvað að halda mig við þetta svona því þetta er bara helvíti gott.

Heiðgrænt kryddjurta aioli

Birt þann af Freyr

Þessi sósa er frábær með alls konar, en við gerðum hana upphaflega með quesadilla, geggjað gott með.

Það sem þarf

  • 1/2 búnt ferskur kóríander
  • 1/2 búnt fersk basillika
  • Ca 10 myntulauf
  • 1 stór hvítlauksgeiri, pressaður
  • 2 tsk hunang
  • 3 til 5 kúfaðar mtsk majones
  • Salt og pipar eftir smekk

Aðferð

Setjið allt í blandara og maukið vel saman, smakkið til með salti og pipar. Setjið svo í skál og bætið við 1-2 mtsk majones eftir smekk, hrærið saman við til að þykkja.

Pico de gallo

Birt þann af Freyr

Pico de gallo er gott meðlæti með mexikóskum mat. Ferskt og gott. Þetta er einfalt en dálítið nauðsynlegt finnst mér.

Það sem þarf

  • 370 g ferskir kirsuberjatómatar, skornir smátt
  • 1/2 krukka jalpéno skorinn smátt
  • Safi úr 1 límónu
  • 1 tsk cumin duft
  • 1-2 hvítlauksgeirar, pressaðir
  • 1/2 búnt ferskur kóríander skorinn smátt
  • 2 mtsk smátt skorin fersk basillika
  • 1/2 rauðlaukur, skorinn mjög smátt
  • Salt og pipar eftir smekk
  • Skvetta af góðri ólifuolíu

Aðferð

Blandið þessu bara öllu í skál, skvetta af olífuolíu yfir og berið fram.

Quesadilla veisla

Birt þann af Freyr

Það þarf ekki mörg orð hér. Mexikanskt er bara geggjað og skemmtilegt að útbúa. Hér er hugmynd af quesadilla og meðlæti sem hægt er að nota með flestum suður amerískum réttum. Njótið….það væri gaman að tagga okkur ef þið prófið eitthvað af þessu.

Það sem þarf (fyrir ca 6-8)

  • Einn bakki úrbeinuð kjúklingalæri (lærkjöt)
  • 2 tsk chili flögur
  • 2 tsk reykt papriku duft
  • Salt og pipar
  • 3 ferskir maískólfar
  • 1 stór laukur, skorinn gróft
  • 1 ferskur chilli
  • 4 hvítlauksgeirar
  • Ólífuolía
  • 1 bolli salsa verde, t.d. Þessi hér
  • 1/2 maxíkóostur, rifinn
  • 1 bolli rifinn cheddar ostur
  • 1 lúka af ferskum kóríander
  • 10 -12 tortilla kökur
  • Myntulauf og límónur til skrauts

Aðferð

Veltið kjúklingnum uppúr chili flögum, reyktu papríku kryddi, salti og pipar. Magnið fer eftir smekk bara. Setjið bökunarpappír á ofnskúffu, setjið svo kjúllann í miðjuna. Raðið svo grænmetinu í kringum kjúllann. 3 ferskir maískólfar, 1 stór laukur skorinn í grófa bita, einn ferskur chilli eða eitthvað sterkara ef þið viljið, 4 hvítlauksgeirar. Dreifið ólifuolíu yfir, salt og pipar og setjið svo inn í ofn. Bakið við 200 gráður í ca 15 mín eða þar til kjúklingurinn er eldaður í gegn. Takið þá kjúklinginn af plötunni. Hækkið hitann eða setjið á yfirgrill. Grillið grænmetið áfram þar til komið er smá bruni á það. Ekki brenna þetta samt.

Rífið kjúklinginn og setjið á pönnu, skafið kornin af maískólfunum og setjið á pönnuna. Skerið hvítlaukinn, laukinn og chilli í litla bita og bæti því við og hrærið öllu saman. Bætið ca bolla af salsa verde saman við. Fínt að vera bara búinn að gera salsa daginn áður. Hér er svakalega einfalt salsa verde og óskaplega ljúffengt. Rífið svo hálfan mexico ost og einn bolla rifinn cheddarost yfir og blandið saman við og bræðið ostinn saman við. Rífið loks ca lúku af ferskum kóríander yfir þetta allt.

Finnið til tortilla kökur (ekki verra ef er heimabakað), dreifið kjúklingablöndunni yfir og setjið svo kökur yfir. Sem sagt svona samlokur. Olía á pönnu og steikið svo tortilla samlokurnar á báðum hliðum. Skerið svo í fernt og raðið á disk, eða bretti. Skreytið með límónubátum, rifnum parmesan, pækluðum rauðlauk og kóríander eða myntulaufum t.d.

Þetta er gott eitt og sér svo sem en við viljum hafa gott meðlæti með. Hér er dæmi um meðlæti sem gengur mjög vel með. Pæklaður rauðlaukur er líka algert möst.

Pörunin

Ég má til með að benda á þessa pörun en ég held að sjaldan sé hægt að tala um eins flott match. Beiskur og brakandi IPA er öflugur en samt nógu hógvær til að lofa matnum að njóta sín en heldur samt vel velli gagnvart sterkum bragðflækjunum í þessu. West coast IPA og kóríander hefur alltaf einhvern veginn parast mjög vel saman í mínum bókum, þetta tvennt tvinnast saman og myndar alveg nýtt bragð. Það er vonlaust að lýsa þessum dansi með orðum. Prófið bara sjálf. Við mælum með Úlf IPA frá Borg.

Guacamole á öðru plani

Birt þann af Freyr

Guacamole er ómissandi með suður amerískum mat. Til eru ótal uppskriftir og útgáfur en ég ákvað að skrá þessa niður til að hafa hana hér til taks þegar ég þarf að grípa í hana síðar. Sigrún mín henti í þetta um daginn og það var bara svo gott.

Það sem þarf

  • 3 þroskuð avocado, kramin með gaffli
  • 2 mtsk ferskur kóríander skorinn smátt
  • 2 mtsk smátt skorin fersk basillika
  • 1-2 hvítlauksrif, pressuð
  • Safi ur 1/2 límónu
  • 2-3 mtsk pico di gallo, uppskrift hér.
  • Salt og pipar eftir smoke

Aðferð

Allt hrært saman í fallega skál og saltað og pipar eftir smekk. Ein mtsk pico di gallo ofaná og skvetta af góðri ólifuolíu. Ekki flókið.

Ómótstæðilegt Salsa Verde

Birt þann af Freyr

Salsa verde er ómissandi í mexikanskri matargerð, bæði notað sem hráefni í rétti eða sem meðlæti.  Þetta heimagerða salsa verde er geggjað, hingað til hef ég ætlað að kaupa svona en aldrei fundið tilbúið en nú þarf ég ekki að hafa áhyggjur af því framar.  Þetta er fljótlegt og einfalt.  Ég man ekkert hvar ég sá þetta, þetta var einhvers staðar á youtube.

Það sem

  • 250 g kirsuberjatómatar, skornir í tvent
  • 2 fersk chili, eða jalapeno eða habanero, fer eftir hversu mikinn bruna þú vilt í þetta
  • 4 hvítlauksgeirar
  • 1 laukur skorinn í nokkra bita
  • 1 sæt paprika (löng rauð)
  • 1 búnt ferskur kóríander
  • 3-4 mtsk límónusafi
  • Salt og pipar

Aðferðin

Takið fram elfast mót, stillið bakarofn á 210.  Skerið tómata í tvent (250 g) og raðið í mótið, afhýðið hvítlauksgeirana (4 stk), skerið eina sæta langa papriku í tvent eftir endilöngu og setjið með sárið niður í mótið.  Sama með 2 fersk chilli nema að fjarlægið fræin.  Laukur er skorinn gróft í nokkra bita og líka settur á mótið.   Svo er bara að baka þetta í ca 10 mín eða þar til kominn bruni á grænmetið.  Þið ráðið auðvitað hversu mikið “char” þið viljið hafa.

Mér finnst ágætt að klára þetta með gasbrennara.   Setjið þetta svo allt í blender sem þolir heitt innihald.  Takið ferskt kóríander og rífið það aðeins niður, setjið með laufum og stilkum í blandarann.  Bætið um 3 mtsk límónusafa við, salt og pipar eftir smekk og maukið.

Smakkið þetta til, meira límónusafi eða meira salt, pipar eða hvað það nú er.   Takið fram pönnu, setjið olíu á pönnuna og hitið vel, eins og ef þið væruð að fara steikja naut.  Passið ykkur það gæti skettst olía á ykkur.  Hellið svo úr blandaranum í einum hvelli á pönnuna, það kæfir í raun olíusletturnar.  Það á að vera læti.  Hér erum við að karmellisera blönduna dálítið og draga fram bragðið.

Loks setjið þið þetta í krukku og notið þegar þarf.