Blog

Kjúklingur 65, besti kjúklingaréttur þú smakkar á árinu

Kjúklingur er ágætt hráefni og það er sannarlega hægt nota hann í stórkostlega rétti. Þessi réttur er svo magnaður að ég er sannfærður um að þetta verði besti kjúklingaréttur sem þú munt smakka á þessu ári. Ég elska að djúpsteikja allan andskotan, þegar ég sá nafna minn Ragnar Frey (Læknirinn í Eldhúsinu) gera þetta einhvern tíman á instagram þá varð ég bara að prófa. Eða í raun var það Sigrún mín sem eldaði og þetta var alveg magnað. Krakkarnir okkar elska þetta en þau kalla þennan rétt rauða kjúllann.

Sigrún hefur eldað þetta nokkrum sinnum en nú langaði mig að prófa. Uppskriftin er á síðunni hans Ragnars en fyrir mig sem þarf að hafa allt mjög skipulagt og einfalt uppsett þá fannst mér dálítið erfitt að lesa mig í gegnum hana. Ég ákvað því að skrifa þetta upp til að auðvelda mér verkið næst þegar ég elda þetta því það verður svo sannarlega gert oft, krakkarnir einfaldlega krefjast þess.

Það sem þarf fyrir 6

Fyrir marineringu

  • 1.4 kg Kjúklingalæri úrbeinuð (tveir bakkar)
  • 1 dós grísk jógúrt (350ml)
  • 2 sítrónur, safinn
  • 2 egg
  • 3 mtsk túrmerik
  • 3 mtsk garan masala
  • 3 mtsk paprikuduft
  • 2 mtsk chiliduft
  • 1/2 – 1 mtsk chiliflögur, fer eftir hversu sterkar þær eru
  • 2 mtsk svartur pipar
  • 1 bolli maísmjöl
  • 3 mtsk engifermauk
  • 3 mtsk hvítlauksmauk
  • 50 mll rauðrófusafi
  • salt
  • 2-2,5 L djúpsteikingarolía

Fyrir sósuna

  • 1 dós grísk jógúrt (350 ml)
  • 50 ml rauðrófusafi
  • 5 mtsk tómatsósa
  • 2 mtsk sæt chilisósa
  • 2 mtsk sriracha sósa
  • salt og pipar eftir smekk
  • 1 grænn chili, skorinn fínt
  • 10-15 karrílauf, má sleppa, nota þá ca tsk karrí í staðinn
  • 1 mtsk engifermauk
  • 1 mtsk hvítlauksmauk

Döðlu raita

  • 1 dós grísk jógúrt
  • 1/2 búnt kóríander, saxað
  • 1-2 hvítlauksgeirar, pressaðir
  • 15-20 steinlausar döðlur, skorið smátt
  • salt

Allt hrært saman í skál

Saffran Hrísgrjón

  • 5 dl basmati hrísgrjón
  • 1 L vatn
  • 1 mtsk isio 4 olía eða 2 mtsk ghee
  • 1/2 – 1 tsk saffran þræðir
  • 1/2 sítróna, bæði hýði og safi
  • 1 tsk salt
  • 2 tsk brún sinnepsfræ (fæst í Fiska)

Aðferð

Marinering

Byrjið á að skera kjúklingalærin í hæfilega bita. Ég fékk 4 bita úr hverju læri t.d. Finnið til stóra skál og setjið kjúklinginn í hana. Þvínæst er öllum kryddunum, jógúrti, sítrónusafa, rauðrófusafa, eggjum og öllu því sem ég er líklega að gleyma að telja upp, bætt í skálina. Svo er bara að hnoða þetta eða blanda vel saman með höndunum. Látið standa í 2-3 klst eða lengur.

Sósan

Takið til skál, hrærið saman 1 dós af grískri jógúrt, 50 ml rauðrófusafa, 5 mtsk tómatsósu, 2 mtsk sæta chilisósu, 2 mtsk sriracha, salt og pipar eftir smekk. Skerið chili smátt, hitið olíu á pönnu og steikið svo aðeins chili, engifermauk, hvítlauksmauk og karrí. Hellið svo sósunni út á pönnuna og hrærið saman. Smakkið til með salti og pipar. Sósan er þá í raun tilbúin en svo er þetta hitað upp með kjúklingnum á eftir.

Hrísgrjónin

Gott er að koma hrísgrjónunum af stað áður en byrjað er að djúpsteikja. Setjið vatn í pott (1 L) og látið suðuna koma upp.  Bætið við rifnum sítrónuberki og safa (1/2 sítróna) út í vatnið ásamt saffran þráðunum og látið renna saman í 5 mín.  Á meðan notið þið tíman og setjið olíuna eða ghee í pott og náið upp hita.  Setjið sinnepsfræin varlega útí en passið ykkur þau geta poppað og þá slettist á ykkur heit ólían.  Hrærið í fræunum stöðugt í 30-40 sek, bætið svo þurrum hrísgrjónumum útí pottinn og blandið við fræin í 1-2 mín.

Bætið þvínæst hrísgrjónunum ásamt salti (1 tsk) út í saffran vatnið og hrærið létt saman og setjið svo viskastykki yfir pottinn og lok yfir og látið malla í 10 mín.  Ekki bullsjóða.  Forðist að hræra mikið svo þið brjótið ekki grjónin.  Þvínæst slökkvið þið á hitanum og látið pottinn standa í aðrar 10 mínútur.

Djúpsteikingin

Notið djúpsteikingarpott ef þið eigið. Hitið um 2 L olíu upp í 170 – 180 gráður. Djúpsteikið svo kjúklinginn í ca 4 mínútur. Kannið hvort þetta sé eldað í gegn, ef ekki þá bætið þið við mínútu ef þarf. Látið svo standa á ofngrind og kólna. Hér er fínt að henda í raita en það er alveg ómissandi með. Þetta mun slá í gegn við matarborðið. Skerið dölurnar og kóríander smátt og hrærið svo bara öllu saman í skál. Smakkið til með salti.

Naan brauð

Það verður að vera naan með til að þurrka upp þessa geggjuðu sósu. Við höfum gert ýmsar útgáfur, en Sigrún mín hefur verið dugleg að prófa sig áfram. Ég held samt að hveitikökuuppskriftin mín (tortilla) komi best út með þessu. Mótið hvert naan að vild en hafið kannski deigið aðeins þykkara en þegar gert er tortilla. Staflið naan brauðunum upp og pakkið inn í álpappír.

Þegar allt er klárt þá setjið þið kjúklingabitana út í sósuna og veltið vel saman þannig að bitarnir hjúpist alveg. Hitið aðeins upp þessa blöndu en ekki sjóða eða steikja. Skreytið með ferskum kóríander og berið fram.

Þetta er dálítið sterkt en alls ekkert sem rífur of mikið í. Mér finnst best að para indverskt með flottum premium lager, amk þennan rétt hér. Sætan í lagernum dempar dálítið brunann frá chili-inu, kolsýran og létt beiskjan opna upp sósurnar og létta á öllu. IPA gengur líka en þá þarf maður að vera tilbúinn í að bruninn í matnum verði meira áberandi.

Dásamlegt sítrónu soufflé með sætu cava

Ég gerði þessa uppskrift eignlega óvart. Já ég hef svo sem aldrei gefið mig út fyrir að vera einhver meistara kokkur, ég er bara að gera tilraunir. Ég lagði upp með að finna uppskrift af soufflé, svona eggja soufflé. Mér fannst þessi líta svo vel út og var ekkert að lesa hana í gegn. Það var ekki fyrr en ég kom að flórsykrinum að ég áttaði mig á að hér væri kannski annars konar soufflé á ferðinni. Já ekki dæma, ég er að koma hreint fram hérna. En ég sé alls ekki eftir þessu, þessi réttur er frábær og jafnframt svo elegant.

Það sem þarf í þetta (4 soufflé)

  • brætt smjör, til að bera á mótin
  • 2 sítrónur, safinn og rifinn börkur
  • 2 eggjarauður og 4 eggjahvítur
  • 6 kúfaðar matsk sykur
  • 3 kúfaðar tsk maíshveiti
  • 1 kúfuð mtsk hveiti
  • 90ml rjómi
  • 110ml nýmjólk
  • flórsykur til að skreyta

Aðferðin

Takið til 4 soufflé mót og pennslið að innan með smjöri. Setjið smá sykur í hvert mót og þyrlið og veltið þannig að það myndast smá sykurhjúpur innan á mótunum. Hellið svo öllum lausum sykri úr. Látið svo mótin standa í kæli.

Með fínu rifjárni rífið þið sítrónubörk af 2 sítrónum. Passa að rífa ekki niður í hvíta undirlagið, það er of biturt. Skerið sítrónurnar svo í tvennt og kreistið safa úr. Blandið rifna börkinum saman við. Setjið til hliðar.

Aðskiljið eggjarauður frá hvítunni, setjið 4 eggjahvítur í stóra skál. Í aðra skál setjið þið tvær eggjarauður en hinar tvær notið þið ekki hér. Bætið 6 mtsk sykur við eggjarauðurnar og látið bíða.

Setjið hveitið, maíshveiti og rjóma í skál og pískið saman þar til þið fáið mjúkt krem. Hitið mjólkina í potti alveg að suðu. Blandið svo mjólkinni saman við hveitikremið og pískið saman. Byrjið að smá mjólk til að byrja með og hrærið vel saman og pressið út alla klumpa. Hrærið þar til þið eruð komin með mjög þykkt krem. Bætið þá restinni af mjólkinni saman við og blandið saman.

Hellið blöndunni aftur í pottinn og setjið á meðal hita. Pískið stöðugt því annars getur þetta byrjað að brenna í botninn. Þegar þið finnið að þetta er farið að þykkna þá takið þið pottinn af hitanum og bætið sítrónusafanum út í í litlum skömmtum.

Notið trésleif til að hræra saman eggjarauður og sykurinn frá því áðan. Við viljum frá þykkt krem. Bætið þessu þykka kremi svo saman við blönduna í pottinum. Blandið vel saman. Setjið pottinn aftur á helluna og hitið þar til fer að sjóða. Hrærið stöðugt á meðan. Takið svo af hitanum aftur og látið kólna áður en eggjahvítur fara saman við.

Eggjahvíturnar þurfa að vera í alveg hreinni skál, engin korn eða óhreinindi. Passið að enginn skurn eða eggjarauðurest sé í hvítunum. Stífþeytið hvíturnar þar til þið getið myndað stífa toppa.

Þegar blandan í pottinum er farin að kólna er hægt að blanda hvítunni saman við. Blandan þarf að vera kaldari en líkamshiti. Byrjið á að setja stóra skeið af hvítunum í blönduna og hrærið vel saman við þannig að blandan verði ekki eins stíf. Næst notið þig stóra málmskeið eða sleikju og bætið afar varlega afganginum af hvítunum saman við. Veltið þessu saman varlega. Markmiðið er að fella lofti inn í deigið. Haldið áfram þar til þið eruð komin með fölgula blöndu án eggjahvítustrengja.

Takið fram mótin og sléttfyllið þau með blöndunni. Sléttið yfir með hníf t.d. Gott er svo að renna hnífsoddi meðfram kantinum allan hringinn innanvert til að losa aðeins um þar. Þá lyftist deigið betur þegar það bakast og fellur síður.

Hitið ofninn í 180 gráður. Setjið svo mótin í miðjan ofn í ca 14-15 mín eða þar til þetta hefur lyft sér vel og orðið gyllt og fallegt. Fylgist vel með allan tíman. Alls ekki opna ofninn að óþörfu. Um leið og soufflé hefur lyft sér og byrjað að fá þessa gylltu áferð þá takið þið mótin út. Ath bökunartími fer eftir stærð mótanna.

Berið fram um leið og þetta er komið út úr ofninum. Dustið flórsykri yfir eftir smekk.

Pörunin

Freyðivín er geggjað með svona sítrónu eftirréttum. Hins vegar þarf að passa að vínið sé ekki þurrt. Við elskum þurrt freyðivín á þessum bæ en hér gengur það ekki. Þurrt freyðivín verður hvasst og leiðinlegt með súrum réttum. Sýran virðist skemma dálítið vínið. Hér viljum við vín í sætari endanum en það kemur vel á móti sýrunni í þessum rétt. Búblurnar opna líka réttinn upp og létta á öllu. Þetta er frábært combo.

Bao gufusoðið brauð

Við erum hér með ótal uppskriftir af réttum þar sem bao bun er í aðalhlutverki. Fólk er dálítið að spyrjast fyrir um uppskriftina af brauðinu sjálfu. Hér kemur hún, til einföldunar. Svo er það bara í ykkar valdi að raða í þetta fyllingu. Læt samt fylgja með hér neðst það sem ég gerði síðast en það var svakalega gott.

Það sem þarf, (þetta gerir um 10-12 brauð)

  • Vatn, 3/4 bolli eða 177ml, volgt, ca 25 gráður.
  • Þurrger, 1,5 tsk
  • Olía, 2 mtsk
  • Hveiti, 365g
  • Sykur, 2 mtsk
  • Lyftiduft, 2 tsk

Aðferð

Velgið vatn, setjið gerið í vatnið og látið aðeins blotna, passa bara að hafa ekki of heitt vatn. Því næst er 2 mtsk olíu hrært saman við og þetta látið standa. Setjið svo hveiti, sykur og lyftiduft í hrærivélaskál. Blandið aðeins saman. Setjið svo hnoðarahaus á og stillið á frekar lágan hraða. Hellið gervatninu hægt saman við og aukið svo hraðan og hnoðið deigið saman. Þegar þetta er komið í klump hreinsið þið rest deig úr skálinni og bætið í klumpinn.

Deigið á að vera aðeins klístrað en ekki þannig að það þurfi hveiti á borðið. Ef það er of klístrað þá bætið þið ögn meira hveiti saman við og öfugt, ef of þurrt þá setjð þið smá vatn. Hoðið þetta saman. Pennslið svo skál með olíu, setjið deigbolluna í og plastfilmu yfir. Látið svo hefast í klst á volgum stað.

Undirbúið fyllinguna hver svo sem hún er. T.d. hér að neðan. Klippið til ca 12 búta af bökunarpappír og hafið tilbúna. Þegar deigið hefur tvöfaldast að stærð rúllið þið því út í lengju. Ekki vera að hnoða allt loftið úr deiginu hér. Skiptið svo deiginu í 10-12 jafn stóra búta. Fletjið hvern bút út í höndunum, myndið disk. Hér er bara að prófa sig áfram með þykktina. Það má nota kökukefli en alls ekki gera mjög þunna diska.

Pennslið svo helminginn með olíu og lokið þannig að þið eruð með hálfmána. Setjið hvern hálfmána á bökunarpappírs bút. Raðið mánunum á plötu og látið lyfta sér undir viskastykki í aðra klukkustund.

Svo er það suðan. Best er að nota bambus gufukörfu en það er hægt að nota bara t.d. svona grænmetisgufugræju. Setjið vatn í Wok pönnu og bambusinn yfir, ekki láta vatnið ná upp í bambuskörfuna. Náið upp gufu. Svo raðið þið hálfmánunum í gufugræjuna og lokið. Bakið þetta í 7-8 mín. Ekki opna til að kíkja hvernig gengur. Látið svo kólna ögn áður en borið er fram.

Rifin confit de canard með kóríander, sellerírót, graslauk og teríakí sósu

Það er hægt að kaupa geggjaða önd í dós í Bónus, confit de canard. Þetta er svakalega góð önd. Setjið öndina í eldfast mót, smá af fitunni með og bakið í 200 gráður þar til heitt í gegn og aðeins stökkt.

Rífið niður sellerírót, setjið í skál, bleytið í þessu með góðri ólífuolíu, sítrónusafa úr einni sítrónu og smá salti. Látið standa í kæli

Svo er bara að rífa niður kóríander og klippa til graslauk. Reyndar hafði ég pæklaðan rauðlauk með líka og sriracha sósu.

Þegar bao brauðið er tilbúið er bara að rífa niður öndina og raða þessu öllu í brauðið og njóta. Geggjað.

Langeldaður grís, Pulled Pork!

Við Sigrún elskum hægeldaðan grís og notum oft tækifærið t.d. á sunnudögum til að henda í þetta. Sunnudagar eru nefnilega boring en dútl í eldhúsinu gerir þá bara ansi bærilega. Við köllum þessa sunnudaga slow cook sunday! Þó það sé sára einfalt að elda þetta þá tekur það tíma og því kannski ekki eitthvað sem maður hendir í eftir vinnu á virkum degi. Vinnan við þetta er samt lítil, mestur tíminn fer í langeldunina eða um 4 tímar.

Til þessa hefur verið dálítið bras að finna uppskriftina okkar hér á síðunni því hún er falin í öðrum færslum. Hér kemur fínpússuð uppskrift sem okkur finnst best en hún hefur verið að þróast í gegnum tíðina. Ég er að segja ykkur að þegar þið smakkið þetta þá munuð þið elska sunnudaga. Hvað er svo gert við langeldað grísakjöt kann einhver að spyrja? Það er ýmislegt skal ég segja ykkur, við setjum þetta oft bara í hamborgarabrauð með meðlæti, eða á heimagert tortilla eða þegar við erum með ekstra langan tíma, í bao bun (gufusoðið brauð) en það er dútl samt. Það er líka bara hægt að borða þetta bara beint af disknum þetta er bara svo sturlað.

Það sem þarf fyrir ca 4

fyrir krydd nuddið

  • 2 tsk sjávar salt
  • 2 tsk svartur pipar, steytt
  • 2-3 tsk púðursykur
  • 2 tsk chili flögur
  • 2 tsk kóríander fræ, steytt
  • 2 tsk reykt papríka
  • 2 tsk hvítlaukssalt, eða 1 pressaður hvítlaukur
  • 2 tsk fennelfræ / eða krydd
  • 2 tsk season all krydd
  • 1 stjörnuanis, steyttur

fyrir soðið

  • 1 – 1,5 kg Grísahnakki í sneiðum, fæst í Krónunni t.d.
  • 2 laukar skornir í fernd
  • 3-4 gulrætur skornar í grófa bita
  • 4 hvítlauksgeirar, marðir
  • 3 heilar stjörnuanis stjörnur
  • 2 kanilstangir
  • 2 mtsk púðursykur
  • 3 mtsk epla edik
  • 4 lárviðarlauf
  • 200 ml nautasoð, tveir tengingar leystir upp í vatni
  • ca 80 cl (2-3 flöskur) af imperial stout, fínt að hafa reyktan stout með.

Aðferð

Þetta er ekki flókið, það er kannski meðlætið sem er meira dútl? Alla vega, byrjið á krydd nuddinu, það er einfalt, 2 tsk af öllu ,nema stjörnuanis sem er bera ein stjarna, sett í mortél og steytt saman í fínt krydd. Ef þið viljið meira krydd þá er bara að tvöfalda uppskriftina t.d. Nuddið þessu svo inn í kjötið og látið svo standa í kæli í amk klst, tvær er betra en ein er nóg.

Forhitið bakarofn, 145 gráður, skerið 2 lauka í fernt, 3-4 gulrætur skornar gróft og 4 hvítlauksgeirar kramdir. Setjið olíu í stóran pott sem má fara inn í ofn. Mýkið þetta og brúnið aðeins. Svo er öllu hinu bætt saman við. 3 stjörnuanis, 2 kanilstangir, 2 mtsk púðursykur, 4 lárviðarlauf, 3 mtsk epla edik og 200 ml nautasoð. Opnið svo bjórinn, smakkið hann, gaman að átta sig á bragðinu fyrir eldun. Hellið svo bjórnum samanvið og hrærið öllu saman og látið malla.

Takið kjötið út og stekið á pönnu í olíu. Við erum hér að brúna kjötið til að fá fram meira bragð. Reynir að steikja líka á hliðunum ef stykkin eru ekki of þunn, annars er þetta bara fínt. Setjið svo kjötið í pottinn og grafið það undir þannig að vökvi fljóti helst yfir kjötið. Svo er lok sett yfir og inn í 145 gráðu heitan ofninn í ca 4 klukkustundir. 3 gætu dugað en 4 er betra.

Takið svo pottinn varlega út úr ofninum, veiðið kjötið uppúr, passið ykkur það dettur auðveldlega í sundur. Setjið allt kjötið á disk og rífið með göfflum. Smakkið þetta, þetta er rugl. Hellið svo smá soði yfir til að bleyta aðeins í þessu. Nú eruð þið klár með geggjað prótein.

Ekki henda svo gumsinu í pottinum. Þetta er svakalega flottur grunnur í paella t.d. Þannig að setjið þetta í box eða poka og inn í frysti þar til þið hendið í paella. Ég sé það núna að við eigum enn eftir að setja inn paellu uppskriftir, verðum að bjarga því.

Meðlæti

Hugmyndir af meðlæti. Okkur finnst best að hafa smá súrt með grísakjötinu, t.d. eins og pæklaðan rauðlauk, einnig er stökkt hrásalat mjög gott með, svo gott að hafa smá bit. Kóríander er ómissandi, nóg af honum og svo sósurnar. Okkar uppáhalds er sriracha majo og sriracha sósa.

Dæmi um hrásalat hér Frábært hrásalat með asísku ívafi, gott t.d. á borgarann

Sriracha majó er einfalt, hrærið bara sriracha sósi við majones og smakkið til. Stillið brunanum eftir smekk

Snögg pæklaður rauðlaukur. Þetta er hægt að gera bara t.d. klst fyrir mat.

  1. rauðlaukur, sneiddur í mandolini
  2. 1 bolli vatn, soðið
  3. 1/2 bolli edik, t.d. eplaedik og hvítvínsedik, fínt að blanda saman
  4. 1,5 mtsk sykur
  5. 1 tsk salt

Sneiðið laukinn í mandolini, skerið svo þvert á hringana til að opna þá, Leggið í skál, setjið edikið yfir, salt og sykur og blandið val. Hellið svo soðnu vatninu yfir og látið standa þar til þið þurfið að nota. Ég hef leikið mér með alls konar útgáfur af þessu en aldrei skrifað hlutföllin niður. Darri vinur minn gerði þetta svona og ég get klárlega mælt með þessu.

Have fun!

Stökkar kartöflur steiktar í andafitu

Þessi réttur fékk svo mikla athygli á instagramminu okkar að ég ákvað að henda hér inn uppskrift. Stökkar kartöflur steikar í andafitu, fullkomið meðlæti með alls konar mat. Ég fékk þessa uppskrift hjá vini mínum Lækninum í Eldhúsinu en ég er svo sem ekki viss um að hún sé alveg eins því þetta var bara svona munnleg uppskrift frá honum í gegnum konuna mína og til mín. En það er allt í lagi, þetta er bara geggjað og kom mér í raun óvart hversu vel þetta kom út, ef einhver hefði fært mér þetta hefði ég veðjað á að þetta væru djúpsteiktar kartöflur.

Það sem þarf í þetta:

  • Kartöflur, skrældar
  • smá salt og pipar
  • andafita (t.d. sem umlykur confit de canard í dós)
  • hveiti

Aðferðin

Þetta er einfalt, svo einfalt reyndar að mig langar næstum til að semja eitthvað bull til að láta þetta hljóma flókið. En ég geri það ekki samt, við erum saman í þessu. Ég var með önd sem ég kaupi í dós, Confit de Canard, en þessi önd er alveg fáránlega góð. Andalærin eru umlukin andafitu í dósinni sem ég notaði að hluta til í þessar kartöflur en restina geymi ég t.d. þar til næst bara.

Sem sagt, skrælið kartöflur, sjóðið svo í vatni með smá salti í ca 7 mín. Ég gleymdi mér auðvitað og tók ekki tíman en þetta á ekki sjóða þar til þær eru tilbúnar.

Setjið svo slatta af hveiti í poka ásamt salti og pipar. Bara svona eftir höfðinu. Setjið svo kartöflurnar í pokann og hristið þannig að hveitið hjúpi kartöflurnar.

Setjið andafitu á pönnu og hitið upp, steikið svo kartöflurnar á dálítið háum hita. Við erum ekkert að eltast við að brúna þær en gott að velta kartöflunum aðeins um þannig að það komi aðeins litur á þær og fitan hjúpi allar hliðar (auðvitað eru í raun ekki hliðar á kartöflum, þær eru hnettir en þið vitið hvað ég á við).

Hitið bakarofn í 180 gráður. Svo setjið þið pönnuna í ofninn ef pannan þolir það, annars er það bara að henda þessu í eldfast mót en látið fituna á pönnunni fylgja með. Bakið svo í ca 50 mínotur. Tékkið bara á kartöflunum, þegar þær eru orðnar stökkar og vel litaðar þá eru þær klárar.

Gangi ykkur vel!

Pönnuristaður hörpudiskur í sítrónu rjómasósu á kóríander mauki

Ég er mjög hrifinn af hörpudisk en þetta er réttur sem ég hef ekki mikið vera að elda sjálfur í gegnum tíðina.  Það varð eiginlega vakning hjá mér á síðasta ári líklega í tengslum við gríðarlegt verðlag á humrinum sem einnig er í miklu uppáhaldi.  Humar er hins vegar í útrýmingarhættu og er erfitt að veiða hann nú orðið miðað við sem áður var.  Það er því dálítið góð tilfinning að gæða sér á hörpudisk vitandi það að maður er þá ekki að stuðla að brotthvarfi humarsins.

Alla vega, það eru komnar hér inn líklega 2-3 uppskriftir af hörpudisk, allt mjög gott að mínu mati. Núna á þrettándanum langaði mig að elda eitthvað gott sem parast vel með kampavíni eða hvítvíni en ég er alltaf kominn með hundleið á graflaxi, paté og öðrum jólamat þegar hingað er komið sögu.  Ég mundi þá eftir hörpudisknum og hve frábær hann er með búblunum.  Mig langaði að prófa eitthvað nýtt en þá er bara að googla.  Ég datt niður á þessa uppskrift og bætti aðeins við svona til að líka gera réttinn ögn fallegri.   Þetta kom ofsalega vel út og ég held að þessi sósa sé geggjuð með öðru sjávarfangi.  Í kvöld er ég t.d. að fara gera risarækju taco og ég ætla að prófa að marinera rækjurnar í þessari sósu.

En nóg um það.  Það sem þarf

  • Stór hörpudiskur, eins stór og þið komist í (fallegra), magn fer eftir hvort þið eruð með þetta sem forrétt eða aðalrétt.  Ég miða oftast við 3-4 á mann sem forrétt.
  • Fyrir saltpækil, 1 hluti heitt vatn á móti 1/3 hluta salt.  Ísmolar ca 1 bolli.
  • 2-3 mtsk smjör
  • 2-3 hvítlauksgeirar, pressaðir
  • Safi úr einni sítrónu
  • Rifinn börkur af einni sítrónu
  • 1 msk Dijon sinnep (smakka bara til)
  • 1 dl rjómi en fer eftir smekk.  Stillið magn eftir þykkt sem þið viljið
  • 2 tsk ferskt dill
  • Svartur pipar eftir smekk

Ef þið gerið kóríander majóið

  • Heilt búnt af kóríander (stilkar og allt með), bætið við ef þarf að vera grænna
  • 2 dl majones eða þar um bil (stillið bara af eftir smekk)
  • 1 tsk steytt kóríanderfræ
  • 1 hvítlauksrif pressað
  • Mjólk ef þarf að þinna

Aðferð

Þetta er í fyrsta sinn sem ég nota saltpækil og ég er ekki frá því að útkoman er betri.  Byrjið á að afþýða hörpudiskinn, helst láta standa yfir daginn. Það má þó flýta fyrir og þýða í sigri undir rennandi köldu vatni.  Tekur um 30 mín. 

  1. Setjið heitt vatn í skál og 1/3 hlut salt og leysið upp.  Þegar saltið er nánast uppleyst er klökum bætt við.  Þegar pækill er orðinn kaldur setjið þið hörpudiskinn útí og látið standa í 10 mín. Takið svo hörpudiskinn uppúr og skolið með köldu vatni.   Leggið hörpudiskinn á eldhúsbréf og leggið eldhúsbréf einnig yfir.  Látið standa í 10 mín.  Reynið að þerra eins vel og þið getið á öllum hliðum.
  2. Rétt áður en harpan fer á pönnuna þá saltið og piprið létt á báðum hliðum.  Ég nota heita pönnu, ekki meðalhita eins og talað er um í þeirri uppskrift sem ég var að fylgja.  Hafið olíu á pönnunni. Raðið hörpunni á pönnuna eins og klukku.  Sem sagt í hring frá kl 1.  Þannig vitið þið hvaða harpa fór fyrst á pönnuna og svo koll af kolli.  Við erum að tala um ca 2 mín eða skemur, snúið þá hörpunni við.  Það ætti að vera komin falleg gulleit skorpa.  Setjið smör í bitum á pönnuna og mokið svo yfir hörpudiskinn.  Steikið í aðra ca 1-2 mín.  Við viljum ekki ofelda þannig að það er kannski best að taka frá bita og prófa.  Takið svo bitana af í þeirri röð sem þeir fóru á pönnuna og látið standa t.d. á eldhúsbréfi.
  3. Á sömu pönnu mýkið þið hvítlaukinn í 30 sek eða svo á meðalhita.  Bætið svo sítrónuberki og safanum saman við og skrapið allt þetta brúna og nánast brennda af pönnunni og blandið saman á pönnunni.  Steikið í um mínotu.  Slökkvið svo undir pönnunni og bætið rjóma og Dijon sinnepi samanvið og hrærið.  Stillið af þykkt með vatni eða meiri rjóma.  Smakkið til og bætið salti eða pipar við eftir smekk.  Já eða meira Dijon.  Ég gerði það ekki en það er mjög líklegt að hvítvín kæmi ofsalega vel út hér.  Sem sagt að nota hvítvín í sósuna til að bragðbæta!
  4. Þegar þið eru sátt þá bætið þið hörpudisknum aftur á pönnuna, blandið við sósuna og hitið upp á lágum hita í 2 mínotur.  Skreyti með fersku dilli.

Ég gerði svo kóríander majóið mitt en það er bara svo fallegt svona með og kóríanderinn kemur vel út með hörpudisknum.   Ef þið sleppið majóinu þá berið þið réttinn bara fram í pönnunni en annars er gaman að raða á hvern disk ef maður er í stuði.

5.Kóríander majo er mikilvægt að gera í t.d. nutribullet eða með töfrasprota sem maukar allt vel saman.  Ef blandan verður ekki nógu græn þá bætið þið meira kóríander útí.  Sem sagt, allt sett í blandara og maukað. 

Skreytið svo diska með grænum klessum og setjið hörpuna ofan á og berið fram.

Jólaleg matarpörun með Lækninum í Eldhúsinu. „Stund milli stríða“!

Á dögunum hittumst við Bytturnar 3 og Læknirinn í Eldhúsinu heima hjá þeim síðarnefnda og prófuðum okkur áfram með mat og bjór. Sjá myndbandið hér að neðan. Þetta kom mjög vel út, maturinn einfaldur en stórkostlegur og bjórinn geggjaður með. Gott þarf svo sannarlega ekki að vera flókið.

Ragnar gerði 5 rétti fyrir okkur, er eru þeir og bjórinn sem passaði með.

Heit dönsk lifrarkæfa á rúgbrauði með beikon og smjörsteiktum sveppum toppað með pækluðum rauðlauk.

Hitið lifrarkæfu í ofni, steikið beikon á pönnu eða í ofni þannig að verði stökkt. Smjörsteikið sveppi og pæklið rauðlauk. Raðið svo kæfunni á gott rúgbrauð og svo beikon og sveppi ofan á það lokst skreytt með rauðlauknum.

Þessi réttur kom best út með Skyrjarmi bláberja súrbrjór sem gefur þessa berjasætu og sýru sem vantaði dálítið í réttinn en Askasleikir virkaði líka en gerði samt ekki mikið fyrir réttinn.

Ástarpungur með heimagerðu hangikjötssalati og tvíreyktu lambakjöti

Ástarpungar er vanmetið brauð, þessi samsetning er með því jólalegra sem gerist, algerlega frábær biti. Bakið ástarpunga eins og þið kunnið best. Skerið svo niður hangikjöt og mikið af því. Hrærið saman 1/3 hluta majones og 2/3 sýrðan rjóma og niðursoðnar gulrætur og baunir, smakkið til með salt og pipar. Setjið salatið ofan á ástarpung og skreytið með þunnum sneiðum af tvíreyktu lambakjöti.

Þessi réttur mun slá í gegn hjá ykkur. Báðir bjórarnir sem við prófuðum komu mjög vel út. Surtur 30 frá Borg er taðreyktur imperial stout. Hér er reykurinn í aðalhlutverki en einnig lúmsk sæta og beiskjubit. Reykurinn tengir hér vel við reykinn í lambinu. Giljagaur barley wine var svo svakalega flottur með þessum rétt. Þróttmikill bjór með sætum tónum, en beiskju sem klýfur upp þennan feita rétt. Þessi bjór samtvinnast inn í réttinn og breytir dálítið áherslunum.

Rúgbrauð með kryddsíld, eggi, kartöflum og rjómaosti

Síld er klassískt á jólunum. Hér þarf að nota góða síld. T.d. frá Klädesholmen. Útbúið síldina nokkrum dögum áður en þið notið hana.

  • 1 pk Klädesholmen 5-minuterssild
  • 1 dós sýrður rjómi 
  • 3 msk majónes 
  • handfylli hakkað dill
  • 1 msk hlynsíróp
  •  1 1/2 msk Edmont Fallot dijon sinnep 
  • salt og pipar eftir smekk. 

Hella af síldinni, skola undir köldu vatni. Skera í munnbitastóra bita. Hræra saman öllum hráefnum, smakka til með salti og pipar. Færa yfir í fallega krukku. Setja í ísskáp á meðan unnið er í næstu síldarréttum. 

Smyrjið gott rúgbrauð með smjöri, miklu smjöri, raðið svo sneiddum soðnum eggjum ofaná, kartöflu og svo síldinni og toppið með feitum sýrðum rjóma, 34%

Bjórinn með. Hér vorum við ekki alveg sammála, en þeir tveir bjórar sem stóðu uppúr voru Hurðaskellir 11.5% imperial porter aldraður á rúgvískítunnu. Hér datt mér í hug að nota Hurðaskelli sem staðgengil brennivínsins sem klassískt er með síldinni. Mjög skemmtilegt combo, en sumum okkar fannst of mikill þróttur í bjórnum sem er skiljanlegt.

Bjúgnakrækir pale ale féll mönnum betur í geð enda afar ljúfur og þægilegur bjór með sætum ávaxtatónum og léttri beiskju. Beiskjan hjálpar til við að opna upp fituna í réttinum og ljúfir sætutónar pakka síldinni dásamlega vel inn.

Våsterbottenostasíld á sænsku hrökkbrauði með dilli

Þessi réttur er magnaður. Hér notar Ragnar ost með síld sem hljómar reyndar ekki vel en er svakalega gott. Osturinn þarf að vera góður, Ragnar var með hinn sænska Västerbottenost sem er ofsalega flottur ostur.

  • 1 pk Klädesholmen 5-minuterssild
  • 1 dós sýrður rjómi 
  • 2 harðsoðin egg
  • 1/2 dl majónes 
  • handfylli hökkuð steinselja
  • hnífsoddur af chilidufti
  • 1 1/2 dl rifinn Västerbottenostur 
  • salt og pipar eftir smekk

Síldin er undirbúin eins og að ofan. Svo er að sjóða eggin og skera niður og rífa niður ostinn. Hella af síldinni, skola undir köldu vatni. Skera í munnbitastóra bita. Hræra saman öllum hráefnum, smakka til með salti og pipar. Setjið þetta svo ofan á gróft hrökkbrauð og berið fram með dillgrein.

Þetta er ofsalega gott, osturinn kemur lúmskt í gegn en maður finnur hann ekki nema vita af honum. Hér notuðum við Sölkunr 81 frá Borg sem er nýjasti villibjórinn þeirra og er þroskaður á Chardonnay og Sauvignon Blanc tunnum. Bjórinn er svakalegur, beittur, kolsýrður með þægilegum belgískum kryddum og svo þessum funky villikeim. Tengingin hér við réttin var alveg fullkomin, hér tvinnaðist réttur og bjór saman í fullkomna heild. Magnað. Askasleikir red ale kom líka frábærlega út með þessum rétti en fer með hann í allt aðra átt. Hér koma lúmskir malttónar vel fram og það er eins osturinn verði meira áberandi hér en með hinn bjórinn.

Lax grafinn í Marberg gini á ristuðu brauði með heimalagaðri graflaxsósu

Margerg er frábært alíslenskt gin sem er gott til drykkju en það er líka hægt að nota það í að grafa lax.

Grafið lax. Nú veit ég ekki hvernig Ragnar gerði þetta en hér er góð uppskrift af gröfnum urriða sem hefur reynst mér vel. Þá myndi maður svo dassa Marberg gini yfir fiskinn áður en hann er grafinn.

  • 1/2 msk hvítur pipar
  • 1,5 tsk fennel krydd
  • 1,5 msk gróft salt
  • 2 msk dill
  • 1,5 tsk aromat
  • ½ msk sykur
  • 1 lítill skallotlaukur fínt skorinn

Flakið laxinn og úrbeinið, og þerrið flökin og leggið svo í t.d. eldfast mót eða annað hentugt ílát.  Saxið laukinn smátt og blandið saman kryddunum í skál og dreifið jafnt yfir flökin. Slettið smá gini yfir.  Plastfilma yfir og svo í kæli í 4 sólarhringa. Snúið flökunum daglega. Hafið smá farg ofan á flökunum.  Fínt að frysta svo flökin og taka út rétt áður en þið skerið niður í þunnar sneiðar.

Ristið hvítt brauð, skerið út í hringi og raðið laxinum ofan ásamt graflaxsósu (heimagerð helst) og skreytið með dillgrein.

Hér algerlega negldi Giljagaur þetta. Það er eitthvað við Giljagaur og grafinn lax, fullkomið combo. Ginkeimurinn kom líka skemmtilega í gegn og tengdist við áfengið í bjórnum. Mögnuð pörun. Skyrjarmur tók svo þennan rétt í aðra átt með bláberjakeim sem kom æðislega vel út með laxinum. Sýran í bjórnum er líka kærkomin með þessu.

Heimagerðar piparkökur með gráðaosti og heimagerðri bláberjasultu

Bakið ykkar uppáhalds piparkökur. Raðið ofan á þær íslenskum gráðaosti og efst heimagerðri bláberjasultu. Þessi réttur er með þeim einfaldari en kemur alltaf jafn mikið á óvart. Við hins vegar gjörsamlega lyftum þessum rétti upp með Emblu imperial porter sem bruggaður er með sykurpúðum, hlynsírópi og appelsínum. Þessi blanda er sjúklega góð.

Við prófuðum að fara í allt aðra átt og reyndum Bjúgnakræki líka. Hér er mildur og þægilur pale ale með sætum ávaxtatónum sem koma þægilega á móti söltum ostinum en tengir svo við sætuna í piparkökunni.

Bakkelsisbjór/salgætisbjór, hvað er í boði um þessar mundir?

Ég hef áður skrifað hér um bakkelsisbjór eða það sem kallast pastry beer á erlendri tungu. Oftast heyrir maður þetta í tengslum við stout sem sé, pastry stout, en nú orðið eru menn farnir að leika sér með fleiri stíla þannig að pastry beer eða bakkelsisbjór gengur bara vel sem orð yfir þetta. Salgætisbjór gæti líka gengið eða hvað? Þegar ég fjallaði um þetta fyrirbæri fyrir ári síðan voru menn að byrja að leika sér með þetta hér heima. Nú eru menn komnir meira á flug og ég fagna því sérstaklega því ég er ofsalega hrifinn af þessum stíl ef stíl má kalla.

Sumir nota þetta orð yfir bjór sem bruggaður er með einhverju sætabrauði ss snúðum, kleinuhringjum, vínarbrauði eða álíka sem þá er sett í annað hvort í meskingu eða eftir gerjun, já eða jafnvel í suðuna sjálfa.  Aðrir tala um bakkelsisbjór ef bjórinn líkist bakkelsi eða sætum eftirréttum og er hann þá bragðbættur með einhverju ss súkkulaði, hnetusmjöri, vanillu, sykurpúðum eða hvað það kann að vera.  Svo eru sumir sem bara þola ekki þetta hugtak en það sem fer fyrir brjóstið á þeim eru allar þessar viðbætur (adjuncts) og þeir vilja meina að svona drykki sé ekki hægt að flokka sem bjór.  Hvenær hættir bjór þá að vera bjór annars?  Ef hann er gerður úr vatni, byggi, humlum og geri þá er það bjór, sama hvað menn reyna að segja, punktur.  Það má til gamans benda á að hér áður var ekki notast við humla í bjórgerð, humlar í bjór er tiltölulega nýtt fyrirbæri, eða þannig en tilkoma humlanna hefur umbylt bjórnum og gert hann mun meira aðlaðandi og drekkanlegri.

Ef maður vill vera að flækja þetta er spurning hvar maður setur mörkin, við getum þá kannski talað um alvröu bakkelsisbjór og svo bragðbættann bjór eða adjunct beer? Þá er ég að meina að bragðbættur bjór er bjór sem er bragðbættur þ.e.a.s. allt sem er bætt í bjór annað en ger, vatn, humlar,korn og gerjanleg sterkja, en það er komin dálítið löng hefð fyrir að nota í bjór t.d. kaffibaunir, súkkulaði, appelsínubörk, kóríander og viðlíka. Ég nefni sem dæmi Hoegaarden hveitibjórinn sem er svo sannarlega ekki nýr af nálinni og inniheldur kóríander og appelsínubörk. Alvöru bakkelsisbjór væri þá bjór þar sem menn nota t.d. snúða, vínarbrauð kókosbollur, kleinuhringi, vanillustangir, konfektmola eða hin ýmsu síróp til að kalla fram bragð eins og hnetusmjör,kókos og annað gúmmilaði. ‘

En þetta er kannski óþarfa flækjustig, stíllinn er svo sem ekki skilgreindur að mínu viti og því er kannski bakkelsisbjór fyrir mér eitthvað annað en fyrir þér. Þegar ég tala um bakkelsisbjór þá er það bjór sem bæði minnir mig á eitthvað sætabrauð eða bakkelsi og er bragðbættur með einhverju sem ekki er gerjanlegt.

En tökum stöðuna hér heima í dag þegar aðeins nokkrir dagar eru til jóla það er nefnilega dálítið gaman í kringum jólin en það er svo sannarlega tími bakkelsisbjóra því menn setja alls konar krydd og krásir í bjórinn til að jóla bjórinn sinn upp.

Þegar þetta er ritað þá sit ég með minn uppáhalds bakkelsisbjór um þessar myndir, sá heitir Doppa og er imperial stout (10.5%) með hnetusmjöri og er frá Malbygg. Malbygg er eitt af mínum uppáhalds íslensku brugghúsum en þeir virðast bara gera góðan bjór. Þessi bjór er alveg magnaður og fyrir mína parta er hann fyllilega gjaldgengur sem jólabjór, hnetukeimurinn er alls ráðandi ofan á sætan undirtón og rist. Hér er maður kominn dálítið í hunangsristaðar möndlur fílinginn svei mér þá. Malbygg gerir reyndar jóla bakkelsisbjór fyrir þessi jól sem heitir hnetubrjótur og er mildur herslihnetu mjólkur stout og er afar vel lukkaður sem slíkur. Aftur þarna þessi hnetu jólakeimur. En fyrst við erum komin í jólin, þá eru nokkrir jólabjórar sem tilheyra flokki bakkelsisbjóra að mínu mati.

  • Gluggagægir (9%) frá Borg er nýjasti jólbabjórinn þeirra í ár og er alveg frábær ef maður er fyrir svona gúmmilaði bjór. Við erum að tala hér um Lemon Cake DIPA, sem sagt bjór sem er ofsalega ferskur og svalandi og með áberandi sítrónu og vanillukeim. Eins og sítrónu ostakaka. Magnað.
  • Jóla Jóra (9.2%) frá Ölvisholti er svakalegur. Við erum að tala um gömlu góðu lagkökuna hennar ömmu í flösku. Hér erum við með imperial stout kryddaður með vanillu, negul, kanil og allra handa. Svo sem ekki óalgegn krydd í jólabjór en það er hér bragðið sem minnir svakalega á lagkökuna sem gerir þennan bjór að bakkelsisbjór fyrir mér.
  • Choc Ho Ho 2020 (4.7%) frá Smiðjunni í Vík. Choc Ho Ho er léttur mjólkur stout með hnetusmjöri. Hann er furðulega þéttur og flottur mv styrk og hnetusmjörið er mjög áberandi. Virkilega þægilegur jólabjór.
  • Eitthvað fallegt (5%) frá RVK Brewing company. Þessi var í miklu uppáhaldi hjá mér í fyrra, við erum að tala um eins mikinn bakkelsisbjór og þeir gerast þarna úti. Í grunninn sennilega IPA eða Pale Ale en svo sjóða menn heilt jólatré í þennan bjór. Að auki er bætt í Machintosh molum, mandarínum og smákökum. Mjög jólalegur bjór svo ekki sé meira sagt.
  • Ris A La Sour Gose (5) er látlaus súrbjór eða gose frá Smiðjunni. Hugmyndin er bjór sem minnir á eftirréttinn Ris a La Mande. Bjórinn er ofsalega fínn og minnir mikið á réttinn. Þessi verður flottur sem dressing á grautinn á aðfangadag.

Það eru eflaust fleiri jólabjórar sem flokka má sem bakkelsisbjór en ég hef ekki smakkað þá alla svo sem. Svo er ég ekki að taka hér með bjór sem er bara bragðbættur með negul, kanill eða álíka jólakryddum, svoleiðis bjór flokka ég einfaldlega sem jólabjór!

En það eru sannarlega fleiri íslenskir bakkelsisbjórar á markaðinum. Hér læt ég þá flakka ekki í nenni sérstakri röð. Ath þetta er alls ekki tæmandi list. Ég er líklega að gleyma einhverjum….það er þá spurning hvað það segir um þá bjóra?

  • Bjössi Bolla (11%) frá Malbygg er frábær fyrir sælkera. Hér erum við með rosalegan imperial stout sem bruggaður er með kókosbollum. Þróttmikill en svakalega sætur á tungu. Alls ekki fyrir alla en sannarlega fyrir mig. Maður drekkur einn svona í mesta lagi á kvöldi. Hálfur er reyndar passlegt. Svo er reyndar til spariútgáfa af þessum líka, sem er látinn þroskast á kókos/romm tunnum, hann er svakalegur.
  • Kaffibolla (11%) er svo mögnuð útgáfa af Bjössa Bollu en hann er bruggaður með súkkulaði, kaffi og kókosbollu. Þessi er svakalega ljúfur, sætur með beisku kaffi í bland. Fæst eins og staðan er í svakalega litlu magni í Vínbúðinni.
  • Co & Co (10.1%) er með þeim fyrstu hér á landi í flokki bakkelsisbjóra og er frá RVK Brewing company. Ég er ekki að segja sá fyrsti en með þeim fyrstu. Þessi er russian imperial stout bruggaður með snúðum frá Brauð & Co. Svo hefur hann komið í lúxus útgáfu þar sem hann fær að liggja á bourbon tunnu. Vonandi kemur það gotterí aftur. Magnaður bjór. Já og ef þið komist í að prófa hann á nitrokrana í bruggstofunni hjá RVK brewing þá er það mögnuð upplifun.
  • Morning Glory (7%) er svo annar skemmtilegur. Þetta er nettur imperial milk stout frá RVK Brewing. Þetta er sannkallaður bakkelsisbjór sem sameinar allt það besta í morgunmat, Cocoa Puffs, nýmalað kaffi, pönnukökur og hlynsíróp og svo meira að segja smá bacon líka. Allt er þetta notað í bjórinn. Fullkominn morgunmatur á laugardagsmorgni, ef maður er ekki á leið í vinnu.
  • Embla (9.2%) er nýjasti bakkelsisbjórinn og er vetrarbjór sem kemur frá Borg. Þetta er magnaður bjór og er þegar kominn í topp 3 yfir bestu bakkelsisbjóra Íslands hjá mér. Frábær imperial porter með sykurpúðum, hlynsírópi og appelsínum. Bjórinn er í senn mildur og léttur en mjög mikill og djúsí.
  • Askur (11.6%) kom á sama tíma og Embla, þessi er nokkuð þróttmeiri en Embla enda 11% imperial stout. Hér erum við enn með sykurpúða og hlynsíróp en engar appelsínur. Flottur bjór en mér finnst appelísnan koma svo svakalega vel í gegn í Emblu.
  • Surtur (x%) ég get í raun ekki klárað þessa yfirferð nema nefna Surt bjórana frá Borg á nafn. Þeir eru alls ekki allir bakkelsisbjór en oft er inn á milli að finna bjór með einhverju gúmmilaði. Surtur 61 í fyrra var t.d. með  Gunnars kleinuhringjum og hlynsýrópi  í ríkulegu magni og svo látinn eldast á bourbon tunnum og rúg whiskey tunnum  í einhverja mánuði.

En já, látum staðar numið hér, endilega sendið á mig ábendingu ef ég er að gleyma uppáhalds bakkelsisbjórnum ykkar hér og ég get þá bara bætt þeim við!

Frábært hrásalat með asísku ívafi, gott t.d. á borgarann

Sigrún kona mín segir að ég einbeiti mér alltaf of mikið af aðal hráefninu þegar ég elda og gleymi meðlætinu. Ég get alveg tekið undir það, mér finnst oft meðlætið frekar óspennandi, það er samt hægt að gera það gott og spennandi en bara oft of mikil fyrirhöfn fyrir eindfalda sál eins og mig. Stundum tekst samt vel til og hér er dæmi um það, frábær leið til að framreiða grænmeti með t.d. grilluðum kjúkling eða geggjuðum hamborgara sem á allt gott skilið. Ég er að segja ykkur, börnin mín hámuðu þetta í sig!

Það er sunnudagur þegar ég skrifa þetta, við köllum hann stundum hægur sunnudagur, „slow sunday“, menn bara að hangsa og allt á rólegu tempói. Þá er tilvalið að elda eitthvað sem tekur langan tíma, hægeldaður gríst t.d. Okkar uppáhalds! Í kvöld ákvað ég að skella í „pulled pork burger “ með asísku coldslaw og heimalagaðri rauðlaukssultu. Ég verð að segja ykkur að þó svo að rifni grísinn hafi verið geggjaður að þá sló eiginlega hrásalatið í gegn!

Hugmyndin kviknaði út frá „Eldum Rétt“ sem við vorum með um daginn. Ég skal vera fyrstur til að viðurkenna að þeir þarna hjá Eldum Rétt eru að gera virkilega flotta rétti með spennandi og framandi brögðum. Þetta hrásalat er gott dæmi

Ég veit ekki hvernig uppskriftin er frá þeim í smáatriðum en ég reyndir bara að apa eftir og tókst bara mjög vel til…..að mínu mati alla vega.

Það sem þarf:

  • 1/2 hvítkálshaus, lítill og rifinn í smátt með mandolin
  • 4 gulrætur rifnar í ræmur
  • ein lúka af ferskum kóríander, skorið gróft
  • eitt búnt af vorlauk, skorið smátt
  • 2 dl majones
  • 3-4 mtsk sesamolía, kannski aðeins meira?
  • 1 msk eplaedik
  • 1 hvítlauksgeiri, pressaður
  • 1 tsk dijon sinnep

Aðferð

Rífið kálið og gulræturnar fínt í mandolíni. Pressið hvítlauksgeira saman við, skerið kóríandir gróft og saxið vorlauk fínt. Blandið saman í skál. Hrærið svo majonesi saman við sesamolíuna og eplaedikið. Bætið svo dijon sinnepi saman við og hrærið vel. Ef þetta er of þykkt má alveg nota smá mjólk til að þynna. Blandið svo við salatið og berið fram.

Ég prófaði þetta með hægelduðum grís og heimalagaðri rauðlaukssultu og þetta var algerlega magnað.