Naut | Bjór & Matur

Fullkomnir smáborgarar með langelduðu nauta brisket, chipotle majo og brokkolísalati

Birt þann 25. maí, 2025 af Freyr

Það er nánast í öllum veislum að maður finnur smáborgara meðal rétta. Ég hef alltaf látið á vera því það er undantekningalaust að þeir eru þurrir og óspennandi til átu.

Við frúin vorum með útskriftar veislu fyrir son okkar í gær og ákváðum að gera sjálf einhverja rétti en kaupa þó flesta réttina því maður hefur jú ekki endalausan tíma. Mig langaði að prófa að gera smáborgara eins og ég myndi vilja fá þá. Þetta var niðurstaðan og þeir fengu frábæra dóma gesta. Lang vinsælasti rétturinn og kláruðust rúmlega 100 borgarar langt á undan öllu öðru. Hér er eins og ég gerði þetta. Ég skal viðurkenna það að það er gott að hafa einn eða tvo með sér að raða þessu saman, við vorum tvö í þessu og það gekk samt furðu hratt.

Það sem þarf fyrir 100 borgara

2,5 kg nauta brisket
2 laukar skornir í grófa bita
4-6 hvítlauksrif, pressuð
4 stórar gaulrætur, skornar í bita
2 mtsk ferskt origano, saxað smátt
1 mtsk þurrkað timian
1 mtsk paprikukrydd
1 – 2 mtsk reykt paprika
1 mtsk cumin krydd
2 mtsk tómat púrra (Mutti)
300 ml rauðvín
500 ml nautasoð (1-2 mtsk nautakraftur í 500ml vatn)
Ein krukka chipotle paste
Safi úr hálfri límónu
Heimagert brokkolísalat

Aðferð

Ég mæli með að gera langeldaða kjötið deginum áður en veislan er. Eða byrja daginn mjööög snemma.

Ég fékk brisket í Costco, það kemur upprúllað bundið með snæri. Ég byrjaði á að klippa á snærið og skar svo brisket niður í smærri einingar svo ég gæti steikt það á pönnu. Svo er kjötið steikt á öllum hliðum á heitri pönnu í olíu og smjöri.

Takið til stóran pott sem hægt er að loka. Skerið niður 2 lauka í grófa bita, 4 gulrætur og pressið 4-6 hvítlauksrif. Mýkið þetta í olíu í pottinum. Bætið svo kryddunum saman við, 2 mtsk origano, 1 mtsk timian, 1 mtsk papríku krydd, 2 mtsk reykt papríka og 1 mtsk cumin. Blandið vel saman, bætið svo 2 mtsk tómatpúrru, 300ml rauðvín og 500ml nautasoð saman við og blandið vel. Bætið svo kjötinu í pottinn og látið suðuna koma upp.

Setjið lok yfir pottinn og inn í ofn við 145 mín í 3-4 klst. Takið svo pottinn út, og munið að hann er heitur. Takið kjötið úr pottinum og rífið það niður með tveim göfflum á disk.

Sigtið soðið frá grænmetinu í lítinn pott. Hellið aðeins af soðinu yfir kjötið en afganginn sjóðið þið niður. Bætið um 2-3 mtsk hlynsírópi saman við soðið og látið malla í eina klst eða þar til þetta hefur soðið niður amk um helming. Þetta á að verða þykkt og svart en geggjað gott.

Hellið þessari sósu yfir kjötið og blandið vel saman.

Næst er það brokkolísalatið, þetta er reyndar einn mest skoðaði réttur á síðunni okkar. Frábært salat og geggjað hér í þessu samhengi. Skerið samt brokkolí í litla bita svo það verði ekki of gróft fyrir smáborgarana.

Hendið í chipotle majo, hér er bara að smakka til. Hellingur af majonesi, nánast ein krukka af chipotle paste og svo hálf límóna kreist yfir. Bladið vel og smakkið til.

Svo annað hvort bakið þið sjálf eða kaupið hamborgarabrauðið, við fengum brauðið frá Garra. Kartöflubrauð en það er mjúkt og þægilegt. Skerið brauðið til helminga, setjið slatta af kjöti á botninn, toppið með brokkolísalatinu og smyrjið vel af chipotle majo á lokið.

Filet mignon, eldun

Birt þann 19. nóvember, 2024 af Freyr

Mín uppáhalds steik punktur. Eldunin skiptir miklu máli en auðvitað gæði kjötsins líka. Við viljum fitusprengt og fallegt kjöt. Þú biður um filet mignon steikur í kjötbúðinni eða skerð sjálfur niður miðhlutann í steikur ef þú kaupir nautalund í t.d. Bónus. Já þú færð nefnilega gott kjöt þar líka.

Það sem þarf

Nautalund skorið í hæfilegar steikur
Ólifuolía til steikingar
Smjörklípa
Ferskt rósmarín
Hvítlauksgeirar
Salt og pipar

Aðferð

Saltið og piprið vel steikurnar í skurðsárin. Olía á pönnu, kremjið nokkra hvítlauksgeira og setjið á pönnuna ásamt tveimur greinum af rósmarín. Steikið á háum hita í 3 til 4 mín á hvorri hlið. Bætið smjöri á pönnuna og ausið yfir steikurnar annað slagið.

Rúllið svo steikunum á rönd eftir pönnunni og lokið hliðunum þannig.

Færið steikurmar yfir í eldfast mót og bakið í ofni við 145 gráður þar til kjarnhita er náð, 54 – 55 gráður.

Látið svo kjötið hvíla í 10 til 15 mín áður en það er skorið

Filet Mignon með frábærri kartöflumús og demiglace

Birt þann 7. október, 20239. mars, 2024 af Freyr

Ég held að nautafilet sé uppáhalds steikin mín í nauti strax á eftir tomahawk steikinni. Þetta kjöt er bara svo dásamlegt, bráðnar í munni og gælir við mann alveg ef hún er rétt elduð. Filet Mignon er miðhlutinn úr filet steikninni og maður eldar hana í minni steikum en ekki í heilu lagi eins og filet.

Gordon Ramsay elskar þessa steik og til eru nokkur myndbönd á netinu sem sýna hvernig hann gerir þetta. Ég ákvað að prófa eina aðferð en svo fannst mér þetta verða eitthvað skrítið þannig á miðri leið breytti ég út af og fór okkar leið bara eins og við eldum nautakjöt hér á bæ. Útkoman var algerlega geggjuð og ég mátti til með að skrá aðferðina niður hér svo þið getið notið líka.

ÞAÐ SEM ÞARF

Filet mignon steikur mv fjölda í mat, steik á mann
3 lárviðarlauf
3-4 hvítlauksgeirar
1 mtsk timían
1 mtsk rósmarín
Salt og pipar
Kjúklingasoð
5-6 sveppir skornir í grófa bita

Fyrir kartöflumúsina

1 kg kartöflur
2 tsk timían
2 tks rósmarín
2-3 tsk salt
100 g smjör í það minnsta
1-2 dl rjómi

Fyrir demi glace

1-2 skarlottulaukur, skorinn smátt
50 g smjör til að steikja úr
50 g kalt smjör í kubbum
3 mtsk hlynsíróp
2 dl rauðvín
2 dl vatn
1 mtsk timían
2 teningar sveppakraftur
Salt og pipar

AÐFERÐ

Demi glace
Best er að byrja á sósunni, hún tekur smá tíma. Skerið skarlottulauk í smátt og setjið í pott. Mýkið í smjöri, bætið timían útí og smá salt og pipar. Ca tveir teningar sveppakraftur raspað saman við og svo látið malla í ca 2 dl rauðvíni, 3 mtsk hlynsírópi og ca 2 dl vatni. Þetta þarf að sjóða vel niður. Ef verður of þykk má bæta smá vatni saman við. Sigtið svo lauk og kryddin frá. Setjið aftur í pottinn. Alveg í lokin er köldu smjöri (um 50g) í kubbum hrært saman við og hiti lækkaður. Sósan ætti að fá á sig gljáa og minna á þunnt síróp. Ekki bæta neinum vökva saman við eftir að smjörið fer útí.

Krydduð kartöflumús
Næst er það kartöflumúsin, skrælið kartöflurnar og sjóðið þar til þær eru tilbúnar. Sigtið vatnið frá og stappið saman með helling af smjöri. Kryddið með salti, rósmarín og timían. Magnið af smjöri fer bara eftir því hvernig þið viljið hafa hana. Hafið smá hita undir pottinum á meðan. Bætið svo rjóma líka samanvið. Þetta eru alla vega 2 dl en hér stillir maður sig bara af. Músin á að vera loftkennd og létt, ekki eins og gúmmí. Ef hún verður þannig má hræra meira vatni og rjóma saman við.

Filet mignon
Þá er það heiðursgesturinn, sjálf steikin. Saltið og piprið á öllum hliðum. Ég hitaði svo olíu á pönnu, bætti saman við lárviðarlaufum, krömdum hvítlauksgeirum, rósmarín og timían kryddi og steikti svo kjötið á öllum hliðum. Það þarf að koma dálítið kröst á kjötið. Svo hellti ég kjúklingasoði út á pönnuna samkvæmt ráðleggingum Gordons en þá fannst mér þetta eitthvað skrítið, ég vildi alls ekki sjóða kjötið. Tók því kjötið af og setti í ofnskúffu og inn í ofn við 140 gráður. Hellti smá af soðinu á pönnunni yfir kjötið og setti hvítlaukinn og lárviðarlaufin með kjötinu.

Ég hélt áfram að láta soðið malla á pönnunni, bætti saman við smá smjöri og sveppum. Lét malla aðeins og svo helti ég Tokaj desertvíni út á pönnuna og flamberaði. Það mætti alveg nota púrtvín eða sherrí svo sem. Lét svo sveppina malla í þessu áfram. Þetta soð varð algjörlega magnað og líklega bestu sveppir sem ég hef gert.

Þegar kjötið var komið í 55 gráður tók ég það út, hellti soði af pönnunni yfir og raðaði sveppum efst og lét svo hvíla í 12-15 mínútur. Fullkomið medium rare!

Svo er bara að raða þessu á disk. Kartöflumúsin fyrst, svo kjötið ofaná og sveppirnir efst. Smá klettasalat og demiglace yfir. Algerlega fullkomin steik. Ég myndi servera Gordon þetta án þess að blikkna.

Hin fullkomna Tomahawk steik

Birt þann 15. júní, 202315. júní, 2023 af Freyr

Tomahawk steik er í raun bara ribeye með stæla. Ef þér líkar við ribeye eða rifauga eins og þetta heimfærist yfir á íslenskuna þá áttu eftir að elska tomahawk. Steikin er bragðmeiri líklega frá beininu en svo eldar maður tomahawk líka öðruvísi, meiri bruni á grillinu t.d.

Ég hef reynt að gera hina fullkomnu tomahawk síðustu árin. Hún kostar sitt þannig að maður kannski getur ekki æft sig hverja helgi. Stundum hefur hún heppnast vel en stundum ekki. Undanfarið hefur þetta samt verið að ganga vel og mér fannst kominn tími til að skrá þetta niður hér.

Aðferðin

Mér finnst skemmtilegast að gera beina eldun á grilli, ekki reverse sear eins og mikið er talað um. Fyrst er að krydda steikina vel á öllum hliðum. Bara eitthvað gott krydd, pipar, salt ofl. Ég var með truflusalt og pipar núna síðast. Reyndar líka rosmarín krydd. Pressið kryddið vel inn í kjötið á allar hliðar þess, líka þykku fituröndina.

Hitið grillið, reynið að halda hitanum í kringum 200 gráður. Setjið svo steikina á grillið og eldið í um 12 mínútúr. Snúið steikinni á mínútu fresti meðan eldað er, þá meina ég líka upp á rönd. Fitan í kjötinu mun kveikja bál, það er allt í lagi. Það má samt færa kjötið úr eldinum aðeins þegar snúið er. Við þessa aðferð bráðnar fitulagið vel inn í kjötið. Það er allt i lagi þó það komi eins og brunaskorpa á kjötið.

Óbein eldun, næst er að slökka á öllum brennurunum nema einum. Færðu steikina í hornið á grillinu fjærst brennaranum og lækkaðu hitann aðeins. Svo er bara að láta malla undir lokuðu grillinu. Ágætt ef hitinn fer ekki yfir 150 gráður. Snúið svo kjötinu annað slagið þannig að ekki sama hlið snúi alltaf að brennaranum sem er í gangi. Þegar kjarnhiti hefur náð um 51 gráðu takið þið kjötið af og látið hvíla undir álpappír í ca 10 mínútur. Kjarnhiti ætti að hækka um nokkrar gráður og enda í 54 -55 gráðum. Fullkomið medium rare. Ég hef reyndar lent í því ítrekað með marga mismunandi hitamæla að þeir mæla bara eitthvað bull. Treysti meira á að pota í kjötið til að meta.

Við setjum oftast smjörklípu ofan á steikina og rósmaríngrein á meðan hún hvílir undir álpappírnum. Svo er bara að skera stykkið niður í fallegar steikur en halda beininu með, það lítur bara svo vel út. Maður er svo sannarlega að borga fyrir beinið og því um að gera að láta það njóta sín. Hins vega má benda á að til er steik sem menn kalla kúrekasteik eða cowboy steik sem er í raun Tomahawk nema með afskornu rifbeini. Sama kjötið nema ódýrari.

Ramen núðlur með ungnautafilet og eggjum

Birt þann 3. maí, 2023 af Freyr

Ég var með spúsunni í matar og bjórferð í Kaupmannahöfn um daginn. Gríðarlega skemmtileg ferð. Á leiðinni heim var ég ekki kominn með nóg af mat og drykk en sem betur fer er ekki of seint að njóta þó þú sért kominn í gegnum öryggisleit á Kastrup flugvelli. Þar er nefnilega Mikkeller með bar og beint við hliðina á er Ramen to Bíiru sem er í eigu Mikkel Bjergsø og Daisuke Uki og er ekta japanskur núðlustaður sem sameinar japanskan skyndimat og hágæða danskan handverksbjór. Ég náði mér þarna í ljúfan öl á Mikkeller og spicy núðlur með grísasíðu og eggi. Ég var mjög sáttur því í mörg ár hef ég verið að stefna á að prófa Ramen to Bíiru en aldrei náð því. Í stuttu máli var þetta bara alveg geggjað og bjórinn parast einkar vel við.

Það góða við Evrópuflug er að þú getur flogið heim á kristilegum tíma, við vorum t.d. lent kl 16:30 og komin í Krónuna klukkutíma síðar og ég farinn að elda Ramen 40 mín eftir það. Já ég eldaði með ómissandi stuðningi Sigrúnunnar minnar spicy ramen núðlur með ungnautafilet og hálflinsoðnum eggjum. SVAKALEGA GOTT!

Galdurinn er að gera gott soð, ég man ekki alveg hlutföllin því þetta er bara svona að prófa sig áfram dæmi, smakka til en ég reyni hér að henda niður svona circa það sem ég gerði. Svo er bara að smakka sig áfram.

Það sem þarf fyrir 5

500 g Ungnautafilet eða annað gott nautakjöt
7 egg
2-3 L nautasoð (vatn blandað með 3-4 mtsk nautakrafti)
2-3 mtsk ferskur, rifinn engifer
4 hvítlauksrif, rifinn
2 dl soyasósa
1 mtsk sriracha sósa
2 tsk fennel fræ
4 mtsk Tom Yum Paste (áttum ekki til miso paste)
4 stjörnuanis
2 tsk salt
1 mtsk sesamolía plús sletta til að steikja kjötið uppúr
1 tsk sterkar chiliflögur
1 lime skorið í báta
Portobello sveppur skorinn í bita (af því að ég átti til einn)

Fyrir marineringu

1 tsk Rósapipar, mulinn
2 tsk reykt papríka
Salt
rifinn ferskur engifer
3 tsk hvítlausksalt
2 tsk kóríander krydd
2 mtsk soyasósa
2 mtsk ólífuolía
1 mtsk el Toro krydd

Aðferðin

Ok ég byrjaði á að skera kjötið í ca 6-7 mm þykkar sneiðar og krydda. Fann til það sem ég átti, kóríander krydd, toro krydd, reykt papríka, hvítlaukssalt og steytti svo rósapipar og smá salt yfir. Nuddaði þessu inn í kjötið. Bætti kóríander kryddi við og svo reif ég helling af engifer, líklega verið um 2 tsk og dreifði yfir kjötið. Bleytti vel í með soyasósu og ólífuolíu og lét svo bara standa svona.

Sauð næst eggin, það hefur tekið mig dálítinn tíma að finna út úr hvernig ég næ íslenskum eggjum hálflinsoðnum en það tókst. Eggin sett varlega í sjóðandi vatn, ekki bullsjóðandi vatn því þá springa þau. 7 mín og 10 sekúndúr. Hellið heita vatninu af og látið kalt vatn renna í amk 2 mín í pottinn. Þetta stoppar eldunina. Takið skurninn af og geymið. Við erum að miða við að fá eggjarauðu sem er soðin í köntum en næstum því lin alveg innst.

Setjið olíu í stóran pott, smá smjörklípu. Steikið hvítlaukinn (4 geirar) ásamt rifinn engifer (hellingur, 2-3 mtsk) og fennelfræ (2 tsk) í smá stund, bætið svo við öllu hinu, nema eggjum og kjöti auðvitað og náið upp suðunni. Ég átti til portobello svepp sem var orðinn svekktur í ískápnum, skar hann í bita og henti í pottinn. Svo er þetta bara soðið í dágóða stund, amk klukkutíma. Smakkið svo til, bætið útí eftir þörfum soya, sriracha eða það sem þykir passa. Lækkið svo hita og látið malla. Bætið nautasoði saman við ef þetta virðist of lítill vökvi.

Sjóðið svo núðlurnar skv leiðbeiningum. Steikið svo kjötið í 30 sek á báðum hliðum uppúr sesamolíu og leggið til hliðar. Smakkið til. Ef of lítið eldað þá bætið þið bara nokkrum sekúndum við. ATH kjötið eldast áfram í soðinu á eftir.

Búið til listaverkið

Þetta er það skemmtilega við eldamennsku, að raða saman og bera fram. Sigtið núðlurnar og skammtið í fallegar skálar, hellið soðinu yfir þannig að þetta verði vel blautt, ekki samt alveg súpa. Leggið nautakjöt yfir í enda skálanna, skerið eggin til helminga og setjið tvo helminga í hverja skál, ef of linsoðin þá látið þið eggin meira ofan í soðið. Dreifið svo kóríander yfir og kreistið einn límónubát yfir allt og leggið annan ofan á núðlurnar. Njótið með t.d. IPA eða NEIPA bjór.

Philly Cheesesteak, rib-eye steikarsamloka

Birt þann 26. febrúar, 202326. febrúar, 2023 af Freyr

Ég hef einu sinni smakkað það sem menn kalla philly cheesesteak í Bandaríkjunum en það er nautasteik og ostur ásamt steiktu grænmeti borið fram á ristuðu langbrauði. Þessi samsetning er ættuð frá Philadelphia USA og má kannski segja að sé forveri eða fyrirmynd Hlöllabátanna? Ég veit ekki en þetta minnir mikið á minn uppáhalds Hlölla, Sýslumanninn! Alla vega, sonur minn spurði mig um daginn hvernig philly steik bragðast, hann langaði að smakka og þar sem það er mjög langt að ferðast til Philadelphiu þá ákvað ég að skoða uppskriftir og henda saman í þetta. Ég var staddur í bústaðnum okkar og því með takmarkaða vinnuaðstöðu en þetta gekk og var hrikalega gott.

Við Sigrún höfum gaman að því að finna drykki sem passa vel við matinn okkar. Paranir þar sem drykkurinn bætir við eða upphefur matinn og líka öfugt, það er ótrúlega gaman að upplifa þetta. Að þessu sinni sáum við fyrir okkur öflugan IPA með sinni humlabeiskju og bit en jafnframt sætu. Úlfur Úlfur er frábær double IPA frá Borg Brugghús en hann paraðist fullkomlega við þennan rétt.

Það sem þarf fyrir 5

Kjötið og osturinn er í aðalhlutverki hér og því þarf að velja gott hráefni. Ég náði mér í tvær fallegar rib-eye steikur en það má samt nota annað kjöt svo lengi sem það er fitusprengt og djúsí. T.d. Chuck flap steik, ég hefði notað hana en hún var ekki til hjá Sælkerabúðinni þar sem ég kaupi allt mitt kjöt.

Sonur minn valdi ostinn, Hávarður sem er flottur havarti ostur og svo völdum við góðan þroskaðan cheddar ost fyrir bechamel ostasósuna. Svo er það brauðið, ég veit ekki hvernig brauð er best í þetta en ég notaði Hlöllabrauð en það fæst í Nettó, stundum!

Gott kjöt, ca 720 grömm
Havarti ostur, ég notaði vel rúmlega hálft stykki
Cheddar fyrir sósuna
Paprikur, 2 stk.
Laukur, 1 stór skorinn í sneiðar
Hlöllabrauð, 5 stk ristuð í ofni
Sveppir, sneiddir og steiktir. Er ekki klassískt á philly steik samt
Smjör, hveiti, salt og pipar. Önnur krydd að vild

Aðferðin

Ok, nú verða kjötvinir kannski smá sárir en ég byrjaði á að setja steikurnar inn í frysti. Já því það þarf að skera það niður í örþunnar sneiðar og það er best gert með kaldar steikur. Passa að frysta samt ekki steikurnar.

Á meðan steikurnar eru í frystinum er fínt að græja grænmetið. Sneiðið papríkurnar og laukinn og auðvitað sveppina ef þið eruð með þá. Mýkjið papríku og lauk á pönnu í ólífuolíu, ég nota alltaf smjör líka, það verður bara betra þannig. Salt og pipar og annað krydd að vild. Ég var með ferskt rósmarín sem ég skar smátt. Látið þetta malla. Sveppina steiki ég sér í miklu smjöri, salt og pipar, smá estragon og svo er alltaf gott að nota eitthvað áfengi eins og púrtvín til að poppa þetta upp.

Ekki gleyma kjötinu, tékkið á því, þegar það er orðið vel kalt og stíft finnið þið hárbeittan hníf og skerið steikurnar í þunnar sneiðar, eins þunnt og þið getið. Trimmið samt fitu og sinar af fyrst. Saltið og piprið kjötið og látið standa þar til allt er klárt.

Gerið bechamel ostasósuna. 50g smjör sett í pott og látið bráðna, bætið svo 50 g hveiti samanvið og hrærið, látið malla aðeins, svo þarf að þynna þetta með mjólk þannig að þetta verði kannski eins og súrmjólk, salt og pipar eftir smekk, smakkið til. Bætið svo rifnum osti samanvið, t.d. Cheddar eða eitthvað annað spennandi. Ca 100 – 150 g ostur en þið bara smakkið það til. Látið ostinn bráðna vel saman við, þynnið þetta með mjólk eða vatni. Smakkið til með salti. Leggið til hliðar.

Nú er allt klárt fyrir kjötið. Hitið ofn í 180 gráður, verið tilbúin með brauðið, það má ekki fara of fljótt inn í ofn svo það brenni ekki. Nú er það spurning með pláss. Ég gat bara gert tvo skammta af kjöti í einu en ef þið eruð með stærri pönnu þá gerið þið meira í einu. Ég skipti kjötinu í 5 skammta, sama með papríkuna og laukinn. Svo er það bara olía á pönnu, stillið á meðal til háan hita. Skellið kjötinu á, þetta tekur mjög stuttan tíma. Ekki ofelda. Ágætt að henda brauðinu inn í ofn núna.

Steikið kjötið í ca mínútu, hrærið svo í því aðeins og bætið grænmetinu ofan á, lækkið hitann eða takið pönnuna aðeins af. Blandið kjöti og grænmetinu saman. Skellið ostinum á, margar sneiðar, þetta er ostasteik. Þegar osturinn er bráðnaður þá blandið þið öllu saman. Setjið pönnuna á hita ef þarf en ekki hafa þetta of lengi á hitanum. Í raun bara á meðan osturinn er að bráðna inn í blönduna. Það má krækja í einn kjötbita til að smakka og kanna ástandið.

Takið brauðin út og skammtið ostakjötblöndunni á hvert brauð. Ekki gleyma sveppunum. Setjið svo bechamel ostasósuna yfir og berið fram með góðum double IPA já eða bara ísköldu kók glasi!

Það má svo auðvitað bæta þetta stökkt kál, tómata eða eitthvað annað ef maður vill en þá er maður kominn út fyrir conceptið philly cheesesteak!

Geggjaður Ribeye Sælkeraborgari, með pækluðum rauðlauk, púrtvíns sveppum, chipotle mayo ofl.

Birt þann 26. janúar, 2020 af Freyr

Ég er fyrir löngu kominn með leið á heimagerðum hamborgara, hann verður alltaf einhvern veginn einsm, sama heimabragðið. Líklega er maður bara alltaf með sama eða svipað álegg. Ég hef reyndar stundum dottið niður á eitthvað alveg spes og ljúffengt en gleymi alltaf hvað ég gerði. Í kvöld var svona dagur sem enginn nennti að elda neitt sérstakt og við vorum alls ekki í stuði fyrir eitthvað heimsent. Það varð úr að gera hamborgara og ég verð að segja að útkoman var frábær. Hrikalega var þetta gott.

Við fórum í krónuna og hentum alls konar í körfuna og ég ætla að reyna hér að muna hvað það var. Við ákváðum að kaupa ribeye steikarborgara sem fæst í Krónunni, við höfum gert hamborgara með þessu kjöti áður og vorum mjög ánægð. Kvöldið áður vorum við með kjöt og ostaveislu og áttum því alls konar osta til að moða úr. Við ákváðum að prófa Guinnes cheddar og Castello Havarti Jalapeno en báðir þessir ostar eru ægilega góðir, fást í ostaborðinu í Hagkaup. Guinnes osturinn inniheldur Guinnes bjór og maður finnur það vel í gegn, hrikalega gott, svo er Havarti osturinn dálítið spicy og rífur ögn í en í senn mjúkur og fullur.

Auk þessara osta vorum við með eftirfarandi álegg:

sneiddan Avocado
sneidd gúrka (gæti verið frábært að pækla hana)
kettasalat
heimagert chipotle mayo (sjá að neðan)
BBQ sósa Hamborgarafabrikkunnar, bragðbætt með reyktu paprikudufti og Sriracha sósu
rauð paprika,sneidd niður
tómatur stór og safaríkur, sneiddur niður
pæklaður hálfur rauðlaukur (sjá að neðan)
smjörsteiktir sveppir með smá púrtvíni
pönnuristuð chorizopylsa
salt og pipar
smá sykur
rauðvínsedik
hamborgarabrauð Fabrikkunnar

Aðferðin

Þetta er svo sem sára sára einfalt. Best að byrja á að pækla rauðlaukinn svo hann nái nú að verða pæklaður. Skerið hálfan rauðlauk í eins þunnar sneiðar og þið getið án þess að skera ykkur. Leggið í litla skál sem hægt er að loka. ‘Eg mældi þetta svo sem ekki en ég sauð um 1 dl af vatni og 2 tsk sykur til að leysa upp sykurinn. Svo hellti ég 2 dl af rauðvínsediki yfir laukinn og loks sykurvatninu. Bætti nokkrum rauðum piparkornum saman við og lét svo standa þar til hamborgarinn var tilbúinn.

Svo er það Chipotle mayo, 4-5 msk majones, ca 2 tsk sriracha (fer eftir hversu sterkt þetta á að vera) og um 1 tsk reykt paprikuduft. Hrært saman og sett í sprautuflösku.

BBQ sósan frá Hamborgarafabrikkunni er ofsalega góð en mig langaði í aðeins reyktari og meira spicy útgáfu og bætti því sriraca og reyktri papriku við. Ofsalega gott.

Svo er það bara að sneiða niður grænmetið, skola klettasalatið og gera allt klárt.

Sveppirnir eru steiktir í smjöri, miklu af smjöri. Kryddað með Estragon, salt og rauðum pipar. Ég notaði líka smá hvítlaukssalt og örlítið af reyktri papriku. Í lokin bætti ég smá púrtvín á pönnuna og kláraði steikinguna. Þetta gefur ofsalega ljúfan keim í sveppina.

Chorizo pylsa er góð fersk en mig langaði að fá stökka áferð og bragðmeiri. Ég prófaði því að steikja sneiðarnar á pönnu þar til þær urðu stökkar. Ofsalega gott með.

Loks er að steikja hamborgarana, salt og pipar og leggja svo ostinn yfir þegar búið er að snúa kjötinnu einu sinni.

Pennslið svo neðri hluta af brauðinu með BBQ sósunni, raðið svo álegginu bara á, t.d. chorizo pylsu, papriku og tómat, svo kjötið, klettasalat og avocado, piklaði rauðlaukurinn og sveppirnir efst. Sprautið svo fallega slatta af chipotle mayo yfir og lokið með efra brauðinu.

Berið fram með bökuðum frönskum t.d. Geggjað gott.

Ég átti svo til Þorrabjór frá Gæðingi en þessi bjór er að koma mér virkilega skemmtilega á óvart. Um er að ræða 5% brown ale á bourbon eik. Ofsalega þægilegur bjór, mjúkur með léttri karamellurist og svo notalegum eikar bourbon keim. Frábær matarbjór og alveg smellpasaði með þessum hamborgara. Maltið í bjórnum tengir svakalega vel við t.d. BBQ sósuna og brauðið, einnig fínt mótspil við sterku kryddunum í ostinum og chipotle mayo ofl. Mér fannst líka þessi bourbon keimur koma vel út með kjötinu og púrtvínssveppunum.

Þetta er bjór sem ég mun kaupa núna yfir Þorra, vel gert Gæðingur!

Heimagert maís tacho á tvo vegu með hárrétta bjórnum

Birt þann 7. janúar, 2020 af Freyr

Það er ósjaldan sem hugur okkar Sigrúnar leitar til suðrænna slóða á þessum tíma árs. Jólin búin og við tekur kaldur leiðinlegur og dimmur janúar, febrúar tekur svo við ekkert skárri eða hvað, vissulega eru Surtsdagar í lok janúar og bjórfest í febrúar ákv ljós í myrkrinu en stundum er það bara ekki nóg. Þegar þetta er skrifað er veður vont og allt flug til og frá landinu fallið niður, við komumst bara ekkert þó við vildum. Þá er um að gera að finna aðrar leiðir, þess vegna datt okkur í hug að skapa bara suðræna stemningu hér heima, mexíkósk veisla!!! Já okkur hefur lengi langað að prófa að gera heimagert maís tortilla / tacho og nú létum við bara vaða. Ég fór út í morgun og fékk mér langþráða tortilla pressu (í Kokka) og fann svo fyrir rest maís hveiti (masa harina) í asísku búðinni í Skeifunni og því hafði ég enga afsökun fyrir að hella mér ekki út í þetta.

Mér hefur alltaf þótt þessar tortilla kökur sem maður fær tilbúnar í búð frekar óspennandi, allt of stórar og allt of þykkar. Ég vil hafa tortillu kökurnar litar og nettar, ca eins og desert diskur að stærð. Það er svo ekkert hlaupið að því að finna maís tortillur hér í búð. Ég veit ekki afhverju maður er ekki löngu búinn að prófa að gera þetta sjálfur, þetta er ótrúlega einfalt. Ég held að mesta vinnan hafi farið í það að finna maís hveitið og svo uppskrift. En ef maður fer bara beint í asísku búðina þá er eftirleikurinn auðveldur.

En ok, nóg af rausi. Svona gerði ég þetta. Ég byrjaði á að leita að uppskriftum á netinu og fann nokkrar, þær eru allar svipaðar. Innihaldið er í raun bara masa harina (hveitið), smá salt og svo vatn. Hlutföllin eru ekki alveg klár því það er dálítið misjafnt hve mikið vatn maður þarf, maður þarf dálítið að prófa sig áfram með það. Það er samt ekkert mál því ef deigið endar allt of þurrt þá bætir maður við ögn vatni, ef það er hins vegar allt of klístrað þá bætir maður við hveiti. Maður á að enda með klump sem er í raun eins og leir, hangir vel saman en er ekki klístraður.

Það sem þarf (10-12 tortilla kökur – fer eftir stærð):

Maís Hveiti (t.d. úr Asísku búðinni Skeifunni) 250g
Heitt vatn, ég endaði með ca 340ml
smá salt til að bragðbæta
ólifuolíu til að pennsla kökurnar með fyrir steikingu

Svo er það áleggið / fyllingin eða meðlætið…? Hvað kallar maður þetta annars? Topping! Alla vega það sem þú vilt setja ofan á tortillurnar. Það er auðvitað frjálst og möguleikarnir endalausir.

Að þessu sinni langaði mig í naut en líka eitthvað sjávarfang. Ég gerði því tvenns konar tacho rétti. Ég hef skrifað hér um ungnauta tacho áður en endurtek það hér aftur og svo var ég með steikta risarækju með avocadosalsa og kóríandersósu, uppskrift sem ég fann á Gulur Rauður Grænn & Salt.

Það sem þarf í þetta:

Ungnauta tacho

ungnautalaund ( ca 300-350 g)
kikkoman soyasósa, 1 dl
safi úr 1,5 límónum
ferskur kóríander, 1 lúka, gróft skorið
ólífuolía, 1 dl
púðursykur 2-3 mtsk
grænn ferskur chili, skorinn í litlar sneiðar
rauðlaukur, hálfur, skorinn í fínar ræmur
sykur, 1/2 – 1 tsk
salt, 1/2 tsk

Mangosalsa

mango, hálfur ávöxtur skorinn í litla kubba
kirsuberjatómatar, lúkufylli skorið í litla kubba
graslaukur, eftir hentugleika, smátt skorið
kóríander, skorið gróft. Ca lúkufylli
grænn ferskur chili, skorinn smátt

Risarækju tacho

frosnar risarækjur, 400g
ólífuolía, 3 msk
hvítlauksrif, 2 stk pressuð
cumin, 1 tsk
chilipipar, 1 tsk
hvítlauksduft, 1/2 tsk
sjávarsalt, 1/2 tsk

Avocadosalsa

avocado, 3 stk, skorið í kubba
gular baunir, 3 msk eða svo eftir smekk bara
kirsuberjatómatar, ca lúkufylli, skornir í kubba
Grænn chili ávöxtur, skorinn smátt, með fræjum
safi úr hálfri límónu
kóríander, ferskur, lúkufylli skorið gróft.
salt og pipar

Kóríandersósa (aðeins breitt útgáfa)

Sýrður rjómi, 10%, ein dós
safi úr límónu, ca 1-2 msk
hvítlauksgeiri, 1 stk pressaður
kóríander, ferskur. Hér myndi ég nota rúmlega tvær lúkufyllir eða meira,
kóríanderkrydd, eftir smekk, smakkið þetta bara til

Aðferð

Rækjurnar

Líklega er bara best að undirbúa allt meðlæti fyrst. T.d. marinera rækjurnar og kjötið. Látið rækjurnar þiðna, afhýðið ef þær eru í skelinni. Setjið svo ólífuolíu (3 msk) í skál, bætið rest útí, cumin (1 tsk), chilipipar (1 tsk), hvítlauksduft (1/2 tsk), tveir pressaðir hvítlauksgeirar og hálf tsk sjávarsalt. Hrærið vel, smakkið til og bætið við eftir smekk salti, chili eða hvítlauk. Hellið þessu yfir rækjurnar og látið standa eins lengi og hægt er. Fínt að velta rækjunum annað slagið upp, sem sagt moka þeim neðstu efst þannig að allar fái að liggja í þessum legi sem safnast saman á botninn.

Ungnautalund

Kjötið er hægt að gera á tvenna vegu, ég held að betra sé að steikja kjötið fyrst og svo skera það þunnt og marinera. Sem sagt, steikja létt á heitri pönnu, ca 3-4 mín á hvorri hlið og látið standa aðeins. Við erum að miða við medium rare. Skerið svo í eins þunnar sneiðar og þið getið og látið liggja í marineringunni. Hún er einföld, setjið kikkoman soyasósu (1 dl), safa úr 1,5 límónum, ólífuolíu (1dl), 2-3 mtsk púðursykur, niðurskorinn grænn eða rauður (fallegri) chili pipar og helling af gróft skornum kóríander í skál og hrærið vel, hellið svo yfir nautakjötið og látið standa.

Hin leiðin er að skera hrátt kjötið í þunnar sneiðar og láta liggja í marineringunni og svo bara steikja örstutt áður en borið er fram.

Tvenns konar salsa

Þetta er bara einfallt, skerið allt niður sem fer í mangosalasa og avocadosalsa og setjið í tvær skálar. Mangosalsa er með nautinu, avocadosalsa með rækjunum. Takið svo rauðlauk og skerið í tvent. Skerið svo einn helminginn í þunnar sneiðar. Leggið sneiðarnar í litla skál og kreistið límónusafa yfir. Svo smá salt (1/2 tsk) og 1/2 til 1 tsk sykur. Látið liggja þar til allt er klárt.

Kóríandersósa

Við breyttum uppskriftinni aðeins, okkur fannst í raun lítið kóríander bragð af þessu, þannig að við notuðum mun meira kóríander og líka kóríanderkrydd. Líklega enduðum við með 2-3 lúkufyllir af ferskum kóríander og ca 1 tsk kóríanderkrydd. Við bættum líka 1 pressuðum hvítlauksgeira við og svo er safi úr límónu, ca 2 mtsk og ein dós af sýrðum rjóma. Allt sett í nutri bullet eða svipað og maukað í drasl.

Framreiðslan

Þið gætuð græjað tortilla deigið einhvers staðar þarna inn á milli, það þarf að standa í 15 mín. Sem sagt setjið 250g maís hveiti í skál, smá salt, um 1-2 tsk og svo hellið þið heitu vatni saman við þar til þið náið þessu saman í kúlu sem líkist helst dótaleir. Ef of þurrt þá bætið þið vatni við, ef of klístrað þá þarf meira hveiti. Ég endaði með um 340ml af vatni. Myndið kúlu og setjið matarfilmu yfir og látið standa í um 15 mín. Ég veit ekkert afhverju. Loks myndið þið litlar kúlur, mér fannst hæfilegt að miða við eins og lítil egg.
Setjið bökunarpappír milli deigs og pressu og pressið eins og vindurinn. Kökurnar ættu að enda á stærð við kökudisk eða aðeins minna.

Pennslið aðeins með ólífuolíu og steikið í um 3 mín á hvorri hlið eða þar til þetta er farið að líta almennilega út, brúnir blettir hér og þar.

Fyrir rækjutacho setjið þið avocadosalsa á kökurnar, leggið tvær rækjur ofan á það og loks kóríandersósuna yfir.

Fyrir nautatacho er það mangosalsa, leggið 3-4 ræmur af kjöti ofaná, smá rauðlauk og njótið.

Pörunin

Þetta tacho er heldur bragðmikið, bæði nautið og rækjan eru dálítið spicy og það sama má segja um mangosalsaið. Kóríandersósan er heins vegar létt og „köld“ með léttri sýru sem kemur vel á móti brunanum og svo er safaríkt mangoið og mjúkt feita avocadoið að gera skemmtilega hluti og jafna þetta allt út. Bjórinn með þessu má vera bragiðmikill því hann þarf að þola þetta allt og ekki verra ef hann tengir við það hráefni og bragð sem við erum með. Bjórinn gæti líka verið eitthvað sem myndar andstæður við hráefnin.
Það væri reynar frekar klassískt en dálítið leiðinlegt að velja einhvern mexíkanskan létt lager á borð við Corona með límónu í. Ég er ekki að segja að það kæmi illa út, mig langaði bara að gera eitthvað meira spennandi.

Í kvöld valdi ég Úlfey frá Borg Brugghús en þetta er afskaplega ljúffengur 7,5% New England IPA og er um þessar mundir í sérlegu uppáhaldi hjá mér þegar kemur að íslenskum bjór. Bjórinn er í senn beittur en líka safaríkur og mjúkur eins og öflugur ávaxtasafi með keim af suðrænum ávöxtum. Ávaxtabragðið í bjórnum kemur ofsalega vel út með þessu tachoi, mangoið og jafnvel avocado tengja mjög vel við bjórinn hvað þetta varðar. Þó svo að um New England bjór sé að ræða býr hann yfir smá beiskju en beiskjan togar dálítið í chili keiminn í matnum og magnar dálítið upp. Bæði þessi tacho eru mikið kóríander baseraðir en mér hefur alltaf þótt IPA eiga sérlega vel við kóríander, ég veit ekki hvað það er en það smellpassar. Loks er það karamellumaltið í bjórnum en sætan þar tengir vel við bæði maís tortillurnar og maísinn í avocadosalsainu.

Þessi pörun kom betur út en ég hafði reiknað með og hvet ég ykkur til að prófa. Vá!

Stökkt Sloppy Joe smælki innblásið af BrewDog Reykjavík

Birt þann 22. október, 201922. október, 2019 af Freyr

Það er orðið dálítið síðan ég setti inn uppskrift hér síðast, ég hef bara ekki haft tíma en ég hef verið dálítið á ferðinni bæði til að drekka í mig náttúru og menningu en einnig skoða matarkúltúrinn hér og þar. Mig langar að deila þessari einföldu uppskrift með ykkur því þetta er bara svo ofsalega gott. Við getum sagt að þetta sé dálítið innblásið af Sloppy Joe kartöfluréttinum á BrewDog Reykjavík og kartöfluuppskrift frá nágranna okkar henni Björk. Upphaflega fengum við kartöfluhugmyndina sem meðlæti frá Björk, alveg geggjað með öllu sem kallar á kartöflur. Mig langaði að taka þetta skrefi lengra og uppfæra yfir í sjálfstæðan rétt. Kannski ekki alveg sá hollasti í heimi en ó svo gott.

Þessi réttur kallar á bjór, það er bara ekkert annað í boði. Við erum að tala um IPA, eða flottan Pale Ale en brakandi pilsener gengur líka. Í kvöld vorum við með frábæran skýjaðan New England Pale Ale frá Malbygg sem Kisi heitir. Reyndar verður maður að passa sig á brunanum í þessum rétt, ef hann er of mikill þá fer hann ekki vel með bjórinn. En að pöruninni á eftir.

Það sem þú þarf í þetta (ca fyrir 6)

ca 700g Smælki
Hveiti, slatta í poka
salt og pipar
parmesan ost rifinn yfir
nautahakk 1 kg
1 krukka af uppáhalds pastasósunni ykkar, eða gera sjálf frá grunni
smjör, helling, líklegast ein 100g, sneitt niður
dash af worcestershire sósu
dash af fiski sósu
ferskur rauður chilipipar, skorinn í litla hringi
vorlaukur skorinn í litla hringi
Sriracha sósa
Stonewall Kitchen Roasted Garlic Aiole eða eitthvað heimalagað gúmmelaði

Aðferðin.

Byrjið á smælkinu, það þarf mestan tíma. Setjið það í pott og sjóðið þar til orðið soðið. Kælið þá niður með köldu vatni. Brjótið eða rífið hverja kartöflu til helminga. Setjið slatta af hveiti í poka, salt og pipar, slatta líka. Færið svo smælkið í pokann og hristið saman. Raðið svo kartöflunum í eldfast mót, sneiðið vel af smjöri yfir. Inní ofn við 140 gráður (blástur), eftir klst þá veltið þið aðeins smælkinu og bætið smjöri ofan á og hækkið svo ofninn í 200 eða 220 gráður í ca 30 mín, aðal atriðið er að þetta verði stökkt. Takið svo út og rífið parmesan ost yfir og lofið að bráðna inn í kartöflurnar.

Á meðan smælkið er inní ofninum þá hitið þið olíu á pönnu, setjið nautahakkið á pönnuna. Steikið aðeins og bætið svo dash af Worcestershire sósu út á kjötið, þetta eru ca 2 msk eða svo. Slettið líka fiski sósu yfir, ekki meira en svona 2 tsk. Vel af pipar og salti og steikið þar til orðið stökkt og steikt í gegn. Bætið svo pastasósu út á pönnuna og látið malla áfram.

Skerið niður vorlauk og chili, einn vorlaukur og einn chili ætti að vera nóg. ‘Eg held að kóríander fari í þetta næst hjá mér, það væri fullkomið.

Þegar smælkið er klárt setjið þið nautahakkið á stóran disk eða skammtið á hvern disk fyrir sig, raðið stökka brakandi smælkinu ofan á. Rífið meira parmesan ost yfir og svo setjið þið vorlauk og chili hringina yfir allt og kóríander ef þið eruð með það.

Setjið svo Aiole í sprautuflösku og sprautið fallegar línur yfir þetta allt, það má fara vel af þessu á þetta. Gerið það sama við Sriracha sósuna, hún kemur reyndar í sprautuflösku. Njótið.

Pörunin.

Þetta er svakalega flottur réttur og bara alls ekkert voðalega hollur en það er stundum allt í lagi. Smælkið verður stökkt og eins og karmeliserað í smjörinu. Sósurnar lífga svo vel upp á réttinn og ásamt ferska chilinu skapa dálítinn bruna og hita. Fitan, seltan og bruninn í þessum rétta hrópá á bjór, einhvern sem hefur kitlandi gos og dálítið bit svo sem beittur IPA eða humlaður og brakandi tékkneskur pilsner. Humlarnir hér brjóta upp fituna og þurrka skánina af gómbogum, og preppa fyrir næsta bita. Kolsýran og maltað kornið í ölinu dempa svo chili brunann en ristin í bjórnum gefa létta karamellutóna sem tengja sérlega vel við karamelluáferðina á smælkinu.

Þetta er bara frábær og skemmtielgur réttur þar sem kartöflur eru í aðal hlutverki og velkomin tilbreyting frá frönskunum.

Drottning allra steika, Bistecca alla Fiorentina eða Flórens steik.

Birt þann 31. júlí, 201916. ágúst, 2019 af Freyr

Við frúin heimsóttum Ítalíu á dögunum bæði til að skoða matarkúltúrinn en einnig til að njóta sólar og hita með fjölskyldunni. Ítalir kunna svo sannarlega að búa til mat enda hráefnið sem menn hafa úr að moða svo dásamlegt. Þar sem við vorum í sveitum Toskana héraðs uxu t.d. ólifutré, sítrónutré og perutré um allt og bæði timian, rósmarín og salvía spruttu villt inn á milli runna. Þetta er svo magnað. Matur út um allt! Allir þekkja klassíska ítalska rétti svo sem pastaréttina, pizzurnar og ítalska ísinn, gelato en það er svo sannarlega meira í ítalskri matargerð en það. Caprese salatið er t.d.í miku uppáhaldi hjá okkur Sigrúnu en að fá það hér í Flórens vs heima er bara svart og hvítt. Hér kristallast það hvað hráefni skiptir miklu máli, tómatarnir eru safaríkir og mjúkir, mozarella osturinn er ekki eins og heima heldur gerður úr eðal vísundamjólk og er svo mjúkur og dásamlegur og bara allt önnur vara. Ég þarf ekki að nefna parmegano ostinn sem er allt annað en það sem maður fær heima. Svo eru olíurnar eitthvað svo bragðmiklar og ríkar. En ég ætlaði ekki að tala um þetta allt hér núna heldur kjöt.

Nautakjöt er hráefni sem Ítalir kunna vel við og þeir vita nákvæmlega hvernig á að fara með það svo vel sé, amk hér í Toskana héraði því héðan er komin steik allra steika eða drotning steika eins og heimamenn kalla þennan ákveðna kjötskurð. Við erum að tala um Flórens steik, Bistecca alla Fiorentina eða einfaldlega La Bistecca. Þessi réttur er kominn frá Flórens eins og nafnið gefur til kynna og á sér heilmikla sögu að baki.

Hér eru menn ekkert að grínast með steikina, þetta er alvöru mál. Ef þú pantar þér þessa steik og reynir að fá hana „well done“ eða með sósu er þér líklega vísað á dyr, kjötið á helst að vera „rare“ en „medium rare“ sleppur alveg og auðvitað engar sósur því kjötið er svo bragðgott og magnað að jafnvel mjög góð sósa skemmir þá upplifun.

Flórens steik er í raun sama og porterhouse steik sem er stærri útgáfan af T-bone steikinni sem við könnumst flest við, porterhouse er tekinn aðeins aftar á Nautinu en T-bone steikin. Öðru meginn við beinið er lundin og hinu meginn er það sem menn kalla filet. Ég veit ekki hvað sá hluti kallast á okkar tungu. Til þess að vera alvöru Bistecca alla Fiorentina að mati Flórensbúa þarf kjötið að koma frá hinni fornu nautgripategund Chianina sem er þekkt fyrir ótrúlega bragðmikið kjöt. Kjötið þarf að koma frá „scottona“ sem er ung kvíga sem ekki hefur orðið kálfafull og það þarf að hafa hangið í minnsta kosti tvær vikur. Steikin á svo að vera þykk, mjög þykk, við erum að tala um amk 2-3 fingur á þykkt. Auðvitað nota menn um heim allan annað kjöt en frá Chianina tegundinni en það er bara ekki alvöru Flórens steik að mati heimamanna.

Sökum þess hve kjötið sjálft er bragðmikið og meirt er frekar einfallt að elda það, maður kryddar bara með salti og pipar, reyndar alveg helling af því á allar hliðar og svo er steikin grilluð ca 5 mín á hvorri hlið. Þetta er massíf steik sem hentar fyrir amk tvo, jafnvel þrjá fullorðna.

Okkur Sigrúnu hefur dreymt í dálítinn tíma um að smakka alvöru Flórens steik eða alveg síðan við sáum umfjöllun um færasta slátrara Ítala Dario Cecchini og hvernig hann fullkomnar þessa steik. Dario rekur lítinn stað skammt utan við Flórens, L’officina della Bistecca og mælum við sterklega með að menn prófi þessa steik þar ef menn hafa tök á því. Ferðafélagar okkar vildu ekki koma með okkur til Dario að þessu sinni og mun það því bíða betri tíma. Við vorum hins vegar í Flórens og gripum tækifærið að prófa þar La Bistecca. Við fórum á stað sem gestagjafi okkar mælti með, reyndar ekki sérstaklega fyrir La Bistecca. Steikin var svo sannarlega ljúf og kjötið bragðmikið. Maður þurfti enga sósu en það var mjög gott að rífa smá parmegiano ost yfir. Með svona royal mat er svo ekki hægt að drekka mjólk eða vatn, maður fer í alvöru rauðvín í raun bara af virðingu við kjötið. Við vorum stödd í Flórens Toskana og því fórum við í það besta frá héraðinu, Brunello di Montalcino vín. Þessi máltíð var mögnuð og verður ekki af því skafið. Það er hins vegar svo, og nú veit ég bara ekki hvort þessi Flórens steik sem við smökkuðum var eins og hún gerist best (það eru margir veitingastaðir í Flórens og alls ekki allir kunna að mastera La Bistecca), en við elduðum þessa steik sjálf í tvígang heima og ég verð að viðurkenna að það var mun betra. Reyndar fengum við ekki alvöru Flórens steik frá slátraranum því það var í raun ekki kjöt beggja vegan við beinið en slátrarinn vildi meina að þetta væri það besta í „húsinu“.

Það eru ákv reglur um hvernig á að elda La Bistecca, það á að vera funheitt kolagrill, kjötið er svo grillað á hvorri hlið í ca 5-7 mín þannig að það verði stökkt og karamelliserað að utan en safaríkt og mjúkt að innan. Markmiðið er rare í miðjunni og nánast brunnið að utan. Það á að sjá vel á kjötinnu förin eftir grillgrindina og það má bara snúa kjötinu einu sinni. Það á svo að salta kjötið eftir eldunina og svo láta standa á volgum stað í amk 15 mín, þannig að safinn úr kjötinu nái að dreifast um stykkið.

Við gerðum þetta á eftirfarandi máta, eða í raun mágur minn Kjartan, við skulum ekkert vera að taka það af honum. Steikurnar voru þykkar, tveir fingur á breidd og afar meirar og djúsí. Salt og pipar og svo var kjötið var grillað á heitu Weber gasgrilli í ca 4 – 5 mín á hvorri hlið eða þar til kjarnhiti hafði náð 55 gráðum. Hér var búið að salta áður en kjötið var grillað en hefðum samkvæmt átti að gera það eftir á. Svo var kjötið látið standa í um 15 mín áður en það var borið fram með léttu meðlæti. Við vorum hér með grillað grænmeti, kúrbít, langar paprikur og sveppi og fersk salat með.

Þetta er í raun eins enfallt og það gerist og bragðast svo dásamlega. Hér heima á klakanum getum við í raun skv skilgreiningunni ekki eldað okkur alvöru Bistecca alla Fiorentina en við komumst ansi nálægt því ef við getum náð okkur í porterhouse steik í kjötbúðinni, passa að sneiðarnar séu fitusprengdar og nógu þykkar og þá er þetta komið. Funheitt gas eða kolagrill og svo létt meðlæti. Þetta er svo gott.